Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mareko 4:1-41

HAAPOTORAA O TE MAU TUMU PARAU

  • FAAHOHO‘ARAA O TE FAATERERAA ARII (1-34)

    • Te taata ueue huero (1-9)

    • Tumu e faaohipa ’i Iesu i te mau faahoho‘araa (10-12)

    • Faataahia te faahoho‘araa o te taata ueue huero (13-20)

    • Eita te mori e tuuhia i raro a‘e i te farii (21-23)

    • Ta outou huru faitoraa (24, 25)

    • Te taata ueue huero e taoto ra (26-29)

    • Te huero sinapi (30-32)

    • Faaohiparaa i te mau faahoho‘araa (33, 34)

  • Pohe te vero ia Iesu (35-41)

4  Haapii faahou atura Iesu i te taata i tatahi e mea rahi roa te taata tei haere mai ia ’na ra. Haere atura ïa oia i nia i te hoê poti, parahi ihora e faaatea rii atura i tai a faaea noa ’i te nahoa atoa i tatahi.  Haapii atura oia ia ratou e rave rahi parau mau ma te rave i te mau faahoho‘araa e na ô atura:  “A faaroo mai na. Inaha, e taata ueue tei haere e ueue i te huero.  A ueue ai oia, mairi ihora te tahi mau huero na te hiti purumu, maue maira te mau manu e amu ihora i te mau huero.  Mairi ihora te tahi atu mau huero i te vahi ofaifai aita i rahi te repo e tupu ihora, no te mea mea iti te repo i reira.  I te puairaa mai râ te mahana, paapaa a‘era te mau huero e mǎrô atura no te mea aita i a‘a.  Mairi ihora te tahi atu mau huero i roto i te mau raau taratara, tupu maira te mau raau taratara, tapo‘i a‘era i te mau huero, e aita ’tura i hotu mai.  Mairi ihora râ te tahi atu i nia i te repo maitai, e a tupu e a rahi mai ai, hotu maira e taitoru ahuru ta te hoê, taiono ahuru ta te tahi e taihanere ta te tahi atu.”  Na ô faahou atura oia: “E tari‘a to ’na no te faaroo, a faaroo ïa.” 10  A faaea noa ’i Iesu o ’na ana‘e, uiui maira te tahi mau pǐpǐ e na 12* ia ’na no nia i te mau faahoho‘araa. 11  Parau atura oia: “Ua horoahia ia outou te taaraa i te mau parau huna mo‘a o te Faatereraa arii a te Atua,* no to rapae râ, e faahoho‘araa ana‘e ïa ta ratou e faaroo. 12  Hi‘o noa ’i ratou, te hi‘o ra, aita râ e ite ra, e faaroo noa ’i ratou, te faaroo ra, aita râ e taa ra i te auraa, eita atoa ratou e ho‘i mai a faaorehia ’tu ai ta ratou hara.” 13  Na ô faahou atura oia: “Aita e taa ra ia outou teie faahoho‘araa, e nafea ïa e taa ’i ia outou te tahi atu mau faahoho‘araa atoa? 14  E ueue te taata ueue i taua parau ra. 15  Te hiti purumu i ueuehia ’i te huero, o te feia ïa no faaroo noa ihora i te parau, haere maira râ Satani e iriti ê ihora i te parau i ueuehia i roto ia ratou. 16  Oia atoa, te vahi ofaifai i ueuehia ’i te huero, o te feia ïa no faaroo noa ihora i te parau e farii atura i te reira ma te oaoa. 17  Aita râ te parau i a‘a i roto i to ratou aau, maa taime noa ïa to ratou fariiraa i te reira, e i te tupuraa iho â te ati aore ra te hamani-ino-raa no te parau, aita ’tura ratou i tiaturi faahou. 18  Te vahi taratara i mairi ai te huero, o te feia ïa tei faaroo i te parau. 