Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 26:1-75

HAAPOTORAA O TE MAU TUMU PARAU

  • Opua te mau tahu‘a e haapohe ia Iesu (1-5)

  • Niniihia te mono‘i no‘ano‘a i nia ia Iesu (6-13)

  • Pasa hopea e tuuraahia Iesu i te enemi (14-25)

  • Haamauhia te Amuraa maa a te Fatu (26-30)

  • Tohuhia to Petero parauraa e aita oia i ite ia Iesu (31-35)

  • Pure Iesu i Getesemane (36-46)

  • Tapeahia Iesu (47-56)

  • Haavahia i mua i te Sunederi (57-68)

  • Parau Petero e aita oia i ite ia Iesu (69-75)

26  I te otiraa ta Iesu faahitiraa i teie mau parau atoa, na ô atura oia i ta ’na mau pǐpǐ:  “Ua ite outou e i roto e piti mahana e tupu ai te Pasa, e e tuuhia te Tamaiti a te taata nei i te rima o te enemi ia patitihia oia i nia i te pou.”  I taua taime ra, putuputu a‘era te mau tahu‘a tiaau e te mau aratai ati Iuda i roto i te aua o te tahu‘a rahi, o Kaiapha te i‘oa,  e opua a‘era e haru ia Iesu na roto i te hoê ravea haavarevare e e haapohe ia ’na.  Te parau noa ra hoi ratou: “Eiaha tatou e haru ia ’na i te oroa, ia ore te taata e faahuehue.”  Tei Betania Iesu i te fare o Simona e lepera na mua ’‘e,  tapiri maira te hoê vahine e mohina* mono‘i no‘ano‘a moni rahi ta ’na, e ninii ihora i nia i te upoo o Iesu e tamaa ra.*  I to te mau pǐpǐ iteraa i te reira, aita ratou i mauruuru e na ô ihora: “Eaha i haamâu‘ahia ’i tena mono‘i?  E nehenehe hoi e hoo i teie mono‘i, e moni rahi ïa te noaa mai a horoa ’tu ai na te feia veve.” 10  A ite ai Iesu i ta ratou parau, na ô atura oia: “Eaha outou e haapeapea ’i i teie vahine? E ohipa maitai ta ’na i rave no ’u. 11  E vai noa mai hoi te feia veve i ǒ outou. O vau nei râ, e ore ïa e vai noa mai i ǒ outou. 12  I to teie vahine niniiraa i te mono‘i no‘ano‘a i nia i to ’u tino, no te faaineine ïa ia ’u no to ’u hunaraa. 13  Oia mau ta ’u e parau atu: I te mau vahi atoa e porohia ’i te parau apî oaoa e ati a‘e te ao nei, e faatia-atoa-hia ta teie vahine i rave ei mana‘oraa ia ’na.” 14  Haere atura hoê o na 12,* tei piihia Iuda Isakariota, i te mau tahu‘a tiaau 15  e parau ihora: “Eaha ta outou e horoa mai na ’u ia tuu atu vau ia Iesu i to outou rima?” Faaau a‘era ratou e horoa ’tu e 30 moni ario. 16  E mai reira mai, imi ihora oia i te taime tano no te tuu atu ia Iesu i to ratou rima. 17  I te mahana matamua o te Oroa pane* hopue ore, haere maira te mau pǐpǐ ia Iesu ra e na ô maira: “Ihea oe e hinaaro ai ia faaineine matou i te Pasa ia amu oe i te reira?” 18  Parau atura oia: “A haere i te oire, e ite outou i te tahi taata e a parau atu ia ’na: ‘Te na ô mai ra te Orometua: “Ua fatata to ’u taime faataahia no te pohe. E faatupu vau i te Pasa e ta ’u mau pǐpǐ i to oe fare.”’” 19  Na reira ’tura te mau pǐpǐ mai ta Iesu i faaue e faaineine a‘era i te Pasa. 20  E ahiahi ihora, te tarava ra Iesu i te amuraa maa e na pǐpǐ 12. 21  A tamaa ’i ratou, na ô atura oia: “Oia mau ta ’u e parau atu: E tuu atu te hoê o outou ia ’u i to ’u mau enemi.” 22  Peapea roa a‘era ratou e na ô maira ratou paatoa: “E te Fatu, o vau anei?” 23  Pahono atura oia: “O tei tuu i ta ’na pane* e o vau atoa i roto i te au‘a, na ’na e tuu atu ia ’u i te enemi. 24  Te reva nei iho â te Tamaiti a te taata nei, mai tei papaihia no ’na, ua ati râ te taata na ’na e tuu i te Tamaiti a te taata nei i to ’na mau enemi! Mea maitai a‘e no tera taata ahani aita oia i fanauhia.” 25  Ui maira Iuda o te tuu ia Iesu i te enemi: “O vau anei, Rabi?”