Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 27:1-66

HAAPOTORAA O TE MAU TUMU PARAU

  • Tuuhia Iesu ia Pilato (1, 2)

  • Tarî Iuda ia ’na (3-10)

  • Iesu i mua ia Pilato (11-26)

  • Faaooohia i mua i te taata atoa (27-31)

  • Patitihia i nia i te pou i Gologota (32-44)

  • Poheraa o Iesu (45-56)

  • Hunaraa o Iesu (57-61)

  • Tiai-maitai-hia te menema (62-66)

27  E poipoi a‘era, putuputu a‘era te mau tahu‘a tiaau atoa e te mau aratai ati Iuda no te paraparau no nia i te haapoheraa ia Iesu.  I muri a‘e i to ratou taamuraa ia ’na, aratai e tuu atura ratou ia ’na ia Pilato te tavana.  I to Iuda tei tuu ia Iesu i te enemi iteraa e ua faautuahia Iesu, tatarahapa ihora oia e faaho‘i atura i na moni ario e 30 i te mau tahu‘a tiaau e te mau aratai ati Iuda,  a na ô ai: “Ua hara vau i to ’u hooraa ’tu i te toto o te hoê taata hapa ore.” Parau a‘era ratou: “Ohipa oe ïa, e ere i te ohipa na matou!”  Taora ihora Iuda i na moni ario i roto i te hiero, reva ’tura e tarî ihora ia ’na.  Tera râ, rave a‘era te mau tahu‘a tiaau i na moni ario e parau a‘era: “E ere i te mea tano ia au i te ture ia taora i teie moni i te vahi to reira te mau afata moni, o te hoo hoi teie o te toto tei haamaniihia.”  Paraparau atura ratou paatoa e hoo maira i taua moni ra i te fenua o te potera ei vahi hunaraa i te mau taata ěê.  Parauhia ’tura taua fenua ra “Fenua o te toto” e tae roa mai i teie mahana.  Tupu atura tei parauhia na roto ia Ieremia te peropheta: “Rave atura ratou i na moni ario e 30, te hoo o te taata ta te mau tamarii* Iseraela i faaau e aufau, 10  e hoo maira i taua moni ra i te hoê tâpû fenua, mai ta Iehova* i faaue mai ia ’u.” 11  Tia noa ihora Iesu i mua i te tavana e ui maira te tavana ia ’na: “O oe te Arii o te ati Iuda?” Pahono atura Iesu: “Te reira iho â mai ta oe e parau ra.” 12  A parihia ’i râ oia e te mau tahu‘a tiaau e te mau aratai ati Iuda, aita oia i pahono atu. 13  Na ô maira Pilato: “Aita oe e faaroo ra i ta ratou pariraa e rave rahi ia oe?” 14  Aita râ oia i pahono atu, aita roa ’tu, a maere roa ’i te tavana. 15  I te mau oroa Pasa atoa, ua matau te tavana i te tuu mai i te hoê taata tapeahia ta te nahoa e hinaaro. 16  I taua mau mahana ra, to roto te hoê taata ohipa ino ua tui te roo o Baraba te i‘oa i te tapearaa. 17  No reira, a putuputu mai ai te nahoa, parau atura Pilato: “O vai ta outou e hinaaro ia tuu atu vau, o Baraba aore ra o Iesu tei parauhia te Mesia?” 18  Ua ite hoi Pilato e no te pohehae i tuu ai ratou ia Iesu ia ’na ra. 19  Hau atu â, te parahi noa ra Pilato i te vahi haavaraa i faatae mai ai ta ’na vahine faaipoipo i teie poroi: “A vaiiho atu i tena taata parau-tia, te horuhoru nei hoi au i teie mahana no to ’u moemoeâraa ia ’na inapo ra.” 20  Onoono a‘era râ te mau tahu‘a tiaau e te mau aratai ati Iuda i te nahoa ia ani ia Baraba, ia haapohehia râ Iesu. 21  Ui faahou atura te tavana: “O vai o raua ta outou e hinaaro ia tuu atu vau?” Na ô maira ratou: “O Baraba.” 