Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 9:1-62

HAAPOTORAA O TE MAU TUMU PARAU

  • Faaineinehia na 12 no te taviniraa (1-6)

  • Horuhoru Heroda no Iesu (7-9)

  • Faatamaa Iesu e 5 000 tane (10-17)

  • Faaite Petero o vai te Mesia (18-20)

  • Tohuhia to Iesu pohe (21, 22)

  • Pǐpǐ mau a Iesu (23-27)

  • Te tauiraa to Iesu huru (28-36)

  • Faaorahia te tamaroa uruhia e te demoni (37-43a)

  • Tohu-faahou-hia to Iesu pohe (43b-45)

  • Mârô te mau pǐpǐ o vai tei rahi a‘e (46-48)

  • Tei ore e patoi mai, te turu mai ra ïa (49, 50)

  • Aita Iesu i fariihia i te hoê oire iti i Samaria (51-56)

  • Nafea ia pee ia Iesu? (57-62)

9  Titau atura Iesu i na 12* e horoa ’tura i te puai e te mana ia tiavaru ratou i te mau demoni atoa e ia faaora i te mau ma‘i.  Tono atura oia ia ratou e poro i te Faatereraa arii a te Atua* e e faaora i te ma‘i,  e na ô atura: “Eiaha e rave i te tahi mea no te tere, eiaha e turutootoo, e pute maa, e faraoa,* e moni,* eiaha atoa e piti ahu.  I te mau vahi atoa râ e tomo ai outou i roto i te hoê fare, a faaea i reira e reva noa ’tu outou.  E i te mau vahi atoa e ore ai te taata e farii ia outou, a haere mai i rapae i taua oire ra, e a tûtû i te repo o to outou avae* ei faaararaa ia ratou.”  Haere atura ratou na te mau oire rii atoa e faaite haere i te parau apî oaoa e e faaora i te ma‘i.  Faarooroo ihora râ Heroda* te arii* i te mau mea atoa e ravehia ra, e horuhoru ihora no ta vetahi parau e ua tia faahou mai Ioane mai te pohe mai,  ta te tahi atu râ, o Elia tei fa mai e ta te tahi atu, e peropheta no tahito tei tia mai te pohe mai.  Na ô ihora Heroda: “Ua tâpûhia te upoo o Ioane, na ’u hoi i faaue. O vai ïa teie taata e paraparauhia nei?” Hinaaro roa ’tura oia e ite i taua taata ra. 10  I te ho‘iraa mai te mau aposetolo, faatia maira ratou ia Iesu i te mau mea atoa ta ratou i rave. Rave atura Iesu ia ratou e reva ’tura o ratou ana‘e i te hoê oire o Betesaida te i‘oa. 11  Ite a‘era râ te nahoa taata e pee maira ia ’na. Farii maitai maira Iesu ia ratou, faaite atura i te parau o te Faatereraa arii a te Atua, e faaora ’tura i te feia ma‘i. 12  Haamata ihora te ahiahi, haere maira na 12 e na ô maira ia Iesu: “A tuu na i te nahoa ia haere na te mau oire rii e na te mataeinaa e imi i te nohoraa e e hoo mai i te maa, no te mea e vahi mo‘emo‘e teie.” 13  Na ô atura râ oia: “Na outou e horoa i te maa na ratou.” Pahono maira ratou: “E pae ana‘e faraoa e e piti i‘a ta matou, e haere anei ïa matou e hoo mai i te maa na teie mau taata atoa?” 14  Te vai ra piri i te 5 000 tane. Na ô atura râ Iesu i ta ’na mau pǐpǐ: “A haaparahi ia ratou e 50 taata i te pǔpǔ hoê.” 15  Na reira ’tura ratou e parahi ihora te taata atoa. 16  Rave ihora Iesu i na faraoa e pae e na i‘a e piti, hi‘o a‘era i nia i te ra‘i, haamaitai ihora i te Atua no tera maa, ofati ihora i na faraoa e horoa ’tura i te faraoa e te i‘a i te mau pǐpǐ o tei opere na te nahoa. 17  Tamaa a‘era ratou pauroa, paia ’tura e haaputu atura i te toea maa i roto 12 farii. 18  I te tahi atu mahana, a pure noa ’i Iesu o ’na ana‘e, haere maira te mau pǐpǐ ia ’na ra e ui atura Iesu ia ratou: “O vai au i ta te nahoa parauraa?” 