Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 14:1-36

HAAPOTORAA O TE MAU TUMU PARAU

  • Tâpûhia te upoo o Ioane Bapetizo (1-12)

  • Faatamaa Iesu e 5 000 tane (13-21)

  • Haere Iesu na nia i te miti (22-33)

  • Faaoraraa ma‘i i Genesareta (34-36)

14  I taua tau ra, ua faarooroo Heroda te arii* i ta Iesu i rave  e ua parau oia i ta ’na mau tavini: “O Ioane Bapetizo taua taata ra. Ua tia faahou mai oia mai te pohe mai, no reira oia i rave ai i teie mau ohipa mana.”  I haru na Heroda* ia Ioane, i taamu na ia ’na a tuu atu ai i roto i te tapearaa no Herodia te vahine faaipoipo a Philipa to ’na taeae.  I parau na hoi Ioane ia Heroda: “E ere i te mea tano ia au i te ture ia faaipoipo oe ia ’na.”  Hinaaro a‘era Heroda e taparahi pohe ia Ioane, ua mǎta‘u râ oia i te nahoa taata o tei mana‘o e e peropheta Ioane.  A tupu ai râ te oroa fanauraa o Heroda, ori ihora te tamahine a Herodia i mua i te mau manihini e au roa a‘era Heroda  i horeo ai oia e horoa ’tu i ta ’na atoa e ani mai.  E mai ta to ’na metua vahine i faaue, parau atura oia: “A horoa mai i te upoo o Ioane Bapetizo i roto i te hoê farii maa parahurahu.”  Peapea ihora te arii, no ta ’na râ i horeo e no te feia e tamaa ra* e o ’na, faaue ihora oia ia horoahia te upoo o Ioane i te tamahine ra. 10  Tono atura ïa oia i te taata e tâpû i te upoo o Ioane i te fare tapearaa. 11  Hopoihia maira to ’na upoo i roto i te hoê farii maa parahurahu e horoahia ’tura i te tamahine ra, o tei afai atu i to ’na metua vahine. 12  I muri iho, haere maira te mau pǐpǐ a Ioane e tii i to ’na tino, huna a‘era e haere atura e faaite ia Iesu. 13  I to Iesu iteraa i te reira, faarue maira oia i taua vahi ra na nia i te poti e fano atura i te hoê vahi mo‘emo‘e o ’na ana‘e. A faaroo ai râ te nahoa taata i te reira, pee atura ratou ia ’na na raro noa mai to ratou mau oire mai. 14  I to Iesu pouraa ’tu, ite ihora oia i te hoê nahoa rahi, aroha ’tura ia ratou e faaora ’tura i te feia ma‘i. 15  E ahiahi ihora, haere maira ta ’na mau pǐpǐ ia ’na ra e na ô maira: “E vahi mo‘emo‘e teie e ua ahiahi ê na. A tuu na i te nahoa ia haere na te mau oire rii e hoo mai i te maa na ratou.” 16  Parau atura râ Iesu: “Aita e faufaa ia haere ratou, na outou e horoa i te maa na ratou.” 17  Na ô maira ratou ia ’na: “E pae ana‘e faraoa* e e piti i‘a ta matou.” 18  Parau atura oia: “Afai mai na i ǒ nei ia ’u nei.” 19  Faaue ihora oia i te nahoa e parahi i nia i te matie. Rave ihora oia i na faraoa e pae e na i‘a e piti, hi‘o a‘era i nia i te ra‘i, haamaitai ihora i te Atua, ofati ihora i na faraoa e horoa ’tura i te mau pǐpǐ o tei opere na te nahoa. 20  Tamaa a‘era ratou pauroa, paia ’tura e haaputu atura i te toea faraoa i roto 12 farii î maitai. 21  Te feia i tamaa, e piri ïa i te 5 000 tane, aita i taiohia te vahine e te tamarii rii. 22  I reira iho, parau atura Iesu i ta ’na mau pǐpǐ ia haere i nia i te poti e ia fano na mua ia ’na i te tahi a‘e pae, a faaho‘i ai oia i te nahoa taata. 23  E oti a‘era te nahoa i te faaho‘ihia, haere atura Iesu ana‘e i nia i te mou‘a e pure. I te poraa, o ’na ana‘e to reira. 24  Ua atea ê na te poti e rave rahi hanere metera* i te fenua e te faaû ra i te mataare no te mata‘i e na mua mai ra. 25  I te maha râ o te araraa o te rui,* haere maira Iesu i ta ’na mau pǐpǐ ra na nia i te miti. 26  I to ratou iteraa mai ia ’na i te haereraa na nia i te miti, riaria a‘era ratou e na ô atura: “E orama!” Tuô atura ratou no te mehameha. 27  Parau ihora râ Iesu ia ratou: “Ia itoito outou! O vau teie, eiaha e mǎta‘u.” 28  Na ô atura Petero: “E te Fatu, i te mea e o oe teie, a faaue mai na ia ’u ia haere atu ia oe ra na nia i te miti.” 29  Parau maira Iesu: “Haere mai!” Pou ihora Petero mai nia mai i te poti, e haere tia ’tura ia Iesu ra na nia i te miti. 30  I to ’na râ hi‘oraa i te mata‘i, mǎta‘u ihora oia. E a haamata ’i oia i te mure i raro i te miti, pii atura oia: “E te Fatu, faaora mai ia ’u!” 31  Toro oioi atura Iesu i to ’na rima, haru maira ia Petero e na ô atura: “Taata faaroo tapetepete, eaha oe i feaa ’i?” 32  Pauma ’tura raua i roto i te poti e pohe ihora te mata‘i. 33  Tahopu maira te mau pǐpǐ i roto i te poti ia ’na a parau ai: “E Tamaiti mau â oe na te Atua.” 34  Fano atura ratou i te tahi atu pae e tae atura i Genesareta. 35  I te iteraa to reira e o Iesu tera, haere a‘era ratou e faaara i to taua fenua taatoa ra, e hopoihia maira ia ’na ra te feia ma‘i atoa. 36  Taparu maira ratou ia ’na ia tapea noa ’tu ratou i to ’na hiti ahu. Ora roa maira te feia atoa tei tapea i to ’na hiti ahu.

Nota i raro i te api

“Teterareha” na roto i te reo Heleni.
Oia hoi Heroda Anitipa. A hi‘o i te titionare.
Aore ra “e tarava ra i te amuraa maa.”
Aore ra “pane.”
“E rave rahi setadia” na roto i te reo Heleni. Hoê setadia, 185 ïa metera.
Mai te area hora 3 i te aahiata e tae atu i te hitiraa mai o te mahana i te area hora 6.