Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 18:1-35

HAAPOTORAA O TE MAU TUMU PARAU

  • Tei rahi a‘e i roto i te Faatereraa arii (1-6)

  • Te mau mea e hapa ’i te taata (7-11)

  • Faahoho‘araa o te mamoe i mo‘e (12-14)

  • Nafea ia faaho‘i i te hoê taeae i nia i te e‘a maitai? (15-20)

  • Faahoho‘araa o te tavini tei ore i faaore i te tarahu (21-35)

18  I reira, haere maira te mau pǐpǐ ia Iesu ra e na ô maira: “O vai hoi tei rahi a‘e i roto i te Faatereraa arii* o te ra‘i?”  Pii atura ïa oia i te hoê tamarii iti e tuu atura ia ’na i ropu ia ratou  e parau ihora: “Oia mau ta ’u e parau atu: Ia ore outou e fariu mai,* a riro ai mai te mau tamarii rii, e ore roa ïa outou e ô i roto i te Faatereraa arii o te ra‘i.  No reira, te taata e faahaehaa ia ’na mai teie nei tamarii iti, o ’na tei rahi a‘e i roto i te Faatereraa arii o te ra‘i,  e te taata o te farii i te hoê tamarii iti mai teie no to ’u nei i‘oa, e farii atoa ïa ia ’u.  Ia ore râ hoê o teie feia o te au i te tamarii rii e tiaturi faahou mai ia ’u no te tahi taata, mea maitai a‘e ia taamuhia i nia i te a‘î o teie taata te hoê ofai oro e hutihia na e te asini, a huri atu ai ia ’na i raro i te moana.  Ia ore te hoê taata e tiaturi faahou mai ia ’u no te tahi atu taata, ua ati ïa teie taata! E hapa iho â te taata, ua ati râ ratou ia ore vetahi e tiaturi faahou mai no te reira.  No reira, ia hapa oe no to oe rima aore ra avae, a tâpû ïa e a faarue atu. Mea maitai a‘e ia tae atu oe i te ora ma te hoê noa rima aore ra avae, i te hurihia oe i roto i te auahi mure ore ma to oe na rima aore ra avae.  Ia hapa atoa oe no to oe mata, a paaro ïa e a faarue atu. Mea maitai a‘e ia tae atu oe i te ora ma te hoê noa mata, i te hurihia oe ma to oe na mata i roto i te auahi o Gehena.* 10  Eiaha ïa outou e vahavaha hoê o teie feia e au i te tamarii rii, te parau atu nei hoi au ia outou e e tia noa to ratou mau melahi i nia i te ra‘i i mua i te aro o to ’u Metua i te ra‘i. 11  *—— 12  Eaha to outou mana‘o? Mai te peu e 100 mamoe ta te hoê taata e ia mo‘e te hoê, e ore anei oia e vaiiho i na 99 i nia i te mou‘a, a haere atu ai e imi i tei mo‘e? 13  E ia itea ia ’na tei mo‘e, oia mau ta ’u e parau atu, e rahi a‘e to ’na oaoa no taua mamoe ra i na 99 tei ore i mo‘e. 14  E ore atoa to ’u* Metua i te ra‘i e hinaaro ia mo‘e hoê noa ’‘e o teie feia e au i te tamarii rii. 15  Hau atu â, ia hara to taeae, a haere e faaite ia ’na i ta ’na hapa* orua ana‘e. Ia faaroo oia ia oe, ua faaho‘i ïa oe i to taeae i nia i te e‘a maitai. 