Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 21:1-46

HAAPOTORAA O TE MAU TUMU PARAU

  • Tomoraa hanahana o Iesu i Ierusalema (1-11)

  • Tamâ Iesu i te hiero (12-17)

  • Faainohia te hoê tumu suke (18-22)

  • Faahapahia to Iesu mana (23-27)

  • Faahoho‘araa o na tamaiti e piti (28-32)

  • Faahoho‘araa o te feia faaapu taparahi taata (33-46)

    • Faaruehia te ofai tihi (42)

21  A piri atu ai ratou ia Ierusalema e a tae ai i Betephage i nia i te mou‘a Oliveta, tono ihora Iesu e piti pǐpǐ,  a na ô ai: “A haere i roto i tera oire iti i mua ia orua, i reira orua e ite ai i te hoê asini tei taamuhia e ta ’na fanau‘a i pihai iho mai. A tatara ïa e a putô mai.  Ia parau mai te hoê taata i te tahi mea, a parau atu: ‘Te hinaaro mai ra te Fatu.’ E tuu oioi ïa oia i na animara.”  Ua tupu mau â te reira mai ta te Atua i parau na roto i ta ’na peropheta:  “A parau i te tamahine a Ziona: ‘A hi‘o na! Te haere mai ra to arii ia oe ma te haehaa e ma te parahi i nia i te hoê asini, i nia hoi i te hoê fanau‘a, ta te hoê maiaa asini i fanau.’”  Haere a‘era ïa na pǐpǐ e rave atura i ta Iesu i faaue ia raua.  Putô maira raua i te asini e te fanau‘a, tuu a‘era te mau pǐpǐ i to ratou ahu tapo‘i i nia iho, e parahi ihora Iesu i nia i te fanau‘a asini.  Vauvau a‘era te rahiraa o te nahoa i to ratou ahu tapo‘i i nia i te purumu, a tâpû ai vetahi i te mau amaa raau no te vauvau atu i nia i te purumu.  Hau atu â, te tuô noa ra te nahoa i mua e i muri mai ia ’na: “A faaora na ia ’na,* te Tamaiti a Davida! Ia haamaitaihia tei haere mai ma te i‘oa o Iehova!* A faaora na ia ’na,* oe te Atua i te ra‘i teitei!” 10  E i to Iesu taeraa ’tu i Ierusalema, te arepurepu ra te oire taatoa e te uiui ra te taata: “O vai teie?” 11  Te parau noa ra te nahoa: “O te peropheta Iesu no Nazareta i Galilea!” 12  Tomo ihora Iesu i roto i te hiero, tiahi atura i rapae i te feia atoa e hoo atu ra e e hoo mai ra i roto i te hiero, e huri ihora i te mau amuraa maa a te feia taui moni e te mau parahiraa a te feia hoo uupa. 13  E na ô atura ia ratou: “Ua papaihia: ‘E parauhia to ’u fare e fare no te pure,’ te faariro nei râ outou i te reira ei ana no te eiâ.” 14  Tapiri maira te matapo e te piri‘o‘i ia ’na i roto i te hiero e faaora ’tura oia i to ratou ma‘i. 15  Inoino ihora te mau tahu‘a tiaau e te mau papai parau i to ratou iteraa i te mau ohipa faahiahia ta Iesu i rave e te tuôraa te mau tamaroa na roto i te hiero: “Te Atua e, te taparu nei matou ia oe ia faaora i te Tamaiti a Davida!” 16  Na ô maira ratou ia ’na: “Te faaroo ra oe i ta ratou parau?” Pahono atura Iesu: “E. Aita anei outou i taio: ‘Ua faatupu oe i te arueraa na roto i te vaha o te mau tamarii rii e te mau aiû’?” 17  Vaiiho ihora oia ia ratou, faarue atura i te oire no te haere i Betania e taoto atura i reira. 18  I te poipoi roa, a ho‘i mai ai oia i te oire, poia ihora oia. 19  Ite ihora oia i te hoê tumu suke i te pae purumu, haere atura i pihai iho. Aita râ e maa to nia iho, e rauere ana‘e. Na ô atura oia: “Eiaha roa ’tu oe e hotu faahou mai.” Oriorio ihora taua tumu suke ra. 20  I to te mau pǐpǐ iteraa i te reira, maere ihora ratou e na ô atura: “Mea nafea tera tumu suke i te oriorio-oioi-raa?” 21  Pahono atura Iesu: “Oia mau ta ’u e parau atu: Mai te peu e e faaroo papu to outou, e rave ïa outou i ta ’u i rave i te tumu suke. Ia parau atoa outou i teie mou‘a: ‘Ia pee oe e ia taorahia i roto i te miti,’ e tupu iho â te reira. 22  E te mau mea atoa ta outou e ani na roto i te pure ma te faaroo, e fana‘o iho â outou.” 