Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mareko 5:1-43

HAAPOTORAA O TE MAU TUMU PARAU

  • Tuu Iesu i te mau demoni i roto i te puaa (1-20)

  • Tamahine a Iaeiro. Tapea te hoê vahine i to Iesu ahu (21-43)

5  Tae atura ratou i tera ’tu pae o te roto, i te tuhaa fenua o Geregasa.  I muri a‘e iho â i to Iesu pouraa mai nia mai i te poti, farerei maira te hoê tane tei uruhia e te hoê varua viivii ia ’na, mea na roto mai oia i te vahi hunaraa.  I mau na oia i reira e aita e taata i tia ia taamu ia ’na i te fifi auri.  Ehia taime te taamuraahia to ’na na rima e na avae i te fifi auri. Ua mutu râ te fifi auri e ua hu‘ahu‘a roa ia ’na e aita i mau i te taata ia tapea ia ’na.  I te po e te ao, na te vahi hunaraa e te mau mou‘a, i tutuô noa na oia, o tei mutumutu hanoa ia ’na iho i te ofai.  I to ’na râ iteraa ’tu ia Iesu i te atea ê, horo maira oia e tahopu ihora ia ’na.  Tuô maira taua taata ra a na ô ai: “Eaha ta oe ohipa i ǒ nei, Iesu, Tamaiti a te Atua Teitei? Ia horeo mai oe i te i‘oa o te Atua e e ore oe e haamauiui ia ’u.”  I parau na hoi Iesu ia ’na: “Haere i rapae i tera taata, oe te varua viivii.”  Ui atura râ Iesu: “O vai to oe i‘oa?” Pahono maira oia: “O Nuu, mea rahi hoi matou.” 10  Onoono maira oia ia Iesu eiaha e tiavaru ia ratou i rapae i taua fenua ra. 11  E nǎnǎ puaa rahi tei te pae mou‘a e amu haere ra i te maa. 12  Taparu a‘era te mau varua ia Iesu: “A tuu ia matou i roto i te mau puaa.” 13  Faatia ihora oia. Haere maira te mau varua viivii i rapae e tomo a‘era i roto i te mau puaa piri i te 2 000. Horo atura te nǎnǎ, topa ’tura i roto i te miti na nia mai i te pari* e paremo a‘era. 14  Horo atura râ te mau tiai o taua mau puaa ra e faatia na te oire e na te mataeinaa i te ohipa i tupu e haere maira te taata e hi‘o. 15  Haere maira ratou ia Iesu e ite a‘era i te tane tei uruhia na e te nuu demoni, te parahi ra, e ahu to ’na e ua afaro te feruriraa. Mǎta‘u a‘era ratou. 16  Faatia atoa ’tura te feia tei ite mata i tei tupu i nia i te tane tei uruhia e te demoni e i nia i te mau puaa. 17  Parau onoono maira ratou ia Iesu ia faarue mai i to ratou fenua. 18  Taparu maira te tane tei uruhia na e te demoni ia Iesu o te haere ra i nia i te poti, ia pee atoa oia ia ’na. 19  Aita râ Iesu i farii, ua na ô atu râ: “A ho‘i i to oe fare, i to oe mau fetii, e a faatia ’tu i te mau mea atoa ta Iehova* i rave no oe e i to ’na aroharaa* ia oe.” 20  Haere atura taua taata ra e faaite na Dekapoli* i te mau mea atoa ta Iesu i rave no ’na. Maere ihora te taata atoa. 21  Ho‘i atura Iesu i te tahi a‘e pae o te miti na nia i te poti. Tei tatahi â oia i ruru mai ai te hoê nahoa rahi i pihai iho ia ’na. 22  Tae maira te hoê aratai o te sunago, o Iaeiro te i‘oa, e a ite ai oia ia Iesu, tuturi ihora oia i to ’na pae avae. 23  Taparuparu maira oia: “E ma‘i rahi to ta ’u tamahine iti.