Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 17:1-27

HAAPOTORAA O TE MAU TUMU PARAU

  • Te tauiraa to Iesu huru (1-13)

  • Faaroo mai te hoê huero sinapi (14-21)

  • Tohu-faahou-hia to Iesu pohe (22, 23)

  • Aufauhia te tute i te moni no roto mai i te vaha o te i‘a (24-27)

17  E ono mahana i muri a‘e, rave ihora Iesu ia Petero, Iakobo e Ioane to ’na taeae e aratai atura ia ratou i nia i te hoê mou‘a teitei o ratou ana‘e.  Taui ihora te huru o Iesu i mua ia ratou, anaana ihora to ’na mata mai te mahana, e anaana* ihora to ’na ahu mai te maramarama.  E inaha, fa maira Mose raua Elia e te paraparau ra raua e o ’na.  Na ô atura Petero ia Iesu: “E te Fatu, mea fana‘o matou i te tiaraa mai i ǒ nei. Ia hinaaro oe, e faatia vau e toru fare ie i ǒ nei, hoê no oe, hoê no Mose e hoê no Elia.”  Te paraparau noa ra â oia, inaha tapo‘ihia maira ratou e te hoê ata anaana, e na ô maira te hoê reo no roto mai i taua ata ra: “O ta ’u Tamaiti teie, tei herehia, ta ’u i mauruuru roa. A faaroo ia ’na.”  A faaroo ai na pǐpǐ i te reira, mǎta‘u roa a‘era ratou e tipapa ihora i raro.  Tapiri maira Iesu e tapea ihora ia ratou, a na ô ai: “A tia mai. Eiaha e mǎta‘u.”  Hi‘o a‘era ratou, o Iesu ana‘e ta ratou i ite, aore e taata ê atu.  A pou mai ai ratou mai nia mai i te mou‘a, faaue maira Iesu ia ratou: “Eiaha e faaite i te taata i teie orama e ia tia roa mai te Tamaiti a te taata nei mai te pohe mai.” 10  Ui a‘era râ te mau pǐpǐ ia ’na: “No te aha ïa te mau papai parau e parau ai e o Elia na mua te haere mai?” 11  Pahono ihora oia: “Te haere mai nei iho â Elia e e faaho‘i oia i te mau mea atoa mai i te matamua ra. 12  Te parau atu nei râ vau e ua haere ê na mai Elia, e aita ratou i ite e o ’na tera, ua rave râ ia ’na mai ta ratou i hinaaro. Oia atoa te Tamaiti a te taata nei, e rave ino ratou ia ’na.” 13  Taa a‘era i te mau pǐpǐ e o Ioane Bapetizo ta ’na e parau ra. 14  I to ratou haereraa ’tu i te nahoa taata ra, tapiri maira te hoê tane ia Iesu, tuturi ihora i raro i mua ia ’na e na ô maira: 15  “E te Fatu, aroha* mai oe i ta ’u tamaiti, e hopii to ’na e mea ino roa oia. Pinepine oia i te topa i roto i te auahi e i roto atoa i te pape. 16  Ua afai au ia ’na i ta oe mau pǐpǐ ra, aita râ to ’na ma‘i i ora ia ratou.” 17  Na ô atura Iesu: “Auê ïa u‘i ino aore e faaroo, ehia â maororaa e parahi ai au ia outou nei? Ehia â maororaa e faaoromai ai au ia outou? Afai mai ia ’na.” 18  Tama‘i atura Iesu i te demoni, haere maira te demoni i rapae i te tamaroa, e ora ihora te ma‘i o te tamaroa. 19  Haere maira te mau pǐpǐ ia Iesu ra o ratou ana‘e, e na ô maira: “No te aha i ore ai i tia ia matou ia tiavaru i te demoni?” 20  Parau atura Iesu: “No te iti o to outou faaroo. Oia mau ta ’u e parau atu: Ahiri to outou faaroo e mai te hoê huero sinapi* te rahi, e parau outou i teie mou‘a, ‘A haere i ǒ atu,’ e haere iho â taua mou‘a ra, e aore e mea e ore e tia ia outou ia rave.” 21  *—— 22  Tei Galilea Iesu e ta ’na mau pǐpǐ i parau ai oia ia ratou: “E tuuhia te Tamaiti a te taata nei i te rima o to ’na mau enemi, 23  e taparahi pohe ratou ia ’na, e i te toru o te mahana, e faatiahia mai oia.” Oto roa a‘era te mau pǐpǐ. 24  I to ratou taeraa ’tu i Kaperenaumi, haere maira te feia titau i te tute* no te hiero ia Petero ra e na ô maira: “E ore anei ta outou orometua e aufau i te tute no te hiero?” 25  Parau atura Petero: “Oia.” I to ’na râ tomoraa ’tu i roto i te fare, parau ihora Iesu ia ’na: “Eaha to oe mana‘o Simona? E titau te mau arii o te fenua i te mau tute* rau ia vai ma? I ta ratou mau tamarii* anei aore ra ia vetahi ê?” 26  I to Petero parauraa: “Ia vetahi ê,” na ô maira Iesu: “E ore iho â ïa te mau tamarii* e aufau i te tute. 27  Teie râ, ia ore ratou ia inoino mai, e haere oe i tatahi e taora i te mǎtau, e te i‘a matamua e amu, a rave e ia hamǎmǎ oe i te vaha o te i‘a, e ite oe i te hoê moni ario,* o ta oe ïa e hopoi atu ia ratou no tâua.”

Nota i raro i te api

Aore ra “uouo.”
Aore ra “aroha hamani maitai.”
E huero haihai roa teie e raea e 4 metera te teitei ia tupu mai, e amaa to ’na.
Te vai ra teie irava i roto i te tahi mau huriraa Bibilia, aita râ i roto e rave rau papai Heleni tahito fariihia.
“E piti derama” na roto i te reo Heleni, o te moni ïa no e piti mahana ohipa.
Oia hoi te hoê tute na nia i te taata tataitahi.
“Tamaiti” na roto i te reo Heleni.
“Tamaiti” na roto i te reo Heleni.
“Setatera” na roto i te reo Heleni, e maha ïa derama.