Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 7:1-50

HAAPOTORAA O TE MAU TUMU PARAU

  • Faaroo o te hoê raatira faehau (1-10)

  • Faatia faahou mai Iesu i te tamaiti a te hoê vahine ivi i Naina (11-17)

  • Haapopouhia Ioane Bapetizo (18-30)

  • Faahapahia te u‘i etaeta (31-35)

  • Faaorehia te hara a te hoê vahine (36-50)

    • Faahoho‘araa o na taata tei tarahu i te moni (41-43)

7  I te otiraa ta ’na paraparauraa i te taata, tomo ihora Iesu i Kaperenaumi.  E ma‘i rahi to te tavini here a te tahi raatira faehau e ua fatata i te pohe.  I to te raatira faehau faarooraa no Iesu, tono ihora oia i te tahi mau aratai ati Iuda e ani ia Iesu ia haere mai e faaora i te ma‘i o ta ’na tavini.  Haere maira ratou ia Iesu ra e taparuparu maira ia ’na: “Mea tano ia farii oe i ta ’na aniraa,  mea here hoi na ’na to tatou nunaa e ua faatia oia iho i ta matou sunago.”  Haere atura ïa Iesu e ratou atoa. Te piri atu ra râ oia i te fare i tono mai ai te raatira faehau i te mau hoa e parau ia Iesu: “E te Fatu, eiaha e faaohipa rahi ia oe, eita hoi e tano ia ’u ia farii ia oe i to ’u fare.  No reira vau i ore ai i haere atu ia oe ra. A parau noa râ i te tahi parau, e ia ora te ma‘i o ta ’u tavini.  E taata hoi te faatere mai ia ’u, e faehau atoa ta ’u o te auraro mai ia ’u, e ia parau vau i teie faehau: ‘A haere!’ e haere oia, i te tahi atu: ‘A haere mai!’ e haere mai oia, e i ta ’u tavini: ‘A na ô!’ e na ô oia.”  I to Iesu faarooraa i teie mau parau, maere ihora oia i taua raatira faehau ra, fariu atura oia i te nahoa tei pee mai ia ’na e na ô atura: “E parau atu vau: Aita vau i ite a‘enei i te faaroo rahi mai teie i Iseraela.” 10  I to te feia i tonohia ho‘iraa ’tu i te fare, ite a‘era ratou e ua ora te ma‘i o te tavini. 11  I muri iti a‘e, reva ’tura Iesu i te hoê oire o Naina te i‘oa, ua pee atoa mai ta ’na mau pǐpǐ e te hoê nahoa rahi. 12  A piri atu ai oia i te uputa o te oire, inaha te amohia mai ra te hoê taata pohe, o ’na ana‘e te tamaiti* a te hoê vahine ivi. E rave rahi to te oire i pihai iho i taua vahine ra. 13  Ite atura te Fatu ia ’na, aroha ihora ia ’na e na ô atura: “Eiaha e ta‘i faahou.” 14  Tapiri atura Iesu, tapea ’tura i te ro‘i e tia noa ihora te feia amo. Na ô atura oia: “Taurearea, te parau atu nei au ia oe: A tia mai!” 15  Tia maira taua taata pohe ra, paraparau ihora e tuu atura Iesu ia ’na i to ’na metua vahine. 16  Mǎta‘u ihora ratou pauroa e faahanahana ’tura i te Atua a na ô ai: “Ua tia mai te hoê peropheta rahi i rotopu ia tatou,” e “Ua haamana‘o mai te Atua i to ’na nunaa.” 17  Atutu atura teie parau apî no nia ia Iesu e ati a‘e Iudea e te mau vahi tapiri atoa. 18  E teie nei, faatia a‘era te mau pǐpǐ a Ioane ia ’na i teie mau mea atoa. 19  Titau ihora Ioane e piti o ta ’na mau pǐpǐ e tono atura ia raua e ui i te Fatu: “O oe anei ta matou i tiai noa na, aore ra e taata ê te tae mai?” 20  Haere atura raua ia Iesu ra e na ô atura: “Ua tono mai Ioane Bapetizo ia mâua e ui ia oe: ‘O oe anei ta matou i tiai noa na, aore ra e taata ê te tae mai?’” 21  I taua taime ra, ua faaora oia e rave rau ma‘i e te matapo e rave rahi ia ite faahou e ua tiavaru atoa i te mau varua ino. 22  Pahono maira Iesu ia raua: “A haere e faatia ia Ioane i ta orua i ite e i faaroo: Te ite faahou nei te matapo, te haere nei te piri‘o‘i, ua ora te lepera, te faaroo nei te tari‘a turi, ua tia faahou mai te feia pohe e te faaitehia nei te parau apî oaoa i te feia veve. 23  E oaoa te taata e tiaturi mau nei ia ’u.” 24  I te revaraa na pǐpǐ a Ioane, parau ihora Iesu i te nahoa taata no nia ia Ioane: “Eaha ta outou i haere e hi‘o i te medebara? Te hoê aeho e taueue ra i te mata‘i? 25  O vai ïa ta outou i haere e hi‘o? Te hoê taata e ahu unauna* to ’na? Te feia e ahu unauna to ratou, to roto ïa i te aorai o te mau arii. 26  O vai ïa ta outou i haere e hi‘o i te medebara? Te hoê peropheta? Oia mau, te parau atu nei au, e rahi a‘e oia i te hoê peropheta. 