Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 12:1-50

HAAPOTORAA O TE MAU TUMU PARAU

  • O Iesu “te Fatu o te Sabati” (1-8)

  • Faaorahia te hoê tane rima mǎrô (9-14)

  • Tavini herehia a te Atua (15-21)

  • Tiavaruhia te mau demoni maoti te varua mo‘a (22-30)

  • Hara o te ore e faaorehia (31, 32)

  • Itehia te tumu raau i to ’na mau hotu (33-37)

  • Tapao a Iona (38-42)

  • Ia ho‘i mai te varua viivii (43-45)

  • To Iesu mau taeae e metua vahine (46-50)

12  I reira, haere atura Iesu na roto i te mau faaapu sitona i te Sabati.* Poia a‘era ta ’na mau pǐpǐ, hutihuti ihora i te huero sitona e amu atura.  Ite a‘era te mau Pharisea e na ô atura ia Iesu: “A hi‘o na! Te rave nei ta oe mau pǐpǐ i tei opanihia ia rave i te Sabati.”  Parau maira oia ia ratou: “Aita outou i taio i ta Davida e to ’na mau taata i rave a poia ’i ratou?  Ua tomo oia i roto i te fare o te Atua e ua amu ratou i te mau pane pûpûhia,* tei opanihia ia ’na e i to ’na mau taata ia amu. O te mau tahu‘a ana‘e te nehenehe e amu.  Aita atoa anei outou i taio i roto i te ture a Mose e i te Sabati e rave te mau tahu‘a i te ohipa i te hiero e aore ratou i hara?  Te parau atu nei râ vau e to ǒ nei te hoê taata tei hau a‘e i te hiero.  Ahiri râ outou i taa i te auraa o teie parau: ‘O te aroha hamani maitai ta ’u e hinaaro eiaha te tusia,’ e ore ïa outou e faahapa i te feia hapa ore.  E Fatu hoi te Tamaiti a te taata nei no te Sabati.”  Faarue ihora oia i taua vahi ra, haere atura i roto i ta ratou sunago, 10  e inaha, e tane rima mǎrô* to reira! Ui maira vetahi ia Iesu: “Mea tano anei ia au i te ture ia faaora i te ma‘i i te Sabati?” Te imi ra hoi ratou i te ravea no te faahapa ia ’na. 11  Parau atura Iesu ia ratou: “O vai ïa taata i rotopu ia outou hoê ana‘e mamoe ta ’na o te topa i roto i te hoê apoo i te Sabati, e ore e tii e huti mai i ta ’na mamoe i rapae? 12  Mea faufaa a‘e hoi te taata i te mamoe! No reira, mea tano ia au i te ture ia rave i te mea maitai i te Sabati.” 13  Na ô atura oia i te tane rima mǎrô: “A toro mai na i to rima.” Toro maira oia i to ’na rima e ora roa ’tura. 14  Haere atura te mau Pharisea i rapaeau e opua a‘era e haapohe ia Iesu. 15  I to Iesu iteraa i te reira, reva ’tura oia. E rave rahi taata tei pee ia ’na, e ua faaora oia i to ratou ma‘i, 16  ua faaue maitai râ oia ia ratou eiaha e faaite o vai oia, 17  ia tupu hoi ta te peropheta Isaia i parau: 18  “Teie ta ’u tavini ta ’u i maiti, mea here na ’u ia ’na e ua mauruuru roa vau* ia ’na! E tuu vau i to ’u varua i nia ia ’na, e na ’na e faataa i te feia o te mau nunaa ěê eaha te parau-tia. 19  E ore oia e tatama‘i, e ore e tutuô, e ore atoa te taata e faaroo i to ’na reo na te mau purumu rahi. 20  E ore oia e taataahi i te aeho paruparu, e ore atoa e tupohe i te uiti e ama rii noa ra e ia faatupu roa oia i te parau-tia. 21  Oia mau, na roto i to ’na i‘oa e tiai ai te mau nunaa i te mea maitai.” 22  Afai maira ratou ia ’na ra i te hoê taata tei uruhia e te demoni, e matapo hoi e te vava, faaora ihora oia ia ’na, paraparau ihora taua vava ra e ite atoa ’tura oia. 23  Maere ihora te nahoa taata e na ô atura: “E ere anei o te Tamaiti a Davida teie?” 24  I to te mau Pharisea faarooraa i te reira, parau a‘era ratou: “I te mana noa o Belezebuba,* te raatira o te mau demoni, e tiavaru ai tena taata i te mau demoni.” 25  Ua ite râ Iesu i to ratou mana‘o e parau atura: “Ia amahamaha te hoê faatereraa, e mou te reira, e ia amahamaha te hoê oire aore ra te hoê utuafare, e taa ê te tahi i te tahi. 26  Oia atoa, ia tiavaru Satani ia Satani, ua amahamaha ïa oia, e nafea ïa ta ’na faatereraa e mau ai? 27  Hau atu â, mai te peu e i te mana o Belezebuba e tiavaru ai au i te mau demoni, i to vai ïa mana e tiavaru ai ta outou mau tamarii* i te mau demoni? No reira, na ratou e faahapa ia outou. 