Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 22:1-46

HAAPOTORAA O TE MAU TUMU PARAU

  • Faahoho‘araa o te oroa faaipoiporaa (1-14)

  • Te Atua e Kaisara (15-22)

  • Uiraa no nia i te tia-faahou-raa (23-33)

  • Na faaueraa rahi roa ’‘e (34-40)

  • E tamaiti anei te Mesia na Davida? (41-46)

22  Pahono faahou atura Iesu ia ratou ma te rave i te mau faahoho‘araa e na ô atura:  “E nehenehe e faaau i te Faatereraa arii* o te ra‘i i te hoê arii o tei faatupu i te hoê oroa faaipoiporaa no ta ’na tamaiti.  Tono atura oia i ta ’na mau tavini e tii i te feia i titau-manihini-hia, aita râ ratou i hinaaro e haere mai.  Tono faahou atura oia i te tahi atu mau tavini a na ô ai: ‘A parau atu i tei titau-manihini-hia: “Inaha, ua faaineine au i te maa, ua tupaihia ta ’u mau puaatoro e animara poria, e ua nahonaho te mau mea atoa. A haere mai i te oroa faaipoiporaa.”’  Aita râ ratou i tâu‘a ’tu, haere atura vetahi i ta ratou faaapu, te tahi atu i ta ratou tapihooraa.  Te toea râ, haru a‘era ïa i ta ’na mau tavini, tuhi ihora e haapohe atura.  Riri roa ihora te arii, tono atura i ta ’na mau faehau, haapohe atura i taua mau taparahi taata ra e tanina ’tura i to ratou oire i te auahi.  Parau atura oia i ta ’na mau tavini: ‘Ua nahonaho te oroa faaipoiporaa, eita râ e tano ia haere mai te feia i titau-manihini-hia.  A haere ïa na te mau purumu rahi e a titau manihini i te taata atoa ta outou e ite atu.’ 10  Haere a‘era taua mau tavini ra na te mau purumu rahi e titau manihini maira i ta ratou atoa i ite atu, te feia maitai e te feia ino. Î roa a‘era te piha faaipoiporaa i te feia atoa e tamaa ra.* 11  I to te arii tomoraa mai e hi‘opoa i te mau manihini, ite ihora oia i te hoê tane aita i oomo i te ahu no te faaipoiporaa. 12  Na ô atura oia ia ’na: ‘Eaha oe i tomo mai ai i ǒ nei e aita hoi to oe e ahu no te faaipoiporaa?’ Mamû noa ihora taua taata ra. 13  Parau atura te arii i ta ’na mau tavini: ‘A taamu i to ’na na rima e na avae e a huri ia ’na i roto i te poiri i rapae. I reira oia e ta‘i ai e to ’na niho e ma‘u‘u ai i te ahoaho.’ 14  Mea rahi hoi tei titau-manihini-hia, mea iti râ tei maitihia.” 15  Haere atura te mau Pharisea e feruri ihora i te hoê ravea e noaa ’i Iesu ia ratou na roto i ta ’na mau parau. 16  Tono a‘era ratou i ta ratou mau pǐpǐ e to te pǔpǔ a Heroda e parau ia Iesu: “Orometua, ua ite matou e e taata parau mau oe e te haapii ra oe ia vetahi ê i te e‘a o te Atua ma te parau mau, eita atoa oe e imi i ta te taata farii maitai, eita hoi oe e haapao i te huru rapaeau o te taata. 17  Faaite mai na ïa i to oe mana‘o. Mea tano* anei ia au i te ture ia aufau i te tute* ia Kaisara* aore ra eita?” 18  Ua ite râ Iesu i ta ratou opuaraa ino e na ô atura: “Eaha outou e râmâ mai ai ia ’u, haavarevare ma? 19  Faaite mai na i te moni aufau tute.” Horoa maira ratou i te hoê denari.