Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mareko 14:1-72

HAAPOTORAA O TE MAU TUMU PARAU

  • Opua te mau tahu‘a e haapohe ia Iesu (1, 2)

  • Niniihia te mono‘i no‘ano‘a i nia ia Iesu (3-9)

  • Tuu Iuda ia Iesu i to ’na mau enemi (10, 11)

  • Pasa hopea (12-21)

  • Haamauhia te Amuraa maa a te Fatu (22-26)

  • Tohuhia to Petero parauraa e aita oia i ite ia Iesu (27-31)

  • Pure Iesu i Getesemane (32-42)

  • Haruhia Iesu (43-52)

  • Haavahia i mua i te Sunederi (53-65)

  • Parau Petero e aita oia i ite ia Iesu (66-72)

14  I roto e piti mahana e tupu ai te Pasa e te Oroa pane* hopue ore. Te imi ra te mau tahu‘a tiaau e te mau papai parau e haru ia Iesu na roto i te hoê ravea haavarevare e e haapohe ia ’na.  Te parau noa ra hoi ratou: “Eiaha tatou e haru ia ’na i te oroa a‘unei te taata e faahuehue ai.”  Tei Betania Iesu e tamaa ra* i te fare o Simona, e lepera na mua ’‘e, haere maira te hoê vahine e mohina* mono‘i no‘ano‘a ta ’na, e naradi mau moni rahi. Vavahi ihora oia i te auvaha o te mohina e ninii ihora i te mono‘i i nia i to Iesu upoo.  Aita vetahi i mauruuru, a na ô ai te tahi i te tahi: “Eaha i haamâu‘ahia ’i teie mono‘i no‘ano‘a?  E nehenehe hoi e hoo i teie mono‘i no‘ano‘a no e 300 tiahapa denari,* a horoa ’tu ai i te moni na te feia veve!” Riri roa ihora* ratou i taua vahine ra.  Na ô atura râ Iesu: “A vaiiho na ia ’na. Eaha outou e haapeapea ’i ia ’na? E ohipa maitai ta ’na i rave no ’u.  E vai noa mai hoi te feia veve i ǒ outou e e nehenehe outou e tauturu ia ratou i te mau taime atoa e hinaaro ai outou. O vau nei râ, e ore ïa e vai noa mai i ǒ outou.  Ua rave oia i tei tia ia ’na. Ua ninii oia i te mono‘i no‘ano‘a i nia i to ’u tino no te faaineine ia ’u no to ’u hunaraa.  Oia mau ta ’u e parau atu: I te mau vahi atoa e porohia ’i te parau apî oaoa e ati a‘e te ao nei, e faatia-atoa-hia ta teie vahine i rave ei mana‘oraa ia ’na.” 10  Haere atura Iuda Isakariota, hoê o na 12,* i te mau tahu‘a tiaau ra no te tuu ia Iesu i to ratou rima. 11  I to ratou faarooraa i ta Iuda parau, au roa a‘era ratou, e fafau ihora e horoa i te moni ario na ’na. Haamata ’tura Iuda i te imi i te taime tano no te tuu ia Iesu i to ratou rima. 12  I te mahana matamua o te Oroa pane hopue ore, e peu matauhia hoi ia pûpû i te animara ei tusia no te Pasa, na ô maira te mau pǐpǐ a Iesu: “Ihea oe e hinaaro ai ia haere matou e faaineine i te Pasa ia amu oe i te reira?” 13  Tono atura oia e piti o ta ’na mau pǐpǐ e na ô atura: “A haere i te oire, e farerei mai te hoê tane e amo ra i te hoê farii araea î i te pape ia orua. A pee ia ’na, 14  e i te vahi e tomo ai oia, a parau atu i te fatu fare: ‘Te na ô mai ra te Orometua: “Teihea te piha no te mau manihini e nehenehe ai au e amu i te Pasa e ta ’u mau pǐpǐ?”’ 15  E faaite mai oia i te hoê piha rahi i nia tei nahonaho. A faaineine i te Pasa no tatou i reira.” 16  Haere atura na pǐpǐ, tomo atura i roto i te oire, tupu a‘era te mau mea atoa mai ta Iesu i parau e faaineine atura raua i te Pasa. 17  E ahiahi ihora, haere maira Iesu e na 12 i reira. 18  A tarava noa ’i ratou i te amuraa maa e a tamaa noa ’i, na ô atura Iesu: “Oia mau ta ’u e parau atu: E tuu te hoê o outou e tamaa nei e o vau, ia ’u i to ’u mau enemi.” 19  Peapea ihora ratou e na ô maira ratou paatoa: “O vau anei?” 20  Parau atura oia: “O te hoê o na 12 te tuu i ta ’na pane* e o vau atoa i roto i te au‘a. 21  Te reva nei hoi te Tamaiti a te taata nei, mai tei papaihia no ’na, ua ati râ te taata na ’na e tuu i te Tamaiti a te taata nei i to ’na mau enemi! Mea maitai a‘e no tera taata ahani aita oia i fanauhia.” 