Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mareko 10:1-52

HAAPOTORAA O TE MAU TUMU PARAU

  • Faaipoiporaa e faataaraa (1-12)

  • Haamaitai Iesu i te mau tamarii (13-16)

  • Uiraa a te hoê taata tao‘a rahi (17-25)

  • Haapaeraa no te Faatereraa arii (26-31)

  • Tohu-faahou-hia to Iesu pohe (32-34)

  • Aniraa a Iakobo raua Ioane (35-45)

    • E hoo Iesu no te taata e rave rahi (45)

  • Faaorahia Baretimaio matapo (46-52)

10  Tia a‘era Iesu, haere atura i te otia fenua o Iudea na tera pae mai o Ioridana. Ruru faahou maira te nahoa ia ’na ra e mai ta ’na i matau, haapii faahou atura oia ia ratou.  Tapiri maira te mau Pharisea no te râmâ ia ’na, e ui maira e mea tano anei ia au i te ture ia faataa te hoê tane i ta ’na vahine faaipoipo.  Pahono atura oia: “Eaha ta Mose i faaue ia outou?”  Na ô maira ratou: “Ua vaiiho Mose ia papai te hoê tane i te tahi parau faataaraa ia faataa oia i ta ’na vahine faaipoipo.”  Parau atura râ Iesu: “No te etaeta o to outou aau i papai ai oia i teie faaueraa no outou.  I te omuaraa râ i to te Atua poieteraa i te taata, ua hamani oia i te tane e te vahine.  No reira te hoê tane e faarue ai i to ’na metua tane e to ’na metua vahine,  e riro raua ei hoê. E ere atura ïa raua e piti, hoê râ.  No reira, o ta te Atua i taati, eiaha ïa te taata e faataa ê.” 10  I roto â i te hoê fare, ui maira te mau pǐpǐ ia ’na no nia i te reira. 11  Na ô atura oia: “O te faataa i ta ’na vahine faaipoipo, a faaipoipo atu ai i te tahi atu, ua faaturi ïa e ua taiva i te vahine matamua, 12  e ia faataa noa ’tu te hoê vahine i ta ’na tane faaipoipo, a faaipoipo atu ai i te tahi atu, ua faaturi atoa ïa.” 13  Aratai maira te tahi mau taata i te mau tamarii rii ia Iesu ra ia tuu oia i to ’na na rima i nia ia ratou,* tama‘i a‘era râ te mau pǐpǐ i taua mau taata ra. 14  I to Iesu iteraa ’tu, aita oia i mauruuru e na ô atura i te mau pǐpǐ: “A vaiiho noa i te mau tamarii rii ia haere mai ia ’u nei, eiaha e tapea ’tu, no te feia hoi e au i teie mau tamarii rii te Faatereraa arii a te Atua.* 15  Oia mau ta ’u e parau atu: Te taata e ore e farii i te Faatereraa arii a te Atua mai te hoê tamarii iti, e ore roa ’tu ïa e ô i roto.” 16  Tauahi ihora Iesu i te mau tamarii e haamaitai atura ia ratou, ma te tuu i to ’na na rima i nia iho ia ratou. 17  A haere atu ai Iesu, horo maira te hoê taata, tuturi ihora i mua ia ’na e ui maira: “Orometua maitai, eaha ta ’u e rave e noaa ’i ia ’u te ora mure ore?” 18  Na ô atura Iesu: “Eaha oe e parau mai ai Orometua maitai? Aita hoê a‘e e mea maitai, o te Atua ana‘e râ. 19  Ua ite oe i te mau faaueraa: ‘Eiaha e taparahi pohe i te taata, eiaha e faaturi, eiaha e eiâ, eiaha e pari haavare, eiaha e taviri i te taata, a faatura i to metua tane e to metua vahine.’” 20  Na ô maira taua taata ra: “Orometua, ua hope ia ’u i te haapao i teie mau mea atoa mai to ’u apîraa mai â.” 21  Hi‘o ihora Iesu ia ’na ma te here e parau atura: “Hoê noa mea e toe ra ia oe: A haere a hoo i ta oe mau tao‘a, a horoa ’tu ai i te moni na te feia veve, e tao‘a ïa ta oe i nia i te ra‘i, e a pee mai ia ’u.” 22  Peapea ihora râ oia no taua parau ra e haere atura ma te oto, mea rahi hoi ta ’na faufaa. 23  Hi‘o ihora Iesu e ati a‘e ia ’na e na ô atura i ta ’na mau pǐpǐ: “Mea fifi mau â no te feia mea rahi ta ratou moni ia ô i roto i te Faatereraa arii a te Atua!” 24  Maere ihora râ te mau pǐpǐ i ta ’na parau. Na ô atura Iesu: “Ta ’u mau tamarii, mea fifi mau â ia ô i roto i te Faatereraa arii a te Atua! 25  Mea ohie a‘e no te hoê kamela ia ô i roto i te hoê apoo nira eiaha râ no te hoê taata tao‘a rahi ia ô i roto i te Faatereraa arii a te Atua.” 26  Rahi roa ihora to ratou maere e na ô maira ia ’na:* “O vai ïa te nehenehe e ora ’tu?” 27  Hi‘o tia ’tura Iesu ia ratou e na ô ihora: “I te taata, e ore e tia, i te Atua râ, oia ïa, e tia hoi i te Atua te mau mea atoa.” 28  