Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mareko 7:1-37

HAAPOTORAA O TE MAU TUMU PARAU

  • Faaite-roa-hia mai te tutuu a te taata (1-13)

  • No roto mai i te aau te mea viivii (14-23)

  • Faaroo o te vahine no Phenikia i Suria (24-30)

  • Faaorahia te hoê tari‘a turi (31-37)

7  Ruru maira te mau Pharisea e te tahi mau papai parau na Ierusalema mai ia Iesu ra.  Ite a‘era ratou vetahi o ta ’na mau pǐpǐ e tamaa ra ma te rima repo, oia hoi aita i horoihia.*  (Eita hoi te mau Pharisea e te ati Iuda atoa e tamaa aita ana‘e ratou i horoi i to ratou na rima e tae roa ’tu i te poro rima ia au i te tutuu a te mau tupuna,  e ia ho‘i mai ratou na te matete mai, eita ratou e tamaa aita ana‘e ratou i horoi ia ratou. E mea rahi atu â te tutuu tei tuuhia ia haapao ratou, mai te tutauraa i te mau au‘a, te mau pita e te mau pani veo i roto i te pape.)  Ui maira ïa teie mau Pharisea e papai parau ia ’na: “No te aha ta oe mau pǐpǐ e ore ai e haapao i te tutuu a te feia no tahito ra, a tamaa ’i ratou ma te rima repo?”  Pahono atura oia: “Ua tano Isaia i te tohuraa no nia ia outou, haavarevare ma, mai tei papaihia: ‘Te faatura nei te vaha o teie mau taata ia ’u, to ratou râ aau, tei te atea ê ïa ia ’u.  Mea faufaa ore to ratou haamori-noa-raa mai ia ’u, te haapii nei hoi ratou ia vetahi ê i te mau faaueraa a te taata.’  Te haapae nei outou i te faaueraa a te Atua e te haapao nei i te tutuu a te taata.”  Parau atura oia: “Mea ite roa outou i te haapae i te faaueraa a te Atua no te haapao i ta outou tutuu. 10  Ua parau hoi Mose: ‘A faatura i to metua tane e to metua vahine,’ e: ‘O tei faaino* i to ’na metua tane aore ra metua vahine, ia haapohehia ïa.’ 11  Outou râ, te na ô nei ïa: ‘Ia parau te hoê taata i to ’na metua tane aore ra metua vahine: “E korebana (oia hoi e ô pûpûhia i te Atua) ta ’u mau mea atoa o ta ’u e nehenehe e faaohipa no te tauturu ia oe,”’ 12  te faatia ra ïa outou ia ’na eiaha e tauturu faahou i to ’na metua tane aore ra metua vahine. 13  Te haafaufaa ore ra ïa outou i te parau a te Atua na roto i ta outou tutuu ta outou i tuu atu. Mea rahi te ohipa mai te reira te huru ta outou e rave ra.” 14  Pii ihora oia i te nahoa ia tapiri mai ia ’na e na ô atura: “A faaroo mai outou paatoa e a taa i te auraa o ta ’u mau parau. 15  E ere o ta te hoê taata e amu te haaviivii ia ’na, o te mau mea râ no roto mai i te hoê taata te haaviivii ia ’na.” 16  *—— 17  Vaiiho maira Iesu i te nahoa, tomo ihora i roto i te hoê fare e uiui maira ta ’na mau pǐpǐ no nia i te faahoho‘araa. 18  Na ô atura oia: “Aita atoa outou e taa ra mai ia ratou? Aita outou i ite e e ere o ta te taata e amu te haaviivii ia ’na, 19  e na roto atu hoi te reira, eiaha i to ’na aau, i to ’na râ opu a faaruehia ’tu ai i te haumitiraa?” Te parau ra ïa Iesu e mea viivii ore te mau maa atoa. 20  Parau faahou atura oia: “O te mau mea no roto mai i te hoê taata te haaviivii ia ’na, 21  no roto mai hoi i te aau te mau mana‘o ino, te mau peu taotoraa tia ore,* te eiâ, te taparahi-pohe-raa, 22  te faaturi, te popore, te ohipa ino, te haavare, te peu faufau,* te mata nounou, te faaino, te teoteo e te maamaa. 23  No roto mai teie mau mea ino atoa i te aau o te hoê taata e o te haaviivii ia ’na.” 24  Reva ’tura Iesu e haere ihora i na tuhaa fenua o Turia e Sidona. Tomo ihora oia i roto i te hoê fare, aita hoi i hinaaro ia ite mai te taata ia ’na, ua itehia râ oia. 25  Faaroo ihora te hoê vahine no nia ia Iesu, haere maira ia ’na ra e tipapa ihora i raro i to ’na pae avae, ua uruhia hoi ta ’na tamahine iti e te hoê varua viivii, 26  e Heleni oia no Phenikia i Suria.* Taparu ihora taua vahine ra ia Iesu ia tiavaru i te demoni i rapae i ta ’na tamahine. 27  Parau atura râ oia: “A vaiiho na i te mau tamarii ia paia na mua, e ere hoi mea maitai ia rave i te faraoa* a te mau tamarii, a horoa ’tu ai na te mau fanau‘a urî.” 28  Pahono maira râ taua vahine ra: “Oia mau e te Fatu, e amu atoa râ te mau fanau‘a urî i raro a‘e i te amuraa maa i te mau hu‘ahu‘a faraoa a te mau tamarii rii.” 29  Parau atura Iesu: “A ho‘i i ǒ oe, no ta oe hoi i parau, ua reva te demoni i rapae i to tamahine.” 30  Ho‘i atura taua vahine ra i to ’na fare e ite ihora i te tamahine iti e tarava ra i nia i te ro‘i, ua reva te demoni. 31  Faarue ihora Iesu i te tuhaa fenua o Turia e ho‘i atura i te miti o Galilea na Sidona ’tu e na roto atu i te tuhaa fenua o Dekapoli.* 32  Afai maira ratou i te hoê tane tari‘a turi e mea fifi atoa no ’na ia paraparau, e taparu maira ia Iesu ia tuu i to ’na rima i nia iho i taua taata ra. 33  Aratai ihora Iesu ia ’na i te hiti ia atea ’tu raua i te nahoa, tuu atura i to ’na na manimani rima i roto i na tari‘a o taua taata ra, tutuha ihora e tapea ’tura i to ’na arero. 34  E a hi‘o ai i nia i te ra‘i, huti roa ihora oia i te aho e na ô atura: “Ephata,” teie te auraa “Ia matara oe.” 35  Faaroo ihora to ’na tari‘a, matara a‘era to ’na arero e afaro atura ta ’na paraparau. 36  Faaue ihora oia ia ratou eiaha e faaite i te taata. Tera râ, rahi atu â oia i te faaue ia ratou, rahi atu â ratou i te faaite haere. 37  Maere roa ihora ratou e na ô a‘era: “E ohipa faahiahia ana‘e ta ’na i rave, ia ’na hoi e faaroo ai te tari‘a turi e e paraparau ai te vava.”

Nota i raro i te api

Oia hoi ia au i te mau peu a te ati Iuda.
Aore ra “tuhi.”
Te vai ra teie irava i roto i te tahi mau huriraa Bibilia, aita râ i roto e rave rau papai Heleni tahito fariihia.
A hi‘o i te titionare.
Aore ra “haerea haama ore.” A hi‘o i te titionare.
Aore ra “tei fanauhia i Phenikia i Suria.”
Aore ra “pane.”
Aore ra “o na oire hoê ahuru.”