Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mareko 8:1-38

HAAPOTORAA O TE MAU TUMU PARAU

  • Faatamaa Iesu e 4 000 tane (1-9)

  • Aniraa i te hoê tapao (10-13)

  • Hopue a te mau Pharisea e ta Heroda (14-21)

  • Faaorahia te hoê matapo i Betesaida (22-26)

  • Faaite Petero o vai te Mesia (27-30)

  • Tohuhia to Iesu pohe (31-33)

  • Pǐpǐ mau a Iesu (34-38)

8  I taua mau mahana ra, e nahoa rahi â tei ruru mai e aita ta ratou e maa faahou. Pii ihora ïa Iesu i te mau pǐpǐ ia haere mai e na ô atura:  “Te aroha nei au i teie nahoa taata, no te mea a toru atura mahana to ratou faaearaa ia ’u nei e aita ta ratou e maa faahou.  Ia faaho‘i au ia ratou i to ratou fare ma te poia,* e matapoirihia ratou i nia i te purumu e mea atea to vetahi faaearaa.”  Parau maira râ ta ’na mau pǐpǐ: “Ihea i teie vahi mo‘emo‘e e noaa mai ai te faraoa* e paia ’i teie mau taata?”  Ui atura Iesu: “Ehia faraoa ta outou?” Parau maira ratou: “E hitu.”  Faaue ihora oia i te nahoa ia parahi. Rave ihora oia i na faraoa e hitu, haamauruuru a‘era i te Atua, ofati ihora i te faraoa e horoa ’tura i ta ’na mau pǐpǐ e na ratou i opere na te nahoa.  E maa i‘a rii atoa ta ratou, haamaitai atura Iesu i te Atua no te reira e parau atura ia ratou ia opere atoa ’tu.  Tamaa a‘era ratou, paia ’tura e haaputu atura i te toea faraoa i roto e hitu farii* rahi î maitai.  Piri i te 4 000 tane tei tamaa. Faaho‘i atura Iesu ia ratou. 10  Haere ihora oia e ta ’na mau pǐpǐ i nia i te poti e fano atura i te tuhaa fenua o Dalemanuta. 11  Haere maira te mau Pharisea e mârô ia ’na, a ani ai i te tahi tapao no te ra‘i mai no te râmâ ia ’na. 12  Autâ roa ihora oia e na ô atura: “No te aha teie nei u‘i e imi ai i te tahi tapao? Oia mau ta ’u e parau atu: Aita e tapao e horoahia ’tu i teie nei u‘i.” 13  Vaiiho ihora oia ia ratou, ho‘i atura i nia i te poti e fano atura i te tahi a‘e pae. 14  Ua mo‘e râ i te mau pǐpǐ i te rave i te faraoa e hoê ana‘e faraoa ta ratou i nia i te poti. 15  Faaara papu atura Iesu ia ratou: “A haapao maitai, a ara i te hopue a te mau Pharisea e te hopue a Heroda.” 16  Haamata a‘era ratou i te tatama‘i no te mea aita hoê i rave i te faraoa. 17  A ite ai Iesu i te reira, na ô atura oia: “Eaha outou e tatama‘i ai i te mea aita outou i rave i te faraoa? Aita â i taa e i maramarama ’tura ia outou? Aita â to outou aau i maramarama ’tura? 18  ‘E mata to outou, aita outou e ite ra? E tari‘a to outou, aita outou e faaroo ra?’ Aita outou e haamana‘o ra 19  i to ’u ofatiraa i na faraoa e pae no na tane e 5 000, ehia farii ta outou i faaî?” Na ô maira ratou: “Hoê ahuru ma piti.” 20  “I to ’u ofatiraa i na faraoa e hitu no na tane e 4 000, ehia farii* rahi î maitai ta outou i rave?” Na ô maira ratou: “E hitu.” 21  Na ô atura oia: “Aita â outou i maramarama ’tura?” 22  Tae atura ratou i Betesaida. Aratai maira to reira mau taata i te hoê tane matapo ia Iesu ra, e taparu maira ia ’na ia tapea i taua matapo ra. 23  Rave maira Iesu i te rima o te tane matapo e aratai ihora ia ’na i rapaeau mai i te oire, parai atura i te huare i nia i to ’na na mata, a tuu atu ai i to ’na na rima i nia iho ia ’na e ui atura: “Eaha ta oe e ite ra?” 24  Hi‘o maira taua tane ra e na ô maira: “Te ite nei au i te taata, e au hoi i te tumu raau, te hahaere nei râ ratou.” 25  Tuu faahou ihora Iesu i to ’na na rima i nia i na mata o taua tane ra. Ora maira oia e ite maitai atura i te mau mea atoa. 26  Faaho‘i atura oia ia ’na i te fare a na ô ai: “Eiaha oe e ho‘i i te oire rii.” 27  Reva ’tura Iesu e ta ’na mau pǐpǐ i te mau oire rii i Kaisarea Philipi. A haere noa ’i ratou, ui atura oia i ta ’na mau pǐpǐ: “O vai au i ta te taata parauraa?” 28  Na ô maira ratou: “O Ioane Bapetizo, o Elia râ ta te tahi pae, e ta te tahi atu, hoê ïa o te mau peropheta.” 29  Ui atura oia: “Outou râ, o vai au i ta outou parauraa?” Pahono maira Petero: “O te Mesia oe.” 30  Faaue maitai atura oia ia ratou eiaha e faaite i te taata o vai oia. 31  Haamata atoa ’tura oia i te haapii ia ratou e ia roohia te Tamaiti a te taata nei i te mauiui rahi e tia ’i, ia vahavahahia oia e te mau aratai ati Iuda, te mau tahu‘a tiaau e te mau papai parau, ia haapohehia e ia faatiahia mai e toru mahana i muri iho. 32  Aita iho â oia i huna i te parau. Aratai rii ê ihora râ Petero ia Iesu e tama‘i atura ia ’na. 33  Huri tua maira Iesu, hi‘o atura i ta ’na mau pǐpǐ, tama‘i ihora ia Petero e na ô atura: “Haere na muri mai ia ’u, Satani! No te mea e ere to oe mana‘o i to te Atua, to te taata râ.” 34  Pii atura oia i te nahoa e ta ’na mau pǐpǐ e na ô atura: “Te taata e hinaaro e pee mai ia ’u, ia haapae ïa ia ’na iho e ia rave i ta ’na pou haamauiuiraa,* a pee noa mai ai ia ’u. 35  O tei tapea hoi i to ’na ora,* e ere ïa oia i te reira. O tei ere râ i to ’na ora* no ’u nei e no te parau apî oaoa, e noaa faahou mai ïa ia ’na te reira. 36  Eaha hoi te apî ia noaa i te hoê taata te ao taatoa, a ere ai râ oia i to ’na ora?* 37  Eaha hoi ta te hoê taata e horoa no to ’na ora?* 38  Te taata hoi o te haama ia ’u e i ta ’u mau parau i roto i teie nei u‘i faaturi* e te hara, e haama atoa ïa te Tamaiti a te taata nei ia ’na ia haere mai oia ma te hanahana o to ’na Metua e te mau melahi mo‘a.”

Nota i raro i te api

Aore ra “aita ratou i tamaa.”
Aore ra “pane.”
Aore ra “farii maa.”
Aore ra “farii maa.”
A hi‘o i te titionare.
Heleni pusuke. A hi‘o i te titionare.
Heleni pusuke. A hi‘o i te titionare.
Heleni pusuke. A hi‘o i te titionare.
Heleni pusuke. A hi‘o i te titionare.
Aore ra “taiva.”