Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 4:1-44

HAAPOTORAA O TE MAU TUMU PARAU

  • Faahema te Diabolo ia Iesu (1-13)

  • Haamata Iesu i te poro i Galilea (14, 15)

  • Aita Iesu i fariihia i Nazareta (16-30)

  • I te sunago i Kaperenaumi (31-37)

  • Faaorahia te ma‘i o te metua vahine hoovai o Simona e te tahi atu (38-41)

  • Itehia Iesu i te hoê vahi mo‘emo‘e e te nahoa (42-44)

4  Faarue atura Iesu tei î i te varua mo‘a ia Ioridana e arataihia ’tura oia e taua varua ra i te medebara  e 40 mahana. Aita atoa oia i tamaa e i te hoperaa taua mau mahana ra, poia ihora oia. I reira, faahema ihora te Diabolo ia ’na.  Na ô maira te Diabolo: “E tamaiti oe na te Atua, a parau i teie ofai ia riro ei faraoa.”*  Pahono atura râ Iesu: “Ua papaihia: ‘E ore te taata e ora i te maa ana‘e.’”  Afai a‘era te Diabolo ia Iesu i nia i te hoê vahi teitei e faaite maira maa taime noa i te mau faatereraa arii atoa o te ao nei.  Na ô maira ïa te Diabolo: “E horoa ’tu vau i te mana i nia i teie mau faatereraa atoa e to ratou hanahana, no te mea ua tuuhia mai te reira ia ’u ra e e horoa ’tu vau na te taata ta ’u e hinaaro.  No reira, ia haamori mai oe ia ’u,* na oe ïa teie mau mea atoa.”  Pahono atura Iesu: “Ua papaihia: ‘O Iehova* to oe Atua ta oe e haamori, e ia ’na ana‘e e pûpû ai oe i te hoê taviniraa mo‘a.’”  Afai atura te Diabolo ia Iesu i Ierusalema, tuu ihora ia ’na i te vahi teitei roa o te hiero e na ô ihora: “E tamaiti oe na te Atua, a ou‘a i raro, 10  ua papaihia hoi: ‘E faaue oia i ta ’na mau melahi e paruru ia oe,’ 11  e ‘Na to ratou rima e mau ia oe ia ore roa to oe avae e tano i nia i te ofai.’” 12  Pahono atura Iesu: “Ua parauhia: ‘Eiaha oe e ‘a‘a ia Iehova* to oe Atua.’” 13  I muri a‘e i to ’na faahemaraa ia Iesu, vaiiho maira te Diabolo ia ’na, a tiai ai i te tahi atu taime tano. 14  Ho‘i maira Iesu ma te î i te mana o te varua mo‘a i Galilea. Atutu atura te parau maitai no nia ia ’na na te mau vahi tapiri mai. 15  Haapii atoa ’tura oia i te taata i roto i te mau sunago na reira, e arue maira te taata atoa ia ’na. 16  Haere atura oia i Nazareta, i reira to ’na paariraa mai, tomo ihora i roto i te sunago mai ta ’na i matau i te mahana Sabati,* e tia a‘era no te taio. 17  Horoahia maira te otaro a te peropheta Isaia, hohora ihora oia i te otaro e itehia ’tura ia ’na te vahi i papaihia ’i: 18  “Tei nia iho ia ’u te varua o Iehova,* ua faatavai hoi oia ia ’u no te faaite i te parau apî oaoa i te feia veve. Ua tono mai oia ia ’u no te poro e e tiamâ te feia tîtî e e ite faahou te matapo, no te tuu i te feia i haavîhia, 19  no te poro i te tau e haamaitai faahou ai Iehova* ia ratou.” 20  Oviri atura oia i te otaro, faaho‘i atura i te tavini e parahi ihora. Hi‘o noa maira to te sunago atoa ia ’na. 21  Na ô atura oia: “Teie parau i papaihia ta outou i faaroo mai nei, ua tupu ïa i teie mahana.” 22  Faahiti a‘era ratou paatoa i te parau maitai no nia ia ’na e to ratou maere i te au rahi o ta ’na mau parau, a na ô ai: “E tamaiti na Iosepha teie, e ere anei?” 23  Na ô atura oia: “E faaau mai paha outou ia ’u i teie parau e na ô ra: ‘Taote, a faaora ia oe iho. Ua faaroo matou i ta oe i rave i Kaperenaumi, a na reira atoa ïa i ǒ nei, i to oe nei fenua.’” 