Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 8:1-56

HAAPOTORAA O TE MAU TUMU PARAU

  • Te mau vahine e apee ia Iesu (1-3)

  • Faahoho‘araa o te taata ueue huero (4-8)

  • Tumu Iesu e faaohipa ’i i te mau faahoho‘araa (9, 10)

  • Faataahia te faahoho‘araa o te taata ueue huero (11-15)

  • Eita e tapo‘ihia te mori (16-18)

  • To Iesu mau taeae e metua vahine (19-21)

  • Pohe te vero ia Iesu (22-25)

  • Tuu Iesu i te mau demoni i roto i te puaa (26-39)

  • Tamahine a Iaeiro. Tapea te hoê vahine i to Iesu ahu (40-56)

8  I muri iti a‘e, haere atura Iesu na te mau oire e oire rii e poro e e faaite haere i te parau apî oaoa o te Faatereraa arii a te Atua.* Ua pee mai na 12* ia ’na,  oia atoa te tahi mau vahine ta ’na i tiavaru i te mau varua ino e i faaora i te ma‘i: o Maria piihia Magadala, e hitu demoni tei haere i rapae no roto mai ia ’na,  o Ioana te vahine faaipoipo a Huza, tiaau a Heroda, o Susana e e rave rahi atu â vahine. Ua aupuru ratou ia Iesu e te mau aposetolo i ta ratou mau faufaa.  Putuputu maira râ te hoê nahoa rahi e te feia no te mau oire mai o tei apee ia ’na, e faahiti atura oia i te hoê faahoho‘araa:  “Ua haere te hoê taata ueue e ueue i ta ’na huero. A ueue ai oia, mairi ihora te tahi mau huero na te hiti purumu, taataahihia ihora e te taata e amuhia ’tura e te mau manu o te ra‘i.  Mairi ihora te tahi atu mau huero i nia i te pǎpǎ, tupu a‘era e mǎrô ihora no te pape ore.  Mairi ihora te tahi atu i roto i te mau raau taratara, e tapo‘i a‘era te mau raau taratara tei tupu atoa mai i te mau huero.  Mairi ihora râ te tahi atu i nia i te repo maitai, tupu a‘era e hotu maira taihanere ta te hoê.” E na ô atura oia ma te reo puai: “E tari‘a to ’na no te faaroo, a faaroo ïa.”  Ani maira râ te mau pǐpǐ ia Iesu i te auraa o teie faahoho‘araa. 10  Na ô atura Iesu: “Ua horoahia ia outou te taaraa i te mau parau huna mo‘a o te Faatereraa arii a te Atua, no te tahi atu râ, e faahiti ïa vau i te mau faahoho‘araa. Hi‘o noa ’i ratou, aita râ e haro‘aro‘a ra i ta ratou e hi‘o ra, e faaroo noa ’i ratou, aita râ e taa ra i te auraa. 11  Teie te auraa o te faahoho‘araa: Te huero, o te parau ïa a te Atua. 12  Te hiti purumu i ueuehia ’i te huero, o te feia ïa tei faaroo, haere maira te Diabolo e iriti ê ihora i te parau i roto i to ratou aau, ia ore hoi ratou e tiaturi e ia ore ratou e ora. 13  Te pǎpǎ i ueuehia ’i te huero, o te feia ïa e faaroo e e farii i te parau ma te oaoa. No te mea râ aita te reira i a‘a, tiaturi ihora ratou maa taime, i te tupuraa mai râ te fifi, aita ’tura i tiaturi faahou. 14  Te mau raau taratara i mairi ai te huero, o te feia ïa tei faaroo a mana‘ona‘o ai râ i te mau haapeapearaa, te mau tao‘a e te mau mea navenave o teie oraraa, po‘i roa ’tura ratou e aita ’tura i hotu maitai mai. 15  Te repo maitai i ueuehia ’i te huero, o te feia ïa tei faaroo i te parau ma te aau maitai roa, tei tapea maite i te reira e tei hotu mai a faaoromai tamau ai i te fifi. 16  Aore e taata e tutui i te mori, a tapo‘i atu ai i te hoê farii aore ra a tuu atu ai i raro a‘e i te hoê ro‘i. E tuu atu râ oia i nia i to ’na vairaa, ia ite hoi te feia e tomo mai i te maramarama. 