Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 6:1-49

HAAPOTORAA O TE MAU TUMU PARAU

  • ‘E Fatu Iesu no te Sabati’ (1-5)

  • Faaorahia te hoê tane rima mǎrô (6-11)

  • Na 12 aposetolo (12-16)

  • Haapii e faaora Iesu (17-19)

  • Oaoa e ati (20-26)

  • Here i te mau enemi (27-36)

  • Faaea i te haava (37-42)

  • Na te maa e faaite (43-45)

  • Fare haamauhia i nia i te niu, fare aita e niu (46-49)

6  I te hoê râ Sabati,* haere atura Iesu na roto i te mau faaapu sitona, hutihuti a‘era ta ’na mau pǐpǐ i te huero sitona, orooro ihora i roto i to ratou rima e amu atura.  Na ô maira te tahi mau Pharisea: “Eaha outou e rave ai i tei opanihia i te Sabati?”  Pahono atura râ Iesu: “Aita outou i taio i ta Davida i rave a poia ’i oia e to ’na mau taata?  Ua tomo oia i roto i te fare o te Atua, ua horoahia mai te mau pane pûpûhia,* tei opanihia i te taata atoa ia amu. O te mau tahu‘a ana‘e te nehenehe e amu. Ua amu oia e ua horoa i te tahi na to ’na mau taata.”  Na ô atura oia: “E Fatu te Tamaiti a te taata nei no te Sabati.”  I te tahi atu Sabati, tomo ihora Iesu i roto i te sunago e haapii atura i te taata. E tane atoa to reira ua mǎrô* to ’na rima atau.  Hi‘o maitai maira te mau papai parau e te mau Pharisea ia Iesu no te ite e faaora anei oia i te taata ma‘i i te Sabati, a faahapa mai ai ratou ia ’na.  Ua ite râ Iesu i to ratou mana‘o e parau atura i te tane rima mǎrô:* “A tia mai e a tia noa i ropu.” Tia a‘era oia e tia noa ihora i ropu.  Na ô atura Iesu: “E ui atu vau ia outou: Ia au i te ture, mea tano anei i te Sabati ia hamani maitai aore ra ia hamani ino, ia faaora aore ra ia haapohe?” 10  Hi‘o ihora oia ia ratou pauroa e na ô atura i taua tane ra: “A toro mai na i to rima.” Na reira maira oia e ora ’tura to ’na rima. 11  Hae a‘era râ ratou e paraparau a‘era te tahi i te tahi i ta ratou e rave ia Iesu. 12  I te hoê mahana, pauma ’tura Iesu i nia i te mou‘a e pure, e pure atura i te Atua i te po taatoa. 13  E ao a‘era, parau atura oia i ta ’na mau pǐpǐ ia haere mai e maiti ihora i rotopu ia ratou 12 ta ’na i mairi i te i‘oa aposetolo: 14  Simona ta ’na i mairi atoa i te i‘oa Petero, Anederea to ’na taeae, Iakobo, Ioane, Philipa, Baretolomea, 15  Mataio, Toma, Iakobo te tamaiti a Alephaia, Simona parauhia “tei itoito rahi,” 16  Iuda te tamaiti a Iakobo e Iuda Isakariota tei riro ei enemi. 17  Pou maira Iesu e ratou atoa e faaea ’tura oia i te hoê vahi papu, to reira e rave rahi o ta ’na mau pǐpǐ e te nahoa taata no Iudea atoa, no Ierusalema e no te pae miti o Turia e Sidona, tei haere mai e faaroo ia ’na e ia ora to ratou mau ma‘i. 18  Ua ora atoa mai te feia tei haamauiuihia e te mau varua viivii. 19  Imi atura te taata atoa i te tapea ia Iesu, no te mea e mana no roto mai ia ’na te haere i rapae, a ora ’tu ai to ratou ma‘i. 20  Hi‘o atura Iesu i ta ’na mau pǐpǐ e na ô atura: “E oaoa outou te feia veve, no outou hoi te Faatereraa arii a te Atua.* 21  E oaoa outou e poia nei, e paia hoi outou. E oaoa outou e ta‘i nei, e ata hoi outou. 22  E oaoa outou ia hae te taata ia outou, ia tiavaru ia outou, ia faahapa ia outou e ia faaino* i to outou i‘oa no te Tamaiti a te taata nei. 23  I na reira na hoi to ratou mau tupuna i te mau peropheta. A oaoa i taua mahana ra e ia oaoa roa outou, inaha, e haamaitairaa rahi hoi ta outou i te ra‘i. 24  Ua ati râ outou te feia tao‘a rahi, ta outou hoi e fana‘o nei, tera noa ïa te noaa ia outou. 25  Ua ati outou tei paia, e poia hoi outou. Ua ati outou e ata nei, e oto e e ta‘i hoi outou. 26  Ua ati outou ia arue te taata ia outou, ua na reira hoi to ratou mau tupuna i te mau peropheta haavare. 27  Tera râ, te parau atu nei au ia outou e faaroo nei: A here noa i to outou mau enemi, a hamani maitai noa i te feia e hae ra ia outou, 28  a haamaitai noa i tei faaino mai ia outou, a pure noa no tei vahavaha mai ia outou. 