Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 15:1-39

HAAPOTORAA O TE MAU TUMU PARAU

  • Faaite-roa-hia mai te tutuu a te taata (1-9)

  • No roto mai i te aau te mea viivii (10-20)

  • Faaroo rahi o te vahine no Phenikia (21-28)

  • Faaora Iesu e rave rahi ma‘i (29-31)

  • Faatamaa Iesu e 4 000 tane (32-39)

15  Haere maira te tahi mau Pharisea e papai parau ia Iesu ra na Ierusalema mai, e na ô maira:  “No te aha ta oe mau pǐpǐ e ofati ai i te tutuu a te feia no tahito ra? Eita ratou e horoi i to ratou rima* ia tamaa ratou.”  Pahono ihora oia ia ratou: “No te aha outou e ofati ai i te mau faaueraa a te Atua no ta outou tutuu?  Ua parau te Atua: ‘A faatura i to metua tane e to metua vahine,’ e ‘O tei faaino* i to ’na metua tane aore ra metua vahine, ia haapohehia ïa.’  Outou râ, te na ô nei ïa: ‘Ia parau te hoê taata i to ’na metua tane aore ra metua vahine: “E ô pûpûhia i te Atua ta ’u mau mea atoa o ta ’u e nehenehe e faaohipa no te tauturu ia oe,”  aita ïa e faufaa ia faatura oia i to ’na metua tane.’ Ua haafaufaa ore ïa outou i te parau a te Atua na roto i ta outou tutuu.  Haavarevare ma, ua tano Isaia i te tohuraa no nia ia outou, i to ’na parauraa:  ‘Te faatura nei te vaha o teie mau taata ia ’u, tei te atea ê râ to ratou aau ia ’u.  Mea faufaa ore to ratou haamori-noa-raa mai ia ’u, te haapii nei hoi ratou ia vetahi ê i te mau faaueraa a te taata.’” 10  Pii ihora Iesu i te nahoa taata ia tapiri mai, e na ô atura: “A faaroo mai e ia taa ia outou te auraa: 11  E ere no ta te hoê taata e amu e viivii ai oia, no te mea râ e na roto mai i to ’na vaha e viivii ai oia.” 12  Haere maira te mau pǐpǐ ia Iesu ra, e na ô maira: “Ua ite anei oe e ua inoino te mau Pharisea no ta oe i parau?” 13  Pahono atura oia: “Te mau raau atoa e ere na to ’u Metua i te ra‘i i tanu, e iriti-tumu-hia ïa. 14  Vaiiho noa ’tu ia ratou. E aratai matapo ratou. Ia aratai te hoê matapo i te tahi matapo, e topa ïa raua toopiti i roto i te apoo.” 15  Parau maira Petero: “A faataa mai na i te faahoho‘araa.” 16  Na ô atura Iesu: “Aita â i taa ’tura ia outou? 17  Aita outou i ite e te mau mea atoa e ô i roto i te vaha, e na roto atu ïa i te opu a faaruehia ’tu ai i te haumitiraa? 18  Te mau mea râ e na roto mai i te vaha, no roto mai ïa i te aau, no taua mau mea ra e viivii ai te hoê taata. 19  No roto mai hoi i te aau te mana‘o ino, te taparahi-pohe-raa, te faaturi, te mau peu taotoraa tia ore,* te eiâ, te parau haavare, te faaino. 20  No teie mau mea e viivii ai te hoê taata. E ere râ no te tamaaraa ma te ore e horoi i te rima* e viivii ai oia.” 21  Reva ’tura Iesu e haere ihora i na tuhaa fenua o Turia e Sidona. 22  E inaha, haere maira te hoê vahine no Phenikia no taua tuhaa fenua mai ra, e pii maira: “Aroha* mai ia ’u, e te Fatu, Tamaiti a Davida. Ua uruhia ta ’u tamahine e te demoni o te haamauiui nei ia ’na.” 23  Aita râ oia i pahono atu. Haere maira ïa ta ’na mau pǐpǐ e na ô maira: “A parau ia ’na ia haere, te pii noa mai ra hoi oia.” 24  Pahono atura oia: “Aita vau i tonohia i te mau taata atoa, i te mau mamoe ana‘e râ tei mo‘e o te utuafare o Iseraela.” 25  Tera râ, tapiri maira te vahine e tahopu ihora ia Iesu a parau ai: “E te Fatu, a tauturu mai ia ’u!” 26  Na ô atura oia: “E ere mea maitai ia rave i te faraoa* a te mau tamarii, a horoa ’tu ai na te mau fanau‘a urî.” 27  Parau maira oia: “Oia mau e te Fatu, e amu atoa râ te mau fanau‘a urî i te mau hu‘ahu‘a faraoa e topa mai nia mai i te amuraa maa a to ratou fatu.” 28  Pahono atura Iesu: “E faaroo rahi to oe. Ta oe e hinaaro, ia tupu ïa.” I reira iho ora a‘era ta ’na tamahine. 29  Reva ’tura Iesu mai taua vahi ra e tae ihora i te pae miti o Galilea. Haere atura oia i nia i te mou‘a, e parahi ihora. 30  Haere maira te hoê nahoa rahi ia ’na ra, ma te afai atoa mai i te piri‘o‘i, te huma mero, te matapo, te vava, e e rave rahi atu â taata ma‘i, tuu maira ia ratou i te pae avae o Iesu, e faaora ihora Iesu i to ratou ma‘i. 31  Maere roa a‘era te nahoa a ite ai ratou i te vava i te paraparauraa, te piri‘o‘i i te haereraa e te matapo i te iteraa, e faahanahana ’tura ratou i te Atua o Iseraela. 32  Pii ihora râ Iesu i ta ’na mau pǐpǐ ia haere mai e na ô atura: “Te aroha nei au i teie nahoa taata, no te mea a toru atura mahana to ratou faaearaa mai ia ’u nei e aita ta ratou e maa faahou. Eita vau e hinaaro e faaho‘i ia ratou e poia ra,* a‘unei ratou e matapoirihia ’i i nia i te purumu.” 33  Parau maira râ te mau pǐpǐ: “Ihea i teie vahi mo‘emo‘e e noaa mai ai te faraoa e paia ’i teie rahiraa taata?” 34  Na ô atura Iesu: “Ehia faraoa ta outou?” Parau maira ratou: “E hitu, e maa i‘a rii atoa.” 35  Faaue ihora oia i te nahoa ia parahi, 36  rave ihora i na faraoa e hitu e na i‘a, haamauruuru a‘era i te Atua, ofati ihora i te faraoa e horoa ’tura i te mau pǐpǐ o tei opere na te nahoa. 37  Tamaa a‘era ratou pauroa, paia ’tura e haaputu atura i te toea faraoa i roto e hitu farii* rahi î maitai. 38  Te feia i tamaa, e 4 000 ïa tane, aita i taiohia te vahine e te tamarii rii. 39  E oti a‘era te nahoa i te faaho‘ihia, haere ihora Iesu i nia i te poti e fano atura i te tuhaa fenua o Magadana.

Nota i raro i te api

Oia hoi ia au i te mau peu a te ati Iuda.
Aore ra “tuhi.”
A hi‘o i te titionare.
Oia hoi ia au i te mau peu a te ati Iuda.
Aore ra “Aroha hamani maitai.”
Aore ra “pane.”
Aore ra “aita i tamaa.”
Aore ra “farii maa.”