Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 23:1-39

HAAPOTORAA O TE MAU TUMU PARAU

  • Eiaha e pee i te mau papai parau e Pharisea (1-12)

  • Ua ati te mau papai parau e Pharisea (13-36)

  • Oto Iesu no Ierusalema (37-39)

23  Parau atura Iesu i te nahoa e i ta ’na mau pǐpǐ:  “Ua rave te mau papai parau e te mau Pharisea i te parahiraa o Mose.  No reira, te mau mea atoa ta ratou e parau mai, a rave, eiaha râ e pee i ta ratou mau peu, e parau hoi ratou eita râ e rave mai ta ratou e parau ra.  E taamu ratou i te mau hopoia teimaha, a tuu atu ai i nia i te tapono o te taata. O ratou râ, eita ïa e hinaaro e hauti i te reira.  Te mau mea atoa ta ratou e rave, ia hi‘ohia ïa ratou e te taata. Te faaaano nei hoi ratou i te mau afata nainai e irava o te mau Papai to roto, ta ratou e taamu i nia iho ia ratou ei tao‘a paruru, e te faaroa nei i to ratou hiti ahu.  Mea au na ratou e parahi i te mau vahi faataahia no te mau manihini tiaraa teitei i te mau tamaaraa e i mua roa* i roto i te mau sunago,  e ia arohahia ratou ma te faatura na te mahora* e ia parauhia ratou e Rabi.*  O outou râ, eiaha e titau ia parauhia outou e Rabi, hoê ana‘e hoi Orometua to outou, e taeae ana‘e outou paatoa.  Eiaha atoa e parau i te taata o te fenua nei e metua no outou, hoê ana‘e hoi Metua to outou, tei te ra‘i ïa. 10  Eiaha atoa e titau ia parauhia outou e aratai, hoê ana‘e hoi Aratai to outou, o te Mesia. 11  O tei rahi a‘e râ i rotopu ia outou, ia riro ïa ei tavini no outou. 12  Te taata o te faateitei ia ’na, e faahaehaahia ïa, e te taata o te faahaehaa ia ’na, e faateiteihia ïa. 13  Ua ati outou te mau papai parau e te mau Pharisea, haavarevare ma, no te mea te ponao nei outou i te uputa o te Faatereraa arii* o te ra‘i i mua i te taata, eita hoi outou iho e tomo, e te feia e hinaaro e tomo, e tapea ïa outou. 14  *—— 15  Ua ati outou te mau papai parau e te mau Pharisea, haavarevare ma, no te mea te tere nei outou na te tai e na te fenua ia noaa mai te hoê taata o te farii i te haapaoraa ati Iuda.* Ia farii oia, mea ino roa ’tu â ïa oia ia outou. Mai te peu e mea tano ia haere outou i Gehena,* o ’na atoa ïa. 16  Ua ati outou te mau aratai matapo o te parau nei: ‘Ia tǎpǔ te taata i te hiero, aita e faufaa ia tapea oia i te reira. Ia tǎpǔ râ oia i te auro o te hiero, ia tapea ïa oia i te reira e tia ’i.’ 17  Maamaa, matapo ma! Eaha hoi te mea faufaa a‘e, te auro aore ra te hiero o te haamo‘a i te auro? 18  Hau atu â: ‘Ia tǎpǔ te taata i te fata, aita e faufaa ia tapea oia i te reira. Ia tǎpǔ râ oia i te ô i nia i te fata, ia tapea ïa oia i te reira e tia ’i.’ 19  Matapo ma! Eaha hoi te mea faufaa a‘e, te ô aore ra te fata o te haamo‘a i te ô? 20  O te tǎpǔ hoi i te fata, te tǎpǔ ra ïa i taua fata ra e i te mau mea atoa i nia iho, 21  e o te tǎpǔ i te hiero, te tǎpǔ ra ïa i taua hiero ra e tei parahi ra i roto, 22  e o te tǎpǔ i te ra‘i, te tǎpǔ ra ïa i te terono o te Atua e tei parahi ra i nia iho. 23  Ua ati outou te mau papai parau e te mau Pharisea, haavarevare ma, no te mea te horoa nei outou i te tuhaa ahuru o te mineta, te aneto e te kumina,* ua haapae râ i te mau mea faufaa a‘e o te ture a Mose, oia hoi te parau-tia, te aroha hamani maitai e te taiva ore. Ia horoa iho â outou i te tuhaa ahuru e tia ’i, eiaha râ e haapae i te mau mea faufaa a‘e o te ture a Mose. 24  Aratai matapo ma, te titia nei outou i te naonao e te horomii nei râ i te kamela! 