19  Ô maira râ i roto i to ratou aau te haapeapearaa no te oraraa o teie faanahoraa o te ao nei,* te mana haavarevare o te tao‘a e te hinaaro i te mau mea rau, tapo‘i a‘era i te parau, e aita ’tura i hotu mai. 20  E te repo maitai i ueuehia ’i te huero, o te feia ïa tei faaroo e tei farii maitai i te parau, hotu maira e taitoru ahuru ta te hoê, taiono ahuru ta te tahi e taihanere ta te tahi atu.” 21  Parau faahou atura oia ia ratou: “Eita te hoê mori e tuuhia i raro a‘e i te hoê farii* aore ra i raro a‘e i te hoê ro‘i, e tuuhia râ i nia i to ’na vairaa, e ere anei? 22  Aita hoi e mea huna e ore e faaitehia, e aita e mea i tapo‘i-maitai-hia e ore e haamahorahia. 23  E tari‘a to ’na no te faaroo, a faaroo ïa.” 24  Parau faahou atura oia ia ratou: “A faaroo maitai i ta outou e faaroo nei. Tei te huru o ta outou faitoraa e faito-atoa-hia ’i ta outou, oia mau, hau atu â ta outou e fana‘o. 25  Te taata hoi e faufaa ta ’na, e horoahia ’tu â ïa ta ’na. Te taata râ aita ta ’na e faufaa, e iriti-ê-atoa-hia ïa ta ’na.” 26  Na ô faahou atura ïa oia: “E au te Faatereraa arii a te Atua i te hoê taata o te ueue i te huero i raro i te repo. 27  A taoto ai oia i te po e a ara ’i i te ao, e oteo e e tupu mai te huero ma te ore oia e ite e nafea. 28  Na te repo iho e faahotu riirii mai, te oteo na mua, te maa sitona i muri iho o te paari roa mai i te pae hopea. 29  I te paariraa iho â te sitona, e tâpû oia i te reira i te tipi fefe, ua tae mai hoi te ootiraa.” 30  Na ô faahou atura oia: “I te aha e faaau ai tatou i te Faatereraa arii a te Atua, aore ra na roto i teihea faahoho‘araa e faataa ’i tatou i te reira? 31  E au te reira i te hoê huero sinapi,* te huero nainai roa ’‘e o te mau huero atoa o te fenua ia tanuhia i raro i te repo. 32  Ia tanuhia râ, e tupu mai te reira e e rahi a‘e i te mau maa tupu atoa a toro atu ai to ’na mau amaa, a nehenehe atu ai te mau manu o te reva e parahi ai i raro a‘e i to ’na marumaru.” 33  Maoti e rave rahi faahoho‘araa mai tera te huru i haapii ai oia ia ratou i te parau a te Atua, ia au i te tia ia ratou ia taa. 34  Oia mau, maoti noa te mau faahoho‘araa e haapii ai oia ia ratou. I ta ’na ana‘e râ mau pǐpǐ e faataa ’i oia i te mau mea atoa. 35  E ahiahi ihora taua mahana ra, parau atura oia ia ratou: “Mai fano ana‘e i tera ’tu pae.” 36  I muri a‘e i to te mau pǐpǐ faaho‘iraa ’tu i te nahoa, rave a‘era ratou i te poti tei roto Iesu e fano atura e te tahi atu mau poti. 37  Tupu ihora te hoê mata‘i rahi, fati maira te mau are i nia i te poti tei fatata roa i te tomo. 38  Tei te muriraa râ o te poti Iesu, e taoto ra te upoo i nia i te turua. Faaara maira te mau pǐpǐ ia ’na e na ô maira: “Orometua, e pohe tatou, aita oe e haapeapea ra?” 39  Tia a‘era oia, tama‘i ihora i te mata‘i e parau atura i te miti: “A faaea! Mamû!” Pohe ihora te mata‘i e mania roa ’tura. 40  Parau atura oia ia ratou: “Eaha outou e mǎta‘u* roa ’i? Aita â to outou e faaroo?” 41  E mǎta‘u rahi hoi to ratou, a na ô ai te tahi i te tahi: “O vai hoi teie taata? E faaroo atoa te mata‘i e te miti ia ’na.”

Nota i raro i te api

Oia hoi na 12 aposetolo.
Aore ra “Basileia o te Atua.”
Aore ra “teie tau.” A hi‘o i te titionare.
Aore ra “farii faito maa.”
E huero haihai roa teie e raea e 4 metera te teitei ia tupu mai, e amaa to ’na.
Aore ra “toaruaru.”