Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 25:1-46

HAAPOTORAA O TE MAU TUMU PARAU

  • TAPAO O TE TAU O TE HO‘IRAA MAI O TE MESIA (1-46)

    • Faahoho‘araa o na vahine apî hoê ahuru (1-13)

    • Faahoho‘araa o te mau taleni (14-30)

    • Te mamoe e te puaaniho (31-46)

25  E nehenehe e faaau i te Faatereraa arii* o te ra‘i i na vahine apî* hoê ahuru tei rave i ta ratou mori e tei haere e farerei i te tane faaipoipo.  Mea neneva e pae o ratou e mea paari e pae.  Ua rave hoi na vahine apî neneva i ta ratou mori, aita râ i rave atoa i te hinu.  Area te mea paari, ua rave ïa i ta ratou mori e te hinu atoa i roto i te farii.  Roohia a‘era ratou paatoa i te varea taoto no te maoro o te tane faaipoipo, e taoto atura ratou.  E tae a‘era i te tuiraa po, tuôhia maira: ‘Teie te tane faaipoipo! A haere e farerei ia ’na.’  Tia a‘era taua na vahine apî atoa ra e faaineine a‘era i ta ratou mori.  Na ô maira na vahine apî neneva i te mea paari: ‘A horoa mai na maa vahi iti o ta outou hinu, te pohe ra hoi ta matou mori.’  Pahono atura te mea paari: ‘Eita paha e navai na tatou paatoa. A haere na râ outou e hoo mai i ta outou iho i te feia hoohoo.’ 10  A haere ai râ na vahine apî neneva e hoo mai i te hinu, tae maira te tane faaipoipo. Tomo a‘era na vahine apî tei ineine e o ’na i roto i te fare oroa faaipoiporaa, e tapirihia ’tura te opani. 11  I muri iho, tae atoa maira na vahine apî e toe ra, e na ô maira: ‘E te Fatu, e te Fatu, iriti mai na!’ 12  Pahono atura te fatu: ‘Oia mau ta ’u e parau atu, aita vau i ite ia outou.’ 13  A ara ïa, aita hoi outou i ite i te mahana e te hora. 14  E au atoa hoi te Faatereraa arii o te ra‘i i te hoê taata hou a reva ’i i te ara, o tei titau i ta ’na mau tavini, e tuu atura i ta ’na mau faufaa ia ratou ra. 15  Ua horoa oia e pae taleni* na te hoê, e piti na te tahi e hoê na te tahi atu, ia au i tei tia ia ratou tataitahi ia haapao, e reva ’tura oia i te ara. 16  Haere oioi ihora te tavini tei horoahia ’tu e pae taleni e faaohipa i te reira ia hoona mai e ua apî mai oia e pae atu â taleni. 17  Oia atoa te tavini tei horoahia ’tu e piti, ua apî mai ïa e piti atu â taleni. 18  Area te tavini tei horoahia ’tu hoê noa taleni, ua haere ïa e ô i te apoo e huna ’tura i te moni* a to ’na fatu. 19  I muri a‘e roa, ho‘i maira te fatu o taua mau tavini ra e titau ihora i ta ’na moni. 20  Haere maira te tavini tei horoahia ’tu na taleni e pae, hopoi atoa maira e pae atu â taleni, a na ô ai: ‘E te Fatu, ua tuu mai oe e pae taleni, a hi‘o na, e pae taleni hau tei noaa mai ia ’u.’ 21  Na ô atura to ’na fatu: ‘Maitai roa, e tavini afaro oe e te haapao maitai! Ua haapao maitai oe vetahi o ta ’u mau ohipa. E faatoroa vau ia oe ei tiaau i te mau mea rahi atu â. Ia oaoa atoa oe e to oe fatu.’ 22  Haere atoa maira te tavini tei horoahia ’tu e piti taleni e na ô maira: ‘E te Fatu, ua tuu mai oe e piti taleni, a hi‘o na, e piti taleni hau tei noaa mai ia ’u.’ 23  Na ô atura to ’na fatu: ‘Maitai roa, e tavini afaro oe e te haapao maitai! Ua haapao maitai oe vetahi o ta ’u mau ohipa. E faatoroa vau ia oe ei tiaau i te mau mea rahi atu â. Ia oaoa atoa oe e to oe fatu.’ 24  Haere maira te tavini tei horoahia ’tu hoê taleni e parau maira: ‘E te Fatu, ua ite au e e taata etaeta oe, o te ooti i ta oe i ore i ueue e o te haaputu i ta oe i ore i tanu. 25  Mǎta‘u ihora vau e haere atura vau e huna i ta oe taleni i roto i te repo. Tera mai ta oe taleni.’ 