Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mareko 9:1-50

HAAPOTORAA O TE MAU TUMU PARAU

  • Te tauiraa to Iesu huru (1-13)

  • Faaorahia te tamaroa uruhia e te demoni (14-29)

    • E tia te mau mea atoa i te taata e faaroo to ’na (23)

  • Tohu-faahou-hia to Iesu pohe (30-32)

  • Mârô te mau pǐpǐ o vai tei rahi a‘e (33-37)

  • Tei ore e patoi mai, te turu mai ra ïa (38-41)

  • Te mau mea e hapa ’i te taata (42-48)

  • “Ia vai te miti i roto ia outou” (49, 50)

9  Na ô atoa ’tura Iesu ia ratou: “Oia mau ta ’u e parau atu: Te vai ra vetahi o te feia i ǒ nei o te ore e pohe hou a ite ai na mua i te Faatereraa arii a te Atua* ua haere ana‘e mai ma te mana.”  E ono mahana i muri a‘e, rave ihora Iesu ia Petero, Iakobo e Ioane e aratai atura ia ratou i nia i te hoê mou‘a teitei o ratou ana‘e. Taui ihora te huru o Iesu i mua ia ratou,  anaana ’tura to ’na ahu e uouo roa a‘era. Aore hoi e taata pu‘a ahu i te ao nei e noaa ia ’na teie huru uouo.  Fa atoa maira o Elia raua Mose e te paraparau ra raua e o Iesu.  Na ô atura Petero ia Iesu: “Rabi,* mea fana‘o matou i te tiaraa mai i ǒ nei. Vaiiho na ia matou ia faatia e toru fare ie, hoê no oe, hoê no Mose e hoê no Elia.”  Aita hoi Petero i ite e nafea râ, ua mehameha roa hoi ratou.  Fa maira te hoê ata, tapo‘i ihora ia ratou, e na ô maira te hoê reo no roto mai i taua ata ra: “O ta ’u Tamaiti teie, tei herehia. A faaroo ia ’na.”  Hi‘o a‘era râ ratou e ati a‘e ia ratou, o Iesu ana‘e ta ratou e ite ra, aore e taata ê atu.  A pou mai ai ratou mai nia mai i te mou‘a, faaue maitai ihora Iesu ia ratou eiaha e faaite i te taata i ta ratou i ite e ia tia roa mai te Tamaiti a te taata nei mai te pohe mai. 10  Tapea maite atura ratou i taua parau ra i roto i to ratou aau,* paraparau a‘era râ te tahi i te tahi no nia i te auraa o to ’na tiaraa mai te pohe mai. 11  Ui maira ratou ia ’na: “No te aha te mau papai parau e parau ai e o Elia na mua te haere mai?” 12  Na ô atura oia: “O Elia iho â na mua te haere mai e e faaho‘i oia i te mau mea atoa mai i te matamua ra. No te aha râ i papaihia ’i e e roohia te Tamaiti a te taata nei i te mauiui rahi e e vahavahahia oia? 13  Te parau atu nei râ vau e ua haere mai iho â Elia e ua rave ratou ia ’na mai ta ratou i hinaaro, mai tei papaihia no nia ia ’na.” 14  I to Iesu, Petero, Iakobo e Ioane haereraa ’tu i te tahi atu mau pǐpǐ ra, ite a‘era ratou i te hoê nahoa rahi ati a‘e i taua mau pǐpǐ ra e te mau papai parau e mârô ra ia ratou. 15  I to te nahoa iho â râ iteraa mai ia Iesu, maere ihora ratou e horo maira e aroha ia ’na. 16  Ui atura ïa oia: “Eaha ta outou e mârô nei i te mau pǐpǐ?” 17  Pahono maira te hoê o te nahoa: “Orometua, ua afai mai au i ta ’u tamaiti ia oe nei, no te mea e varua to ’na i vava ’i oia. 18  I te mau taime atoa e uruhia ’i oia, e taorahia oia i raro, e tahe to ’na haae, e ma‘u‘u to ’na niho, a paruparu atu ai. Ua parau hoi au i ta oe mau pǐpǐ ia tiavaru i taua varua ra, aita râ i haere ia ratou.” 19  Na ô atura oia: “Auê ïa u‘i aore e faaroo, ehia â maororaa e parahi ai au ia outou nei? Ehia â maororaa e faaoromai ai au ia outou? Afai mai ia ’na.” 20  Afai maira ratou i te tamaroa. I to te varua râ iteraa mai ia Iesu, rave ihora oia e ia iriti te tamaroa. Topa ’tura oia e taaviriviri ihora a tahe noa ’i te haae. 21  Ui atura Iesu i te metua tane: “Mai afea mai â e na ô noa ’i oia?” Parau maira te metua tane: “Mai to ’na nainairaa mai â, 22  pinepine to te varua huriraa ia ’na i roto i te auahi e i roto atoa i te pape ia pohe oia. Ia tia râ ia oe ia faaora ia ’na, aroha mai na e a tauturu mai.” 23  Na ô atura Iesu: “Eaha oe e parau ai: ‘Ia tia ia oe’? I te taata hoi e faaroo to ’na, e tia ïa te mau mea atoa.” 24  Tuô ihora te metua tane o te tamaiti a na ô ai: “E faaroo to ’u! A tauturu mai ia rahi atu â to ’u faaroo!” 