Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 2:1-23

HAAPOTORAA O TE MAU TUMU PARAU

  • Tere o te feia hi‘o fetia (1-12)

  • Hororaa i Aiphiti (13-15)

  • Haapohe Heroda i te mau tamarii tamaroa (16-18)

  • Ho‘iraa i Nazareta (19-23)

2  I muri a‘e i to Iesu fanauraahia i Betelehema i Iudea i te tau o te arii Heroda,* inaha, e feia hi‘o fetia* no hitia o te râ mai tei tae mai i Ierusalema.  Na ô atura ratou: “Teihea roa te arii o te ati Iuda tei fanauhia mai nei? Ua ite hoi matou i to ’na fetia i hitia o te râ e te haere mai nei matou e tahopu ia ’na.”  I to te arii Heroda e to Ierusalema taatoa faarooraa i te reira, horuhoru a‘era ratou.  Haaputuputu ihora te arii i te taatoaraa o te mau tahu‘a tiaau e papai parau e ui atura ia ratou ihea te Mesia e fanauhia ’i.  Parau maira ratou ia ’na: “I Betelehema i Iudea, ua papai hoi te peropheta:  ‘O oe e Betelehema i te fenua o Iuda, eiaha roa ’tu te mau tavana atoa no Iuda e faariro ia oe ei oire haihai, mai roto mai hoi ia oe e tia mai ai te hoê faatere o te aratai i to ’u mau taata ia Iseraela.’”  Tii huna ’tura Heroda i te feia hi‘o fetia e ui maitai ihora ia ratou inafea te fetia i te faraa mai.  Tono atura oia ia ratou i Betelehema ma te parau: “A haere a maimi i tera tamarii e ia ite outou ia ’na, a ho‘i mai e faaite ia ’u, ia haere atoa hoi au e tahopu ia ’na.”  I muri a‘e i to te arii horoaraa i teie faaueraa, reva ’tura ratou. E inaha, te fetia ta ratou i ite i hitia o te râ, te na mua ihora ïa ia ratou e mau atura i nia a‘e i te fare to reira te tamarii. 10  Oaoa roa a‘era ratou i te iteraa i te fetia i te mauraa. 11  Tomo a‘era ratou i roto i te fare e ite atura i te tamarii e ia Maria to ’na metua vahine. Tipapa ihora ratou i raro e tahopu atura ia ’na. Iriti atoa maira ratou i ta ratou mau vairaa tao‘a e pûpû atura i te auro, te tapau libano e te tapau mura ei ô na ’na. 12  Ua faaara râ te Atua ia ratou na roto i te moemoeâ eiaha e ho‘i ia Heroda ra. Reva ’tura ïa ratou i to ratou fenua na te tahi atu e‘a. 13  I muri a‘e i to ratou revaraa, inaha, fa maira ta Iehova* melahi ia Iosepha na roto i te moemoeâ, a na ô ai: “A tia, a rave i te tamarii e to ’na metua vahine e a horo i Aiphiti. I reira outou e faaea ’i e na ’u e parau atu ia ho‘i mai. Te imi nei hoi Heroda i te taparahi haapohe i te tamarii.” 14  I taua rui ra, tia a‘era Iosepha, rave ihora i te tamarii e ia Maria e horo atura i Aiphiti. 15  Parahi ihora oia i reira e tae noa ’tu i te poheraa o Heroda. Tupu atura ta Iehova* i parau na roto i ta ’na peropheta: “E tii au i ta ’u tamaiti i Aiphiti.” 16  Riri roa ihora Heroda i to ’na iteraa e ua haavare te feia hi‘o fetia ia ’na. Tono ihora oia i te taata i Betelehema e i te mau vahi tapiri atoa e haapohe pauroa te mau tamaroa mai te piti matahiti e raro mai, ia au i te taime ta te feia hi‘o fetia i faaite ia ’na. 17  Tupu atura ta te peropheta Ieremia i parau: 18  “E reo tei faaroohia i Rama, e ta‘i e te auê. Te ta‘i ra Rahela i ta ’na mau tamarii e aita oia i hinaaro i te tamahanahanaraa, no te mea aita nei ratou.” 19  I to Heroda poheraa, inaha, fa maira ta Iehova* melahi na roto i te moemoeâ ia Iosepha i Aiphiti, 20  na ô maira: “A tia, a rave i te tamarii e to ’na metua vahine e a haere i te fenua o Iseraela, ua pohe hoi te feia tei imi na i te rave i te ora* o te tamarii.” 21  Tia a‘era oia, rave ihora i te tamarii e ia Maria e ho‘i atura i te fenua o Iseraela. 22  Faaroo a‘era râ Iosepha e o Arehelau te faatere ra i Iudea ei mono i to ’na metua tane ia Heroda, mǎta‘u ihora oia e haere i ǒ. Ua faaara atoa te Atua ia ’na na roto i te moemoeâ, e reva ’tura oia i te fenua o Galilea. 23  Parahi ihora oia i te oire o Nazareta te i‘oa ia tupu hoi ta te mau peropheta i parau: “E parauhia oia* no Nazareta.”*

Nota i raro i te api

A hi‘o i te titionare.
Aore ra “feia tahutahu.”
A hi‘o i te titionare.
A hi‘o i te titionare.
A hi‘o i te titionare.
Heleni pusuke. A hi‘o i te titionare.
Oia hoi te Mesia.
No ǒ mai paha teie ta‘o i te parau Hebera hurihia ei “oteo.”