Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mareko 3:1-35

HAAPOTORAA O TE MAU TUMU PARAU

  • Faaorahia te hoê tane rima mǎrô (1-6)

  • Nahoa rahi i tatahi (7-12)

  • Na 12 aposetolo (13-19)

  • Faainoraa i te varua mo‘a (20-30)

  • To Iesu metua vahine e mau taeae (31-35)

3  Tomo faahou atura Iesu i roto i te hoê sunago. E tane rima mǎrô* to reira.  Hi‘o maitai maira te mau Pharisea ia ’na no te ite e faaora anei oia i taua taata ma‘i ra i te Sabati a faahapa mai ai ratou ia ’na.  Parau atura Iesu i te tane rima mǎrô:* “A tia mai e a haere mai i ropu.”  Na ô atura oia: “Ia au i te ture, mea tano anei i te Sabati ia hamani maitai aore ra ia hamani ino, ia faaora aore ra ia haapohe?” Mamû noa a‘era ratou.  Hi‘o ihora Iesu ia ratou ma te riri, peapea roa ihora no te etaeta o to ratou aau e na ô atura i taua tane ra: “A toro mai na i to rima.” Toro maira oia i to ’na rima e ora ’tura.  Haere atura te mau Pharisea i rapae e putuputu ihora e te feia o te pǔpǔ a Heroda no te feruri i te hoê ravea no te haapohe ia Iesu.  Haere atura râ Iesu e ta ’na mau pǐpǐ i te pae miti. Mea rahi te taata no Galilea e no Iudea mai tei pee mai ia ’na.  Tae atoa maira e rave rahi no Ierusalema mai, Idumea, hitia o te râ o Ioridana e to pihai iho ia Turia e Sidona, i to ratou faarooraa i te mau mea atoa ta ’na i rave.  Parau atura oia i ta ’na mau pǐpǐ ia faaineine i te hoê poti, ia tia ia ’na ia faaatea ’tu i tai ia piri roa mai te nahoa ia ’na. 10  No to ’na faaoraraa e rave rahi taata ma‘i, piri roa maira te feia atoa e ma‘i ino to ratou no te tapea ia ’na. 11  Ia ite atoa te mau varua viivii ia Iesu, e tipapa ratou i raro i mua ia ’na a parau atu ai ma te reo puai: “O te Tamaiti a te Atua oe.” 12  Ua faaue maitai râ oia ia ratou e rave rahi taime eiaha e faaite o vai oia. 13  Pauma a‘era Iesu i nia i te hoê mou‘a, titau ihora i te tahi o ta ’na mau pǐpǐ e pee maira ratou ia ’na. 14  Haamau* ihora Iesu i te tino 12,* o ta ’na i mairi i te i‘oa aposetolo, ia pee noa ratou ia ’na e ia tono oia ia ratou e poro 15  ma te mana e tiavaru i te mau demoni. 16  Teie te tino 12 ta ’na i maiti,* Simona ta ’na i mairi atoa i te i‘oa ia Petero, 17  Iakobo te tamaiti a Zebedaio, Ioane te taeae o Iakobo (ua mairi atoa oia ia raua i te i‘oa o Boanere, “tamaiti a te patiri” te auraa), 18  Anederea, Philipa, Baretolomea, Mataio, Toma, Iakobo te tamaiti a Alephaia, Tadaio, Simona parauhia “tei itoito rahi” 19  e Iuda Isakariota, tei tuu ia Iesu i to ’na mau enemi i muri a‘e. Tomo atura oia i roto i te hoê fare, 20  e putuputu faahou maira te nahoa e aita ’tura i tia ia Iesu e ta ’na mau pǐpǐ ia tamaa. 21  I to te fetii râ o Iesu faarooraa i te reira, haere maira ratou e haru ia ’na. I parau na hoi ratou: “Ua maamaahia oia.” 22  I na ô atoa na te mau papai parau tei pou mai Ierusalema mai: “Ua uruhia oia e Belezebuba* e te tiavaru nei oia i te mau demoni i te mana o te raatira o te mau demoni.” 23  No reira, pii atura Iesu ia ratou ia tapiri mai e horoa ’tura i te tahi mau faahoho‘araa: “E nafea ïa Satani e tiavaru ai ia Satani? 24  Ia amahamaha te hoê faatereraa, e ore tera faatereraa e mau. 25  E ia amahamaha te hoê utuafare, e taa ê te tahi i te tahi. 26  Oia atoa, ia aro Satani ia ’na iho a amahamaha ’tu ai, eita oia e mau, e mou râ. 27  Aita hoi e taata e tomo i roto i te fare o te hoê taata puai no te eiâ i ta ’na mau tao‘a ma te ore e taamuamu na mua i taua taata puai ra. Ia na reira oia e tia ’i ia ’na ia eiâ i ta ’na mau tao‘a. 28  Oia mau ta ’u e parau atu: E faaorehia te mau hara atoa ta te taata e rave e ta ratou mau parau faaino atoa. 29  Tera râ, e ore roa e faaorehia te hara a te taata o te faaino i te varua mo‘a, e hara mure ore ta ’na.” 30  O ta Iesu ïa i parau no to ratou na ôraa: “E varua viivii to ’na.” 31  Tae maira to Iesu metua vahine e to ’na mau taeae, e a tia noa ’i i rapaeau, tono maira i te tahi taata e tii ia ’na. 32  E nahoa râ te parahi ra e ati noa ’‘e ia Iesu e parau maira te hoê o ratou: “Inaha, tei rapaeau to metua vahine e to mau taeae, te ani mai ra ia oe.” 33  Pahono atura râ oia: “O vai to ’u metua vahine e to ’u mau taeae?” 34  Hi‘o atura oia i te feia e parahi ra e ati noa ’‘e ia ’na e na ô ihora: “Teie to ’u metua vahine e to ’u mau taeae! 35  Te taata o te rave i te hinaaro o te Atua, o ’na ïa to ’u taeae, to ’u tuahine e to ’u metua vahine.”

Nota i raro i te api

Aore ra “paruparu.”
Aore ra “paruparu.”
Aore ra “Faatoroa.”
Oia hoi na 12 aposetolo.
Aore ra “faatoroa.”
No Satani teie i‘oa.