Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mareko 1:1-45

HAAPOTORAA O TE MAU TUMU PARAU

  • Poro ra Ioane Bapetizo (1-8)

  • Bapetizoraa o Iesu (9-11)

  • Faahemahia Iesu e Satani (12, 13)

  • Haamata Iesu i te poro i Galilea (14, 15)

  • Piihia te mau pǐpǐ matamua (16-20)

  • Tiavaruhia te hoê varua viivii (21-28)

  • Faaora Iesu e rave rahi taata ma‘i i Kaperenaumi (29-34)

  • Pure ra Iesu i te hoê vahi mo‘emo‘e (35-39)

  • Faaorahia te hoê lepera (40-45)

1  Te omuaraa o te parau apî oaoa* no nia ia Iesu Mesia, te Tamaiti a te Atua:  Ua papaihia i roto i te buka a Isaia te peropheta: “(Inaha, te tono nei au i ta ’u vea na mua ia oe,* na ’na e faaineine i te e‘a no oe.)  E taata teie e tuô haere nei na te medebara: ‘A faaineine i te e‘a no Iehova!* A haamanina i te purumu no ’na.’”  I haere na Ioane Bapetizo i te medebara e poro i te taata ia bapetizohia ratou ei faaiteraa i to ratou tatarahapa ia faaorehia ta ratou mau hara.  Haere maira to te fenua o Iudea taatoa e to Ierusalema atoa ia Ioane ra, e bapetizohia* ihora ratou e ana i roto i te anavai o Ioridana, a fa‘i ai ratou i mua i te taata atoa i ta ratou mau hara.  E teie nei, e ahu huruhuru kamela to Ioane e te hatua i nia i to ’na tauupu. E ta ’na maa, e vivi ïa e te meli.  E te poro ra oia a parau ai: “Te haere mai nei i muri a‘e ia ’u te hoê taata e mana rahi a‘e to ’na i to ’u, e ore hoi e tia ia ’u ia tatara i te taamu o to ’na tiaa.  I bapetizo na vau ia outou i te pape, area oia, e bapetizo ïa ia outou i te varua mo‘a.”*  I taua mau mahana ra, mai Nazareta i Galilea, haere atura Iesu i Ioridana ia bapetizohia oia e Ioane. 10  I reira iho, i to ’na haereraa mai i nia, mai raro mai i te pape, ite a‘era Iesu i te ra‘i i te hahaeraahia, e te varua mo‘a i te pouraa mai i nia ia ’na mai te uupa ra. 11  E faaroohia maira te hoê reo mai te ra‘i mai i te na ôraa: “O ta ’u Tamaiti oe, tei herehia. Ua mauruuru roa vau ia oe.” 12  E i reira iho, aratai atura te varua mo‘a ia ’na i te medebara. 13  Faaea ’tura oia i te medebara i rotopu i te mau animara oviri e 40 mahana, faahema ihora Satani ia ’na. Aupuru maira râ te mau melahi ia Iesu. 14  I muri a‘e i to Ioane tapearaahia, haere atura Iesu i Galilea e poro i te parau apî oaoa a te Atua 15  a na ô ai: “Ua tae mai te tau faataahia, e ua fatata mai te Faatereraa arii a te Atua.* A tatarahapa e a tiaturi i te parau apî oaoa.” 16  Te haere ra Iesu na te pae miti o Galilea, ite atura oia ia Simona* e ia Anederea te taeae o Simona, te taora ra i ta raua upe‘a, e ravaai hoi raua. 17  Na ô atura Iesu ia raua: “A pee mai ia ’u, e faariro vau ia orua ei ravaai taata.” 18  I reira iho, vaiiho a‘era raua i ta raua upe‘a, pee maira ia ’na. 19  Haere rii atura Iesu, ite ihora oia ia Iakobo e to ’na taeae o Ioane na tamaiti a Zebedaio i roto i to raua poti, te tafai ra i te upe‘a. 20  Pii ihora oia ia raua. Vaiiho a‘era raua i to raua metua tane o Zebedaio i roto i te poti e ta ’na mau rave ohipa, e pee maira ia Iesu. 21  Haere atura ratou i Kaperenaumi. E tae a‘era i te Sabati,* tomo ihora Iesu i roto i te sunago e haapii atura i te taata. 