Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 16:1-28

HAAPOTORAA O TE MAU TUMU PARAU

  • Aniraa i te hoê tapao (1-4)

  • Hopue a te mau Pharisea e Sadukea (5-12)

  • Te mau taviri o te Faatereraa arii (13-20)

    • Amuiraa niuhia i nia i te hoê pǎpǎ (18)

  • Tohuhia to Iesu pohe (21-23)

  • Pǐpǐ mau a Iesu (24-28)

16  Haere maira te mau Pharisea e te mau Sadukea ia Iesu ra e ani maira i te hoê tapao no te ra‘i mai no te râmâ ia ’na.  Pahono atura oia: “Ua ahiahi ana‘e, e parau outou: ‘E maitai te mahana ananahi, mea uteute hoi te ra‘i,’  e ia poipoi: ‘E ûahia i teie mahana, mea uteute hoi te ra‘i, mea rumaruma atoa râ.’ Ua ite outou i te huru o te mahana ma te hi‘o i te ra‘i, aita râ outou i ite i te tatara i te auraa o te mau tapao o te tau.  Te imi noa nei te hoê u‘i ino e te faaturi* i te hoê tapao. O te tapao a Iona te peropheta ana‘e râ te horoahia ’tu.” Vaiiho ihora oia ia ratou e reva ’tura.  Fano a‘era te mau pǐpǐ i te tahi atu pae, ua mo‘e râ ia ratou i te rave i te faraoa.*  Parau ihora Iesu ia ratou: “A haapao maitai, a ara i te hopue a te mau Pharisea e ta te mau Sadukea.”  Feruri ihora ratou e na ô a‘era te tahi i te tahi: “No te mea paha ïa e ua mo‘e ia tatou te faraoa i parau mai ai oia i te reira.”  Ite ihora Iesu i te reira e na ô atura: “Feia faaroo tapetepete, eaha outou e paraparau ai no te faraoa tei mo‘e ia outou i te rave?  Aita â i taa ’tura ia outou, aita atoa anei outou e haamana‘o ra i na faraoa e pae tei amuhia e na tane e 5 000 e te rahiraa farii ta outou i rave? 10  E na faraoa atoa e hitu tei amuhia e na tane e 4 000 e te rahiraa farii* rahi ta outou i rave? 11  Aita â i taa ’tura ia outou e e ere te faraoa ta ’u e parau ra? Tera râ, a ara i te hopue a te mau Pharisea e te mau Sadukea.” 12  Taa ’tura ia ratou ta Iesu parau e ara eiaha i te hopue faraoa, i te mau haapiiraa râ a te mau Pharisea e te mau Sadukea. 13  I to Iesu taeraa ’tu i te tuhaa fenua o Kaisarea Philipi, ui ihora oia i ta ’na mau pǐpǐ: “O vai te Tamaiti a te taata nei i ta te taata parauraa?” 14  Na ô maira ratou: “O Ioane Bapetizo ta vetahi, o Elia ta te tahi pae, o Ieremia aore ra hoê o te mau peropheta ta te tahi atu.” 15  Parau atura oia: “Outou râ, o vai au i ta outou parauraa?” 16  Pahono maira Simona Petero: “O te Mesia oe, te Tamaiti a te Atua ora.” 17  Parau atura Iesu ia ’na: “Ia oaoa oe, Simona te tamaiti a Iona, e ere na te taata* i faaite ia oe i te reira, na to ’u râ Metua i te ra‘i. 18  E parau atoa ’tu vau ia oe: O Petero oe. E patu vau i ta ’u amuiraa i nia i teie pǎpǎ, e e ore te uputa o te Apoo* e upootia i nia i te reira. 19  E horoa ’tu vau ia oe i te mau taviri o te Faatereraa arii* o te ra‘i, e o ta oe e taamu i te fenua nei, ua taamu-a‘ena-hia ïa i nia i te ra‘i, e o ta oe e tatara i te fenua nei, ua tatara-a‘ena-hia ïa i nia i te ra‘i.” 20  Faaue maitai atura Iesu i te mau pǐpǐ eiaha e faaite e o ’na te Mesia. 21  Mai reira mai, haamata ihora Iesu i te faataa i ta ’na mau pǐpǐ e ia haere oia i Ierusalema e tia ’i, ia hamani-ino-hia oia e te mau aratai ati Iuda, te mau tahu‘a tiaau e te mau papai parau, ia haapohehia e ia faatiahia mai i te toru o te mahana. 22  Aratai rii ê ihora Petero ia Iesu e tama‘i atura ia ’na a na ô ai: “E te Fatu, eiaha oe e na reira i te parau, e ore roa oe e roohia i teie mau mea.” 23  Huri tua maira râ Iesu, e na ô ihora ia Petero: “Haere na muri mai ia ’u, Satani! E turoriraa oe no ’u, no te mea e ere to oe mana‘o i to te Atua, to te taata râ.” 24  Parau atura Iesu i ta ’na mau pǐpǐ: “Te taata e hinaaro e pee mai ia ’u, ia haapae ïa ia ’na iho e ia rave i ta ’na pou haamauiuiraa,* a pee noa mai ai ia ’u. 25  O tei tapea hoi i to ’na ora,* e ere ïa oia i te reira. O tei ere râ i to ’na ora* no ’u nei, e noaa faahou mai ïa ia ’na te reira. 26  Eaha hoi te apî ia noaa i te hoê taata te ao taatoa, a ere ai râ oia i to ’na ora?* Aore ra eaha ta te hoê taata e horoa no to ’na ora?* 27  E haere mai hoi te Tamaiti a te taata nei ma te hanahana o to ’na Metua e ta ’na mau melahi, i reira oia e faautua ’i aore ra e haamaitai ai i te taata atoa ia au i ta ratou i rave. 28  Oia mau ta ’u e parau atu: Te vai ra vetahi o te feia i ǒ nei o te ore e pohe hou a ite ai i te Tamaiti a te taata nei ia haere mai i roto i ta ’na Faatereraa arii.”

Nota i raro i te api

Aore ra “taiva.”
Aore ra “pane.”
Aore ra “farii maa.”
“Te i‘o e te toto” na roto i te reo Heleni.
Aore ra “Hade,” oia hoi te menema o te huitaata. A hi‘o i te titionare.
Aore ra “Basileia.”
A hi‘o i te titionare.
Heleni pusuke. A hi‘o i te titionare.
Heleni pusuke. A hi‘o i te titionare.
Heleni pusuke. A hi‘o i te titionare.
Heleni pusuke. A hi‘o i te titionare.