19  Pahono maira ratou: “O Ioane Bapetizo, o Elia râ ta te tahi pae, e ta te tahi atu, hoê ïa o te mau peropheta i tahito ra tei tia faahou mai.” 20  Na ô atura oia: “Outou râ, o vai au i ta outou parauraa?” Pahono maira Petero: “O te Mesia a te Atua.” 21  Faaue maitai ihora oia ia ratou eiaha e faaite i te reira i te taata, 22  na ô atura râ oia: “Ia roohia te Tamaiti a te taata nei i te mauiui rahi e tia ’i, ia vahavahahia e te mau aratai ati Iuda, te mau tahu‘a tiaau e te mau papai parau, ia haapohehia e ia faatiahia mai i te toru o te mahana.” 23  Na ô atura oia i te taata atoa: “Te taata e hinaaro e pee mai ia ’u, ia haapae ïa ia ’na iho e ia rave i ta ’na pou haamauiuiraa* i te mau mahana atoa, a pee noa mai ai ia ’u. 24  O tei tapea hoi i to ’na ora,* e ere ïa oia i te reira. O tei ere râ i to ’na ora* no ’u, e noaa faahou mai ïa ia ’na te reira. 25  Eaha hoi te apî ia noaa i te hoê taata te ao taatoa, a faaino atu ai râ oia ia ’na iho aore ra a ere ai oia i to ’na ora? 26  Te taata hoi o te haama ia ’u e i ta ’u mau parau, e haama atoa ïa te Tamaiti a te taata nei ia ’na ia haere mai oia ma to ’na hanahana e to te Metua e to te mau melahi mo‘a. 27  Oia mau râ ta ’u e parau atu: Te vai ra vetahi o te feia i ǒ nei o te ore e pohe hou a ite ai na mua i te Faatereraa arii a te Atua.” 28  Piri i te va‘u mahana i muri a‘e i to ’na faahitiraa i teie mau parau, rave ihora Iesu ia Petero, Ioane e Iakobo e pauma a‘era i nia i te mou‘a e pure. 29  A pure noa ’i Iesu, taui ihora te huru o to ’na hoho‘a mata e uouo a‘era to ’na ahu e anaana roa ’tura. 30  E inaha, e piti taata te paraparau ra e o ’na, o Mose raua Elia. 31  Ma te hanahana i fa mai ai raua e paraparau atura e nafea Iesu e faarue mai ai i teie nei ao, o te fatata hoi i te tupu i Ierusalema. 32  E varea taoto rahi to Petero, Ioane e Iakobo, i to ratou râ ara-roa-raa mai, ite a‘era ratou i to Iesu hanahana e na toopiti taata i pihai iho ia ’na. 33  A fatata ’i na taata i te vaiiho mai ia Iesu, na ô atura Petero ia Iesu: “Orometua, mea fana‘o matou i te tiaraa mai i ǒ nei. Vaiiho na ia matou ia faatia e toru fare ie, hoê no oe, hoê no Mose e hoê no Elia.” Aita e taa ra ia ’na ta ’na e parau ra. 34  A paraparau noa ’i râ Petero, fa maira te hoê ata e tapo‘i maira ia ratou. A po‘i ai râ ratou i te ata, mǎta‘u ihora ratou. 35  Faaroohia ’tura te hoê reo no roto mai i taua ata ra e na ô ra: “O ta ’u Tamaiti teie, o ’na tei maitihia e au. A faaroo ia ’na.” 36  A faaroohia ’i taua reo ra, ite ihora ratou ia Iesu ana‘e. Mamû noa ihora râ ratou, e i taua mau mahana ra aita ratou i faatia haere i ta ratou i ite. 37  I te mahana i muri iho, a pou mai ai ratou na nia mai i te mou‘a, haere maira te hoê nahoa rahi ia Iesu ra. 38  E inaha, tuô maira te hoê taata o taua nahoa ra a na ô ai: “Orometua, te ani atu nei au ia oe ia tauturu* i ta ’u tamaiti, o ’na ana‘e hoi ta ’u tamarii. 39  E inaha, e haru te hoê varua ino ia ’na, o te tuô taue hoi, a iriti atu ai e a tahe noa ’i te haae. I muri a‘e atoa i te haamauiuiraa ’tu, eita te varua ino e faarue hanoa ia ’na. 40  Ua ani au i ta oe mau pǐpǐ ia tiavaru i taua varua ra, aita râ i tia ia ratou.” 