28  Mai te peu râ e i te varua o te Atua e tiavaru ai au i te mau demoni, ua roohia ïa outou e te Faatereraa arii a te Atua* ma te mana‘o-ore-hia. 29  E nafea atoa te hoê taata e tomo ai i roto i te fare o te hoê taata puai a rave atu ai i ta ’na mau tao‘a? E taamuamu ïa oia na mua i taua taata puai ra, a eiâ ’tu ai i ta ’na mau tao‘a. 30  Te taata o te ore e turu mai ia ’u, te patoi mai nei ïa ia ’u, e o te ore e haaputu mai i te taata e o vau atoa nei, te haapurara nei ïa. 31  No reira, te parau atu nei au e e faaorehia te mau hara e faaino atoa a te taata, area te faaino i te varua mo‘a, e ore ïa e faaorehia. 32  Ei hi‘oraa, o te faaino i te Tamaiti a te taata nei, e faaorehia ïa ta ’na hara, area o te faaino i te varua mo‘a, e ore ïa e faaorehia ta ’na hara i roto i teie faanahoraa o te ao nei* e to a muri a‘e atoa. 33  Ia aupuru outou i te tumu raau, e maa maitai ïa te hotu mai, ia ore râ outou e aupuru i te tumu raau, e maa ino ïa te hotu mai, na te maa hoi e faaite e tumu raau maitai anei aore ra eita. 34  Fanau‘a ophi taero ma, e nafea e tia ’i ia outou ia parau i te mea maitai, e feia ino hoi outou? No te î o te aau e parau ai te vaha. 35  E parau te taata maitai i te mea maitai, no te mea ua î to ’na aau i te mea maitai, area te taata ino, e parau ïa i te mea ino, no te mea ua î to ’na aau i te mea ino. 36  Te faaite atu nei râ vau e ia tae i te Mahana Haavaraa, e haavahia te taata no ta ’na mau parau faufaa ore atoa, 37  no ta oe hoi mau parau e faarirohia ’i oe ei taata parau-tia, e no ta oe mau parau e faahapahia ’i oe.” 38  Pahono a‘era te tahi mau papai parau e Pharisea ia ’na a na ô ai: “E te Orometua, te hinaaro nei matou ia faaite mai oe i te tahi tapao.” 39  Parau atura Iesu ia ratou: “Te imi noa nei te hoê u‘i ino e te faaturi* i te tahi tapao, o te tapao a Iona te peropheta ana‘e râ te horoahia ’tu. 40  I vai na hoi Iona i roto i te opu o te hoê i‘a rahi e toru rui e toru ao, e vai atoa ïa te Tamaiti a te taata nei i raro i te repo e toru rui e toru ao. 41  E tia mai to Nineve i te haavaraa* e teie nei u‘i atoa. E faahapa ratou i teie nei u‘i, no te mea ua tatarahapa ratou no ta Iona pororaa. Inaha râ, e taata to ǒ nei tei rahi a‘e ia Iona. 42  E tia faahou mai te arii vahine no apatoa i te haavaraa* e teie nei u‘i atoa. E faahapa oia i teie nei u‘i, mai te hopea mai hoi o te fenua i haere mai ai oia e faaroo i te paari o Solomona. Inaha râ, e taata to ǒ nei tei rahi a‘e ia Solomona. 43  Ia haere mai te hoê varua viivii i rapae i te hoê taata, e haere oia na te mau vahi pâpâmǎrô e imi i te faafaaearaa, e ore râ e itehia e ana. 44  Na ô ihora oia: ‘E ho‘i au i to ’u fare mai reira mai au,’ e ia tae atu oia i reira, ua vata te fare, ua purumuhia e ua faanehenehehia. 45  Haere atura oia e rave maira e hitu varua ino a‘e ia ’na, tomo a‘era ratou i roto i taua fare ra, faaea ihora i reira. Ino roa ’tura ïa te huru o taua taata ra i to na mua ’‘e. Mai tera atoa ïa no teie nei u‘i ino.” 46  Te paraparau ra Iesu i te nahoa taata e te tia noa ra to ’na metua vahine e to ’na mau taeae i rapaeau, te hinaaro ra ratou e paraparau ia ’na. 47  Parau atura te hoê taata ia ’na: “Inaha, tei rapaeau to metua vahine e to mau taeae, te hinaaro nei e paraparau ia oe.” 48  Pahono maira oia i taua taata ra: “O vai to ’u metua vahine e o vai to ’u mau taeae?” 49  Tohu ihora oia i ta ’na mau pǐpǐ, e parau ihora: “Teie to ’u metua vahine e to ’u mau taeae! 50  Te taata hoi o te rave i te hinaaro o to ’u Metua i te ra‘i, o ’na ïa to ’u taeae, to ’u tuahine e to ’u metua vahine.”

Nota i raro i te api

A hi‘o i te titionare.
Aore ra “pane o te aro.” A hi‘o i te titionare.
Aore ra “paruparu.”
Heleni pusuke. A hi‘o i te titionare.
No Satani teie i‘oa.
“Tamaiti” na roto i te reo Heleni.
Aore ra “Basileia o te Atua.”
Aore ra “teie tau.” A hi‘o i te titionare.
Aore ra “taiva.”
Oia hoi te Mahana Haavaraa.
Oia hoi te Mahana Haavaraa.