Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mareko 11:1-33

11  A piri atu ai ratou ia Ierusalema, faaea a‘era ratou i te mou‘a Oliveta to reira na oire rii o Betephage e Betania. Tono atura Iesu e piti o ta ’na mau pǐpǐ  e na ô atura: “A haere i tera oire iti i mua ia orua, e ia tomo atu orua, e ite orua i te hoê fanau‘a asini tei taamuhia e aita â i parahihia ’tura e te taata, a tatara e a putô mai.  E ia parau mai te tahi taata: ‘Te aha nei orua?,’ a na ô atu: ‘Te hinaaro mai ra te Fatu i teie animara. E faaho‘i oioi mai oia.’”  Reva ’tura raua e ite a‘era i te fanau‘a asini tei taamuhia i mua i te uputa o te hoê fare i te pae purumu e tatara ihora.  Na ô maira râ vetahi e tia noa ra: “Eaha orua e tatara ’i i tena asini?”  Parau atura raua mai ta Iesu i parau e vaiiho atura ratou ia raua ia haere.  Putô maira raua i te fanau‘a asini ia Iesu ra, tuu a‘era te mau pǐpǐ i to ratou ahu tapo‘i i nia iho, e parahi ihora Iesu i nia i te fanau‘a asini.  Vauvau atoa a‘era e rave rahi i to ratou ahu tapo‘i i nia i te purumu. Te tahi atu râ, ua tâpû ïa i te mau amaa raau na te pae purumu.  Te tuô noa ra te nahoa i mua e i muri mai ia ’na: “A faaora na ia ’na!* Ia haamaitaihia tei haere mai ma te i‘oa o Iehova!* 10  Ia haamaitaihia te Faatereraa arii a* to matou metua ra o Davida e fatata mai ra! A faaora na ia ’na,* oe te Atua i te ra‘i teitei!” 11  Tae atura Iesu i Ierusalema, tomo ihora i roto i te hiero e hi‘o atura i te mau mea atoa e ati a‘e. No te mea râ ua ahiahi ê na, reva ’tura oia e na 12* i Betania. 12  I to muri iho mahana, a faarue ai ratou ia Betania, poia ihora Iesu. 13  Ite atura oia i te atea ê i te hoê tumu suke tei rauerehia, e haere atura e hi‘o e maa anei to nia iho. I to ’na râ piriraa ’tu, e rauere ana‘e ta ’na i ite, e ere hoi i te tau e maahia ’i te tumu suke. 14  Parau atura oia i taua tumu raau ra: “E ore roa te taata e amu faahou i to oe maa.” Te faaroo noa mai ra ta ’na mau pǐpǐ. 15  Tae a‘era ratou i Ierusalema. Tomo ihora Iesu i roto i te hiero, tiahi atura i rapae i te feia e hoo atu ra e e hoo mai ra i roto i te hiero e huri ihora i te mau amuraa maa a te feia taui moni e te mau parahiraa a te feia hoo uupa. 16  Opani atura oia i te taata atoa ia tie i te taihaa na roto atu i te hiero. 17  Haapii atoa ’tura oia i te taata a na ô ai: “Aita anei i papaihia: ‘E parauhia to ’u fare e fare no te pure no te mau nunaa atoa’? Ua faariro râ outou i te reira ei ana no te eiâ.” 18  Faaroo a‘era te mau tahu‘a tiaau e te mau papai parau i te reira, e imi atura i te ravea no te haapohe ia Iesu no to ratou mǎta‘u ia ’na, no te mea te maere ra te nahoa atoa i ta ’na haapiiraa. 19  E ahiahi ihora, haere atura Iesu e ta ’na mau pǐpǐ i rapae i te oire. 20  I te aahiata a‘e râ, a haere ai ratou na te purumu, ite atura ratou i te tumu suke tei mǎrô ê na mai te a‘a mai. 21  Haamana‘o ihora Petero i te ohipa i tupu e na ô maira ia Iesu: “Rabi,* a hi‘o na, ua mǎrô te tumu suke ta oe i faaino.” 22  Parau atura Iesu ia ratou: “A tiaturi i te Atua. 23  Oia mau ta ’u e parau atu, ia na ô te taata i teie mou‘a: ‘Ia pee oe e ia taorahia i roto i te miti,’ e tupu iho â te reira ia ore to ’na aau e feaa, ia tiaturi râ oia e e tupu iho â ta ’na parau. 24  No reira, te parau atu nei au: Te mau mea atoa ta outou e ani ia pure outou, a tiaturi e ua noaa ia outou, e noaa iho â ïa. 25  E ia pure outou a tia noa ’i, a faaore i ta vetahi ê hapa ia outou ia faaore atoa hoi to outou Metua i te ra‘i ra i ta outou.” 26  *—— 27  Ho‘i faahou maira ratou i Ierusalema. A haere noa ’i Iesu i roto i te hiero, tapiri maira te mau tahu‘a tiaau, te mau papai parau e te mau aratai ati Iuda 28  e na ô maira ia ’na: “I teihea mana e rave ai oe i teie mau mea? Aore ra na vai i horoa ia oe i teie mana no te rave i teie mau mea?” 29  Na ô atura Iesu: “E uiraa atoa ta ’u. Ia pahono mai outou, e faaite atoa ’tu ïa vau i teihea mana e rave ai au i teie mau mea. 30  Te bapetizoraa a Ioane, no te ra‘i mai anei aore ra no ǒ mai i te taata ra? A pahono mai.” 31  Feruri ihora ratou e na ô a‘era te tahi i te tahi: “Ia parau tatou: ‘No te ra‘i mai,’ e na ô mai ïa oia: ‘No te aha ïa outou i ore ai i tiaturi ia ’na?’ 32  Ia parau râ tatou: ‘No ǒ mai i te taata ra,’ e naheahia mai ïa tatou?” Te mǎta‘u ra hoi ratou i te nahoa o te tiaturi ra e e peropheta Ioane. 33  Pahono a‘era ïa ratou ia Iesu: “Aita matou i ite.” Na ô atura Iesu: “Eita atoa ïa vau e faaite atu i teihea mana e rave ai au i teie mau mea.”

Nota i raro i te api

E aniraa teie i te Atua ia faaora ia Iesu.
A hi‘o i te titionare.
Aore ra “Basileia o.”
E aniraa teie i te Atua ia faaora ia Iesu.
Oia hoi na 12 aposetolo.
“Orometua” te auraa.
Te vai ra teie irava i roto i te tahi mau huriraa Bibilia, aita râ i roto e rave rau papai Heleni tahito fariihia.