24  Na ô atura ïa oia: “Oia mau ta ’u e parau atu, aita e peropheta e auhia i to ’na iho fenua. 25  E parau mau ta ’u e parau atu: A ore ai i ûa e toru matahiti e te afa e a tupu atu ai te o‘e rahi e ati a‘e te fenua, mea rahi te vahine ivi i Iseraela i te tau o Elia. 26  Teie râ, aita o Elia i tonohia i taua mau vahine ra, i te hoê noa râ vahine ivi i Zarephate i te fenua o Sidona. 27  Mea rahi atoa te taata lepera i Iseraela i te tau o Elisaia te peropheta, aita râ ratou i tamâhia,* o Naamana ana‘e râ no Suria.” 28  Riri roa a‘era to te sunago atoa tei faaroo i teie mau parau, 29  tia a‘era ratou, arato ru ihora ia ’na i rapae i te oire, e afai atura ia ’na i te vahi topa tarere o te mou‘a to reira to ratou oire, no te turai ia ’na i raro. 30  Na roto atura râ Iesu ia ratou i te haere e reva ’tura. 31  Pou ihora oia i Kaperenaumi, oire no Galilea. Haapii atura oia i te taata i te Sabati, 32  e maere ihora ratou i ta ’na huru haapiiraa, no te mea te parau ra oia ma te mana. 33  E taata râ tei uruhia e te hoê varua, te hoê demoni viivii, to roto i te sunago e te tuô ra: 34  “Eaha ta oe ohipa i ǒ nei, Iesu no Nazareta? Haere mai oe e haamou ia matou? Ua ite maitai au o vai oe, te tavini Mo‘a a te Atua.” 35  Tama‘i ihora râ Iesu ia ’na, a na ô ai: “Mamû, haere i rapae ia ’na.” Taora ihora te demoni i taua taata ra i raro i ropu ia ratou e haere atura i rapae ma te ore e rave ino ia ’na. 36  Maere a‘era ratou pauroa e na ô a‘era te tahi i te tahi: “Eaha teie? E faaue oia i te mau varua viivii ma te mana e te puai e haere mai ratou i rapae!” 37  Atutu atura te parau no nia ia ’na na te mau vahi tapiri atoa. 38  Faarue atura Iesu i te sunago, e tomo ihora i roto i te fare o Simona.* E fiva rahi to te metua vahine hoovai o Simona e ani maira te taata i reira ia Iesu ia faaora ia ’na. 39  Tia ihora Iesu i pihai iho ia ’na, tama‘i a‘era i te fiva e pee atura ïa. I reira iho, tia maira taua vahine ra e faaineine atura i te maa na ratou. 40  E ahiahi ihora, arataihia maira te taata ua rau to ratou ma‘i ia Iesu ra. Faaora ihora oia i to ratou ma‘i ma te tuu i to ’na rima i nia iho ia ratou tataitahi. 41  Haere atoa ’tura te mau demoni i rapae e rave rahi taata, ma te tuô e te na ô: “O te Tamaiti a te Atua oe.” Tama‘i atura râ oia ia ratou e faaue atura ia mamû, ua ite hoi ratou e o ’na te Mesia. 42  E ao a‘era, haere ihora Iesu i te hoê vahi mo‘emo‘e. Imi a‘era râ te nahoa ia ’na, haere maira i te vahi to reira oia e taparuparu a‘era ia ’na ia faaea mai. 43  Na ô atura râ oia: “Ia faaite atoa vau i te parau apî oaoa o te Faatereraa arii a te Atua* i te tahi atu mau oire e tia ’i, no reira hoi au i tonohia mai ai.” 44  Haere atura ïa oia e poro i roto i te mau sunago i Iudea.

Nota i raro i te api

Aore ra “pane.”
Aore ra “haamori mai oe ia ’u hoê noa taime.”
A hi‘o i te titionare.
A hi‘o i te titionare.
A hi‘o i te titionare.
A hi‘o i te titionare.
A hi‘o i te titionare.
Aore ra “faaorahia.”
Pii-atoa-hia Petero.
Aore ra “Basileia o te Atua.”