23  Tomo ihora Iesu i roto i te hiero, haapii atura i te taata, tapiri maira te mau tahu‘a tiaau e te mau aratai ati Iuda ia ’na e na ô maira: “Na roto i teihea mana e rave ai oe i teie mau mea atoa? E na vai i horoa ia oe i teie mana?” 24  Pahono atura Iesu: “E uiraa atoa ta ’u. Ia pahono mai outou, e faaite atoa ’tu ïa vau i teihea mana e rave ai au i teie mau mea: 25  Nohea mai te bapetizoraa a Ioane? No te ra‘i mai anei aore ra no ǒ mai i te taata ra?” Feruri ihora ratou e na ô a‘era te tahi i te tahi: “Ia parau tatou: ‘No te ra‘i mai,’ e na ô mai ïa oia: ‘No te aha ïa outou i ore ai i tiaturi ia ’na?’ 26  Ia parau râ tatou: ‘No ǒ mai i te taata ra,’ ua ati ïa tatou i te nahoa o te tiaturi ra e e peropheta Ioane.” 27  Pahono a‘era ratou ia Iesu: “Aita matou i ite.” Na ô atura oia: “Eita atoa ïa vau e faaite atu i teihea mana e rave ai au i teie mau mea. 28  Eaha to outou mana‘o? E piti tamarii ta te hoê taata, haere atura oia i te matahiapo ra e na ô atura: ‘Ta ’u tamaiti, i teie mahana e haere oe i te faaapu vine e rave i te ohipa.’ 29  Pahono maira te tamaiti: ‘Eita.’ I muri iho râ, tatarahapa ihora oia e haere atura. 30  Tapiri atura te metua tane i te teina, e na reira atoa ’tura i te parau i te teina, o tei pahono mai: ‘E.’ Aita râ oia i haere. 31  O vai o raua tei rave i te hinaaro o to ’na metua tane?” Na ô maira ratou: “Te matahiapo.” Na ô atura Iesu: “Oia mau ta ’u e parau atu: O te mau titau tute e te mau vahine taiata te na mua ’tu ia outou i te ô i roto i te Faatereraa arii a te Atua.* 32  Ua haere mai hoi Ioane ia outou ra ma te faaite i te e‘a o te parau-tia, aita râ outou i tiaturi ia ’na. Te mau titau tute râ e te mau vahine taiata, oia ïa. Outou râ o tei ite i te reira, aita ïa i tatarahapa a tiaturi atu ai ia ’na. 33  Teie te tahi atu faahoho‘araa: Ua tanu te hoê fatu fenua i te vine, e aua ’tura. I roto, pao ihora oia i te hoê apoo taataahiraa vine, faatia a‘era i te hoê pare tiairaa, horoa tarahu atura i ta ’na faaapu i te tahi feia faaapu, e reva ’tura i te ara. 34  I te tau ootiraa vine, tono ihora oia i ta ’na mau tavini i te feia faaapu no te rave i ta ’na tuhaa vine. 35  Haru a‘era te feia faaapu i ta ’na mau tavini, rutu ihora i te hoê, haapohe ihora i te tahi atu e pehi ihora i te tahi atu i te ofai. 36  Tono faahou atura oia i te tahi atu mau tavini, hau a‘e i to na mua ’tu. Na reira atoa maira te feia faaapu ia ratou. 37  E i te hopea, tono atura oia i ta ’na tamaiti i te feia faaapu, a na ô ai: ‘E faatura ratou i ta ’u tamaiti.’ 38  A ite ai râ te feia faaapu i te tamaiti, na ô a‘era ratou te tahi i te tahi: ‘Teie te taata o te fatu i teie faaapu, mai haere ana‘e e haapohe ia ’na, a fatu atu ai tatou i teie faaapu!’ 39  Haru a‘era ratou ia ’na, arato atura i rapae i te faaapu vine e haapohe atura ia ’na. 40  No reira, ia haere mai te fatu o te faaapu vine, e aha oia i taua feia faaapu ra?” 41  Na ô maira te mau tahu‘a tiaau e te mau aratai ati Iuda: “No to ratou ino, e haapohe roa ïa oia ia ratou, a horoa tarahu atu ai i te faaapu vine i te tahi atu feia faaapu o te horoa ’tu i ta ’na tuhaa vine i te taime au.” 42  Parau atura Iesu: “Aita outou i taio a‘enei i roto i te mau Papai: ‘Te ofai ta te feia patu fare i faarue, ua riro mai ïa ei ofai tihi.* No ǒ mai te reira ia Iehova* ra, e mea faahiahia roa no matou’? 43  No reira vau e parau atu ai: E iritihia te Faatereraa arii a te Atua ia outou e e horoahia i te hoê nunaa o te rave i to te Atua ra hinaaro. 44  Oia atoa te taata e topa i nia iho i teie ofai, e mou ïa. E tei topahia i teie ofai, e perehu roa ïa.” 45  I to te mau tahu‘a tiaau e te mau Pharisea faarooraa i ta Iesu mau faahoho‘araa, taa a‘era ia ratou e o ratou ta ’na e parau ra. 46  Hinaaro a‘era ratou e haru ia ’na, ua mǎta‘u râ i te nahoa o te tiaturi ra e e peropheta Iesu.

Nota i raro i te api

E aniraa teie i te Atua ia faaora ia Iesu.
A hi‘o i te titionare.
E aniraa teie i te Atua ia faaora ia Iesu.
Aore ra “Basileia o te Atua.”
E tuuhia teie ofai i te poro fare i te vahi e tuati ai e piti patu.
A hi‘o i te titionare.