17  Aita hoi e mea huna e ore roa e faaitehia, e aita e mea i tapo‘i-maitai-hia e ore e faaitehia e e haamahorahia. 18  No reira, a faaroo maitai ïa, te taata hoi e faufaa ta ’na, e horoahia ’tu â ïa ta ’na. Te taata râ aita ta ’na e faufaa, e iriti-ê-atoa-hia ïa ta ’na e mana‘o ra e na ’na.” 19  Haere maira râ to Iesu metua vahine e to ’na mau taeae e hi‘o ia ’na, aita râ i tae atu ia ’na ra no te rahi o te taata. 20  Parauhia maira ïa ia ’na: “Tei rapaeau to metua vahine e to mau taeae, te hinaaro nei e farerei ia oe.” 21  Na ô atura oia: “To ’u metua vahine e to ’u mau taeae, o te feia ïa e faaroo i te parau a te Atua e e haapao i te reira.” 22  I te hoê mahana, ua haere Iesu e ta ’na mau pǐpǐ i nia i te hoê poti e na ô ihora oia ia ratou: “Mai fano ana‘e i tera ’tu pae o te roto.” Reva ’tura ratou. 23  A tere noa ’i râ ratou, varea ihora Iesu i te taoto. Farara maira te mata‘i puai, î a‘era to ratou poti i te pape e fatata ’tura i te tomo. 24  Tapiri maira ïa te mau pǐpǐ ia Iesu e faaara maira ia ’na, a na ô ai: “Orometua, Orometua, e pohe tatou!” Tia a‘era Iesu, tama‘i ihora i te mata‘i e te mataare, topa a‘era te mata‘i e mania ’tura. 25  Na ô atura oia: “Teihea ’tura to outou faaroo?” Mǎta‘u e maere ihora ratou e na ô a‘era te tahi i te tahi: “O vai hoi teie taata? E faaroo hoi te mata‘i e te are i ta ’na parau.” 26  Tapae atura ratou i te tuhaa fenua o Geregasa, o Galilea to tera ’tu pae. 27  A pou atu ai Iesu i tatahi, haere maira te tahi tane no taua oire ra ia ’na. Ua uruhia oia e te mau demoni. Mea maoro, aita oia i oomo i te ahu, e i te vahi hunaraa oia e parahi ai eiaha i te fare. 28  Ite maira oia ia Iesu, tuô ihora, tuturi ihora i raro i mua ia ’na, e na ô atura ma te reo puai: “Eaha ta oe ohipa i ǒ nei, Iesu Tamaiti a te Atua Teitei? Taparu atu nei au ia oe eiaha e haamauiui ia ’u.” 29  (I faaue na hoi Iesu i te varua viivii ia haere i rapae i taua tane ra. E rave rahi taime to ratou haruraa ia ’na.* E pinepine oia i te taamuhia i te fifi e te auri e i te tiaihia, e mutu râ ia ’na te reira, a aratohia ’i oia e te demoni na te mau vahi taata ore.) 30  Ui ihora Iesu ia ’na: “O vai to oe i‘oa?” Pahono maira oia: “O Nuu,” mea rahi hoi te demoni i roto ia ’na. 31  Taparu a‘era ratou ia ’na eiaha e faaue ia ratou ia haere i roto i te abuso. 32  E nǎnǎ rahi puaa râ te amu haere ra i te maa na nia i te mou‘a, taparu a‘era te mau demoni ia Iesu ia vaiiho ia ratou ia tomo i roto i te mau puaa, e faatia ihora oia. 33  Haere maira te mau demoni i rapae i taua tane ra e tomo a‘era i roto i te mau puaa, horo atura te nǎnǎ, topa ’tura i roto i te miti na nia mai i te pari* e paremo a‘era. 34  A ite ai râ te mau tiai o taua mau puaa ra i te ohipa i tupu, horo atura ratou e faaite i te reira i to te oire e to te mataeinaa. 35  Haere maira te taata e hi‘o i tei tupu. Faafatata maira ratou ia Iesu e ite a‘era i te tane tei tiavaruhia na te mau demoni i rapae, te parahi ra oia i te pae avae o Iesu. E ahu to ’na e ua afaro to ’na feruriraa. Mǎta‘u a‘era ratou. 