Parau maira Petero ia Iesu: “Ua haapae hoi matou i te mau mea atoa e ua pee mai ia oe.” 29  Na ô atura Iesu: “Oia mau ta ’u e parau atu: Te taata atoa tei haapae i to ’na fare aore ra taeae, tuahine, metua vahine, metua tane, tamarii aore ra fenua no ’u nei e no te parau apî oaoa, 30  e hamani-ino-hia ïa, e fana‘o râ oia taihanere i teie nei â, te fare, te taeae, te tuahine, te metua vahine, te tamarii e te fenua, e i roto i te faanahoraa o te ao nei no a muri a‘e,* te ora mure ore ïa. 31  E rave rahi râ to mua, e riro ïa no muri e to muri no mua.” 32  A pauma ’i Iesu e ta ’na mau pǐpǐ i Ierusalema, o ’na to mua, maere ihora te mau pǐpǐ. Te tahi atu râ e pee mai ra, ua mǎta‘u ïa. Aratai rii ê atura Iesu i na 12* e faaite atura i ta ’na e fatata i te faaruru: 33  “Inaha, te pauma nei tatou i Ierusalema, e tuuhia te Tamaiti a te taata nei i te rima o te mau tahu‘a tiaau e te mau papai parau. E faautua ratou ia ’na i te pohe, a tuu atu ai ia ’na i te feia o te mau nunaa ěê 34  ia faaooohia, ia tutuhahia, ia huihia e ia taparahi-pohe-hia, i te toru râ o te mahana e tia faahou mai oia.” 35  Haere maira o Iakobo raua Ioane na tamaiti a Zebedaio ia Iesu ra e na ô maira: “Orometua, te hinaaro nei mâua ia rave oe i ta mâua e ani atu.” 36  Na ô atura Iesu ia raua: “Eaha ta orua e hinaaro ia rave au no orua?” 37  Parau maira raua: “A faatia ia parahi mâua e o oe i roto i to Faatereraa arii, hoê i to rima atau e te tahi i to rima aui.” 38  Na ô atura râ Iesu: “Aita orua i ite i ta orua e ani mai nei. E haere anei ia orua ia inu i ta ’u e fatata i te inu, aore ra ia bapetizohia mai ia ’u nei e fatata i te bapetizohia?” 39  Parau maira raua: “E haere ia mâua.” Na ô atura Iesu: “E inu orua i ta ’u e inu e e bapetizohia orua mai ia ’u nei e bapetizohia. 40  Te parahiraa râ i to ’u rima atau aore ra i to ’u rima aui, e ere na ’u e horoa ’tu, no te feia râ no ratou i faaineinehia ’i teie na parahiraa.” 41  I to te tahi atu mau pǐpǐ hoê ahuru faarooraa i te reira, inoino a‘era ratou ia Iakobo e ia Ioane. 42  Pii ihora Iesu ia ratou ia haere mai e na ô atura: “Ua ite outou e te faatere ra te mau arii o teie nei ao i te mau nunaa o te haavî-atoa-hia ra e te feia mana. 43  Eiaha roa mai tera i rotopu ia outou, o tei hinaaro hoi ia rahi oia i rotopu ia outou, ia riro ïa ei tavini no outou e tia ’i, 44  e o tei hinaaro o ’na na mua i rotopu ia outou, ia riro ïa ei tavini no outou paatoa. 45  Ua haere mai hoi te Tamaiti a te taata nei eiaha ia tavinihia oia, no te tavini râ e no te horoa i to ’na ora* ei hoo* no te taata e rave rahi.” 46  Tomo atura Iesu e ta ’na mau pǐpǐ i Ieriko. A haere mai ai râ ratou e te hoê nahoa rahi i rapae ia Ieriko, te parahi noa ra i te pae purumu te hoê matapo e taparu haere ra, o Baretimaio te i‘oa e tamaiti na Timaio. 47  I to ’na faarooraa e o Iesu no Nazareta tera e haere mai ra, pii maira oia: “Iesu, Tamaiti a Davida, aroha* mai ia ’u!” 48  Tama‘i a‘era e rave rahi ia ’na ia mamû oia, puai roa ’tu â râ to ’na tuôraa: “Tamaiti a Davida, aroha* mai ia ’u!” 49  Tia noa ihora ïa Iesu e na ô atura: “A pii ia ’na.” Parau a‘era ratou i taua matapo ra: “A faaitoito! A tia mai, te pii mai ra oia ia oe.” 50  Faarue ihora te matapo i to ’na ahu tapo‘i, tia taue maira e haere maira ia Iesu ra. 51  Na ô atura Iesu ia ’na: “Eaha ta oe e hinaaro ia rave au no oe?” Parau maira te matapo: “Raboni,* ia ite faahou vau.” 52  Na ô atura Iesu: “A haere. No to oe faaroo i ora ’i oe.” Ite faahou ihora oia e pee maira ia Iesu.

Nota i raro i te api

Aore ra “ia haamaitai oia ia ratou.”
Aore ra “Basileia o te Atua.”
Nehenehe atoa e hurihia “na ô a‘era te tahi i te tahi.”
Aore ra “i te tau no a muri a‘e.” A hi‘o i te titionare.
Oia hoi na 12 aposetolo.
Heleni pusuke. A hi‘o i te titionare.
A hi‘o i te titionare.
Aore ra “aroha hamani maitai.”
Aore ra “aroha hamani maitai.”
“Orometua” te auraa.