Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 24:1-51

HAAPOTORAA O TE MAU TUMU PARAU

  • TAPAO O TE TAU O TE HO‘IRAA MAI O TE MESIA (1-51)

    • Tama‘i, o‘e, aueueraa fenua (7)

    • Ia porohia te parau apî oaoa (14)

    • Ati rahi (21, 22)

    • Tapao a te Tamaiti a te taata (30)

    • Te tumu suke (32-34)

    • Mai te tau o Noa (37-39)

    • A ara (42-44)

    • Te tavini haapao maitai e te tavini ino (45-51)

24  I to Iesu haereraa i rapaeau i te hiero, tapiri maira ta ’na mau pǐpǐ no te faaite ia ’na i te hiero taatoa.  Na ô atura oia: “Te ite ra outou i teie mau mea atoa? Oia mau ta ’u e parau atu: E ore roa e vaiihohia te hoê ofai i nia iho i te tahi, e huri-pauroa-hia i raro.”  Te parahi ra Iesu i nia i te mou‘a Oliveta i haere mai ai ta ’na mau pǐpǐ ana‘e ia ’na ra e na ô maira: “A faaite mai na, afea teie mau mea e tupu ai, e eaha te tapao o te tau o to oe ho‘iraa mai* e to te anotau hopea o te faanahoraa o te ao nei?”*  Pahono atura Iesu: “A ara ia ore outou ia vare i te taata,  mea rahi hoi o te haere mai ma to ’u i‘oa, a na ô ai: ‘O vau te Mesia,’ e mea rahi te vare.  E faaroo outou i te tama‘i e te parau o te tama‘i. A ara ia ore outou ia riaria, ia tupu hoi teie mau mea e tia ’i, aita â râ te hopea i tae mai.  E aro hoi te tahi nunaa i te tahi atu nunaa e te tahi faatereraa i te tahi atu faatereraa, e e tupu te o‘e e te aueueraa fenua i tera e tera vahi.  E haamataraa teie mau mea atoa o te mauiui rahi.*  I reira te taata e hamani ino ai e e haapohe ai ia outou. E hae te mau nunaa atoa ia outou no to ’u nei i‘oa. 10  Mea rahi atoa te taiva, te tuu te tahi i te tahi i te rima o te feia hamani ino e te hae te tahi i te tahi. 11  E tia mai e rave rahi peropheta haavare e mea rahi te vare ia ratou, 12  e no te rahi o te ino, e iti roa mai te here o te rahiraa. 13  Te taata râ tei faaoromai tamau* e tae noa ’tu i te hopea, e ora ïa. 14  E e porohia te parau apî oaoa o te Faatereraa arii* e ati a‘e te fenua ia ite te mau nunaa atoa, i reira ïa te hopea e tae mai ai. 15  No reira, ia ite outou i te mea faufau o te haamou ia tia i te hoê vahi mo‘a, mai tei parauhia e Daniela te peropheta, (ia feruri maite te taata taio e taa ’i ia ’na teie parau), 16  ia horo ïa te feia e parahi ra i Iudea i te mau mou‘a. 17  Eiaha te taata i nia iho i to ’na fare* e pou mai e tii i te tao‘a i roto i to ’na fare, 18  eiaha atoa te taata i roto i te faaapu e ho‘i e tii i to ’na ahu tapo‘i. 19  Ua ati te mau vahine hapû e te mau vahine e aiû ta ratou i taua mau mahana ra! 20  A tamau i te pure ia ore ta outou hororaa ia tupu i te tau to‘eto‘e aore ra i te Sabati, 21  e tupu hoi te hoê ati rahi aita i tupu a‘enei mai te omuaraa mai o teie nei ao e tae roa mai i teie mahana, e o te ore atoa e tupu faahou. 22  Ia ore taua mau mahana ra e haapotohia, aita e taata e ora. No te feia râ i maitihia e haapotohia ’i taua mau mahana ra. 23  E ia na ô mai te taata: ‘A hi‘o! To ǒ nei te Mesia,’ aore ra: ‘To ǒ!’ eiaha e tiaturi atu. 24  E tia mai hoi te mau Mesia haavare e te mau peropheta haavare e e faatupu ratou i te mau tapao rahi e te mau ohipa maere no te tamata i te haavare i te feia i maitihia. 25  A haamana‘o, ua faaara vau ia outou. 