29  I te taata e poara mai i to oe papari‘a, a fariu atu i te tahi atu papari‘a. E i te taata e rave i to oe ahu tapo‘i, a horoa atoa ’tu i te tahi atu ahu. 30  A horoa i ta te taata atoa e ani mai. E i te taata e rave i ta oe mau mea, eiaha e ani ia faaho‘i mai. 31  Oia atoa, ta outou e hinaaro ia rave te taata no outou, a na reira atoa ’tu ïa. 32  Mai te peu e o te feia ana‘e e here mai ia outou ta outou e here atu, eaha ïa te apî? Te here atoa nei hoi te feia rave hara i tei here mai ia ratou. 33  E ia hamani maitai outou i tei hamani maitai mai, eaha ïa te apî? Te na reira atoa nei te feia rave hara. 34  Ia horoa tarahu* atoa outou i te tahi mea ma te mana‘o e e faaho‘ihia mai, eaha ïa te apî? Te horoa tarahu atoa nei te feia rave hara ma te tiaturi e e faaho‘i-pauroa-hia mai. 35  Eiaha ïa, a here noa râ i to outou mau enemi, a hamani maitai e a horoa tarahu ma te ore e tiai ia faaho‘ihia mai. E haamaitairaa rahi ïa ta outou e e riro outou ei tamarii* na tei Teitei, mea hamani maitai hoi oia i te feia mauruuru ore e te ino. 36  A aroha hamani maitai noa, mai to outou Metua aroha hamani maitai. 37  A faaea atoa i te haava, e ore roa ïa outou e haavahia, e a faaea i te faahapa, e ore roa ïa outou e faahapahia. A faaore noa i ta vetahi ê hara, e faaorehia ïa ta outou. 38  A tamau i te horoa, e horoa atoa mai ïa te taata. E ninii ratou i roto i to outou ahu e rave rahi roa mea, pue maitai, ueuehia e purehu noa ’tu i rapae. Tei te huru hoi o ta outou faitoraa e faito-atoa-hia ’i ta outou.” 39  Horoa atoa ’tura oia i te hoê faahoho‘araa: “E nehenehe anei te hoê matapo e aratai i te tahi atu matapo? E ore anei raua e topa i roto i te apoo? 40  Aita te hoê piahi* i hau a‘e i ta ’na orometua, te taata râ e haapii-maitai-hia ra, e riro ïa mai ta ’na orometua. 41  Eaha ïa oe e hi‘o ai i te raau hu‘a roa i roto i te mata o to taeae, aita râ oe e tâu‘a ra i te pou i roto i to oe iho mata? 42  E nafea e tia ’i ia oe ia parau i to taeae: ‘Taeae, vaiiho na ia ’u ia iriti i te raau hu‘a roa i roto i to oe mata,’ e aita hoi oe e ite ra i te pou i roto i to oe iho mata? Haavarevare! A iriti na mua i te pou i roto i to oe iho mata, e ite maitai ïa oe ia iriti i te raau hu‘a roa i roto i te mata o to taeae. 43  Aita hoi e tumu raau maitai e faahotu mai i te maa ino, aita atoa e tumu raau ino e faahotu mai i te maa maitai. 44  Na te maa hoi e faaite eaha tera aore ra tera tumu raau. E ore te taata e pofai i te suke aore ra e tâpû i te vine i nia i te raau taratara. 45  E parau te hoê taata maitai i te mea maitai, no te mea ua î to ’na aau i te mea maitai. Te taata ino râ, e parau ïa i te mea ino, no te mea ua î to ’na aau i te mea ino. No te î hoi o to ’na aau e parau ai to ’na vaha. 46  Eaha ïa outou e parau mai ai ia ’u, e te Fatu, e te Fatu, e aita hoi outou e haapao ra i ta ’u mau parau? 47  Te taata e haere mai ia ’u nei e faaroo i ta ’u mau parau, a haapao atu ai, e faaite atu ïa vau e e au o ’na ia vai: 48  E au oia i te hoê taata o te hinaaro e faatia i te hoê fare. E ô oia i te hoê apoo hohonu e tae roa ’tu i te pǎpǎ, a haamau atu ai i te niu i reira. I te ûa-rahi-raa mai, tairi maira te pape pue i nia i taua fare ra, aita râ te fare i aueue, no te mea ua faatia-maitai-hia. 49  Te taata râ o te faaroo mai ma te ore e haapao, e au ïa i te hoê taata tei faatia i te hoê fare i nia i te repo e aita e niu. I te tairiraa mai te pape pue, marua ihora te fare e parari roa ’tura.”

Nota i raro i te api

A hi‘o i te titionare.
Aore ra “pane o te aro.” A hi‘o i te titionare.
Aore ra “paruparu.”
Aore ra “paruparu.”
Aore ra “Basileia o te Atua.”
Aore ra “tuu.”
Oia hoi ma te ore e titau i te moni taime.
“Tamaiti” na roto i te reo Heleni.
Aore ra “pǐpǐ.”