Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 13:1-58

HAAPOTORAA O TE MAU TUMU PARAU

  • FAAHOHO‘ARAA NO NIA I TE FAATERERAA ARII (1-52)

    • Te taata ueue huero (1-9)

    • Tumu e faaohipa ’i Iesu i te mau faahoho‘araa (10-17)

    • Faataahia te faahoho‘araa o te taata ueue huero (18-23)

    • Te sitona e te zizania (24-30)

    • Te huero sinapi e te hopue (31-33)

    • Faaohiparaa i te mau faahoho‘araa, ia tupu ïa te hoê parau tohu (34, 35)

    • Faataahia te faahoho‘araa o te sitona e te zizania (36-43)

    • Tao‘a hunahia e te poe nehenehe (44-46)

    • Te upe‘a (47-50)

    • Tao‘a apî e tao‘a tahito (51, 52)

  • Aita Iesu i fariihia i to ’na iho fenua (53-58)

13  I taua mahana ra, haere atura Iesu i rapae i taua fare ra e parahi ihora i tatahi.  E nahoa rahi tei putuputu mai ia ’na ra, haere atura oia i nia i te hoê poti e parahi ihora, a tia noa ’i te taata atoa i tatahi.  Haapii atura oia e rave rahi parau mau maoti te mau faahoho‘araa a na ô ai: “Inaha, e taata ueue tei haere e ueue i te huero.  A ueue ai oia, mairi ihora te tahi mau huero na te hiti purumu, maue maira te mau manu e amu a‘era i te mau huero.  Mairi ihora te tahi atu mau huero i te vahi ofaifai aita i rahi te repo e tupu ihora, no te mea mea iti te repo i reira.  I te puairaa mai râ te mahana, paapaa a‘era te mau huero e mǎrô atura no te mea aita i a‘a.  Mairi ihora te tahi atu i roto i te mau raau taratara, tupu maira te mau raau taratara e tapo‘i a‘era i te mau huero.  Mairi ihora râ te tahi atu i nia i te repo maitai, e hotu maira taihanere ta teie, taiono ahuru ta tera e taitoru ahuru ta te tahi atu.  E tari‘a to ’na, a faaroo ïa.” 10  Haere maira te mau pǐpǐ e parau maira ia ’na: “No te aha oe e paraparau ai ia ratou ma te faaohipa i te mau faahoho‘araa?” 11  Pahono ihora oia ia ratou: “Ua horoahia ia outou te taaraa i te mau parau huna mo‘a o te Faatereraa arii* o te ra‘i, aita râ i horoahia ia ratou. 12  Te taata hoi e faufaa ta ’na, e horoahia ’tu â ïa ta ’na e e rahi atu â. Te taata râ aita ta ’na e faufaa, e iriti-ê-atoa-hia ïa ta ’na. 13  No reira vau e paraparau ai ia ratou na roto i te mau faahoho‘araa, te hi‘o ra hoi ratou aita râ e haro‘aro‘a ra i ta ratou e hi‘o ra, te faaroo ra aita râ e taa ra i ta ratou e faaroo ra e te auraa atoa o te reira. 14  I nia ia ratou e tupu ai te parau tohu a Isaia e na ô ra: ‘E faaroo iho â outou, eita roa râ e taa i te auraa. E hi‘o iho â outou, eita roa râ e ite. 15  Ua etaeta hoi te aau o teie nunaa, ua tapiri ratou i to ratou tari‘a e ua tapo i to ratou mata, ia ore roa hoi to ratou mata e ite e to ratou tari‘a e faaroo e to ratou aau e taa i te auraa e ia ore roa ratou e ho‘i mai, a ore atu ai au e faaora ia ratou.’ 16  Te oaoa nei râ outou, no te mea te ite nei to outou mata e te faaroo nei to outou tari‘a i teie mau mea. 17  Oia mau ta ’u e parau atu: Mea rahi te peropheta e te taata parau-tia tei hinaaro e ite i te mau mea ta outou e hi‘o nei, aita râ i ite, e faaroo atoa i te mau mea ta outou e faaroo nei, aita râ i faaroo. 18  E teie nei, a faaroo na i te auraa o te faahoho‘araa o te taata tei ueue i te huero. 