Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 11:1-30

HAAPOTORAA O TE MAU TUMU PARAU

  • Haapopouhia Ioane Bapetizo (1-15)

  • Faahapahia te u‘i etaeta (16-24)

  • Arue Iesu i to ’na Metua no te haafaufaaraa i tei haehaa (25-27)

  • Mea mahanahana ta Iesu zugo (28-30)

11  E oti a‘era Iesu i te horoa i te mau faaueraa i ta ’na na pǐpǐ 12, haere atura oia e haapii e e poro na te tahi atu mau oire.  Faaroo ihora râ Ioane i roto i te fare tapearaa i te mau ohipa a te Mesia, e tono ihora toopiti o ta ’na mau pǐpǐ  e ui ia ’na: “O oe anei ta matou i tiai noa na, aore ra e taata ê te tae mai?”  Pahono ihora Iesu ia raua: “A haere e faatia ia Ioane i ta orua e faaroo e e ite nei:  Te ite faahou nei te matapo, te haere nei te piri‘o‘i, ua ora te lepera e te faaroo nei te tari‘a turi, ua tia faahou mai tei pohe e te faaitehia nei te parau apî oaoa i te feia veve.  E oaoa te taata e tiaturi mau nei ia ’u.”  I to raua revaraa, parau atura Iesu i te nahoa taata no nia ia Ioane: “Eaha ta outou i haere e hi‘o i te medebara? Te hoê aeho e taueue ra i te mata‘i?  O vai ïa ta outou i haere e hi‘o? Te hoê taata e ahu unauna* to ’na? Te feia e ahu unauna to ratou, to roto ïa i te aorai o te mau arii.  No te aha ïa outou i haere ai i te medebara? No te ite i te hoê peropheta? Oia mau, te parau atu nei au, e rahi a‘e oia i te hoê peropheta. 10  No ’na i papaihia ’i: ‘Inaha, te tono nei au i ta ’u vea na mua ia oe,* na ’na e faaineine i te e‘a no oe!’ 11  Oia mau ta ’u e parau atu: I rotopu i tei fanauhia mai e te vahine, aita hoê i rahi a‘e ia Ioane Bapetizo, area tei haihai a‘e i roto i te Faatereraa arii* o te ra‘i, mea rahi a‘e ïa ia ’na. 12  Mai ia Ioane Bapetizo mai e tae mai i teie mahana, o te Faatereraa arii o te ra‘i ta te taata e tautoo nei i te titau, e e noaa iho â te reira i te feia e tautoo nei. 13  I tohu na hoi te mau papai a te mau peropheta e te ture atoa a Mose e tae roa a‘enei ia Ioane ra i te mau mea e tupu. 14  Ia tiaturi mai outou aore ra eita, o Ioane te ‘Elia o te tae mai.’ 15  E tari‘a to ’na, a faaroo ïa. 16  E faaau vau i teie nei u‘i ia vai? E au ratou i te mau tamarii rii e parahi ra na te mahora* e e pii ra i te tahi atu mau tamarii, 17  a na ô ai: ‘Ua faata‘i matou i te vivo no outou, aita râ outou i ori. Ua himene matou ma te oto, aita râ outou i tupaipai i to outou ouma.’ 18  Oia atoa, ua haere mai Ioane e aita i tamaa e i inu i te uaina, ua parau râ te taata: ‘E demoni to ’na.’ 19  Ua haere mai te Tamaiti a te taata nei e ua tamaa e ua inu, ua parau râ te taata: ‘Inaha, mea tamaa roa teie taata ma te haapuupuu, mea inu i te uaina, e hoa no te feia titau tute e te feia rave hara.’ Na te mau ohipa parau-tia ta te hoê taata e rave e haapapu e e taata paari oia.” 20  Faahapa ’tura oia i na oire i reira to ’na raveraa i te rahiraa o ta ’na mau ohipa mana, aita hoi to reira mau taata i tatarahapa: 21  “Ua ati oe Korazina! Ua ati oe Betesaida! No te mea ahiri te mau ohipa mana tei ravehia i ǒ orua, i rave-atoa-hia na i Turia e i Sidona, ua tatarahapa ê na ïa to reira mau taata ma te ahu oto e te rehu auahi. 22  Teie râ ta ’u e parau i to Korazina e Betesaida: Mea mâmâ a‘e te utua a to Turia e Sidona i ta outou i te Mahana Haavaraa. 23  E oe Kaperenaumi, e faateiteihia anei oe i te ra‘i? I te Apoo* oe e pou ai, no te mea ahiri te mau ohipa mana tei ravehia i ǒ oe, i rave-atoa-hia i Sodoma, ua vai noa mai ïa taua oire ra e tae roa mai i teie mahana. 24  Teie râ ta ’u e parau i to Kaperenaumi: Mea mâmâ a‘e te utua a te fenua o Sodoma i ta outou i te Mahana Haavaraa.” 25  I reira, na ô ihora Iesu: “E arue au ia oe, to ’u Metua e te Fatu o te ra‘i e te fenua, i mua i te taata, no te mea ua huna oe i teie mau parau i te feia paari e te maramarama e ua faaite i te feia e au i te tamarii rii. 26  O ta oe ïa, to ’u Metua, i faaoti e rave. 27  Ua tuu mai to ’u Metua i te mau mea atoa ia ’u. O te Metua ana‘e tei ite o vai te Tamaiti, e o te Tamaiti ana‘e tei ite o vai te Metua e te taata atoa ta te Tamaiti e hinaaro e faaite atu o vai te Metua. 28  A haere mai ia ’u nei outou atoa e rohirohi e e teimaha nei, na ’u e tamahanahana ia outou. 29  A rave mai i ta ’u zugo i nia ia outou e ia haapiihia outou e au, mea mǎrû hoi au e te haehaa o te aau, e ite ïa outou* i te tamahanahanaraa. 30  Mea mǎrû* hoi ta ’u zugo, e mea mâmâ ta ’u hopoia.”

Nota i raro i te api

Aore ra “ahu maitai roa.”
“I mua i to aro” na roto i te reo Heleni.
Aore ra “Basileia.”
I reira te taata e hoohoo ai e e ruru ai.
Aore ra “Hade,” oia hoi te menema o te huitaata. A hi‘o i te titionare.
Heleni pusuke. A hi‘o i te titionare.
Aore ra “mâmâ.”