Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mareko 12:1-44

HAAPOTORAA O TE MAU TUMU PARAU

  • Faahoho‘araa o te feia faaapu taparahi taata (1-12)

  • Te Atua e Kaisara (13-17)

  • Uiraa no nia i te tia-faahou-raa (18-27)

  • Na faaueraa rahi roa ’‘e (28-34)

  • E tamaiti anei te Mesia na Davida? (35-37a)

  • A ara i te mau papai parau (37b-40(37b-40)

  • Na lepeta e piti a te vahine ivi veve (41-44)

12  Paraparau atura Iesu ia ratou ma te rave i te mau faahoho‘araa: “Ua tanu te hoê taata i te vine, aua ’tura, pao ihora i te hoê apoo taataahiraa vine, faatia a‘era i te hoê pare tiairaa, horoa tarahu atura i ta ’na faaapu i te tahi feia faaapu, e reva ’tura i te ara.  I te tau ootiraa vine, tono ihora oia i te hoê tavini i te feia faaapu ia horoa mai ratou i ta ’na tuhaa vine.  Haru a‘era te feia faaapu i te tavini, rutu ihora ia ’na e faaho‘i maira ia ’na ma te ore e horoa mai i te vine.  Tono faahou atura te fatu i te tahi atu tavini, tupai ihora ratou i te upoo o taua tavini ra e faahaama ’tura ia ’na.  Tono atura oia i te tahi â tavini, e taparahi pohe atura ratou i taua tavini ra. Mea rahi â ta ’na i tono atu, ua rutuhia vetahi e ua haapohehia te tahi atu.  E i te hopea, tono atura ïa te fatu vine i ta ’na tamaiti here i te feia faaapu, a na ô ai: ‘E faatura ratou i ta ’u tamaiti.’  Na ô a‘era râ taua feia faaapu ra te tahi i te tahi: ‘Teie te taata o te fatu i teie faaapu, mai haere ana‘e e haapohe ia ’na, a fatu atu ai tatou i teie faaapu.’  Haru a‘era ratou ia ’na, haapohe ihora e faarue atura ia ’na i rapae i te faaapu vine.  Eaha ta te fatu vine e rave? E haere mai oia e haapohe i te feia faaapu, a horoa tarahu atu ai i te faaapu vine i te tahi atu feia faaapu. 10  Aita outou i taio a‘enei i teie parau tei papaihia: ‘Te ofai ta te feia patu fare i faarue, ua riro mai ïa ei ofai tihi.* 11  No ǒ mai te reira ia Iehova* ra, e mea faahiahia roa no matou’?” 12  Taa a‘era i te mau papai parau e te mau tahu‘a tiaau e no ratou te faahoho‘araa ta Iesu e parau ra, e hinaaro a‘era e haru ia ’na, ua mǎta‘u râ i te nahoa. Vaiiho maira ratou ia ’na e reva ’tura. 13  I muri iho, tono maira ratou ia Iesu ra i te tahi mau Pharisea e vetahi o te pǔpǔ a Heroda ia noaa oia ia ratou na roto i ta ’na mau parau. 14  Tae maira ratou e na ô maira: “Orometua, ua ite matou e e taata parau mau oe, eita atoa oe e imi i ta te taata farii maitai, eita hoi oe e haapao i te huru rapaeau o te taata. Te haapii nei râ oe ia vetahi ê i te e‘a o te Atua ma te parau mau: Mea tano* anei ia au i te ture ia aufau i te tute* ia Kaisara* aore ra eita? 15  Ia aufauhia anei aore ra eiaha?” Taa ihora ia Iesu to ratou huru haavarevare e na ô atura: “Eaha outou e râmâ mai ai ia ’u? Horoa mai na i te hoê denari.”* 16  Horoa maira ratou e na ô atura Iesu: “No vai te hoho‘a e te i‘oa i nia iho?” Parau maira ratou: “No Kaisara.” 17  Na ô atura Iesu: “A faaho‘i i ta Kaisara ia Kaisara ra, ta te Atua râ i te Atua ïa.” Maere roa ihora ratou i ta ’na parau. 18  Haere maira te mau Sadukea, o te parau ra e aita e tia-faahou-raa, e ui maira ia Iesu: 19  “Orometua, ua papai mai Mose e ia pohe te hoê tane, a vaiiho mai ai i ta ’na vahine faaipoipo ma te tamarii ore, ia faaipoipo ïa to ’na taeae i taua vahine ra e tia ’i e ia fanau mai ta ’na ei tamarii na to ’na taeae i pohe. 20  I vai na e hitu taeae, faaipoipo ihora te matahiapo i te vahine, i to ’na râ poheraa, aita e tamarii ta ’na. 21  Faaipoipo ihora te piti i taua vahine ra, pohe atura râ ma te tamarii ore, na reira atoa te toru. 22  O na hitu atoa tei pohe ma te tamarii ore. Pohe atoa ’tura te vahine. 