19  Te hiti purumu i ueuehia ’i te huero, o te taata ïa e faaroo i te parau o te Faatereraa arii ma te ore e taa i te auraa, e haere mai te varua ino* e rave ê i tei ueuehia i roto i to ’na aau. 20  Te vahi ofaifai i ueuehia ’i te huero, o te taata ïa e faaroo i te parau e e farii oioi i te reira ma te oaoa. 21  Aita râ te parau i a‘a i roto i to ’na aau, maa taime noa ïa to ’na fariiraa i te reira, e i te tupuraa te ati aore ra te hamani-ino-raa no te parau, turori oioi atura oia. 22  Te mau raau taratara i mairi ai te huero, o te taata ïa e faaroo i te parau, ua tapo‘i râ te haapeapearaa no te oraraa i roto i teie faanahoraa o te ao nei* e te mana haavarevare o te tao‘a i te parau, e aita ’tura i hotu mai. 23  Te repo maitai i ueuehia ’i te huero, o te taata ïa e faaroo i te parau ma te taa i te auraa, hotu maira ta ’na, taihanere ta teie, taiono ahuru ta tera e taitoru ahuru ta te tahi atu.” 24  Horoa ’tura oia i te tahi atu faahoho‘araa a parau ai: “E nehenehe e faaau i te Faatereraa arii o te ra‘i i te hoê taata tei ueue i te huero maitai i roto i ta ’na faaapu. 25  A taoto noa ’i râ te taata atoa, haere maira to ’na enemi e ueue i te zizania* i te vahi i ueuehia ’i te sitona, e haere ê atura. 26  I te oteoraa mai te sitona e te hoturaa mai, tupu atoa maira te zizania. 27  Haere maira te mau tavini a te fatu fare, e na ô maira ia ’na: ‘E te Fatu, e ere anei i te huero maitai ta oe i ueue i roto i ta oe faaapu? Nohea mai ïa te zizania?’ 28  Parau atura oia: ‘Na te hoê enemi i rave i te reira.’ Na ô maira te mau tavini: ‘E hinaaro anei oe ia haere matou e hutihuti i te zizania?’ 29  Parau ihora oia: ‘Eiaha, a‘unei outou e hutihuti mai ai i te zizania e te sitona atoa. 30  A vaiiho ia tupu apipiti e ia auhune noa ’tu, e ia tae i te ootiraa, na ’u e parau i te feia ooti: A hutihuti na mua i te zizania e a taamu ia taninahia i te auahi e a haaputu i muri iho i te sitona i roto i ta ’u fare vairaa maa.’” 31  Horoa ’tura oia i te tahi atu faahoho‘araa a parau ai: “E au te Faatereraa arii o te ra‘i i te hoê huero sinapi* ta te hoê taata i rave e i tanu i roto i ta ’na faaapu. 32  O te huero nainai roa ’‘e ïa o te mau huero atoa, ia tupu mai râ, e rahi a‘e ïa i te mau maa tupu atoa, a riro atu ai ei tumu raau e i nia i to ’na mau amaa e haere mai ai e e parahi ai te mau manu o te reva.” 33  Parau atura oia i te tahi atu faahoho‘araa: “E au te Faatereraa arii o te ra‘i i te hopue ta te hoê vahine i rave e i anoi i roto e toru faito faraoa ota e ia maraa noa ’tu te faraoa ôihia taatoa.” 34  Haapii atura Iesu i teie mau mea i te nahoa taata maoti te mau faahoho‘araa. Oia mau, maoti noa te mau faahoho‘araa e haapii ai oia ia ratou, 35  ia tupu hoi tei tohuhia e te peropheta: “E parau ta ’u vaha i te mau faahoho‘araa. E faaite haere au i te mau mea hunahia mai te omuaraa mai â.”* 36  I muri a‘e i to Iesu faaho‘iraa i te nahoa taata, tomo atura oia i roto i te hoê fare. Haere maira ta ’na mau pǐpǐ ia ’na ra e parau maira: “A faataa mai na i te faahoho‘araa o te zizania i roto i te faaapu.” 37  Na ô atura oia ia ratou: “Te taata tei ueue i te huero maitai, o te Tamaiti ïa a te taata nei, 38  te faaapu, o te ao nei ïa. Te huero maitai, o te mau tamarii* ïa a te Faatereraa arii, area te zizania, o te mau tamarii ïa a te varua ino, 39  e te enemi tei ueue i te zizania, o te Diabolo ïa. Te ootiraa, o te anotau hopea ïa o te hoê faanahoraa o te ao nei,* e te feia ooti, o te mau melahi ïa. 40  Mai te zizania tei taamuhia a taninahia ’tu ai i te auahi, oia atoa ïa i te anotau hopea o te faanahoraa o te ao nei.