Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 5:1-39

HAAPOTORAA O TE MAU TUMU PARAU

  • Noaa-semeio-raa te i‘a. Te mau pǐpǐ matamua (1-11)

  • Faaorahia te hoê lepera (12-16)

  • Faaora Iesu i te hoê hapepa (17-26)

  • Pii Iesu ia Levi (27-32)

  • Uiraa no nia i te haapaeraa maa (33-39)

5  I te hoê mahana, te faaroo noa ra te nahoa taata ia Iesu o te haapii atu ra i te parau a te Atua i te hiti roto o Genesareta,* tapiri roa maira ratou ia Iesu.  Ite atura oia e piti poti i tatahi e tei uta te mau ravaai e tamâ ra i ta ratou mau upe‘a.  Haere ihora oia i nia hoê o taua na poti ra, to Simona, e ani atura ia ’na ia turai rii atu i te poti i tai. Parahi ihora oia e haapii atura i te nahoa taata mai nia ’tu i te poti.  I te otiraa ta ’na paraparauraa, na ô ihora oia ia Simona: “A hôe atu i te vahi hohonu, e a tuu i ta outou mau upe‘a.”  Na ô maira râ Simona: “Orometua, ua tai‘a matou e ao noa ’tura e aita hoê a‘e i‘a, no ta oe râ parau, e tuu vau i te upe‘a.”  I to ratou na reiraraa, mea rahi ta ratou i‘a i noaa mai, a mutumutu atu ai ta ratou mau upe‘a.  Tarape atura ratou i to ratou mau hoa ravaai i roto i te tahi atu poti ia haere mai e tauturu ia ratou, tapiri maira ratou e faaî ihora i na poti e piti tei fatata roa i te tomo.  A ite ai oia i te reira, tuturi ihora Simona Petero i mua ia Iesu, a na ô ai: “E te Fatu, eiaha e tapiri mai ia ’u, e taata hara hoi au.”  No tera rahiraa i‘a tei noaa mai, maere roa ’tura oia e te mau hoa ravaai atoa, 10  oia atoa Iakobo raua Ioane na tamaiti a Zebedaio e na hoa ohipa o Simona. Na ô atura râ Iesu ia Simona: “Eiaha e mǎta‘u faahou. Mai teie atu nei, te taata te noaa mai ia outou.” 11  Faaho‘i maira ratou i na poti i tatahi, vaiiho a‘era i te mau mea atoa e pee maira ia Iesu. 12  I te tahi atu mahana tei te hoê oire oia, inaha te vai ra te hoê taata ua î roa to ’na tino i te lepera! I to ’na iteraa ia Iesu, tipapa ihora e taparu maira ia ’na: “E te Fatu, ia tia ia oe, e nehenehe oe e tamâ ia ’u.” 13  Toro ihora ïa Iesu i to ’na rima, tapea ’tura ia ’na a na ô ai: “E tia ia ’u! Ia mâ oe.” Pee ihora te lepera. 14  Faaue ihora oia ia ’na eiaha e faaite i te taata e na ô atura: “A haere râ e faaite ia oe i te tahu‘a, e a pûpû i te ô ta Mose i faaue ei haapapuraa e ua mâ to oe lepera, ia ite ratou.” 15  Teie râ, atutu noa ’tura te parau no Iesu e haere maira te nahoa taata e faaroo ia ’na e ia ora to ratou mau ma‘i. 16  Pinepine râ oia i te haere i te mau vahi aita e taata, no te pure. 17  I te hoê mahana, a haapii ai Iesu i te taata i roto i te hoê fare, parahi atoa maira te mau Pharisea e te feia haapii i te ture a Mose no te mau oire rii atoa o Galilea e to Iudea e no Ierusalema mai. E tei ia ’na ra te mana o Iehova* e faaora i te ma‘i. 18  E inaha, amo maira te tahi mau taata i te hoê hapepa i nia i te hoê ro‘i, e imi a‘era i te ravea no te afai roa ’tu ia ’na i mua ia Iesu. 19  Aita râ i tae ia ratou no te rahi o te taata. Pauma a‘era ratou i nia i te tapo‘i fare, faaapoo a‘era i