26  Pahono atura to ’na fatu: ‘Tavini ino e te faatau, ua ite ïa oe e e ooti au i ta ’u i ore i ueue e e haaputu vau i ta ’u i ore i tanu. 27  Ahani iho â ïa oe i hopoi i ta ’u moni* i te fare moni, e ia tae mai au, e rave ïa vau i ta ’u moni e te moni taime.’ 28  Na ô ihora oia i ta ’na mau tavini: ‘A rave i ta ’na taleni e a horoa ’tu na te tavini ahuru taleni ta ’na. 29  Te taata hoi e faufaa ta ’na, e horoahia ’tu â ïa ta ’na e e rahi atu â. Te taata râ aita ta ’na e faufaa, e iriti-ê-atoa-hia ïa ta ’na. 30  A huri atu i te tavini faufaa ore i roto i te poiri i rapae. I reira oia e ta‘i ai e to ’na niho e ma‘u‘u ai i te ahoaho.’ 31  Ia tae mai te Tamaiti a te taata nei ma to ’na hanahana e ma te mau melahi atoa, e parahi oia i nia i to ’na terono hanahana. 32  E haaputuhia te mau nunaa atoa i mua ia ’na, e e faataa ê oia ia ratou ei piti pǔpǔ taata, mai te hoê tiai e faataa ê i te mamoe i te puaaniho. 33  E tuu oia i te mamoe i to ’na rima atau, te puaaniho râ, i to ’na rima aui. 34  I reira te Arii e parau ai i te feia i to ’na rima atau: ‘Haere mai outou o tei haamaitaihia e to ’u Metua, a fatu i te Faatereraa arii tei faaineinehia no outou mai te omuaraa mai â o teie nei ao.* 35  I poia na hoi au e ua horoa mai outou i te maa. I poihâ na vau e ua horoa mai outou i te pape. I ratere mai na vau e ua farii maitai outou ia ’u. 36  I vai tahaa na vau* e ua horoa mai outou i te ahu. I ma‘ihia na vau e ua utuutu outou ia ’u. I roto na vau i te tapearaa e ua haere mai outou e hi‘o ia ’u.’ 37  I reira te feia parau-tia e na ô atu ai: ‘E te Fatu, inafea ra to matou iteraa ia oe i te poiaraa a faatamaa ’tu ai matou ia oe, aore ra i te poihâraa a horoa ’tu ai matou i te pape? 38  Inafea ra to matou iteraa ia oe i te ratereraa mai a farii maitai atu ai matou ia oe, aore ra i te vai-tahaa-raa a faaahu atu ai matou ia oe? 39  Inafea ra to matou iteraa ia oe i te ma‘iraahia aore ra i roto i te tapearaa, a haere atu ai matou e hi‘o ia oe?’ 40  E pahono atu te Arii: ‘Oia mau ta ’u e parau atu: I te mau taime atoa i na reira ’i outou i tei iti haihai roa o to ’u mau taeae, o vau ta outou i na reira.’ 41  I reira oia e parau ai i te feia i to ’na rima aui: ‘Haere ê atu outou tei faautuahia i roto i te auahi mure ore tei faaineinehia no te Diabolo e ta ’na mau melahi. 42  I poia na hoi au, aita râ outou i horoa mai i te maa. I poihâ na vau, aita râ outou i horoa mai i te pape. 43  I ratere mai na vau, aita râ outou i farii maitai ia ’u. I vai tahaa na vau, aita râ outou i horoa mai i te ahu. I ma‘ihia e i roto na vau i te tapearaa, aita râ outou i haapao ia ’u.’ 44  I reira ratou atoa e na ô atu ai: ‘E te Fatu, inafea ra to matou iteraa ia oe i te poiaraa aore ra te poihâraa aore ra te ratereraa mai aore ra te vai-tahaa-raa aore ra te ma‘iraahia aore ra i roto i te tapearaa e aita matou i tauturu ia oe?’ 45  I reira oia e pahono atu ai: ‘Oia mau ta ’u e parau atu: I te mau taime atoa i ore ai outou i na reira i tei iti haihai roa o to ’u mau taeae, o vau ta outou i ore i na reira.’ 46  E roohia teie nei feia i te pohe mure ore,* area te feia parau-tia, e fana‘o ïa i te ora mure ore.”

Nota i raro i te api

Aore ra “Basileia.”
“Paretenia” na roto i te reo Heleni, oia hoi e vahine aita i taoto a‘enei i te hoê tane.
Hoê taleni Heleni, e 20,4 ïa kilo.
“Ario” na roto i te reo Heleni.
“Ario” na roto i te reo Heleni.
Oia hoi a tamariihia ’i Adamu raua Eva.
Aore ra “I navai ore na vau i te ahu.”
“E tâpû-ê-roa-hia teie nei feia” na roto i te reo Heleni.