* 41  E tono te Tamaiti a te taata nei i ta ’na mau melahi, e na ratou e iriti ê mai roto mai i ta ’na Faatereraa arii i te feia atoa e faaturori ia vetahi ê e te feia e ofati ra i te ture, 42  a huri atu ai ia ratou i roto i te auahi ura, i reira ratou e ta‘i ai e to ratou niho e ma‘u‘u ai i te ahoaho. 43  I reira te feia parau-tia e anaana ’i mai te mahana i roto i te Faatereraa arii a to ratou Metua. E tari‘a to ’na, a faaroo ïa. 44  E au te Faatereraa arii o te ra‘i i te hoê tao‘a tei hunahia i te hoê tuhaa fenua, ta te hoê taata i ite e i huna faahou, e no to ’na oaoa, haere atura oia e hoo pauroa i ta ’na mau mea, e hoo maira i taua tuhaa fenua ra. 45  E au atoa te Faatereraa arii o te ra‘i i te hoê taata hoohoo ratere e imi ra i te poe nehenehe. 46  I to ’na iteraa i te hoê poe moni rahi, haere atura oia e ru a‘era i te hoo pauroa i ta ’na mau mea, e hoo maira i taua poe ra. 47  E au atoa te Faatereraa arii o te ra‘i i te hoê upe‘a tei tuuhia i raro i te miti e ua ati te mau huru i‘a atoa. 48  I te îraa te upe‘a, ume maira te mau ravaai i te upe‘a i tatahi, parahi ihora, haaputu a‘era i te i‘a maitatai i roto i te farii, faarue atura râ i te i‘a eita e amuhia. 49  Oia atoa i te anotau hopea o te faanahoraa o te ao nei.* E haere mai te mau melahi e faataa ê i te feia ino e te feia parau-tia, 50  a huri atu ai i te feia ino i roto i te auahi ura, i reira ratou e ta‘i ai e to ratou niho e ma‘u‘u ai i te ahoaho. 51  Ua taa anei ia outou te auraa o teie mau mea atoa?” Parau maira ratou ia ’na: “E.” 52  Na ô ihora oia ia ratou: “Ia ite mai ïa outou e e au te mau orometua haapii atoa tei haapiihia no nia i te Faatereraa arii o te ra‘i i te hoê fatu fare o te rave mai roto mai i ta ’na mau tao‘a i te mea apî e te mea tahito atoa.” 53  E oti a‘era teie mau faahoho‘araa i te faaitehia e Iesu, reva ’tura oia. 54  Tae atura oia i to ’na iho fenua, haapii ihora i to reira mau taata i roto i ta ratou sunago, maere ihora ratou e na ô a‘era: “Nohea mai te paari o teie taata e to ’na puai no te faatupu i teie mau ohipa mana? 55  E ere anei teie i te tamaiti a te tamuta? E ere anei o Maria te i‘oa o to ’na metua vahine, e o Iakobo, Iosepha, Simona e Iuda to ’na mau taeae? 56  E ere anei e tei ǒ tatou nei atoa to ’na mau tuahine? Nohea mai ïa te paari o teie taata e to ’na puai no te faatupu i teie mau ohipa mana?” 57  No reira, aita ratou i tiaturi ia ’na. Parau atura râ Iesu ia ratou: “E faaturahia te hoê peropheta i te mau vahi atoa, area i to ’na iho fenua e i roto i to ’na iho utuafare, eita ïa.” 58  Aita i rahi te mau ohipa mana ta Iesu i faatupu i reira no to ratou ereraa i te faaroo.

Nota i raro i te api

Aore ra “Basileia.”
Aore ra “Satani.”
Aore ra “teie tau.” A hi‘o i te titionare.
E aihere taero teie tei hoho‘a i te sitona.
E huero haihai roa teie e raea e 4 metera te teitei ia tupu mai, e amaa to ’na.
Nehenehe atoa e hurihia “mai te omuaraa mai â o te ao nei.”
“Tamaiti” na roto i te reo Heleni.
Aore ra “te hoê tau.” A hi‘o i te titionare.
Aore ra “te tau.” A hi‘o i te titionare.
Aore ra “te tau.” A hi‘o i te titionare.