Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 19:1-30

HAAPOTORAA O TE MAU TUMU PARAU

  • Faaipoiporaa e faataaraa (1-9)

  • Te ô e faaea taa noa (10-12)

  • Haamaitai Iesu i te mau tamarii (13-15)

  • Uiraa a te hoê taata apî tao‘a rahi (16-24)

  • Haapaeraa no te Faatereraa arii (25-30)

19  I te otiraa ta Iesu paraparauraa, faarue ihora oia ia Galilea e haere atura i te otia fenua o Iudea na tera pae mai o Ioridana.  E nahoa rahi atoa tei pee ia ’na e faaora ihora oia i to ratou mau ma‘i.  Haere maira te mau Pharisea e râmâ ia ’na e ui maira: “Mea tano anei ia au i te ture ia faataa te hoê tane i ta ’na vahine faaipoipo no te mau tumu atoa?”  Pahono atura oia: “Aita anei outou i taio e o tei poiete i te taata i te omuaraa, ua hamani ïa i te tane e te vahine  e na ô atura: ‘No reira te hoê tane e faarue ai i to ’na metua tane e to ’na metua vahine, a ati atu ai i ta ’na vahine faaipoipo, e riro hoi raua ei hoê’?  E ere atura ïa raua e piti, hoê râ. No reira, o ta te Atua i taati, eiaha ïa te taata e faataa ê.”  Parau maira ratou ia ’na: “No te aha ïa Mose i faaue ai ia horoa te hoê tane i te hoê parau faataaraa ia faataa oia i ta ’na vahine faaipoipo?”  Na ô atura oia: “No te etaeta o to outou aau i vaiiho ai Mose ia faataa outou i ta outou iho vahine faaipoipo. E ere râ mai tera i to te Atua poieteraa i te tane e te vahine matamua.  Te parau atu nei au e te tane o te faataa i ta ’na vahine faaipoipo tei ore i rave i te peu taotoraa tia ore,* a faaipoipo atu ai i te tahi atu, ua faaturi ïa.” 10  Na ô maira te mau pǐpǐ ia ’na: “Mai te peu e mai tera te faaipoiporaa, mea au a‘e ïa eiaha roa ’tu e faaipoipo.” 11  Parau atura oia: “E ere o te taata atoa te farii i tena parau, o te feia ana‘e râ e fana‘o ra i taua ô ra. 12  Te vai ra o te ore e faaipoipo* no te tahi fifi i to ratou fanauraahia mai, te tahi pae* no te mea ua patehehia ratou, e te vai ra o tei faaoti eiaha e faaipoipo* no te Faatereraa arii* o te ra‘i. Te taata e tia ia ’na ia farii i te reira, a farii ïa.” 13  Aratai maira te tahi mau taata i te mau tamarii rii ia Iesu ra ia tuu oia i to ’na na rima i nia iho* ia ratou e ia pure no ratou, tama‘i a‘era râ te mau pǐpǐ i taua mau taata ra. 14  Parau atura râ Iesu: “A vaiiho noa i te mau tamarii rii ia haere mai ia ’u nei, eiaha e tapea ’tu, no te feia hoi e au i teie mau tamarii rii te Faatereraa arii o te ra‘i.” 15  Tuu ihora oia i to ’na na rima i nia iho* ia ratou e reva ’tura. 16  E inaha, haere maira te hoê taata apî ia Iesu ra e na ô maira: “Orometua, eaha te maitai ta ’u e rave e noaa ’i ia ’u te ora mure ore?” 17  Parau atura oia: “Eaha oe e ui mai ai no nia i te mea maitai? O te Atua ana‘e te mea maitai. Ia hinaaro hoi oe e fana‘o i te ora, a haapao noa ïa i te mau faaueraa.” 18  Ui maira oia: “Teihea mau faaueraa?” Pahono atura Iesu: “Eiaha roa oe e taparahi pohe i te taata, eiaha roa oe e faaturi, eiaha roa oe e eiâ, eiaha roa oe e pari haavare, 19  a faatura i to metua tane e to metua vahine e ia here oe i to oe taata tupu mai ia oe iho.” 20  Na ô maira te taata apî ra: “Ua hope ia ’u i te haapao i teie mau mea atoa, eaha te toe ra ia ’u ia rave?” 21  Parau atura Iesu: “Ia hinaaro oe ia tia roa oe, a haere e hoo i ta oe mau faufaa, a horoa ’tu ai i te moni na te feia veve, e tao‘a ïa ta oe i nia i te ra‘i, e a pee mai ia ’u.” 22  A faaroo ai te taata apî i teie parau, haere atura oia ma te oto, mea rahi hoi ta ’na faufaa. 23  Na ô atura ïa Iesu i ta ’na mau pǐpǐ: “Oia mau ta ’u e parau atu: Mea fifi no te hoê taata tao‘a rahi ia ô i roto i te Faatereraa arii o te ra‘i. 24  Te parau atu nei â vau: Mea ohie a‘e no te hoê kamela ia ô i roto i te hoê apoo nira eiaha râ no te hoê taata tao‘a rahi ia ô i roto i te Faatereraa arii a te Atua.” 25  Maere roa a‘era te mau pǐpǐ i to ratou faarooraa i te reira, e na ô a‘era: “O vai hoi te nehenehe e ora ’tu?” 26  Hi‘o maitai atura Iesu ia ratou e na ô atura: “I te taata, e ore e tia. I te Atua râ, e tia ïa te mau mea atoa.” 27  Parau maira ïa Petero: “Ua haapae hoi matou i te mau mea atoa e ua pee mai ia oe, eaha ïa ta matou e fana‘o?” 28  Na ô atura Iesu ia ratou: “Oia mau ta ’u e parau atu: E faaapî te Atua i te mau mea atoa ia parahi te Tamaiti a te taata nei i nia i to ’na terono hanahana. I reira outou o tei pee mai ia ’u e parahi atoa ’i i nia 12 terono, a haava ’i i na opu 12 o Iseraela. 29  E te taata atoa tei haapae i to ’na fare aore ra taeae, tuahine, metua tane, metua vahine, tamarii aore ra fenua no to ’u nei i‘oa, e taihanere ïa ta ’na e fana‘o e e noaa ia ’na te ora mure ore. 30  E rave rahi râ to mua, e riro ïa no muri e to muri no mua.

Nota i raro i te api

A hi‘o i te titionare.
“Te vai ra te eunuka” na roto i te reo Heleni. A hi‘o i te titionare.
“Te vai ra te eunuka” na roto i te reo Heleni. A hi‘o i te titionare.
“Te vai ra o tei faaoti e faaeunuka ia ratou” na roto i te reo Heleni. A hi‘o i te titionare.
Aore ra “Basileia.”
Aore ra “ia haamaitai oia.”
Aore ra “Haamaitai ihora oia.”