Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mareko 13:1-37

HAAPOTORAA O TE MAU TUMU PARAU

  • ANOTAU HOPEA O TE FAANAHORAA O TE AO NEI (1-37)

    • Tama‘i, aueueraa fenua, o‘e (8)

    • Ia porohia te parau apî oaoa (10)

    • Ati rahi (19)

    • Haereraa mai o te Tamaiti a te taata (26)

    • Faahoho‘araa o te tumu suke (28-31)

    • A ara noa (32-37)

13  A haere ai Iesu i rapaeau i te hiero, parau maira hoê o ta ’na mau pǐpǐ: “Orometua, a hi‘o na i te faahiahia o teie mau ofai e o teie mau patu!”  Na ô atura râ Iesu: “Te ite ra oe i teie mau patu rahi, e ore roa e vaiihohia te hoê ofai i nia iho i te tahi, e huri-pauroa-hia i raro.”  Te parahi ra Iesu i nia i te mou‘a Oliveta e itehia ’tu ai te hiero, i haere mai ai Petero, Iakobo, Ioane e o Anederea ia ’na ra, o ratou ana‘e, e ui maira:  “A faaite mai na, afea teie mau mea e tupu ai e eaha te tapao e ua fatata te hopea o teie mau mea atoa?”  Na ô atura ïa Iesu: “A ara ia ore outou ia vare i te taata.  Mea rahi te haere mai ma to ’u i‘oa, a na ô ai: ‘O vau te Mesia,’ e mea rahi te vare.  Ia faaroo atoa outou i te tama‘i e te parau o te tama‘i, eiaha e riaria. Ia tupu teie mau mea e tia ’i, aita â râ te hopea i tae mai.  E aro hoi te tahi nunaa i te tahi atu nunaa e te tahi faatereraa i te tahi atu faatereraa, e tupu te aueueraa fenua i tera e tera vahi e e tupu atoa te o‘e. E haamataraa teie o te mauiui rahi.  Outou râ, a ara ia outou iho. E tuu te taata ia outou i te haavaraa, e rutuhia outou i roto i te mau sunago e e tuuhia i mua i te mau tavana e te mau arii no ’u nei, ia ite hoi ratou i ta outou e tiaturi ra. 10  Na mua râ, ia porohia te parau apî oaoa i te mau nunaa atoa. 11  E ia afaihia outou i te haavaraa, eiaha e haapeapea eaha te parau, a parau râ i tei horoahia ’tu i taua hora ra, e ere hoi o outou te paraparau ra, o te varua mo‘a râ. 12  E tuu atoa te taata i to ’na taeae e te metua tane i ta ’na tamarii ia pohe, e orure hau te mau tamarii i to ratou mau metua, a tuu atu ai ia ratou ia pohe. 13  E hae te taata atoa ia outou no to ’u nei i‘oa. Te taata râ tei faaoromai tamau* e tae noa ’tu i te hopea, e ora ïa. 14  Ia ite râ outou i te mea faufau o te haamou ia tia i te vahi e ore e tano ia tia i reira (ia feruri maite te taata taio e taa ’i ia ’na teie parau), ia horo ïa te feia e parahi ra i Iudea i te mau mou‘a. 15  Eiaha te taata i nia iho i to ’na fare* e pou mai e eiaha e tii i te tahi mea i roto i to ’na fare, 16  eiaha atoa te taata i roto i te faaapu e ho‘i i muri e tii i to ’na ahu tapo‘i. 17  Ua ati te mau vahine hapû e te mau vahine e aiû ta ratou i taua mau mahana ra! 18  A tamau i te pure ia ore ta outou hororaa ia tupu i te tau to‘eto‘e, 19  e ati hoi to te reira mau mahana aita i tupu a‘enei mai te omuaraa mai o te ao ta te Atua i poiete, e tae roa mai i teie mahana, e o te ore e tupu faahou. 20  Ahiri aita Iehova* i haapoto i taua mau mahana ra, aita e taata e ora. Ua haapoto râ oia no te feia ta ’na i maiti. 21  E ia na ô atoa mai te taata: ‘A hi‘o! To ǒ nei te Mesia,’ aore ra: ‘A hi‘o! To ǒ oia,’ eiaha e tiaturi atu. 22  E tia mai hoi te mau Mesia haavare e te mau peropheta haavare e e faatupu ratou i te mau tapao e te mau ohipa maere no te tamata i te haavare i te feia maitihia. 23  Outou râ, a ara ïa. Ua faaite atea ’tu vau i te mau mea atoa. 24  I taua râ mau mahana ra, i muri a‘e i taua ati ra, e haapoiri te mahana, e ore te ava‘e e anaana mai, 25  e mairi te mau fetia mai te ra‘i mai e e ueuehia te mau mea puai o te ra‘i. 26  I reira ratou e ite ai i te Tamaiti a te taata nei ia haere mai i roto i te mau ata ma te puai rahi e te hanahana. 27  E i reira oia e tono ai i te mau melahi e e haaputuputu ai i to ’na mau taata maitihia mai apatoerau, apatoa, hitia o te râ e tooa o te râ, mai te hopea o te fenua e tae roa ’tu i te hopea o te ra‘i. 28  A huti na i te haapiiraa i teie faahoho‘araa o te tumu suke: I te tupuraa mai iho â te amaa apî e te oteoraa mai te omou, ua ite ïa outou e ua fatata te tau tupuraa. 29  Oia atoa ia ite outou i teie mau mea ia tupu, ua ite ïa outou e tei te uputa te Tamaiti a te taata nei. 30  Oia mau ta ’u e parau atu: E ore roa teie nei u‘i e mou e tupu ai teie mau mea atoa. 31  E mou te ra‘i e te fenua, ta ’u râ mau parau, e ore roa ïa e mou. 32  No nia i te reira mahana aore ra te hora, aita te hoê i ite, aita atoa te mau melahi i te ra‘i e aita atoa te Tamaiti, o te Metua ana‘e râ. 33  A haapao maitai, a ara, aita hoi outou i ite afea teie mau mea e tupu ai. 34  E au ïa i te hoê taata tei reva i te ara, a vaiiho mai ai i to ’na fare ia haapao ta ’na mau tavini, o te rave i ta ratou iho ohipa, e a faaue ai i te tiai uputa ia ara. 35  A ara noa ïa, aita hoi outou i ite afea te fatu fare e haere mai ai, peneia‘e i te ahiahi, i te tuiraa po, i te aahiata,* i te poipoi roa, 36  ia ore oia ia ite mai ia outou e te taoto ra ia haere oioi mai oia. 37  Ta ’u râ e parau ia outou, o ta ’u ïa e parau i te taata atoa: A ara noa.”

Nota i raro i te api

Aore ra “o te faaoromai tamau ra.”
I tera tau, e tahua te niaraa o te rahiraa o te mau fare e mea rahi te ohipa e ravehia i reira.
A hi‘o i te titionare.
“Ia totereo te moa” na roto i te reo Heleni.