26  E ia parau mai te tahi taata ia outou: ‘A hi‘o! Tei te medebara oia,’ eiaha e haere. Aore ra: ‘A hi‘o! To roto oia i te piha,’ eiaha e tiaturi atu. 27  Mai te uira hoi o te anapa mai hitia o te râ e tae roa ’tu i tooa o te râ, oia atoa ïa te tau o te ho‘iraa mai* o te Tamaiti a te taata nei. 28  I te mau vahi e tino pohe to reira e amui ai te mau aeto. 29  I muri noa ’‘e i taua mau mahana ati ra, e haapoiri te mahana, e ore te ava‘e e anaana mai, e mairi te mau fetia mai te ra‘i mai e e ueuehia te mau mea puai o te ra‘i. 30  I reira e itehia ’i te tapao a te Tamaiti a te taata nei i nia i te ra‘i, e i reira te mau opu atoa o te fenua e tupaipai ai i to ratou ouma ma te oto e e ite ai i te Tamaiti a te taata nei ia haere mai na nia i te mau ata o te ra‘i ma te puai e te hanahana rahi. 31  E tono atoa ’tu oia i ta ’na mau melahi e ia oto rahi te pu e haaputuputu ai ratou i to ’na mau taata maitihia mai apatoerau, apatoa, hitia o te râ e tooa o te râ, mai te hoê pae o te ra‘i e tae atu i te tahi pae. 32  A huti na i te haapiiraa i teie faahoho‘araa o te tumu suke: I te tupuraa mai iho â te amaa apî e te oteoraa mai te omou, ua ite ïa outou e ua fatata te tau tupuraa. 33  Oia atoa ia ite outou i teie mau mea atoa, ua ite ïa outou e tei te uputa te Tamaiti a te taata nei. 34  Oia mau ta ’u e parau atu: E ore roa teie nei u‘i e mou e tupu ai teie mau mea atoa. 35  E mou te ra‘i e te fenua, ta ’u râ mau parau, e ore roa ïa e mou. 36  No nia i te reira mahana e te reira hora, aita te hoê i ite, aita te mau melahi o te ra‘i e aita atoa te Tamaiti, o te Metua ana‘e râ. 37  E riro hoi te tau o te ho‘iraa mai* o te Tamaiti a te taata nei mai te tau o Noa ra. 38  I te reira hoi tau hou te diluvi, te tamaa ra te taata e te inu ra, te faaipoipo ra te tane, te horoahia ra te vahine ia faaipoipo e tae roa i te mahana i tomo ai Noa i roto i te araka, 39  e aita ratou i tâu‘a e tae noa mai ai te diluvi e mou atura ratou paatoa, oia atoa ïa te tau o te ho‘iraa mai* o te Tamaiti a te taata nei. 40  E piti hoi tane tei te faaapu: E ravehia hoê e e vaiihohia te tahi. 41  E piti vahine te taviri ra i te ofai oro: E ravehia hoê e e vaiihohia te tahi. 42  A ara noa ïa, no te mea aita outou i ite eaha te mahana e haere mai ai to outou Fatu. 43  Ua ite hoi outou: Ahiri te fatu fare i ite i teihea hora* e haere mai ai te eiâ, e ara ïa oia e eita e vaiiho noa i to ’na fare ia tomohia. 44  No reira, ia vai ineine outou atoa, no te mea i te hora mana‘o-ore-hia e outou e haere mai ai te Tamaiti a te taata nei. 45  O vai hoi te tavini haapao maitai e te paari ta to ’na fatu i faatoroa i nia i te mau tavini o to ’na utuafare, no te horoa ’tu i ta ratou maa i te taime tano? 46  E oaoa taua tavini ra ia tae mai to ’na Fatu a ite atu ai e te na reira ra oia! 47  Oia mau ta ’u e parau atu: E faatoroa oia ia ’na ei tiaau i ta ’na mau faufaa atoa. 48  Ia na ô râ te tavini ino i roto i to ’na aau: ‘Ua maoro to ’u fatu,’ 49  a rutu ai i to ’na mau hoa tavini, a tamaa e a inu atu ai e te feia inu ava, 50  e haere mai te fatu o taua tavini ra i te mahana mana‘o-ore-hia e ana e i te hora aita oia i ite. 51  E faautua oia ia ’na i te utua ino mau, a amui atu ai ia ’na i te feia haavarevare. I reira oia e ta‘i ai e to ’na niho e ma‘u‘u ai i te ahoaho.

Nota i raro i te api

Heleni parusia. A hi‘o i te titionare.
Aore ra “te tau.” A hi‘o i te titionare.
Mai te mauiui o te hoê vahine ia fanau oia.
Aore ra “o te faaoromai tamau ra.”
Aore ra “Basileia.”
I tera tau, e tahua te niaraa o te rahiraa o te mau fare e mea rahi te ohipa e ravehia i reira.
Heleni parusia. A hi‘o i te titionare.
Heleni parusia. A hi‘o i te titionare.
Heleni parusia. A hi‘o i te titionare.
Aore ra “i teihea hora i te po.”