16  Ia ore râ oia e faaroo ia oe, a rave hoê aore ra e piti atu â taata na muri ia oe, no te haapapu i te mau mea atoa maoti te parau a* toopiti aore ra tootoru ite. 17  Ia ore oia e faaroo ia raua, a faaite atu i te amuiraa. Ia ore atoa oia e faaroo i te amuiraa, ia riro ïa oia no oe mai te hoê taata no te mau nunaa ěê e mai te hoê titau tute. 18  Oia mau ta ’u e parau atu: Te mau mea atoa ta outou e taamu i te fenua nei, o te mau mea ïa tei taamu-a‘ena-hia i nia i te ra‘i, e te mau mea atoa ta outou e tatara i te fenua nei, o te mau mea ïa tei tatara-a‘ena-hia i nia i te ra‘i. 19  Oia mau ta ’u e parau faahou atu: Ia tu te mana‘o o toopiti o outou i te fenua nei no nia i te mea faufaa e titauhia ia ani raua, e horoa mai iho â to ’u Metua i te ra‘i. 20  I te vahi hoi e amui ai e piti aore ra e toru ma to ’u nei i‘oa, tei rotopu atoa ïa vau ia ratou.” 21  Haere maira Petero e na ô maira ia ’na: “E te Fatu, ehia taime e tia ’i i to ’u taeae ia hara mai ia ’u e ia faaore au i ta ’na hara? E hitu anei taime?” 22  Na ô atura Iesu ia ’na: “Te parau atu nei au ia oe: Eiaha e hitu taime, e 77 râ. 23  No reira e nehenehe ai e faaau i te Faatereraa arii o te ra‘i i te hoê arii tei hinaaro ia aufau mai ta ’na mau tavini i ta ratou tarahu. 24  I te taime aufauraa, arataihia maira te hoê taata tei tarahu ia ’na 10 000 taleni.* 25  No te mea râ aita e moni ta taua taata ra no te aufau i ta ’na tarahu, faaue atura to ’na fatu ia hoohia oia, ta ’na vahine faaipoipo, ta ’na mau tamarii e ta ’na mau tao‘a atoa ia pee ta ’na tarahu. 26  Tuturi ihora ïa te tavini e taparu maira ia ’na: ‘Tiai rii na oe, e faaho‘i pauroa ’tu iho â vau i ta oe moni.’ 27  Aroha ihora te fatu o taua tavini ra ia ’na, tuu ihora ia ’na e faaore atura i ta ’na tarahu. 28  Haere atura râ taua tavini ra i rapae, ite ihora hoê o to ’na mau hoa tavini tei tarahu ia ’na 100 denari,* haru ihora ia ’na e uumi atura i to ’na arapoa a na ô ai: ‘Faaho‘i pauroa mai i ta ’u moni.’ 29  Tuturi ihora ïa to ’na hoa tavini e taparu maira ia ’na: ‘Tiai rii na oe, e faaho‘i atu iho â vau i ta oe moni.’ 30  Aita râ oia i farii, haere atura râ e faaue atura ia hurihia to ’na hoa tavini i roto i te fare tapearaa e ia pee noa ’tu ta ’na tarahu. 31  I te iteraa to ’na mau hoa tavini i te ohipa i tupu, peapea roa a‘era ratou e haere atura e faatia pauroa i to ratou fatu. 32  Faaue ihora te fatu e tii ia ’na e na ô atura: ‘Tavini ino, ua faaore pauroa vau i ta oe tarahu i to oe taparuraa mai. 33  Eiaha anei ïa oe e aroha* atoa i to hoa tavini, mai ia ’u i aroha ia oe?’ 34  Riri roa ihora to ’na fatu, e tuu atura ia ’na i te mau tiai fare tapearaa e ia pee noa ’tu ta ’na tarahu. 35  E na reira atoa to ’u Metua i te ra‘i ia outou ia ore outou tataitahi e faaore i te hapa a to ’na hoa ma te aau atoa.”

Nota i raro i te api

Aore ra “Basileia.”
Aore ra “taui.”
A hi‘o i te titionare.
Te vai ra teie irava i roto i te tahi mau huriraa Bibilia, aita râ i roto e rave rau papai Heleni tahito fariihia.
Nehenehe atoa e hurihia “to outou.”
“E a‘o ia ’na” na roto i te reo Heleni.
“Te vaha o” na roto i te reo Heleni.
10 000 taleni ario, e 60 000 000 ïa denari. A hi‘o i te titionare.
A hi‘o i te titionare.
Aore ra “aroha hamani maitai.”