Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mareko 2:1-28

HAAPOTORAA O TE MAU TUMU PARAU

  • Faaora Iesu i te hoê hapepa (1-12)

  • Pii Iesu ia Levi (13-17)

  • Uiraa no nia i te haapaeraa maa (18-22)

  • O Iesu ‘te Fatu o te Sabati’ (23-28)

2  Tau mahana râ i muri a‘e, tomo faahou atura Iesu i Kaperenaumi e atutu atura te parau e tei te fare oia.  Ruru maira e rave rahi taata e apǐ roa ihora te fare e te uputa atoa. Haamata ’tura Iesu i te faaite i te parau apî oaoa.  Afaihia maira te hoê hapepa tei amohia e maha tane.  No te rahi râ o te taata, aita ’tura i tae ia ratou ia afai i tera tane ia Iesu. Faaapoo atura ratou i te tapo‘i fare i nia noa mai i te vahi to reira Iesu, e haapou maira i te hapepa e tarava ra i nia i te ro‘i.  I to Iesu iteraa i to ratou faaroo, na ô ihora oia i te hapepa: “Ta ’u tamaiti, ua faaorehia ta oe mau hara.”  I reira, te parahi ra te tahi mau papai parau e feruriruri ra i roto i to ratou aau:  “Eaha teie nei taata e na reira ’i i te parau? Te faaino ra oia i te Atua. O te Atua ana‘e hoi te nehenehe e faaore i te hara.”  Taa oioi ihora ia Iesu to ratou huru feruriraa e na ô atura: “Eaha outou e feruri ai mai tera i roto i to outou aau?  Eaha hoi te mea ohie a‘e ia parau i te hapepa: ‘Ua faaorehia ta oe mau hara,’ aore ra: ‘A tia i nia, a rave i to oe ro‘i, a haere?’ 10  E faaite râ vau ia outou e e mana to te Tamaiti a te taata nei e faaore i te hara i te fenua.” Na ô atura oia i te hapepa: 11  “Te parau atu nei au ia oe: ‘A tia i nia, a rave i to oe ro‘i e a haere i to oe fare.’” 12  Tia a‘era taua taata ra, rave ihora i to ’na ro‘i e haere atura i rapae na mua ia ratou pauroa. Maere roa ihora ratou pauroa e faahanahana ’tura i te Atua a na ô ai: “A tahi ra tatou a ite ai i te ohipa mai teie.” 13  Haere faahou atura Iesu na te pae miti. E nahoa rahi tei haere mai ia ’na ra e haapii ihora oia ia ratou. 14  A haere noa ’i Iesu, ite atura oia ia Levi* te tamaiti a Alephaia e parahi ra i te fare aufauraa tute, e na ô atura: “A pee mai ia ’u.” Tia a‘era taua taata ra e pee maira ia ’na. 15  I muri a‘e, a tamaa noa ’i Iesu* i roto i te fare o Levi, e rave rahi titau tute e taata rave hara e tamaa atoa ra* e o ’na e ta ’na mau pǐpǐ. Mea rahi o ratou tei pee ia ’na. 16  I to te mau papai parau a te mau Pharisea iteraa e te tamaa ra Iesu e te feia rave hara e te titau tute, na ô maira ratou i ta ’na mau pǐpǐ: “Te tamaa ra oia e te mau titau tute e te feia rave hara?” 17  Faaroo ihora Iesu i taua parau ra e na ô atura: “E ere te taote no te feia oraora maitai, no te feia ma‘i râ. Ua haere mai hoi au e titau i te feia rave hara ia tatarahapa, eiaha râ te feia parau-tia.” 18  Ua matau te mau pǐpǐ a Ioane e te mau Pharisea i te haapae i te maa. Haere maira ratou e ui ia Iesu: “E peu matauhia e te mau pǐpǐ a Ioane e te mau pǐpǐ a te mau Pharisea ia haapae i te maa, no te aha ïa ta oe mau pǐpǐ e ore ai e na reira atoa?” 19  Na ô atura ïa Iesu: “Aita e tumu ia haapae te mau hoa o te tane faaipoipo i te maa a vai noa mai ai oia i rotopu ia ratou, e ere anei? A faaea noa ’i te tane faaipoipo ia ratou ra, eita e tano ia haapae ratou i te maa. 20  E tae mai râ te mau mahana e hopoi-ê-hia ’i te tane faaipoipo, i reira ïa ratou e haapae ai i te maa. 21  Aita e taata e tafai i te ahu apî i nia i te ahu tahito. Ia na reira oia, e tô te ahu apî i nia i te ahu tahito, a rahi atu ai te mutu. 22  Aita atoa e taata e tuu i te uaina apî i roto i te mau pute uaina* tahito. Ia na reira oia, e mahae te mau pute e e mâu‘a te uaina. E tuuhia râ te uaina apî i roto i te mau pute uaina apî.” 23  I to Iesu haereraa na roto i te mau faaapu sitona i te Sabati,* hutihuti a‘era ta ’na mau pǐpǐ i te huero sitona a haere noa ’i ratou. 24  Na ô maira te mau Pharisea: “A hi‘o na! Eaha ta oe mau pǐpǐ e rave ai i tei opanihia i te Sabati?” 25  Parau atura râ oia: “Aita outou i taio i ta Davida i rave a ere ai oia i te maa e a poia ’i oia e to ’na mau taata? 26  Ia au i te aamu o te tahu‘a tiaau ra o Abiatara, ua tomo Davida i roto i te fare o te Atua e ua amu i te mau pane pûpûhia,* tei opanihia i te taata atoa ia amu. O te mau tahu‘a ana‘e te nehenehe e amu. Ua horoa atoa oia i te tahi na to ’na mau taata.” 27  Na ô atura oia: “Ua haamau te Atua i te Sabati no te taata, aita râ oia i hamani i te taata no te Sabati. 28  No reira, e Fatu atoa te Tamaiti a taata nei no te Sabati.”

Nota i raro i te api

Pii-atoa-hia Mataio.
Aore ra “a tarava noa ’i Iesu i te amuraa maa.”
Aore ra “e tarava atoa ra i te amuraa maa.”
Pute uaina iri animara.
A hi‘o i te titionare.
Aore ra “pane o te aro.” A hi‘o i te titionare.