* Na ô atura Iesu: “Te reira iho â mai ta oe e parau ra.” 26  A tamaa noa ’i ratou, rave ihora Iesu i te hoê pane, haamaitai a‘era i te Atua, ofati ihora i te pane e horoa ’tura i te mau pǐpǐ a na ô ai: “A rave, a amu. O to ’u tino teie.” 27  Rave atoa ihora oia i te hoê au‘a uaina, haamauruuru a‘era i te Atua e horoa ’tura ia ratou a na ô ai: “A inu outou paatoa, 28  o to ’u ‘toto o te faufaa’ teie o te haamaniihia no te taata e rave rahi ia faaorehia ta ratou mau hara. 29  Tera râ, te parau atu nei au: E ore roa vau e inu faahou i teie uaina e tae roa ’tu i te mahana e inu ai au e outou atoa i te uaina apî i roto i te Faatereraa arii a to ’u Metua.”* 30  E i muri a‘e i to ratou himeneraa no te arue i te Atua,* haere atura ratou i te mou‘a Oliveta. 31  Parau atura Iesu ia ratou: “I teie nei po, e faarue mai outou paatoa ia ’u no ta ’u e faaruru, ua papaihia hoi: ‘E tairi au i te tiai mamoe e e purara ê te mau mamoe o te nǎnǎ.’ 32  I muri a‘e râ i to ’u tia-faahou-raa, e na mua ’tu vau ia outou i te haere i Galilea.” 33  Parau maira râ Petero: “Noa ’tu e e faarue ratou paatoa ia oe no ta oe e faaruru, eita roa vau e faarue ia oe!” 34  Na ô atura Iesu: “Oia mau ta ’u e parau atu: I teie nei po, hou te hoê moa e totereo ai, e parau oe e toru taime e aita oe i ite ia ’u.” 35  Na ô maira Petero: “Pohe noa ’tu â vau e oe atoa, e ore roa vau e parau e aita vau i ite ia oe.” Na reira atoa maira te tahi atu mau pǐpǐ i te parau. 36  Haere atura Iesu e o ratou atoa i te vahi parauhia Getesemane, e na ô ihora oia i te mau pǐpǐ: “A parahi na outou i ǒ nei, e haere au i ǒ a‘e e pure ai.” 37  Rave atura oia ia Petero e na tamaiti e piti a Zebedaio, e haamata ihora oia i te oto e te horuhoru roa. 38  Parau atura oia: “E oto iti rahi to ’u.* A parahi na outou i ǒ nei e a ara e o vau atoa.” 39  Faaatea rii atura oia, tipapa ihora i raro e pure atura: “To ’u Metua, ia tia ia oe, a hopoi ê atu na i teie au‘a. Ia tupu râ to hinaaro, eiaha to ’u.” 40  Ho‘i maira oia i te mau pǐpǐ ra, ite ihora e te taoto ra ratou e na ô maira ia Petero: “Aita iho â ïa i tia ia outou ia ara hoê noa ’‘e hora e o vau atoa? 41  A vai ara e a tamau i te pure ia ore outou ia hema. E hinaaro iho â te aau,* te tino râ, mea paruparu ïa.” 42  Haere faahou atura oia e pure, te piti ïa o te taime: “To ’u Metua, ia ore ia tia ia hopoi ê i teie au‘a ma te ore au e inu atu, ia tupu ïa to hinaaro.” 43  Ho‘i faahou maira oia e ite ihora e te taoto ra ratou, e varea taoto iti rahi hoi to ratou. 44  Vaiiho ihora oia ia ratou, haere faahou atura e pure, te toru ïa o te taime, ma te faahiti i te hoê â parau. 45  Ho‘i faahou maira oia i na pǐpǐ ra e na ô maira: “I te hoê taime mai teie outou e taoto ai e e haamâha ’i i to outou rohirohi! Inaha, ua fatata hoi te hora e tuuhia ’i te Tamaiti a te taata nei i te rima o te feia rave hara. 46  A tia, mai haere ana‘e. A hi‘o, te fatata mai ra te taata e tuu ia ’u i to ’u mau enemi.” 47  Te paraparau noa ra Iesu, inaha, haere maira Iuda hoê o na 12 e te hoê nahoa rahi ma te ‘o‘e e te raau. No ǒ mai taua nahoa ra i te mau tahu‘a tiaau e te mau aratai ati Iuda. 48  I horoa na hoi Iuda i te hoê tapao ia ratou, a parau ai: “Te taata ta ’u e apa, o ’na ïa. A haru ia ’na.” 49  Haere tia maira oia ia Iesu ra, na ô maira: “Ia ora na Rabi!” e apa ihora ia ’na. 50  Parau atura râ Iesu: “Eaha ta oe ohipa i ǒ nei?” Tapiri maira ratou e haru a‘era ia Iesu. 51  E inaha, rave maira hoê o te feia tei apee ia Iesu i ta ’na ‘o‘e, tairi ihora i te tavini a te tahu‘a rahi e mutu ê atura to ’na tari‘a. 52  Parau atura Iesu ia ’na: “A faaho‘i i ta oe ‘o‘e i roto i te vehî, te feia atoa hoi e rave i te ‘o‘e, e pohe ïa i te ‘o‘e. 53  Te mana‘o ra oe e e ore e tia ia ’u ia ani i to ’u Metua ia horoa mai i teie nei taime hau atu i te 12 nuu melahi? 