27  No ’na i papaihia ’i: ‘Inaha, te tono nei au i ta ’u vea na mua ia oe,* na ’na e faaineine i te e‘a no oe.’ 28  Te parau atu nei au, i rotopu i tei fanauhia mai e te vahine, aita hoê i rahi a‘e ia Ioane, area tei haihai a‘e i roto i te Faatereraa arii a te Atua,* mea rahi a‘e ïa ia ’na.” 29  (I to te taata atoa e te feia titau tute faarooraa i teie parau, farii a‘era ratou e parau-tia ta te Atua, i bapetizohia na hoi ratou e Ioane. 30  Area te mau Pharisea e te feia mea ite i te ture a Mose, ua haafaufaa ore ïa i ta te Atua opuaraa* no ratou, aita hoi ratou i bapetizohia e Ioane.) 31  Na ô faahou atura Iesu: “E faaau ïa vau i te mau taata o teie nei u‘i ia vai, e au hoi ratou ia vai? 32  E au ratou i te mau tamarii rii e parahi ra na te mahora* e e pii ra i te tahi atu mau tamarii, a na ô ai: ‘Ua faata‘i matou i te vivo no outou, aita râ outou i ori. Ua himene matou ma te oto, aita râ outou i ta‘i.’ 33  Oia atoa, ua haere mai Ioane Bapetizo e aita oia i amu i te faraoa* e aita i inu i te uaina, ua parau râ outou: ‘E demoni to ’na.’ 34  Ua haere mai te Tamaiti a te taata nei e ua tamaa e ua inu, ua parau râ outou: ‘Inaha, mea tamaa roa teie taata ma te haapuupuu, mea inu i te uaina, e hoa no te mau titau tute e te feia rave hara!’ 35  Na te mau ohipa parau-tia ta te hoê taata e rave* e haapapu e e taata paari oia.” 36  Ani maira râ te hoê Pharisea ia Iesu ia tamaa i ǒ ’na. Tomo ihora ïa Iesu i roto i te fare o taua Pharisea ra e tarava ihora i te amuraa maa. 37  E inaha, haere maira te hoê vahine, matauhia na te oire ei vahine rave hara. I faaroo na oia e te tamaa ra Iesu* i te fare o te Pharisea. E mohina* mono‘i no‘ano‘a ta ’na. 38  Tuturi ihora oia i te pae avae o Iesu, ta‘i atura, rari a‘era to Iesu avae i to ’na roimata ta ’na i tamǎrô i to ’na rouru. Apa atoa ’tura oia i to Iesu avae ta ’na i ninii i te mono‘i no‘ano‘a i nia iho. 39  I to te Pharisea, tei titau manihini ia Iesu, iteraa i te reira, feruri ihora oia: “Ahiri e peropheta teie taata, e ite ïa o ’na o vai e eaha teie vahine e tapea nei i to ’na avae, e vahine rave hara.” 40  Pahono atura râ Iesu ia ’na: “Simona, e parau ta ’u ia oe.” Na ô maira Simona: “A parau mai Orometua!” 41  “E piti taata tei tarahu i te moni i te tahi atu taata, e 500 denari* tarahu ta te tahi, e 50 ta te tahi atu. 42  No te mea râ e aita ta raua e moni no te faaho‘i, faaore noa maira taua taata ra i ta raua tarahu. O vai ïa o raua te here atu â ia ’na?” 43  Pahono maira Simona: “I to ’u mana‘o, o te taata ïa mea rahi a‘e ta ’na tarahu.” Na ô atura Iesu: “Mea tano to mana‘o.” 44  Hi‘o atura oia i te vahine e na ô atura ia Simona: “Te ite ra oe i teie vahine? Ua tomo vau i roto i to oe fare, aita râ oe i horoa mai i te pape no to ’u avae. Teie râ vahine, ua horoi ïa i to ’u avae i to ’na roimata e ua tamǎrô i to ’na rouru. 45  Aita oe i apa mai ia ’u, teie râ vahine, aita ïa i faaea i te apa i to ’u avae mai to ’u iho â tomoraa mai. 46  Aita oe i ninii i te mono‘i i nia i to ’u upoo, teie râ vahine, ua ninii ïa i te mono‘i no‘ano‘a i nia iho i to ’u avae. 47  Teie ïa ta ’u e parau atu, noa ’tu te rahi o te hara a teie vahine, ua faaorehia ïa. E faaite atu â ïa oia i te here. Te taata râ mea iti ta ’na hara i faaorehia, mea iti atoa ïa te here ta ’na e faaite.” 48  Na ô atura Iesu i taua vahine ra: “Ua faaorehia ta oe mau hara.” 49  Na ô ihora te feia e tarava ra i te amuraa maa e o Iesu, ia ratou iho: “O vai teie taata e faaore atoa ’i oia i te hara?” 50  Na ô atura râ Iesu i taua vahine ra: “Ua ora oe i to oe faaroo. A haere, eiaha oe e haapeapea.”

Nota i raro i te api

“Te tamaiti fanau tahi” na roto i te reo Heleni.
Aore ra “ahu maitai roa.”
“I mua i to aro” na roto i te reo Heleni.
Aore ra “Basileia o te Atua.”
Aore ra “aratairaa.”
I reira te taata e hoohoo ai e e ruru ai.
Aore ra “pane.”
“Na te mau tamarii a te hoê taata” na roto i te reo Heleni.
Aore ra “te tarava ra Iesu i te amuraa maa.”
E mohina ofai parauhia alabata. A hi‘o i te titionare.
A hi‘o i te titionare.