te reira e haapou maira i te hapepa i nia i te ro‘i i rotopu i te feia i mua ia Iesu. 20  I to Iesu iteraa i to ratou faaroo, na ô atura oia i te hapepa: “Ua faaorehia ta oe mau hara.” 21  Na ô ihora te mau papai parau e te mau Pharisea ia ratou iho: “O vai hoi teie taata e faaino ra i te Atua? E ere anei o te Atua ana‘e te nehenehe e faaore i te hara?” 22  Taa ihora râ ia Iesu to ratou huru feruriraa e na ô atura: “Eaha outou e feruri ai mai tera i roto i to outou aau? 23  Eaha hoi te mea ohie a‘e ia parau: ‘Ua faaorehia ta oe mau hara,’ aore ra: ‘A tia i nia, a haere’? 24  E faaite atu râ vau e e mana to te Tamaiti a te taata nei i te fenua e faaore i te hara . . .” Na ô atura oia i te hapepa: “Te parau atu nei au ia oe: A tia i nia, a rave i to oe ro‘i e a haere i to oe fare.” 25  I reira iho, tia a‘era oia i nia i mua ia ratou, rave maira i to ’na ro‘i e haere atura i to ’na fare a faahanahana ’i i te Atua. 26  Maere e mǎta‘u a‘era ratou pauroa, e faahanahana ’tura i te Atua a na ô ai: “E ohipa faahiahia ta tatou i ite i teie mahana!” 27  I muri a‘e i teie mau mea, haere atura Iesu i rapae, ite atura i te hoê titau tute o Levi* te i‘oa, te parahi ra i te fare aufauraa tute, e na ô atura: “A pee mai ia ’u.” 28  Tia a‘era Levi, vaiiho atura i te mau mea atoa e pee maira ia Iesu. 29  Faatupu atoa ihora Levi i te hoê tamaaraa rahi no Iesu i to ’na fare, e i rotopu i te mau manihini e tamaa ra,* mea rahi roa te titau tute. 30  Ohumu a‘era te mau Pharisea e ta ratou mau papai parau e na ô atura i ta ’na mau pǐpǐ: “Eaha outou e tamaa ’i e te mau titau tute e te feia rave hara?” 31  Pahono maira Iesu: “E ere te taote no te feia oraora maitai, no te feia ma‘i râ. 32  Ua haere mai hoi au e titau i te feia rave hara ia tatarahapa, eiaha râ te feia parau-tia.” 33  Na ô atura ratou: “E pinepine te mau pǐpǐ a Ioane i te haapae i te maa e i te pure i te Atua ma te taparuparu, oia atoa te mau pǐpǐ a te mau Pharisea. Ta oe râ, te tamaa nei e te inu noa nei ïa.” 34  Na ô maira Iesu: “Eita ta outou e nehenehe e faahepo i te mau hoa o te tane faaipoipo ia haapae i te maa a vai noa mai ai oia i rotopu ia ratou, e ere anei? 35  E tae mai râ te mau mahana e hopoi-ê-hia ’i te tane faaipoipo, i reira ïa ratou e haapae ai i te maa.” 36  Horoa atoa ’tura oia i te hoê faahoho‘araa: “Aita e taata e tâpû i te ahu apî no te tafai atu i nia i te ahu tahito. Ia na reira oia, e mutu te ahu tahito i te ahu apî, e ore atoa te ahu apî e tano e te ahu tahito. 37  Aita atoa e taata e tuu i te uaina apî i roto i te mau pute uaina* tahito. Ia na reira oia, e mahae te mau pute uaina, e tahe te uaina apî, e ino atoa te mau pute uaina. 38  E tuuhia râ te uaina apî i roto i te mau pute uaina apî. 39  Aita e taata e hinaaro i te uaina apî mai te peu e ua tamata ê na oia i te mea tahito, a na ô ai: ‘Mea au te uaina tahito.’”

Nota i raro i te api

Oia hoi te miti o Galilea.
A hi‘o i te titionare.
Pii-atoa-hia Mataio.
Aore ra “e tarava ra i te amuraa maa.”
Pute uaina iri animara.