Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mareko 15:1-47

HAAPOTORAA O TE MAU TUMU PARAU

  • Iesu i mua ia Pilato (1-15)

  • Faaooohia i mua i te taata atoa (16-20)

  • Patitihia i nia i te pou i Gologota (21-32)

  • Poheraa o Iesu (33-41)

  • Hunaraa o Iesu (42-47)

15  I te aahiata, putuputu a‘era te mau tahu‘a tiaau, te mau aratai ati Iuda e te mau papai parau, oia hoi te Sunederi taatoa, taamu a‘era i to Iesu na rima, afai atura ia ’na e tuu atura ia Pilato ra.  Ui maira Pilato ia Iesu: “O oe te Arii o te ati Iuda?” Pahono atura Iesu: “Te reira iho â mai ta oe e parau ra.”  Mea rahi hoi te pariraa a te mau tahu‘a tiaau ia ’na.  Ui faahou maira Pilato ia Iesu: “Eita oe e pahono? Mea rahi hoi ta ratou pariraa ia oe.”  Aita râ Iesu i pahono faahou, a maere roa ’i Pilato.  I te mau oroa Pasa atoa, ua matau Pilato i te tuu mai i te hoê taata tapeahia ta te nahoa e ani.  I taua mau mahana ra, ua tapeahia te hoê taata o Baraba te i‘oa e te tahi atu mau orure hau tei haapohe atoa i te taata i ta ratou orureraa hau.  Haere maira te nahoa e ani maira ia Pilato i ta ’na i matau i te rave no ratou.  Pahono atura oia: “Hinaaro outou ia tuu atu vau i te Arii o te ati Iuda?” 10  Ua ite hoi Pilato e no te pohehae i tuu ai te mau tahu‘a tiaau ia Iesu ia ’na ra. 11  Onoono a‘era râ te mau tahu‘a tiaau i te nahoa ia ani ia Pilato ia tuu mai ia Baraba, eiaha râ ia Iesu. 12  Na ô faahou atura Pilato: “E nafea ïa vau i te taata ta outou e parau ra te Arii o te ati Iuda?” 13  Tuô noa ’tura ratou: “I nia i te pou!”* 14  Parau faahou atura râ Pilato: “No te aha hoi? Eaha ta ’na ohipa ino i rave?” Puai roa ’tura râ ta ratou tuôraa: “I nia i te pou!”* 15  Tuu atura Pilato ia Baraba ia mauruuru te nahoa. Faaue ihora oia ia huihia Iesu e tuu atura ia ’na i te mau faehau ia haapohehia i nia i te pou. 16  Aratai a‘era te mau faehau ia ’na i roto i te aua, oia hoi i roto i te aorai o te tavana, e titau a‘era i te taatoaraa o te mau pǔpǔ faehau. 17  Faaahu a‘era ratou ia ’na i te ahu vareau, firi a‘era i te hoê hei taratara e tuu atura i nia i to Iesu upoo. 18  Na ô maira ratou: “Ia ora na* te Arii o te ati Iuda!” 19  Tairi atoa maira ratou i to ’na upoo i te aeho, tutuha a‘era i nia ia ’na, tuturi ihora e tahopu maira ia ’na. 20  I muri a‘e i to ratou faaoooraa ia ’na, tatara a‘era ratou i te ahu roa vareau, faaahu ihora ia ’na i to ’na iho ahu tapo‘i e aratai atura ia ’na i rapae ia patitihia i nia i te pou. 21  Faahepo atoa ’tura ratou i te hoê taata e haere ra na reira, na te mataeinaa maira, ia amo i te pou haamauiuiraa* o Iesu. O Simona no Kurene, te metua tane o Alesanedero raua Rupho. 22  Afai atura ratou ia Iesu i te vahi parauhia Gologota, e “Apu upoo” te auraa ia hurihia. 23  I reira, tamata ’tura ratou i te horoa ’tu i te uaina anoihia i te mura, te hoê raau taero, aita râ oia i rave. 24  Patiti a‘era ratou ia ’na i nia i te pou e opere atura i to ’na mau ahu ma te pere* no te faaoti eaha ta te faehau tataitahi e rave. 25  I te toru o te hora* i patiti ai ratou ia ’na i nia i te pou. 26  Ua papaihia i nia noa mai i to ’na upoo tei parihia ia ’na: “Te Arii o te ati Iuda.” 27  E piti atoa eiâ tei patitihia i nia i te pou i pihai iho ia ’na, hoê i to ’na pae atau e hoê i to ’na pae aui. 28  *—— 29  Faaino maira te feia e haere ra na reira ia ’na, a tairiiri ai i te upoo e a na ô ai: “Oe o te vavahi i te hiero e o te patu i te reira e toru mahana, 30  a faaora ia oe iho, a pou mai i raro i tena pou haamauiuiraa.”