Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 10:1-42

HAAPOTORAA O TE MAU TUMU PARAU

  • Na 12 aposetolo (1-4)

  • Faaueraa no te taviniraa (5-15)

  • E hamani-ino-hia te mau pǐpǐ (16-25)

  • Mǎta‘u i te Atua, eiaha te taata (26-31)

  • Eiaha te hau, te ‘o‘e râ (32-39)

  • Farii i te mau pǐpǐ a Iesu (40-42)

10  Titau ihora Iesu i ta ’na na 12 pǐpǐ e horoa ’tura i te mana ia vî te mau varua viivii, ia tiavaru ia ratou e ia faaora i te mau huru ma‘i atoa.  Teie te i‘oa o na 12 aposetolo: Na mua, Simona parau-atoa-hia Petero, Anederea to ’na taeae, Iakobo e Ioane to ’na taeae na tamaiti a Zebedaio,  Philipa raua Baretolomea, Toma raua Mataio te titau tute, Iakobo te tamaiti a Alephaia, Tadaio,  Simona parauhia “tei itoito rahi” e Iuda Isakariota tei tuu ia Iesu i to ’na mau enemi i muri a‘e.  Tono ihora Iesu i taua na 12 ra ma te faaue atu: “Eiaha e haere i ǒ te feia o te mau nunaa ěê e eiaha e tomo atu i te mau oire no Samaria,  a haere noa râ i ǒ te mau mamoe tei mo‘e o te utuafare o Iseraela.  A poro haere ai outou, a na ô atu: ‘Ua fatata mai te Faatereraa arii* o te ra‘i.’  A faaora i te ma‘i, a faatia i te feia pohe, a faaora i te mau lepera, a tiavaru i te mau demoni. Mea horoa-noa-hia mai ta outou, a horoa noa atoa ïa.  Eiaha ei auro, ario aore ra veo i roto i ta outou pute moni, 10  eiaha ei pute maa no te tere, eiaha ei taipiti ahu, tiaa, turutootoo, e fana‘o iho â te rave ohipa i ta ’na maa. 11  I te mau oire aore ra oire rii e tomo ai outou, a imi i te feia e farii ia outou, e a faaea i reira e reva noa ’tu outou. 12  Ia tomo outou i roto i te fare, a aroha ’tu i te utuafare. 13  Ia farii ratou ia outou, ia vai mai ïa to outou hau i nia ia ratou. Ia ore râ ratou e farii mai, ia ho‘i ïa to outou hau i nia ia outou. 14  I te mau vahi atoa e ore ai te taata e farii ia outou aore ra e faaroo i ta outou parau, a haere mai i rapaeau i tera fare aore ra oire, e a tûtû i te repo o to outou avae.* 15  Oia mau ta ’u e parau atu: Mea mâmâ a‘e te utua a te fenua o Sodoma e Gomora i ta taua oire ra i te Mahana Haavaraa. 16  Inaha, te tono nei au ia outou mai te mau mamoe i rotopu i te mau luko. Ia haapao maitai ïa outou mai te ophi ra e te hapa ore mai te uupa ra. 17  A ara i te taata, e tuu hoi ratou ia outou i te haavaraa e e hui ia outou i roto i ta ratou mau sunago. 18  E aratohia outou i mua i te mau tavana e te mau arii no ’u nei, ia ite hoi ratou e te feia o te mau nunaa ěê ia ’u. 19  Ia tapeahia râ outou, eiaha e haapeapea eaha ta outou e parau aore ra e nafea, no te mea e faaitehia ’tu ta outou e parau i taua hora ra, 20  e ere hoi o outou ana‘e te parau, o te varua râ o to outou Metua te parau na roto ia outou. 21  Hau atu â, e tuu te taata i to ’na taeae aore ra te metua i ta ’na tamarii ia pohe e e orure hau te tamarii i te metua, a tuu atu ai i to ratou mau metua ia pohe. 22  E hae te taata atoa ia outou no to ’u nei i‘oa. Te taata râ tei faaoromai tamau* e tae noa ’tu i te hopea, e ora ïa. 23  Ia hamani ino ratou ia outou i te hoê oire, a horo ïa i te tahi atu oire. Oia mau hoi ta ’u e parau atu: E ore e ati te mau oire o Iseraela ia outou e tae mai ai te Tamaiti a te taata nei. 24  Aita te hoê pǐpǐ i hau a‘e i ta ’na orometua, aita atoa te hoê tavini i hau a‘e i to ’na fatu. 25  Ia riro te pǐpǐ mai ta ’na orometua e te tavini mai to ’na fatu, atira ïa. I mairi na te taata i to te fatu fare i‘oa o Belezebuba,* tera atoa ïa te i‘oa ta ratou e topa no to ’na utuafare! 