* Haere mai na e tuu i to rima i nia ia ’na ia ora oia.” 24  Haere atura Iesu na muri i taua aratai ra. Pee atoa maira e rave rahi taata e piri roa maira ia Iesu. 25  Te vai ra te hoê vahine, 12 matahiti to ’na tapahi-noa-raa. 26  I mauiui roa na hoi oia i roto i te rima o te taote e rave rahi a pau roa ’i ta ’na moni e aita hoê a‘e apî. Ua rahi roa ’tu râ to ’na ma‘i. 27  I to ’na faarooraa i te mau mea no nia ia Iesu, haere maira oia i muri ia ’na na roto i te nahoa e tapea maira i to ’na ahu, 28  i parau noa na hoi oia: “Ia tapea noa ’tu vau i to ’na ahu, e ora ïa to ’u ma‘i.” 29  Mau ihora to ’na tapahi. Taa ’tura ia ’na e ua ora to ’na ma‘i ino. 30  Ite ihora Iesu e e mana no roto mai ia ’na tei haere i rapae, fariu atura i muri i roto i te nahoa e ui atura: “Na vai i tapea i to ’u ahu?” 31  Pahono maira râ ta ’na mau pǐpǐ: “Te ite ra oe i te nahoa tei piri roa ia oe, e te ui ra oe: ‘Na vai i tapea ia ’u?’” 32  Hi‘o atura oia e ati noa ’‘e ia ’na ia ite oia i tei na reira ia ’na. 33  Haere maira taua vahine ra ma te mǎta‘u e te rûrû, ua ite hoi oia i tei tupu i nia ia ’na. Tuturi ihora oia i mua ia Iesu a faaite roa ’tu ai i te parau mau. 34  Na ô atura Iesu: “Ta ’u tamahine, no to oe faaroo i ora ’i oe. A haere, eiaha oe e haapeapea, e ia ora mai oe i to oe ma‘i ino.” 35  A paraparau noa ’i oia, haere maira te tahi mau tane na te fare mai o te aratai o te sunago e na ô maira: “Ua pohe to tamahine! Eiaha e haapeapea faahou i te Orometua.” 36  Faaroo ihora râ Iesu i ta ratou parau, e na ô atura i te aratai o te sunago: “Eiaha oe e mǎta‘u,* a faatupu noa râ i te faaroo.” 37  Aita oia i faatia i te taata ia na muri ia ’na, ia Petero ana‘e râ e ia Iakobo e Ioane te taeae o Iakobo. 38  Haere a‘era ratou i te fare o te aratai o te sunago e ite atura Iesu i te taata e maniania ra, e ta‘i ra e e auê ra. 39  Tomo ihora oia i roto i te fare e na ô atura: “Eaha outou e ta‘i ai e e maniania ’i? Aita te potii i pohe, te taoto ra râ.” 40  Ata faaooo a‘era ratou ia ’na. I muri a‘e râ i to ’na faaueraa ia tuuhia ratou i rapaeau, tapea maira oia i te metua tane e te metua vahine o te potii e na pǐpǐ tei na muri ia ’na e tomo atura i te vahi to reira te potii. 41  Rave ihora oia i te rima o te tamahine e na ô atura: “Talita kumi,” teie te auraa ia hurihia: “E teie nei tamahine iti, te parau atu nei au ia oe: A tia mai!” 42  Tia ihora te tamahine e hahaere atura. (Tei te 12raa oia o to ’na matahiti.) I reira iho, oaoa roa a‘era na metua. 43  Faaue ihora oia ia ratou ma te onoono* eiaha e faaite i te ohipa i tupu e parau atura ia horoahia te maa na te potii.

Nota i raro i te api

Aore ra “mato tarere.”
A hi‘o i te titionare.
Aore ra “aroha-hamani-maitai-raa.”
Aore ra “i na oire hoê ahuru.”
Aore ra “Ua fatata ta ’u tamahine iti i te pohe.”
Aore ra “A faaea i te taiâ.”
Aore ra “Faaue maitai ihora oia ia ratou.”