25  A ite ai Iesu e te haere ru mai ra te nahoa, tama‘i ihora oia i te varua viivii a na ô ai: “Oe te varua i vava ’i teie tamarii iti e i turi ai to ’na tari‘a, te faaue nei au ia oe, a haere i rapae e eiaha e tomo faahou i roto ia ’na.” 26  Rave ihora te varua viivii e ia tuô e ia iriti roa te tamaiti e reva ’tura i rapae. Tarava noa ’tura te tamaiti mai te huru ra e ua pohe e na ô a‘era te rahiraa: “Ua pohe oia!” 27  Rave ihora râ Iesu i to ’na rima, faatia a‘era ia ’na e tia maira oia. 28  Tomo atura Iesu e ta ’na mau pǐpǐ i roto i te hoê fare e ui maira ratou ia ’na: “No te aha i ore ai i tia ia matou ia tiavaru i te varua viivii?” 29  Parau atura Iesu: “I te pure noa e reva ’i teie huru varua viivii i rapae.” 30  Faarue maira ratou i taua vahi ra e haere atura na roto ia Galilea, aita râ Iesu i hinaaro ia ite te taata teihea oia. 31  I haapii na hoi oia i ta ’na mau pǐpǐ e i parau atu na: “E tuuhia te Tamaiti a te taata nei i te rima o to ’na mau enemi, e taparahi pohe ratou ia ’na, noa ’tu râ e ua haapohehia, e tia mai oia i te toru o te mahana.” 32  Aita râ ratou i taa i ta ’na i parau e ua taiâ i te uiui ia ’na. 33  Haere atura ratou i Kaperenaumi. Tei roto Iesu i te fare i ui ai oia i ta ’na mau pǐpǐ: “Eaha ta outou i mârô na a haere noa ’i tatou na nia i te purumu?” 34  Mamû noa ihora ratou, i mârô na hoi te tahi i te tahi o vai tei rahi a‘e. 35  Parahi ihora Iesu, pii atura i na 12* ia tapiri mai e na ô atura: “O tei hinaaro ia rahi a‘e oia, ia haehaa roa ïa e ia riro ei tavini no te taata atoa.” 36  Rave atura oia i te hoê tamarii iti, tuu atura ia ’na i ropu ia ratou e a tapea ’i i te tapono o taua tamarii ra, na ô atura: 37  “Te taata o te farii hoê o teie mau tamarii rii no to ’u nei i‘oa, e farii atoa ïa ia ’u. E te taata o te farii ia ’u, e farii ïa eiaha ia ’u noa, i tei tono atoa mai râ ia ’u.” 38  Parau ihora Ioane ia Iesu: “Orometua, ua ite matou i te hoê taata i te tiavaruraa i te mau demoni ma te faaohipa i to oe i‘oa, e ua tamata matou i te tapea ia ’na, no te mea e ere oia i te pǐpǐ na oe.” 39  Na ô atura râ Iesu: “Eiaha e tamata i te tapea ia ’na, aore hoi e taata e tia ia rave i te hoê ohipa mana ma to ’u nei i‘oa, a faaino mai ai ia ’u. 40  Te taata hoi aita e patoi mai ra, te turu mai ra ïa. 41  Te taata hoi e horoa i te tahi au‘a pape na outou no te mea no te Mesia outou, oia mau ta ’u e parau atu, e ore roa oia e ere i ta ’na haamaitairaa. 42  Ia ore râ hoê o teie feia o te au i te tamarii rii e tiaturi faahou mai ia ’u no te tahi taata, mea maitai a‘e ia taamuhia i nia i te a‘î o teie taata te hoê ofai oro e hutihia na e te asini, a huri atu ai ia ’na i raro i te moana. 43  Ia hapa oe no to oe rima, a tâpû ïa. Mea maitai a‘e ia tae atu oe i te ora ma te hoê noa rima, i te haere ma to oe na rima i Gehena,* i roto i te auahi pohe ore. 44  *—— 45  E ia hapa oe no to oe avae, a tâpû ïa. Mea maitai a‘e ia tae atu oe i te ora ma te hoê noa avae, i te hurihia oe ma to oe na avae i Gehena.* 46  *—— 47  E ia hapa oe no to oe mata, a paaro ïa. Mea maitai a‘e ia ô atu oe i roto i te Faatereraa arii a te Atua ma te hoê noa mata, i te hurihia oe ma to oe na mata i Gehena,* 48  e ore te mau tu‘a e te auahi e pohe i reira. 49  E haamairihia te auahi i nia i teie huru taata atoa, mai te miti e ueuehia i nia i te maa. 50  Mea maitai roa te miti, ia maaro râ te reira, e nafea ïa e avaava faahou ai? Ia vai te miti i roto ia outou, e ia vai te hau i rotopu ia outou.”

Nota i raro i te api

Aore ra “Basileia o te Atua.”
“Orometua” te auraa.
Aore ra “na ratou ana‘e.”
Oia hoi na 12 aposetolo.
A hi‘o i te titionare.
Te vai ra teie irava i roto i te tahi mau huriraa Bibilia, aita râ i roto e rave rau papai Heleni tahito fariihia.
A hi‘o i te titionare.
Te vai ra teie irava i roto i te tahi mau huriraa Bibilia, aita râ i roto e rave rau papai Heleni tahito fariihia.
A hi‘o i te titionare.