22  E maere ihora ratou i ta ’na huru haapiiraa, te haapii ra hoi oia ia ratou mai te hoê taata e mana to ’na, eiaha râ mai te mau papai parau. 23  I tera iho â taime, i roto i ta ratou sunago, tuô maira te hoê tane tei uruhia e te hoê varua viivii: 24  “Eaha ta oe ohipa i ǒ nei, Iesu no Nazareta? Haere mai oe e haamou ia matou? Ua ite maitai au o vai oe, te tavini Mo‘a a te Atua!” 25  Tama‘i ihora râ Iesu ia ’na, a na ô ai: “Mamû, haere i rapae ia ’na!” 26  Rave a‘era te varua viivii e ia iriti e ia tuô tera tane e haere maira i rapae. 27  Maere roa ihora te taata e haamata a‘era i te paraparau te tahi i te tahi: “Eaha teie? E haapiiraa apî! E mana to ’na e tiavaru atoa i te mau varua viivii e e faaroo ratou ia ’na.” 28  Atutu atura te parau no ’na e no ta ’na i rave na te mau vahi atoa o te tuhaa fenua o Galilea. 29  I reira iho, faarue a‘era ratou i te sunago e haere atura i to Simona raua Anederea fare, oia atoa Iakobo e Ioane. 30  Te tarava noa ra te metua vahine hoovai o Simona no te fiva, o ta ratou ïa i faatia oioi atu ia Iesu. 31  Tapiri atura oia i te vahine ra, faatia a‘era ia ’na i nia ma te tapea i to ’na rima. Pee atura te fiva e faaineine ihora te vahine i te maa na ratou. 32  E ahiahi ihora, ua topa hoi te mahana, arataihia maira ia ’na te feia ma‘i atoa e tei uruhia e te demoni, 33  e putuputu a‘era to te oire atoa i mua noa i te opani. 34  Faaora ’tura oia e rave rahi taata ua rau to ratou ma‘i, e tiavaru atoa ’tura e rave rahi demoni ma te faaue atu ia mamû, ua ite hoi ratou e o ’na te Mesia.* 35  I te aahiata, te poiri noa ra hoi, tia a‘era Iesu, haere atura i rapae i te hoê vahi mo‘emo‘e e pure atura. 36  Paimi maira râ Simona ma ia ’na, 37  ite a‘era ia ’na e na ô maira: “Te imi nei te taata atoa ia oe.” 38  Na ô atura râ oia: “Mai haere ana‘e i te tahi atu vahi, i roto i te mau oire tapiri, ia poro atoa vau i ǒ, no reira hoi au i haere mai ai.” 39  Haere atura oia e poro i roto i te mau sunago e ati a‘e Galilea a tiavaru atoa ’i i te mau demoni. 40  Haere atoa maira te hoê lepera, taparu maira ia Iesu ma te tuturi i raro e parau maira: “Ia tia ia oe, e nehenehe oe e tamâ ia ’u.” 41  Aroha ihora Iesu ia ’na, toro atura i to ’na rima, tapea ihora ia ’na e na ô atura: “E tia ia ’u! Ia mâ oe.” 42  Pee ihora te lepera e mâ ’tura oia. 43  Hou Iesu a tuu ai ia ’na, horoa ’tura oia i te tahi mau faaueraa papu 44  a parau ai ia ’na: “Haapao maitai, eiaha e faaite i te taata, a haere râ e faaite ia oe i te tahu‘a e a pûpû i te ô ta Mose i faaue ei haapapuraa e ua mâ to oe lepera, ia ite ratou.” 45  I to ’na râ revaraa, faatia haere atura te tane i ta Iesu i rave. Aita ’tura Iesu i nehenehe e tomo atu i roto i te hoê oire, ua faaea râ i rapae i te mau vahi mo‘emo‘e. Mea rahi râ tei haere mai ia ’na no te mau vahi atoa.

Nota i raro i te api

Aore ra “evanelia.”
“I mua i to aro” na roto i te reo Heleni.
A hi‘o i te titionare.
Aore ra “taumihia.”
Aore ra “puai ohipa o te Atua.”
Aore ra “Basileia o te Atua.”
Pii-atoa-hia Petero.
A hi‘o i te titionare.
Nehenehe atoa e hurihia “ua ite hoi ratou o vai oia.”