22  Parau atura Pilato: “E nafea ïa vau ia Iesu tei parauhia te Mesia?” Na ô maira ratou paatoa: “I nia i te pou!”* 23  Ui atura oia: “No te aha hoi? Eaha ta ’na ohipa ino i rave?” Tera râ, puai noa ’tu â to ratou tuôraa: “I nia i te pou!” 24  Ite ihora Pilato e aita ta ’na e ravea e te haamata ra te taata i te faahuehue, rave ihora oia i te pape e horoi atura i to ’na rima i mua i te nahoa a na ô ai: “Aita ta ’u e hara i te toto o teie taata. Tei ia outou ra.” 25  Parau maira te taata atoa: “Ia ho‘i mai to ’na toto i nia ia matou e i nia i ta matou mau tamarii.” 26  Tuu atura Pilato ia Baraba e faaue ihora râ ia huihia Iesu e tuu atura ia ’na i te mau faehau ia haapohehia i nia i te pou. 27  Aratai a‘era te mau faehau a te tavana ia Iesu i roto i te aorai o te tavana, e putuputu maira te taatoaraa o te mau pǔpǔ faehau o te haaati ia Iesu. 28  Tatara a‘era ratou i to ’na ahu, faaahu a‘era ia ’na i te hoê ahu roa uteute, 29  firi a‘era i te hoê hei taratara e tuu atura i nia i to ’na upoo e te hoê aeho i roto i to ’na rima atau. A tuturi noa ’i ratou i mua ia ’na, parau faaooo maira ratou: “Ia ora na* te Arii o te ati Iuda!” 30  Tutuha a‘era ratou i nia ia ’na, rave a‘era i te aeho e tairi atura i to ’na upoo. 31  I muri a‘e i to ratou faaoooraa ia ’na, tatara a‘era ratou i te ahu roa, faaahu ihora ia ’na i to ’na iho ahu tapo‘i e aratai atura ia ’na ia patitihia i nia i te pou. 32  A haere ai ratou i rapae, ite a‘era ratou i te hoê tane no Kurene, o Simona te i‘oa. Faahepo a‘era ratou i teie tane ia amo i te pou haamauiuiraa* o Iesu. 33  Tae atura ratou i te hoê vahi parauhia Gologota, e “Apu upoo” te auraa, 34  horoa a‘era ratou i te uaina anoihia i te raau maramara ia inu oia, aita râ oia i hinaaro e inu i muri a‘e i to ’na tamataraa. 35  Patiti a‘era ratou ia ’na i nia i te pou, opere atura i to ’na mau ahu ma te pere,* 36  e parahi ihora ratou i reira a tiai noa ’i ia ’na. 37  Ua tuu atoa ratou i nia noa mai i to Iesu upoo i tei parihia ia ’na ma teie papai: “O Iesu teie te Arii o te ati Iuda.” 38  E piti atoa eiâ tei patitihia i nia i te pou i pihai iho ia ’na, hoê i to ’na pae atau e hoê i to ’na pae aui. 39  Faaino maira te feia e haere ra na reira ia ’na, a tairiiri ai i te upoo 40  e a na ô ai: “Oe o te vavahi i te hiero e o te patu i te reira e toru mahana, a faaora ia oe iho! E tamaiti oe na te Atua, a pou mai ïa i raro i tena pou haamauiuiraa!”* 41  Faaooo atoa maira te mau tahu‘a tiaau, te mau papai parau e te mau aratai ati Iuda ia ’na, a na ô ai: 42  “Ua faaora o ’na ia vetahi ê, ia ’na iho râ, eita ïa e tia ia ’na! E Arii o ’na no Iseraela, ia pou mai ïa oia i teie nei i raro i te pou haamauiuiraa,* e tiaturi ïa matou ia ’na. 43  Ua tiaturi oia i te Atua, ia faaora ïa te Atua ia ’na i teie nei mai te peu e ua mauruuru Oia ia ’na, ua parau hoi oia: ‘E Tamaiti au na te Atua.’” 44  Faaino atoa maira na eiâ tei patitihia i nia i te pou i pihai iho ia ’na. 45  Mai te ono* o te hora, ati ihora te fenua taatoa i te poiri e tae atu i te iva* o te hora. 46  Piri i te iva o te hora, tuô ihora