36  Faatia ’tura te feia tei ite mata i te reira mea nafea te tane tei uruhia e te demoni i te faaoraraahia. 37  No to ratou mǎta‘u rahi, ani a‘era te nahoa taata o te fenua o Geregasa ia Iesu ia faarue i to ratou vahi. Haere atura Iesu i nia i te poti e ua ineine i te reva. 38  Taparu maira râ taua tane ra ia Iesu ia faatia ia pee oia ia ’na. Aita râ Iesu i farii e na ǒ atura: 39  “A ho‘i i to oe fare e a faatia i te taata atoa i ta te Atua i rave no oe.” Reva ’tura ïa oia e faaite haere i te taata o te oire taatoa i ta Iesu i rave no ’na. 40  I to Iesu tapaeraa ’tu, farii maitai maira te nahoa ia ’na, te tiai ra hoi ratou paatoa ia ’na. 41  E inaha, haere maira te hoê taata o Iaeiro te i‘oa, aratai o te sunago. Tahopu ihora oia ia Iesu a taparu atu ai ia ’na ia tomo mai i roto i to ’na fare, 42  no te mea ua fatata ta ’na tamahine otahi* piri i te 12 matahiti i te pohe. A haere ai Iesu, piri roa maira te nahoa taata ia ’na. 43  Te vai ra te hoê vahine, 12 matahiti to ’na tapahi-noa-raa, e aore roa e taata i nehenehe e rapaau ia ’na. 44  Haere maira oia i muri ia Iesu, tapea maira i to ’na hiti ahu, e mau ihora to ’na tapahi. 45  Parau a‘era Iesu: “Na vai i tapea ia ’u?” I te mea e aita i itehia, na ô atura Petero: “Orometua, te haaati nei te taata ia oe e ua piri roa mai ratou.” 46  Parau maira râ Iesu: “E taata tei tapea ia ’u, ua ite hoi au e e mana tei haere i rapae ia ’u.” 47  Taa ’tura i tera vahine e ua ite Iesu i tei tupu, tuturi ihora oia i mua ia Iesu ma te rûrû, e faaite atura i mua i te taata atoa no te aha oia i tapea ’i ia ’na e mea nafea to ’na ma‘i i ora oioi ai. 48  Parau maira râ Iesu ia ’na: “Ta ’u tamahine, no to oe faaroo i ora ’i oe. A haere, eiaha oe e haapeapea.” 49  A paraparau noa ’i Iesu, haere maira te hoê taata o te fare o te tavana o te sunago e na ô maira: “Ua pohe to tamahine. Eiaha e haapeapea faahou i te Orometua.” 50  I to Iesu faarooraa i teie parau, na ô ihora oia ia Iaeiro: “Eiaha oe e mǎta‘u, a tiaturi noa mai, e ora ïa oia.” 51  I to ’na taeraa ’tu i te fare, o Petero, Ioane, Iakobo e na metua o te tamahine ana‘e ta ’na i faatia ia tomo atu e oia. 52  Te ta‘i ra râ te taata atoa e te tupaipai ra i to ratou ouma no te oto. Na ô ihora Iesu: “A faaea i te ta‘i, aita hoi oia i pohe, te taoto ra râ.” 53  Ata faaooo a‘era ratou ia ’na, no te mea ua ite ratou e ua pohe oia. 54  Rave ihora râ Iesu i te rima o te tamahine e na ô atura ma te reo puai: “Tamahine, a tia mai!” 55  Ho‘i maira te potii i te ora,* tia maira i reira iho e faaue atura Iesu ia horoa i te maa na ’na. 56  Oaoa roa a‘era na metua o te potii, faaue ihora râ Iesu ia raua eiaha e faaite i te ohipa i tupu.

Nota i raro i te api

Aore ra “Basileia o te Atua.”
Oia hoi na 12 aposetolo.
Nehenehe atoa e hurihia “Mea maoro to ratou tapearaa ia ’na.”
Aore ra “mato tarere.”
“Fanau tahi” na roto i te reo Heleni.
Aore ra “Ho‘i faahou maira to ’na puai ora.” Heleni pusuke. A hi‘o i te titionare.