* 31  Faaooo atoa maira te mau tahu‘a tiaau e te mau papai parau ia ’na, a na ô ai te tahi i te tahi: “Ua faaora o ’na ia vetahi ê, ia ’na iho râ, eita ïa e tia ia ’na! 32  Ia pou mai te Mesia, te Arii o Iseraela, i teie nei i raro i te pou haamauiuiraa,* ia ite hoi matou a tiaturi atu ai ia ’na.” Faaino atoa maira na eiâ tei patitihia i nia i te pou i pihai iho ia ’na. 33  Tae a‘era i te ono o te hora,* ati ihora te fenua taatoa i te poiri e tae atu i te iva o te hora.* 34  E i te iva o te hora, tuô ihora Iesu: “Eli, Eli, lama sabakatani?” teie te auraa ia hurihia: “To ’u Atua, to ’u Atua, eaha oe i faarue mai ai ia ’u?” 35  I te faarooraa ’tu vetahi e tia noa ra na reira, na ô a‘era ratou: “Faaroo na! Te pii ra o ’na ia Elia.” 36  Horo ihora te hoê taata e tutau i te rimu i roto i te uaina toavaava, tuu ihora i nia i te hoê aeho e horoa ’tura ia Iesu ra ia inu oia, a na ô ai: “Vaiiho noa na ia ’na! E hi‘o tatou e e haere mai anei Elia e haapou ia ’na i raro.” 37  Tuô ihora râ Iesu e pohe atura.* 38  Mahae ihora te paruru o te nao* mai nia mai e raro roa. 39  I to te raatira faehau e tia ra i mua ia Iesu iteraa i te mau mea e tupu ra i to ’na poheraa, na ô ihora oia: “O te Tamaiti a te Atua iho â teie taata.” 40  E vahine atoa te hi‘o mai ra na te atea mai. I rotopu ia ratou, te vai ra o Maria Magadala, Maria te metua vahine o Iakobo iti raua Iose e o Salome, 41  tei apee na ia Iesu i Galilea e tei tauturu na ia ’na i reira. Mea rahi atu â te vahine tei pauma atoa na muri ia ’na i Ierusalema. 42  Ua ahiahi ê na i taua taime ra e no te mea e mahana Faaineineraa, oia hoi te mahana hou te Sabati,* 43  haere maira Iosepha Arimataio, mero faaturahia no te Sunederi e tiai atoa ra i te Faatereraa arii a te Atua.* Faaitoito ihora oia i te haere i mua ia Pilato e ani maira i te tino o Iesu. 44  Hinaaro ihora râ Pilato e ite e ua pohe anei Iesu aore ra aita, titau ihora oia i te raatira faehau e ani atura ia ’na. 45  I to ’na iteraa e ua pohe Iesu, faatia ’tura oia ia Iosepha ia rave i te tino. 46  Hoo maira Iosepha i te ahu lino maitai, haapou maira i te tino i raro, vehî atura i te ahu lino maitai, tuu ihora i roto i te hoê menema* tei paohia i roto i te mato e turai atura i te hoê ofai i mua i te uputa o te menema. 47  Area Maria Magadala raua Maria te metua vahine o Iose, hi‘o noa ’tura ïa i te vahi i vaiihohia ’i to Iesu tino.

Nota i raro i te api

Aore ra “Haapohe ia ’na i nia i te pou!”
Aore ra “Haapohe ia ’na i nia i te pou!”
Aore ra “Maeva.”
A hi‘o i te titionare.
A hi‘o i te titionare.
I te area hora 9 i te poipoi.
Te vai ra teie irava i roto i te tahi mau huriraa Bibilia, aita râ i roto e rave rau papai Heleni tahito fariihia.
A hi‘o i te titionare.
A hi‘o i te titionare.
I te area hora 12 i te avatea.
I te area hora 3 i te taperaa mahana.
Aore ra “huti atura i to ’na hutiraa aho hopea.”
A hi‘o i te titionare.
A hi‘o i te titionare.
Aore ra “Basileia o te Atua.”
Aore ra “menema haamana‘oraa.”