Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mareko 6:1-56

HAAPOTORAA O TE MAU TUMU PARAU

  • Aita Iesu i fariihia i to ’na iho oire (1-6)

  • Faaineinehia na 12 no te taviniraa (7-13)

  • Poheraa o Ioane Bapetizo (14-29)

  • Faatamaa Iesu e 5 000 tane (30-44)

  • Haere Iesu na nia i te miti (45-52)

  • Faaoraraa ma‘i i Genesareta (53-56)

6  Faarue maira Iesu i taua vahi ra, haere atura i to ’na iho fenua e pee maira ta ’na mau pǐpǐ ia ’na.  I te Sabati,* haapii atura oia i te taata i roto i te sunago, maere ihora te rahiraa o te faaroo ra ia ’na e na ô a‘era: “Ihea to ’na haapiiraa mai i teie mau mea? E no te aha teie paari i horoahia ’tu ai ia ’na e i tia ’i ia ’na ia rave i teie mau ohipa mana?  E ere anei teie i te tamuta, te tamaiti a Maria e te taeae o Iakobo, Iosepha, Iuda e Simona? E ere anei e tei ǒ tatou nei atoa to ’na mau tuahine?” No reira, aita ratou i tiaturi ia ’na.  Parau atura râ Iesu ia ratou: “E faaturahia te hoê peropheta i te mau vahi atoa, area i to ’na iho fenua e i roto i to ’na iho fetii e to ’na iho utuafare, eita ïa.”  No reira, aita rea e taata ma‘i ta ’na i faaora ma te tuu i to ’na rima i nia ia ratou. E aita ’tu â ohipa mana ta ’na i rave i reira.  Maere roa ihora oia i to ratou ereraa i te faaroo. Hahaere atura oia na te mau oire rii tapiri a haapii haere ai i te taata.  Titau ihora oia i na 12* e haamata ’tura i te tono tataipiti ia ratou e i te horoa ’tu i te mana ia vî te mau varua viivii.  Faaue atoa ’tura oia ia ratou eiaha e rave no te tere i te faraoa,* te pute maa, te moni* i roto i te tatua, i te hoê noa râ turutootoo,  ia oomo i te tiaa e hoê noa ahu eiaha râ e piti. 10  Parau atoa ’tura oia: “I te mau vahi atoa e tomo ai outou i roto i te hoê fare, a faaea i reira e reva noa ’tu outou. 11  I te mau vahi atoa e ore ai te taata e farii aore ra e faaroo ia outou, a haere mai i rapaeau i tera vahi, e a tûtû i te repo o to outou avae* ei faaararaa ia ratou.” 12  Haere atura ratou e poro i te taata ia tatarahapa ratou e tia ’i, 13  tiavaru a‘era ratou e rave rahi demoni, parai a‘era i te mono‘i i nia e rave rahi taata ma‘i e faaora ’tura ia ratou. 14  Faarooroo ihora te arii Heroda* i te reira, ua ite-maitai-hia hoi te i‘oa o Iesu, e te parau ra te taata: “Ua tia faahou mai Ioane Bapetizo mai te pohe mai, no reira oia i rave ai i te mau ohipa mana.” 15  Area vetahi, te parau ra ïa: “O Elia.” E te tahi atu: “E peropheta oia mai te mau peropheta no tahito ra.” 16  I to Heroda râ faarooraa i te reira, na ô ihora oia: “Te Ioane ta ’u i faaue ia tâpûhia te upoo, o ’na tei faatiahia mai.” 17  Na Heroda hoi i faaue na ia haru, ia taamu e ia tuu ia Ioane i roto i te tapearaa, ia au i te hinaaro o Herodia ta ’na i faaipoipo, e vahine hoi na Philipa to ’na taeae. 18  I parau noa na hoi Ioane ia Heroda: “E ere i te mea tano ia au i te ture ia faaipoipo oe i te vahine a to taeae.” 19  Inoino roa ihora râ Herodia ia Ioane, a hinaaro atu ai e taparahi pohe ia ’na. Aita râ i tia ia ’na. 20  Te mǎta‘u ra hoi Heroda ia Ioane, ua ite oia e e taata parau-tia teie e te mo‘a, e te paruru ra oia ia ’na. Ia faaroo oia ia Ioane ia paraparau, eita o ’na e taa faahou e nafea. E faaroo noa ’tu râ oia ma te au. 21  Tera râ, tae maira te mahana ta Herodia i tiai noa na, i to Heroda faatupuraa i te tamaaraa i to ’na mahana fanauraa no to ’na mau tia faatere, te mau raatira o te nuu e te feia tiaraa teitei o Galilea. 22  Tomo maira te tamahine a Herodia e ori ihora. Au roa a‘era Heroda e te feia e tamaa ra* e o ’na. Na ô atura te arii i te potii: “A ani mai i ta oe e hinaaro, e horoa ’tu vau.” 23  Horeo atura oia: “Ta oe e ani mai, e horoa ’tu vau, tae noa ’tu i te afaraa o ta ’u faatereraa.” 24  Haere atura te potii i rapaeau e ui atura i to ’na metua vahine: “Eaha ta ’u e ani?” Pahono maira oia: “Te upoo o Ioane Bapetizo.” 25  Haere ru ihora te potii i te arii ra e na ô atura: “Te hinaaro nei au ia horoa mai oe i teie nei i te upoo o Ioane Bapetizo i roto i te hoê farii maa parahurahu.” 26  Peapea roa ihora te arii e farii maira râ i te aniraa a te potii no ta ’na i horeo e no te mau manihini.