22  A tamaa noa ’i ratou, rave ihora Iesu i te hoê pane, haamaitai a‘era i te Atua, ofati ihora i te pane, horoa ’tura i te mau pǐpǐ e na ô atura: “A rave, o to ’u tino teie.” 23  Rave atura oia i te hoê au‘a uaina, haamauruuru a‘era i te Atua, horoa ’tura ia ratou e inu atura ratou paatoa. 24  Na ô atura oia: “O to ’u ‘toto o te faufaa’ teie o te haamaniihia no te taata e rave rahi. 25  Oia mau ta ’u e parau atu: E ore roa vau e inu faahou i te uaina e tae roa ’tu i te mahana e inu ai au i te uaina apî i roto i te Faatereraa arii a te Atua.”* 26  E i muri a‘e i to ratou himeneraa no te arue i te Atua,* haere atura ratou i te mou‘a Oliveta. 27  Parau atura Iesu ia ratou: “E faarue outou paatoa ia ’u, ua papaihia hoi: ‘E tairi au i te tiai mamoe e e purara ê te mau mamoe.’ 28  I muri a‘e râ i to ’u tia-faahou-raa mai, e na mua ’tu vau ia outou i te haere i Galilea.” 29  Parau maira râ Petero: “Faarue noa ’tu â ratou paatoa ia oe, eita vau e na reira.” 30  Na ô atura Iesu: “Oia mau ta ’u e parau atu: I teie mahana, i teie iho â po, hou te hoê moa e totereo ai e piti taime, e parau oe e toru taime e aita oe i ite ia ’u.” 31  Parau onoono maira râ oia: “Pohe noa ’tu â vau e oe atoa, e ore roa vau e parau e aita vau i ite ia oe.” Na reira atoa maira te tahi atu mau pǐpǐ atoa i te parau. 32  Haere atura ratou i te hoê vahi o Getesemane te i‘oa e na ô ihora Iesu i ta ’na mau pǐpǐ: “A parahi na outou i ǒ nei, e haere au e pure.” 33  Rave atura oia ia Petero, Iakobo e Ioane na muri ia ’na e haamata ihora i te ahoaho roa e te horuhoru roa. 34  Na ô atura oia: “E oto iti rahi to ’u.* A parahi na outou i ǒ nei e a ara.” 35  Faaatea rii atura oia, topa turi ihora e pure atura i te Atua ia ore oia ia roohia i taua tupuraa ra mai te peu e e tia. 36  Na ô atura oia: “Aba,* to ’u Metua, e tia ia oe te mau mea atoa, a hopoi ê atu na i teie au‘a. Teie râ, ia tupu to hinaaro eiaha to ’u.” 37  Ho‘i maira oia, ite ihora e te taoto ra ratou e na ô maira ia Petero: “Simona, te taoto ra oe! Aita i tia ia oe ia ara hoê noa ’‘e hora? 38  A vai ara e a tamau i te pure ia ore outou ia hema. E hinaaro iho â te aau,* te tino râ, mea paruparu ïa.” 39  Haere faahou atura oia e pure ma te faahiti i taua â parau ra. 40  Ho‘i faahou maira oia e ite ihora e te taoto ra ratou, e varea taoto iti rahi hoi to ratou. Aita ’tura ratou i ite eaha te parau atu. 41  Ho‘i faahou maira oia i te toru o te taime e na ô maira: “I te hoê taime mai teie outou e taoto ai e e haamâha ’i i to outou rohirohi! Atira! Ua tae i te hora! Inaha, te tuuhia nei te Tamaiti a te taata nei i te rima o te feia rave hara. 42  A tia, mai haere ana‘e. A hi‘o, te fatata mai ra te taata e tuu ia ’u i to ’u mau enemi.” 43  I reira iho, a paraparau noa ’i Iesu, tae maira Iuda hoê o na 12 e te nahoa atoa ma te ‘o‘e e te raau. No ǒ mai taua nahoa ra i te mau tahu‘a tiaau, te mau papai parau e te mau aratai ati Iuda. 44  I horoa na hoi Iuda i te hoê tapao ia ratou, a parau ai: “Te taata ta ’u e apa, o ’na ïa, a haru ia ’na e a arato atu eiaha ia ora.” 45  Haere tia maira oia ia Iesu ra, tapiri maira, na ô maira: “Rabi!”* e apa ihora ia ’na. 46  Haru a‘era ratou ia Iesu. 47  Rave maira râ hoê o te feia e tia ra na reira i ta ’na ‘o‘e, tairi ihora i te tavini a te tahu‘a rahi e mutu ê atura to ’na tari‘a. 48  Na ô atura râ Iesu: “Ua haere mai outou e tapea ia ’u ma te ‘o‘e e te raau mai te mea ra e e eiâ vau? 49  I tia na hoi au e o outou i te hiero i te mau mahana atoa a haapii ai au i te taata, aita râ outou i haru ia ’u. Ia tupu râ te mau Papai i na reirahia ’i.” 50  Faarue a‘era te mau pǐpǐ atoa ia Iesu e horo atura. 