25  Ua ati outou te mau papai parau e te mau Pharisea, haavarevare ma, no te mea te tamâ nei outou i te rapaeau o te au‘a e o te farii maa. O roto râ, ua î ïa outou i te nounou* e te hinaaro vî ore. 26  Pharisea matapo, o roto o te au‘a e o te farii maa ta oe e tamâ na mua ia mâ atoa o rapaeau. 27  Ua ati outou te mau papai parau e te mau Pharisea, haavarevare ma, no te mea e au outou i te mau menema faauouohia, mea nehenehe i rapaeau, o roto râ, ua î ïa i te ivi taata pohe e i te mea viivii ua rau te huru. 28  Oia atoa outou, e au ra e e feia parau-tia outou ia hi‘o mai te taata. To outou râ aau, mea haavarevare roa ïa e te ofati ture. 29  Ua ati outou te mau papai parau e te mau Pharisea, haavarevare ma, no te mea te patu nei outou i te menema o te mau peropheta e te faaunauna nei i te menema* o te feia parau-tia 30  e te na ô nei outou: ‘Ahiri matou i ora na i te tau o to matou mau tupuna, e ore matou e apiti ia ratou i te haamaniiraa i te toto o te mau peropheta.’ 31  Na outou iho ïa e faaite nei e e tamarii* outou na te feia o tei haapohe i te mau peropheta. 32  No reira, a faaoti i ta to outou mau tupuna i haamata. 33  Ophi, fanau‘a ophi taero ma! E nafea outou e ora ’tu ai i te faautuaraa i Gehena?* 34  No reira ïa vau e tono atu ai i te mau peropheta, te feia paari e te mau orometua haapii. Te vai ra i rotopu ia ratou ta outou e taparahi pohe, e haapohe i nia i te pou, e hui i roto i ta outou mau sunago e e hamani ino i tera e tera oire, 35  ia ho‘i mai i nia ia outou te toto o te feia parau-tia atoa tei haapohehia i te ao nei, mai ia Abela mai e tae roa ’tu i te tamaiti a Barakia ra o Zekaria, ta outou i taparahi pohe i rotopu i te nao* e te fata. 36  Oia mau ta ’u e parau atu: E roohia teie nei u‘i i teie mau mea atoa. 37  Ierusalema, Ierusalema, o te taparahi pohe i te mau peropheta e o te pehi i tei tonohia ’tu ia ’na i te ofai! Ahia a‘enei to ’u hinaaroraa e haaputu i ta oe mau tamarii, mai te moa o te haaputu i ta ’na mau fanau‘a i raro a‘e i to ’na pererau! Aita râ outou i hinaaro. 38  Inaha, e faaruehia* to outou fare.* 39  Teie hoi ta ’u e parau atu: E ore roa outou e ite faahou mai ia ’u e tae noa ’tu i te taime e na ô ai outou: ‘Ia haamaitaihia tei haere mai ma te i‘oa o Iehova!’”*

Nota i raro i te api

Aore ra “i nia i te mau parahiraa maitai roa ’‘e.”
I reira te taata e hoohoo ai e e ruru ai.
“Orometua” te auraa.
Aore ra “Basileia.”
Te vai ra teie irava i roto i te tahi mau huriraa Bibilia, aita râ i roto e rave rau papai Heleni tahito fariihia.
Aore ra “peroseluto.”
A hi‘o i te titionare.
E faaohipahia te mineta, te aneto e te kumina no te faano‘ano‘a i te maa.
Aore ra “eiâ.”
Aore ra “menema haamana‘oraa.”
“Tamaiti” na roto i te reo Heleni.
A hi‘o i te titionare.
A hi‘o i te titionare.
Nehenehe atoa e hurihia “e faaanohia.”
Oia hoi te hiero.
A hi‘o i te titionare.