* 27  Tono ihora te arii i te hoê faehau, ma te faaue e hopoi mai i te upoo o Ioane. Haere atura ïa te faehau e tâpû i to Ioane upoo i roto i te tapearaa, 28  afai maira i te upoo i roto i te hoê farii maa parahurahu, tuu maira i te potii ra, o tei horoa ’tu i to ’na metua vahine. 29  I te faarooraa ta ’na mau pǐpǐ i te reira, haere atura ratou e tii i to ’na tino e tuu atura i roto i te menema.* 30  Putuputu maira te mau aposetolo ia Iesu ra e faatia maira i te mau mea atoa ta ratou i rave e i haapii atu. 31  Mea rahi te taata tei haere mai e tei ho‘i atu e aita ’tura e taime to ratou no te tamaa. Na ô atura oia: “Mai haere ana‘e i te hoê vahi mo‘emo‘e e faafaaea rii.” 32  Fano atura ïa ratou ana‘e na nia i te poti i te hoê vahi mo‘emo‘e. 33  Ite a‘era râ te taata ia ratou i te revaraa, faarooroo a‘era e rave rahi, e horo atura mai te mau oire atoa mai e na mua ’tura i te tae i taua vahi ra. 34  I to Iesu pouraa mai nia mai i te poti, ite ihora oia i te hoê nahoa rahi e aroha ’tura ia ratou, no te mea e au ratou i te mau mamoe aore e tiai. Haapii atura oia ia ratou e rave rahi parau mau. 35  A topa ’i te mahana, haere maira ta ’na mau pǐpǐ ia ’na ra e na ô maira: “E vahi mo‘emo‘e teie e ua topa ê na te mahana. 36  A tuu na ia ratou ia haere na te mataeinaa e te mau oire rii tapiri e hoo mai i te maa na ratou.” 37  Pahono atura oia: “Na outou e horoa i te maa na ratou.” Parau maira ratou: “E haere anei ïa matou e hoo mai e 200 denari* faraoa ei maa na ratou?” 38  Na ô atura oia: “Ehia faraoa ta outou? Haere na a hi‘o!” I to ratou iteraa, na ô maira: “E pae, e piti atoa i‘a.” 39  Faaue atura oia i te nahoa atoa ia parahi tapǔpǔ i nia i te matie. 40  Parahi ihora ratou 100 te tahi pǔpǔ, e 50 te tahi atu. 41  Rave ihora Iesu i na faraoa e pae e na i‘a e piti, hi‘o a‘era i nia i te ra‘i e haamaitai ihora i te Atua. Ofati ihora oia i na faraoa, tuu atura i te mau pǐpǐ, o tei opere na te nahoa, e vahi ihora i na i‘a e piti no te taata atoa. 42  Tamaa a‘era ratou pauroa e paia ’tura. 43  Haaputu atura ratou i te toea faraoa i roto 12 farii î maitai, e te toe atoa ra te i‘a. 44  Te feia tei amu i te faraoa, e 5 000 ïa tane. 45  I reira iho, parau atura Iesu i ta ’na mau pǐpǐ ia haere i nia i te poti e ia fano na mua ia ’na i te tahi a‘e pae na pihai iho ia Betesaida, a faaho‘i ai oia iho i te nahoa taata. 46  I muri a‘e râ i to te nahoa revaraa, haere a‘era Iesu e pure i nia i te hoê mou‘a. 47  E po ihora, tei ropu te poti i te miti o Galilea. Area Iesu, tei uta ïa o ’na ana‘e. 48  Ite atura oia ia ratou ua rohirohi i te hôeraa no te mata‘i e na mua mai ra piri i te maha o te araraa o te rui,* haere atura oia ia ratou ra na nia i te miti, mai te huru ra râ e e hemo ratou ia ’na. 49  I to ratou iteraa mai ia ’na i te haereraa na nia i te miti, na ô a‘era ratou: “E orama!” Tuô a‘era ratou. 50  O ratou pauroa hoi tei ite ia ’na e tei riaria. Parau ihora râ Iesu ia ratou: “Ia itoito outou! O vau teie, eiaha e mǎta‘u.” 51  Haere atura oia i nia i te poti ia ratou ra e pohe ihora te mata‘i. Maere roa ihora te mau pǐpǐ, 52  aita hoi i taa ia ratou te auraa o na faraoa ta Iesu i opere e aita â to ratou aau i maramarama ’tura. 53  I to ratou fanoraa i te tahi a‘e pae, tapae atura ratou i Genesareta e tutau ihora i pihai iho mai. 54  I to ratou iho â pouraa mai nia mai i te poti, ite a‘era te taata e o Iesu tera. 55  Horo atura ratou paatoa e faaara i te feia o taua tuhaa fenua ra, e afai maira i te feia ma‘i na nia i te ro‘i i te mau vahi ta ratou i faaroo e to reira Iesu. 56  Na te mau oire rii, oire aore ra mataeinaa i haere ai oia, ua afai ratou i te feia ma‘i i te mahora,* a taparu atu ai ia ’na ia tapea noa ’tu ratou i to ’na hiti ahu. E ua ora te feia atoa tei tapea i to ’na hiti ahu.

Nota i raro i te api

A hi‘o i te titionare.
Oia hoi na 12 aposetolo.
Aore ra “pane.”
“Veo” na roto i te reo Heleni.
E faaiteraa ïa e na te taata iho e amo i ta ’na utua.
Oia hoi Heroda Anitipa. A hi‘o i te titionare.
Aore ra “e tarava ra i te amuraa maa.”
Aore ra “no te feia e tarava ra i te amuraa maa.”
Aore ra “menema haamana‘oraa.”
A hi‘o i te titionare.
Mai te area hora 3 i te aahiata e tae atu i te hitiraa mai o te mahana i te area hora 6.
I reira te taata e hoohoo ai e e ruru ai.