* 20  Na ô atura oia: “No vai te hoho‘a e te i‘oa i nia iho?” 21  Parau maira ratou: “No Kaisara.” Na ô atura oia: “A faaho‘i ïa i ta Kaisara ia Kaisara ra, ta te Atua râ i te Atua ïa.” 22  I to ratou faarooraa i te reira, maere ihora ratou, vaiiho atura ia ’na e haere atura. 23  I taua mahana ra, haere maira te mau Sadukea, o te parau ra e aita e tia-faahou-raa, e ui maira ia Iesu: 24  “Orometua, ua parau Mose: ‘Ia pohe te hoê tane ma te tamarii ore, ia faaipoipo ïa to ’na taeae i ta ’na vahine e tia ’i e ia fanau mai ta ’na ei tamarii na to ’na taeae i pohe.’ 25  I vai na hoi e hitu taeae i ǒ matou. Faaipoipo ihora te matahiapo e pohe atura, e no te mea aita e tamarii ta ’na, faaipoipo ihora to ’na teina i ta ’na vahine. 26  Na reira atoa te piti e te toru e tae noa ’tu i te hitu. 27  Pohe atoa ’tura te vahine. 28  I te tia-faahou-raa, ei vahine oia na vai i rotopu i na hitu? Ua faaipoipo hoi ratou paatoa ia ’na.” 29  Pahono atura Iesu: “Ua hape outou, no te mea aita outou i ite i te mau Papai e e nafea te mana o te Atua e ohipa ’i. 30  E ore hoi te feia tei faatiahia mai e faaipoipo e e ore e horoahia ia faaipoipo, e riro râ ratou mai te mau melahi i te ra‘i. 31  Aita outou i taio i ta te Atua i parau ia outou no nia i te tia-faahou-raa o tei pohe: 32  ‘O vau te Atua o Aberahama e te Atua o Isaaka e te Atua o Iakoba’? E ere oia i te Atua no te feia pohe, no te feia ora râ.” 33  A faaroo ai te nahoa i te reira, maere ihora ratou i ta ’na haapiiraa. 34  I to ratou faarooraa e ua haamamû Iesu i te mau Sadukea, haere maira te mau Pharisea ia ’na ra. 35  Râmâhia maira Iesu e te hoê Pharisea, mea ite i te ture a Mose, ma te ui: 36  “Orometua, teihea te faaueraa rahi roa ’‘e i roto i te ture a Mose?” 37  Pahono atura oia: “‘Ia here oe ia Iehova* to Atua ma to aau atoa e ma to ora* atoa e ma to mana‘o atoa.’ 38  O te faaueraa rahi roa ’‘e teie e te matamua. 39  Teie te piti, o tei taaihia i te reira: ‘Ia here oe i to oe taata tupu mai ia oe iho.’ 40  I nia i teie na faaueraa e piti i niuhia ’i te ture taatoa a Mose e te mau papai a te mau peropheta.” 41  Ui atura Iesu i te mau Pharisea atoa i reira: 42  “Eaha to outou mana‘o i te Mesia? E tamaiti oia na vai?” Pahono maira ratou: “Na Davida.” 43  Ui atura oia: “No te aha ïa Davida tei arataihia e te varua mo‘a i parau ai ia ’na e Fatu? Ua na ô oia: 44  ‘Ua parau Iehova* i to ’u Fatu: “A parahi i to ’u rima atau nei e ia tuu roa vau i to oe mau enemi i raro a‘e i to oe na avae”’? 45  Mai te peu e ua parau Davida i te Mesia e Fatu, mea nafea ïa e tamaiti ai oia na ’na?” 46  Aita ’tura i tae ia ratou pauroa ia pahono, e mai taua mahana mai ra aita roa e taata i ui faahou ia ’na no te taiâ.

Nota i raro i te api

Aore ra “Basileia.”
Aore ra “e tarava ra i te amuraa maa.”
Aore ra “tia.”
Oia hoi te hoê tute na nia i te taata tataitahi.
Aore ra “i te emepera no Roma.”
A hi‘o i te titionare.
A hi‘o i te titionare.
Heleni pusuke. A hi‘o i te titionare.
A hi‘o i te titionare.