23  I te tia-faahou-raa, ei vahine oia na vai? I faaipoipo na hoi na hitu atoa ia ’na.” 24  Na ô atura Iesu: “E ere anei no to outou ite ore i te mau Papai e e nafea te mana o te Atua e ohipa ’i i hape ai outou? 25  Ia tia mai hoi ratou mai te pohe mai, e ore te mau tane e faaipoipo e te mau vahine e horoahia ia faaipoipo, e riro râ ratou mai te mau melahi i te ra‘i. 26  No te feia pohe râ o te faatia-faahou-hia mai, aita outou i taio i roto i te buka a Mose no nia i te raau taratara e ura ra, ua parau te Atua ia Mose: ‘O vau te Atua o Aberahama e te Atua o Isaaka e te Atua o Iakoba’? 27  E Atua oia no te feia ora, eiaha no te feia pohe. Ua hape roa outou.” 28  E papai parau atoa to reira e faaroo ra i ta ratou paraparauraa. A faaroo ai oia i ta Iesu faataaraa tano i taua mau taata ra, ui maira oia: “Teihea te faaueraa rahi roa ’‘e?”* 29  Pahono atura Iesu: “Te faaueraa rahi roa ’‘e, teie ïa: ‘A faaroo mai, e Iseraela, to tatou Atua ra o Iehova,* hoê ana‘e ïa Iehova,* 30  e ia here oe ia Iehova* to Atua ma to aau atoa, ma to ora* atoa, ma to mana‘o atoa e ma to puai atoa.’ 31  Teie te piti: ‘Ia here oe i to oe taata tupu mai ia oe iho.’ Aita ’tu e faaueraa rahi a‘e i teie e piti.” 32  Na ô maira te papai parau: “Orometua, o te parau mau ta oe e faahiti mai nei: ‘Hoê ana‘e Atua, aita ’tu,’ 33  e te hereraa ia ’na ma te aau atoa, ma te feruriraa atoa e ma te puai atoa e te hereraa i te taata tupu mai ia ’na iho, ua hau a‘e ïa i te mau tusia taauahi e te mau tusia animara atoa.” 34  Taa ihora ia Iesu te paari o ta ’na pahonoraa e na ô atura: “Aita oe i atea roa i te Faatereraa arii a te Atua.”* Taiâ a‘era râ ratou paatoa i te ui faahou ia ’na. 35  A haapii noa ’i râ Iesu i te taata i roto i te hiero, na ô atura oia: “No te aha te mau papai parau e parau ai e e tamaiti te Mesia na Davida? 36  Arataihia e te varua mo‘a, ua parau Davida iho: ‘Ua parau Iehova* i to ’u Fatu: “A parahi i to ’u rima atau nei e ia tuu roa vau i to oe mau enemi i raro a‘e i to oe na avae.”’ 37  O Davida iho tei parau i te Mesia e Fatu, mea nafea ïa e tamaiti ai oia na ’na?” Ua au roa te nahoa rahi i te faaroo i ta ’na parau. 38  A haapii ai oia i te taata, parau atura Iesu: “A ara i te mau papai parau, mea au na ratou e hahaere ma te ahu roa, ia arohahia ratou ma te faatura na te mahora* 39  e e parahi i mua roa* i roto i te mau sunago e i te mau vahi faataahia no te mau manihini tiaraa teitei i te mau tamaaraa. 40  E rave haapau ratou i te faufaa a te mau vahine ivi e e faaroa i te pure ia hi‘ohia mai ratou. E faautuahia ratou ma te etaeta ’tu â.” 41  Parahi ihora Iesu i te vahi e ite ai oia i te mau afata* moni e mataitai atura i te taata ia tuu ratou i te moni i roto. Mea rahi te moni ta te feia tao‘a rahi e tuu ra i roto. 42  Haere maira te hoê vahine ivi veve e tuu maira e piti lepeta.* 43  Pii ihora Iesu i ta ’na mau pǐpǐ ia tapiri mai e na ô atura: “Oia mau ta ’u e parau atu: Mea rahi a‘e ta teie vahine ivi veve i tuu i roto i te mau afata moni i ta tera mau taata atoa. 44  Ua tuu hoi ratou paatoa i ta ratou moni hau, o ’na râ, noa ’tu to ’na veve, ua tuu pauroa ïa i ta ’na moni e ora ’i oia.”

Nota i raro i te api

E tuuhia teie ofai i te poro fare i te vahi e tuati ai e piti patu.
A hi‘o i te titionare.
Aore ra “tia.”
Oia hoi te hoê tute na nia i te taata tataitahi.
Aore ra “i te emepera no Roma.”
A hi‘o i te titionare.
Aore ra “faufaa roa ’‘e.”
A hi‘o i te titionare.
A hi‘o i te titionare.
A hi‘o i te titionare.
Heleni pusuke. A hi‘o i te titionare.
Aore ra “Basileia o te Atua.”
A hi‘o i te titionare.
I reira te taata e hoohoo ai e e ruru ai.
Aore ra “i nia i te mau parahiraa maitai roa ’‘e.”
Aore ra “farii.”
Oia hoi te moni no piri i te 10 minuti ohipa. A hi‘o i te titionare.