26  Eiaha ïa outou e mǎta‘u ia ratou, aita hoi e mea i tapo‘ihia e ore e hohorahia, e aita e mea huna e ore e itehia. 27  Ta ’u e parau ia outou i roto i te poiri, a faaite atu ïa i roto i te maramarama, e ta ’u e parau i roto i to outou tari‘a, a faaite ïa na nia mai i te fare. 28  E eiaha e mǎta‘u i te feia e haapohe ia outou, e ore râ e tia ia faaore i te ora.* A mǎta‘u râ i te Atua, e tia hoi ia ’na ia faaore roa i te ora* e te tino i Gehena.* 29  E piti manu rii te hoohia i te hoê noa moni veo,* e ere anei? Ia mairi noa ’tu râ hoê o ratou i raro, e ite iho â to outou Metua i te reira. 30  Ua taio-pauroa-atoa-hia te rouru o to outou upoo. 31  Eiaha ïa e mǎta‘u. Mea faufaa a‘e outou i te manu rii e rave rahi. 32  No reira, te taata o te faaite i mua ia vetahi ê e te tiaturi ra oia ia ’u, e faaite atoa ïa vau i mua i to ’u Metua i te ra‘i e no ’u taua taata ra. 33  Te taata râ o te faaite i mua ia vetahi ê e aita oia e tiaturi ra ia ’u, e faaite atoa ïa vau i mua i to ’u Metua i te ra‘i e e ere no ’u taua taata ra. 34  Eiaha e mana‘o e i haere mai au e hopoi i te hau i te fenua nei. Aita vau i haere mai e hopoi i te hau, i te ‘o‘e râ. 35  I haere mai hoi au e faatupu i te amahamaha, e patoi te tamaiti i to ’na metua tane, te tamahine i to ’na metua vahine, e te hunoa vahine i to ’na metua hoovai vahine. 36  Oia mau te enemi o te taata, o te mau mero ïa o to ’na iho utuafare. 37  Te taata mea here* a‘e na ’na i to ’na metua tane aore ra metua vahine ia ’u nei, e ore ïa e tia ia ’na ia riro ei pǐpǐ na ’u, e te taata mea here* a‘e na ’na i ta ’na tamaiti aore ra tamahine ia ’u nei, e ore ïa e tia ia ’na ia riro ei pǐpǐ na ’u. 38  E tei ore e hinaaro e amo i ta ’na pou haamauiuiraa* e e pee mai ia ’u, e ore ïa e tia ia ’na ia riro ei pǐpǐ na ’u. 39  O tei tapea i to ’na ora,* e ere ïa oia i te reira, e tei ere i to ’na ora* no ’u nei, e noaa faahou mai ïa ia ’na te reira. 40  O tei farii ia outou, e farii atoa ïa ia ’u, e tei farii ia ’u, e farii atoa ïa i tei tono mai ia ’u. 41  O tei farii i te hoê peropheta no te mea e peropheta, e fana‘o ïa i te haamaitairaa a te peropheta, e tei farii i te hoê taata parau-tia no te mea e taata parau-tia, e fana‘o ïa i te haamaitairaa a te taata parau-tia. 42  E o tei horoa i te tahi noa au‘a pape to‘eto‘e na te hoê o teie feia rii no te mea e pǐpǐ oia na ’u, oia mau ta ’u e parau atu: E fana‘o iho â oia i ta ’na haamaitairaa.”

Nota i raro i te api

Aore ra “Basileia.”
E faaiteraa ïa e na te taata iho e amo i ta ’na utua.
Aore ra “o te faaoromai tamau ra.”
No Satani te raatira o te mau demoni teie i‘oa.
Oia hoi te ora no a muri a‘e. Heleni pusuke. A hi‘o i te titionare.
Heleni pusuke. A hi‘o i te titionare.
A hi‘o i te titionare.
“Hoê asario” na roto i te reo Heleni. Te moni ïa a te hoê taata o te rave i te ohipa e 45 minuti.
Heleni phileo.
Heleni phileo.
A hi‘o i te titionare.
Heleni pusuke. A hi‘o i te titionare.
Heleni pusuke. A hi‘o i te titionare.