Iesu: “Eli, Eli, lama sabakatani?” oia hoi: “To ’u Atua, to ’u Atua, eaha oe i faarue mai ai ia ’u?” 47  A faaroo ai vetahi e tia noa ra na reira, na ô a‘era ratou: “Te pii ra teie taata ia Elia.” 48  Horo ihora hoê o ratou e tii i te rimu, tutau ihora i roto i te uaina toavaava, tuu ihora i nia i te hoê aeho e horoa ’tura ia Iesu ia inu oia. 49  Parau maira râ te tahi pae: “Vaiiho noa ia ’na! E hi‘o tatou e e haere mai anei Elia e faaora ia ’na.” 50  Tuô faahou ihora Iesu e pohe atura.* 51  E inaha, mahae ihora te paruru o te nao* mai nia mai e raro roa, aueue ihora te fenua e amaha a‘era te mau pǎpǎ. 52  Matara a‘era te mau menema,* pee maira i rapaeau te tino o te feia mo‘a e taoto ra i roto i te pohe, 53  a itehia ’tu ai e te taata e rave rahi. (I muri a‘e i to Iesu tia-faahou-raa, ua tomo vetahi na te vahi hunaraa mai i roto i te oire mo‘a.) 54  I to te raatira faehau e te feia e tiai ra ia Iesu iteraa i te aueueraa fenua e te mau mea i tupu, riaria roa a‘era ratou e na ô atura: “O te Tamaiti a te Atua iho â teie.” 55  Mea rahi atoa te vahine e hi‘o mai ra na te atea ê. I apee mai na ratou ia Iesu mai Galilea mai no te tauturu ia ’na. 56  I rotopu ia ratou, te vai ra o Maria Magadala, Maria te metua vahine o Iakobo raua Iose, te metua vahine o na tamaiti a Zebedaio. 57  E ahiahi ihora, haere maira te hoê taata tao‘a rahi no Arimataio o Iosepha te i‘oa, tei riro atoa ei pǐpǐ na Iesu. 58  Farerei ihora teie taata ia Pilato e ani maira i te tino o Iesu. Faaue atura Pilato ia horoahia ’tu te tino. 59  Rave maira Iosepha i te tino, vehî atura i te ahu lino maitai e te mâ, 60  e tuu ihora i roto i te menema* apî ta ’na i pao i roto i te mato. Turai ihora oia i te hoê ofai rahi i mua i te uputa o te menema* e reva ’tura. 61  Area Maria Magadala e te tahi atu Maria, parahi noa ihora ïa i mua i te menema. 62  E ao a‘era, i muri a‘e i te mahana faaineineraa no te Sabati, putuputu maira te mau tahu‘a tiaau e te mau Pharisea i mua ia Pilato, 63  e na ô maira: “Tavana, te haamana‘o ra matou e a ora noa ’i tera taata haavare, ua parau oia: ‘E faatiahia mai au ua mairi ana‘e e toru mahana.’ 64  A faaue na ïa ia tiaihia te menema e tae atu i te toru o te mahana, ia ore hoi ta ’na mau pǐpǐ ia haere mai e eiâ i to ’na tino, a na ô atu ai i te taata: ‘Ua faatiahia mai oia mai te pohe mai!’ Mea ino a‘e ïa teie haavare i te haavare matamua.” 65  Parau atura Pilato: “A rave i te tahi mau faehau no te tiai maitai i te menema.” 66  Haere atura ratou i te menema, tapiri maitai a‘era i te ofai e tuu atura i te tiai.

Nota i raro i te api

“Tamaiti” na roto i te reo Heleni.
A hi‘o i te titionare.
Aore ra “Haapohe ia ’na i nia i te pou!”
Aore ra “Maeva.”
A hi‘o i te titionare.
A hi‘o i te titionare.
A hi‘o i te titionare.
A hi‘o i te titionare.
I te area hora 12 i te avatea.
I te area hora 3 i te taperaa mahana.
Aore ra “faaea ’tura i te huti i te aho.”
A hi‘o i te titionare.
Aore ra “menema haamana‘oraa.”
Aore ra “menema haamana‘oraa.”
Aore ra “menema haamana‘oraa.”