51  Pee maira râ te hoê taata apî e ahu lino maitai to ’na ia Iesu, tamata a‘era te taata i te haru ia ’na, 52  faarue ihora râ oia i to ’na ahu lino e horo atura ma te ahu ore.* 53  Aratai atura ratou ia Iesu i te tahu‘a rahi ra, e putuputu maira te mau tahu‘a tiaau taatoa, te mau aratai ati Iuda e te mau papai parau. 54  Pee maira râ Petero ia ’na na te atea ê e tae roa ’tu i roto i te aua o te tahu‘a rahi e parahi ihora e te mau tavini a haamahanahana ’i ia ’na i pihai iho i te auahi. 55  Te imi ra hoi te mau tahu‘a tiaau e te Sunederi taatoa i te pari ia Iesu i te tahi mea e pohe ai oia, aita râ i itehia mai. 56  Mea rahi hoi te pari haavare ra ia ’na, aita râ ta ratou parau e tuea ra. 57  Tia atoa a‘era vetahi e pari haavare maira ia ’na a na ô ai: 58  “Ua faaroo matou ia ’na i te parauraa: ‘E vavahi au i teie hiero hamanihia e te rima taata e e patu vau e toru mahana i te tahi atu e ere na te rima taata i hamani.’” 59  No nia atoa râ i teie parau, aita ta ratou pariraa e tuea ra. 60  Tia a‘era te tahu‘a rahi i rotopu ia ratou e ui ihora ia Iesu: “Eita oe e pahono? Aita oe e faaroo ra i ta teie mau taata e pari nei ia oe?” 61  Mamû noa ihora râ Iesu e aita roa i pahono. Ui faahou maira te tahu‘a rahi ia ’na e parau maira: “O te Mesia oe te Tamaiti a te Atua Mo‘a?” 62  Na ô atura Iesu: “E o vau, e ite atoa outou i te Tamaiti a te taata nei i te parahiraa i te rima atau o te Manahope e te haereraa mai na nia i te mau ata o te ra‘i.” 63  Hahae ihora te tahu‘a rahi i to ’na ahu e na ô maira: “Eaha ïa te faufaa ia imi â i te ite? 64  Ua faaroo outou ia ’na i te faainoraa i te Atua. Eaha ta outou e faaoti?”* Faautua a‘era ratou pauroa ia ’na i te utua pohe. 65  Tutuha a‘era vetahi i nia ia ’na, tapo‘i maira i to ’na mata, moto a‘era ia ’na e na ô maira: “E peropheta oe, faaite mai ïa na vai i tupai ia oe!” Poara maira te mau mutoi ia ’na e afai atura ia ’na. 66  To raro Petero i roto i te aua i haere mai ai hoê o te mau tavini vahine a te tahu‘a rahi. 67  I to ’na iteraa mai ia Petero i pihai iho i te auahi, hi‘o ihora oia ia ’na e na ô maira: “Na muri atoa na oe i teie Iesu no Nazareta.” 68  Parau atura râ Petero: “Aita vau i ite ia ’na e aita atoa vau e taa ra eaha ta oe e parau ra.” Haere atura oia i te uputa. 69  A ite ai te tavini vahine ia ’na i reira, na ô faahou ihora oia i te feia e tia ra na reira: “E pǐpǐ atoa oia na ’na.” 70  Parau faahou atura Petero e aita oia i ite ia ’na. I muri iho, na ô faahou maira te feia e tia noa ra na reira ia Petero: “E pǐpǐ iho â oe na ’na, e taata Galilea hoi oe.” 71  Horeo ihora râ oia: “Ia faautua te Atua ia ’u ia haavare au. Aita vau i ite i tena taata ta outou e parau ra!” 72  Totereo ihora te hoê moa no te piti o te taime. Haamana‘o ihora Petero i ta Iesu i parau ia ’na: “Hou te hoê moa e totereo ai e piti taime, e parau oe e toru taime e aita oe i ite ia ’u.” Peapea roa ihora oia e ta‘i atura.

Nota i raro i te api

Aore ra “faraoa.”
Aore ra “e tarava ra i te amuraa maa.”
E mohina ofai parauhia alabata. A hi‘o i te titionare.
A hi‘o i te titionare.
Aore ra “Parau iria ’tura,” “Tama‘i atura.”
Oia hoi na 12 aposetolo.
Aore ra “faraoa hopue ore.”
Aore ra “Basileia o te Atua.”
Aore ra “himeneraa i te mau salamo.”
Heleni pusuke. A hi‘o i te titionare.
E ta‘o Arama teie, “Papa e!” te auraa.
Aore ra “Ua tae te mana‘o.” Heleni peneuma. A hi‘o i te titionare.
“Orometua” te auraa.
Aore ra “e to ’na noa tihere.”
Aore ra “Eaha to outou mana‘o?”