54  E nafea ’tura ïa e tupu ai te mau Papai, o tei faaite e ia tupu te reira e tia ’i?” 55  I reira, na ô atura Iesu i te nahoa: “Ua haere mai outou e tapea ia ’u ma te ‘o‘e e te raau mai te mea ra e e eiâ vau? I tia noa na hoi au i te mau mahana atoa i te hiero a haapii ai i te taata, aita râ outou i haru ia ’u. 56  Ua tupu teie mau mea atoa ia tupu hoi ta te mau peropheta i papai.” Faarue a‘era te mau pǐpǐ atoa ia Iesu e horo atura. 57  Arataihia ’tura Iesu e te feia tei tapea ia ’na i ǒ Kaiapha te tahu‘a rahi, to reira atoa te mau papai parau e te mau aratai ati Iuda. 58  Pee noa maira râ Petero ia ’na na te atea ê e tae roa ’tu i te aua o te tahu‘a rahi, tomo atura oia e parahi ihora e te mau tavini no te ite i te ohipa e tupu. 59  Te imi ra hoi te mau tahu‘a tiaau e te Sunederi taatoa i te pari haavare ia Iesu i te tahi mea e pohe ai oia. 60  Aita râ i itehia mai, noa ’tu e mea rahi te ite haavare tei haere mai. I muri a‘e, tapiri maira e piti taata 61  e na ô maira: “Ua parau teie taata: ‘E tia ia ’u ia vavahi i te hiero o te Atua e ia patu faahou i te reira e toru mahana.’” 62  Tia a‘era te tahu‘a rahi e na ô maira ia Iesu: “Eita oe e pahono? Aita oe e faaroo ra i ta teie nau taata e pari nei ia oe?” 63  Mamû noa ihora râ Iesu. Na ô maira ïa te tahu‘a rahi: “Te faaue nei au ia oe i te i‘oa o te Atua ora, ia parau mai e o te Mesia anei oe, te Tamaiti a te Atua!” 64  Na ô atura Iesu: “Te reira iho â mai ta oe e parau ra. Teie râ, te parau atu nei au ia outou: Mai teie atu nei, e ite outou i te Tamaiti a te taata nei i te parahiraa i te rima atau o te Atua manahope e te haereraa mai na nia i te mau ata o te ra‘i.” 65  Hahae ihora te tahu‘a rahi i to ’na ahu, a na ô ai: “Ua faaino oia i te Atua! Eaha ïa te faufaa ia imi â i te ite? Inaha, ua faaroo outou ia ’na i te faainoraa i te Atua. 66  Eaha to outou mana‘o?” Pahono maira ratou: “Ia pohe iho â oia.” 67  Tutuha a‘era ratou i nia i to ’na mata e moto atura ia ’na. Poara ’tura te tahi pae ia ’na, 68  a na ô ai: “E peropheta oe te Mesia, faaite mai ïa na vai i tupai ia oe.” 69  Te parahi noa ra Petero i rapaeau, i roto i te aua, a haere mai ai te hoê tavini vahine ia ’na ra e na ô maira: “Na muri atoa na oe ia Iesu no Galilea!” 70  Parau atura râ oia i mua ia ratou paatoa: “Aita vau i ite eaha ta oe e parau ra.” 71  Haere atura oia i rapaeau, i pihai iho i te uputa, ite maira te tahi atu vahine ia ’na e na ô maira i to reira mau taata: “Na muri atoa na teie taata ia Iesu no Nazareta.” 72  Parau haapapu faahou atura Petero: “Aita vau i ite i tena taata!” 73  I muri iho, tapiri maira te feia e tia noa ra na reira e na ô maira ia Petero: “E pǐpǐ iho â oe na ’na, na to oe hoi ta‘iraa reo e faaite mai ra.” 74  Horeo ihora oia: “Ia faautua te Atua ia ’u ia haavare au. Aita vau i ite i tena taata!” Totereo ihora te hoê moa. 75  Haamana‘o ihora Petero i ta Iesu i parau, oia hoi: “Hou te hoê moa e totereo ai, e parau oe e toru taime e aita oe i ite ia ’u.” Haere atura oia i rapaeau e ta‘i ihora no te peapea rahi.

Nota i raro i te api

E mohina ofai parauhia alabata. A hi‘o i te titionare.
Aore ra “e tarava ra i te amuraa maa.”
Oia hoi na 12 aposetolo.
Aore ra “faraoa.”
Aore ra “faraoa.”
“Orometua” te auraa.
Aore ra “Basileia o to ’u Metua.”
Aore ra “himeneraa i te mau salamo.”
Heleni pusuke. A hi‘o i te titionare.
Heleni peneuma. A hi‘o i te titionare.