Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 20:1-34

HAAPOTORAA O TE MAU TUMU PARAU

  • Rave ohipa faaapu vine e hoê â moni aufauhia (1-16)

  • Tohu-faahou-hia to Iesu pohe (17-19)

  • Aniraa i te tiaraa i roto i te Faatereraa arii (20-28)

    • E hoo Iesu no te taata e rave rahi (28)

  • Toopiti matapo tei faaorahia (29-34)

20  E au hoi te Faatereraa arii* o te ra‘i i te hoê fatu faaapu vine, o tei haere i rapae i te poipoi roa e imi i te rave ohipa no ta ’na faaapu vine.  I muri a‘e i to ’na faaauraa e te mau rave ohipa e aufau ia ratou hoê denari* i te mahana, tono atura oia ia ratou i roto i ta ’na faaapu vine.  Piri i te toru o te hora,* haere faahou atura oia i rapae, ite ihora i te tahi mau taata e tia noa ra na te mahora,* aore hoi e ohipa ta ratou,  e parau atura ia ratou: ‘Outou atoa, a haere i roto i ta ’u faaapu vine, e aufau atu vau i te moni tia na outou.’  Reva ’tura ratou. Haere faahou atura oia i rapae piri i te ono o te hora* e i te iva o te hora,* e na reira atoa ’tura.  E piri i te 11 o te hora,* haere faahou atura oia i rapae, ite ihora i te tahi atu mau taata e tia noa ra, e na ô atura: ‘Eaha outou e tia noa ’i i ǒ nei e a mairi noa ’tu te mahana ma te ore e rave i te ohipa?’  Parau maira ratou: ‘No te mea aore e taata i ani mai ia matou.’ Na ô atura oia: ‘Outou atoa, a haere i ta ’u faaapu vine.’  E ahiahi ihora, parau atura te fatu faaapu vine i ta ’na tiaau ohipa: ‘A pii i te mau rave ohipa no te aufau ia ratou, te feia hopea na mua e tae atu i te feia matamua.’  Haere maira to te 11 o te hora, horoahia ’tura na ratou tataitahi hoê denari.* 10  I to te feia matamua taeraa mai, mana‘o ihora ratou e e hau a‘e ta ratou moni, hoê noa râ denari* tei horoahia ’tu na ratou atoa. 11  A rave ai ratou i ta ratou moni, amuamu a‘era ratou i te fatu faaapu vine 12  e parau maira: ‘Ua rave teie feia hopea i te ohipa hoê noa hora, hoê â râ moni ta oe i aufau na ratou e na matou tei rohirohi i te ohiparaa i raro a‘e i te veavea o te mahana e ahiahi noa ’tu!’ 13  No te pahono râ i te hoê o ratou, na ô atura te fatu faaapu vine: ‘Aita vau i taviri ia oe. Aita anei tâua i faaau no te hoê denari?* 14  A rave i ta oe moni e a haere. Te hinaaro nei au e horoa na te feia hopea hoê â moni ohipa e ta oe. 15  E ere anei na ’u e faaoti e faaohipa i ta ’u mau tao‘a mai ta ’u e hinaaro? Aore ra e mata nounou* anei to oe no te mea e taata maitai au?’* 16  Mea na reira ïa to muri e riro ai no mua, e to mua no muri.” 17  A pauma ’i ratou i Ierusalema, aratai rii ê ihora Iesu i na pǐpǐ 12 ana‘e e parau atura: 18  “Inaha, te pauma nei tatou i Ierusalema, e tuuhia te Tamaiti a te taata nei i te rima o te mau tahu‘a tiaau e te mau papai parau. E faautua ratou ia ’na i te pohe, 19  a tuu atu ai ia ’na i te rima o te feia o te mau nunaa ěê ia faaooohia, ia huihia e ia haapohehia i nia i te pou, e i te toru o te mahana e faatia-faahou-hia mai.” 20  Haere maira te vahine a Zebedaio e ta ’na toopiti tamaiti ia Iesu ra ma te tahopu ia ’na no te ani mai i te tahi mea. 21  Na ô atura Iesu i te vahine: “Eaha ta oe e hinaaro?” Pahono maira oia: “A faaue na ia parahi ta ’u na tamaiti nei i roto i ta oe Faatereraa arii, hoê i to rima atau e te tahi i to rima aui.” 22  Pahono atura Iesu: “Aita orua i ite i ta orua e ani mai nei. E haere anei ia orua ia inu i ta ’u e fatata i te inu?” Na ô maira raua: “E haere ia mâua.” 23  Parau atura oia: “E inu iho â orua i ta ’u e inu, te parahiraa râ i to ’u rima atau e i to ’u rima aui, e ere na ’u e horoa ’tu, no te feia râ no ratou i faaineine ai to ’u Metua i teie na parahiraa.” 24  I to te tahi atu mau pǐpǐ hoê ahuru faarooraa i te reira, inoino ihora ratou i na piti taeae. 25  Pii ihora râ Iesu ia ratou ia haere mai e na ô atura: “Ua ite outou e te faatere ra te mau arii o teie nei ao i te mau nunaa o te haavî-atoa-hia ra e te feia mana. 26  Eiaha roa mai tera i rotopu ia outou, o tei hinaaro hoi ia rahi oia i rotopu ia outou, ia riro ïa ei tavini no outou e tia ’i, 27  e o tei hinaaro o ’na na mua i rotopu ia outou, ia riro ïa ei tavini no outou e tia ’i. 28  Ua haere atoa mai te Tamaiti a te taata nei eiaha ia tavinihia oia, no te tavini râ e no te horoa i to ’na ora* ei hoo* no te taata e rave rahi.” 29  A faarue ai Iesu e ta ’na mau pǐpǐ ia Ieriko, pee a‘era te hoê nahoa rahi ia ’na. 30  E inaha, faaroo a‘era e toopiti tane matapo e parahi ra i te pae purumu e te haere mai ra Iesu, e pii maira: “E te Fatu, aroha* mai ia mâua, Tamaiti a Davida!” 31  Tama‘i a‘era te nahoa ia raua ia mamû raua, puai noa ’tura râ to raua tuôraa: “E te Fatu, aroha* mai ia mâua, Tamaiti a Davida!” 32  Tia noa ihora ïa Iesu, pii atura ia raua e na ô atura: “Eaha ta orua e hinaaro ia rave au no orua?” 33  Parau maira raua: “E te Fatu, ia araara to mâua mata.” 34  Aroha ihora Iesu ia raua e tapea ’tura i to raua mata, ite ihora raua e pee maira ia ’na.

Nota i raro i te api

Aore ra “Basileia.”
A hi‘o i te titionare.
I te area hora 9 i te poipoi.
I reira te taata e hoohoo ai e e ruru ai.
I te area hora 12 i te avatea.
I te area hora 3 i te taperaa mahana.
I te area hora 5 i te ahiahi.
A hi‘o i te titionare.
A hi‘o i te titionare.
A hi‘o i te titionare.
“Ino” na roto i te reo Heleni.
Aore ra “horoa noa vau.”
Heleni pusuke. A hi‘o i te titionare.
A hi‘o i te titionare.
Aore ra “aroha hamani maitai.”
Aore ra “aroha hamani maitai.”