41  Na ô atura Iesu: “Auê ïa u‘i ino aore e faaroo, ehia â maororaa e parahi ai au ia outou nei, e faaoromai ai au ia outou? Afai mai i to tamaiti i ǒ nei.” 42  A tapiri atu ai râ Iesu, taora ihora te demoni i te tamaroa i raro e rave atura e ia iriti roa oia. Tama‘i ihora râ Iesu i te varua viivii, faaora ’tura i te tamaroa e tuu atura ia ’na i to ’na metua tane ra. 43  Maere ihora ratou pauroa i te mana rahi o te Atua. A maere ai ratou pauroa i te mau mea atoa ta Iesu e rave ra, na ô atura oia i ta ’na mau pǐpǐ: 44  “A faaroo maitai e a haamana‘o i teie mau parau: E tuuhia te Tamaiti a te taata nei i te rima o to ’na mau enemi.” 45  Aita râ i taa ia ratou ta ’na e parau ra. Ua hunahia hoi te reira ia ratou ia ore ratou e maramarama, e ua taiâ ratou i te uiui ia ’na eaha te auraa o teie parau. 46  Mârô a‘era te tahi i te tahi o vai o ratou tei rahi a‘e. 47  Ua ite râ Iesu i te mana‘o o to ratou aau, rave maira oia i te hoê tamarii iti, tuu ihora i pihai iho ia ’na, 48  e na ô atura: “Te taata o te farii i teie tamarii iti no to ’u nei i‘oa, e farii atoa ïa ia ’u. E te taata e farii ia ’u, e farii atoa ïa i tei tono mai ia ’u. Te taata hoi o te faahaehaa ia ’na i rotopu ia outou pauroa, o ’na ïa tei rahi.” 49  Na ô maira Ioane: “Orometua, ua ite matou i te hoê taata i te tiavaruraa i te mau demoni ma te faaohipa i to oe i‘oa, e ua tamata matou i te tapea ia ’na, no te mea e ere oia i te pǐpǐ na oe.” 50  Na ô atura râ Iesu: “Eiaha e tamata i te tapea ia ’na, te taata hoi aita e patoi ra ia outou, te turu ra ïa ia outou.” 51  A fatata mai ai te taime* e ravehia ’i Iesu i nia i te ra‘i, faaoti roa ’tura oia e haere i Ierusalema. 52  Tono ihora oia i te tahi mau vea na mua ia ’na. Reva ’tura ratou e tomo atura i te hoê oire iti o to Samaria no te faaineine i te mau mea no to Iesu taeraa ’tu. 53  Aita râ to reira mau taata i farii mai ia ’na, no te mea ua faaoti oia e haere i Ierusalema. 54  I to te mau pǐpǐ Iakobo raua Ioane iteraa i te reira, na ô maira raua: “E te Fatu, hinaaro anei oe ia faaue mâua i te auahi ia mairi mai te ra‘i mai ia mou ratou?” 55  Fariu a‘era Iesu e tama‘i atura ia raua. 56  Haere atura Iesu e ta ’na mau pǐpǐ i te tahi atu oire iti. 57  Te haere noa ra ratou, na ô maira te hoê taata ia Iesu: “E pee au ia oe i te vahi atoa ta oe e haere.” 58  Na ô atura râ Iesu: “E apoo to te urî oviri* e e ofaaraa to te manu o te reva. Te Tamaiti râ a te taata nei, aita ïa to ’na e vahi taotoraa.” 59  Na ô atura oia i te tahi atu taata: “A pee mai ia ’u.” Parau maira taua taata ra: “E te Fatu, a tuu na oe ia ’u ia haere na mua e huna i to ’u metua tane.” 60  Na ô atura râ Iesu: “A vaiiho na tei pohe e huna i tei pohe. O oe râ, a haere e faaite na te mau vahi atoa i te Faatereraa arii a te Atua.” 61  Na ô atoa maira te tahi atu: “E te Fatu, e pee au ia oe, na mua râ vaiiho na oe ia ’u ia haere e aroha i to ’u utuafare.” 62  Na ô atura Iesu: “Te taata e tuu i to ’na rima i nia iho i te arote, a hi‘o ai i muri, e ore ïa e tano ia ’na ia ô i roto i te Faatereraa arii a te Atua.”

Nota i raro i te api

Oia hoi na 12 aposetolo.
Aore ra “Basileia o te Atua.”
Aore ra “pane.”
“Ario” na roto i te reo Heleni.
E faaiteraa ïa e na te taata iho e amo i ta ’na utua.
Oia hoi Heroda Anitipa. A hi‘o i te titionare.
“Teterareha” na roto i te reo Heleni.
A hi‘o i te titionare.
Heleni pusuke. A hi‘o i te titionare.
Heleni pusuke. A hi‘o i te titionare.
“Hi‘o” na roto i te reo Heleni.
“A hope ai te mau mahana” na roto i te reo Heleni.
Aore ra “alope.”