Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 3:1-38

HAAPOTORAA O TE MAU TUMU PARAU

  • Haamataraa o ta Ioane ohipa (1, 2)

  • Poro Ioane i te bapetizoraa (3-20)

  • Bapetizoraa o Iesu (21, 22)

  • Pǎpǎraa tupuna o Iesu Mesia (23-38)

3  I te 15raa o te matahiti faatereraa a Tiberio Kaisara,* o Ponotio Pilato te tavana i Iudea, o Heroda* te arii* i Galilea, area to ’na taeae o Philipa e arii ïa i Ituraia e Terahoniti, o Lousanio te arii i Abilene,  o Ana te tahu‘a tiaau e o Kaiapha te tahu‘a rahi. I taua tau ra, tae maira ta te Atua parau ia Ioane te tamaiti a Zekaria i te medebara.  Haere atura ïa Ioane na te mau vahi tapiri atoa ia Ioridana e poro i te taata ia bapetizohia ratou ei faaiteraa i to ratou tatarahapa ia faaorehia ta ratou mau hara,  mai tei papaihia i roto i te buka a Isaia te peropheta: “E taata teie e tuô haere nei na te medebara: ‘A faaineine i te e‘a no Iehova!* A haamanina i te purumu no ’na.  Ia faaîhia te mau peho atoa, ia haaparahurahuhia te mau mou‘a e aivi atoa, ia faaafarohia te mau e‘a tioioi e ia haamaninahia te mau vahi puupuu e tia ’i.  E ite te taata atoa i te faaoraraa* a te Atua.’”  Parau atura ïa Ioane i te nahoa taata e haere mai ra ia bapetizohia ratou e ana: “Fanau‘a ophi taero ma, na vai i faaara ia outou e e ora ’tu outou i te mahana o te riri o te Atua e piri mai ra?  A rave ïa i te mau ohipa o te faaite i to outou tatarahapa. Eiaha e parau i roto ia outou iho: ‘O Aberahama to matou metua.’ Te parau atu nei hoi au e e nehenehe te Atua e faariro i teie mau ofai ei tamarii na Aberahama.  Ua ineine hoi te opahi no te tâpû i te mau tumu raau i te a‘a. Te tumu raau atoa e ore e faahotu mai i te maa maitai, e tâpûhia ïa a hurihia ’tu ai i roto i te auahi.” 10  Ui maira te nahoa ia ’na: “Eaha ïa ta matou e rave?” 11  Pahono atura Ioane: “Te taata e piti ahu to ’na, a horoa ’tu ïa i te tahi na tei ere, e te taata e maa ta ’na, ia na reira atoa ïa.” 12  Haere atoa maira te tahi mau titau tute ia bapetizohia ratou, e na ô maira ia ’na: “Orometua, eaha ta matou e rave?” 13  Na ô atura oia: “A titau* noa i te tute faataahia e te ture, eiaha ia hau atu.” 14  Ui atoa maira te tahi mau faehau ia ’na: “Eaha ta matou e rave?” Na ô atura oia: “Eiaha e haru i ta vetahi ê moni,* eiaha atoa e pari haavare, ia mauruuru râ outou i tei horoahia mai.”* 15  Te tiai noa ra hoi te taata i te Mesia e te feruri ra ratou paatoa i roto i to ratou aau no nia ia Ioane: “E ere anei o ’na te Mesia?” 16  Pahono atura Ioane ia ratou pauroa: “O vau nei, te bapetizo nei au ia outou i te pape, te haere mai nei râ te taata e mana rahi a‘e to ’na i to ’u, e ore hoi e tia ia ’u ia tatara i te taamu o to ’na tiaa. E bapetizo oia ia outou i te varua mo‘a e i te auahi. 17  Tei roto ta ’na ope no te sitona i to ’na rima no te tamâ roa i ta ’na vahi taataahiraa sitona* e no te haaputu i te sitona i roto i ta ’na fare vairaa maa. Area te ota, e tanina ïa oia i te auahi o te ore e pohe.” 18  Horoa atoa ’tura Ioane e rave rahi atu â faaitoitoraa a faaite noa ’i i te parau apî oaoa i te taata. 19  Faahapa ’tura râ oia ia Heroda te arii, no Herodia te vahine faaipoipo a to ’na taeae e no te mau ohipa ino atoa a Heroda. 20  Rave atura Heroda i te tahi mea ino roa ’tu â: Ua huri oia ia Ioane i roto i te fare tapearaa. 21  E teie nei, i te bapetizoraahia te taata atoa, ua bapetizo-atoa-hia o Iesu. E a pure ai oia, matara a‘era te ra‘i, 22  pou maira te varua mo‘a mai te uupa ra i nia ia ’na e faaroohia maira te hoê reo mai te ra‘i mai: “O ta ’u Tamaiti oe, tei herehia. Ua mauruuru roa vau ia oe.” 23  I to Iesu haamataraa i te haapii i te taata, e 30 matahiti to ’na e i ta te taata parauraa e tamaiti oia na Iosepha, tamaiti na Heli, 24  tamaiti na Mata, tamaiti na Levi, tamaiti na Melehi, tamaiti na Ianana, tamaiti na Iosepha, 25  tamaiti na Matasia, tamaiti na Amosa, tamaiti na Nahuma, tamaiti na Eseli, tamaiti na Nage, 26  tamaiti na Maata, tamaiti na Matasia, tamaiti na Semei, tamaiti na Ioseha, tamaiti na Ioda, 27  tamaiti na Ioanana, tamaiti na Resa, tamaiti na Zerubabela, tamaiti na Sealatiela, tamaiti na Neri, 28  tamaiti na Melehi, tamaiti na Adi, tamaiti na Kosama, tamaiti na Elemodama, tamaiti na Era, 29  tamaiti na Iesu, tamaiti na Eliezera, tamaiti na Iorima, tamaiti na Mata, tamaiti na Levi, 30  tamaiti na Timeona, tamaiti na Iuda, tamaiti na Iosepha, tamaiti na Ionana, tamaiti na Eliakima, 31  tamaiti na Melea, tamaiti na Menana, tamaiti na Matata, tamaiti na Natana, tamaiti na Davida, 32  tamaiti na Iese, tamaiti na Obeda, tamaiti na Boaza, tamaiti na Salamona, tamaiti na Naasona, 33  tamaiti na Aminadaba, tamaiti na Arani, tamaiti na Hezerona, tamaiti na Pereza, tamaiti na Iuda, 34  tamaiti na Iakoba, tamaiti na Isaaka, tamaiti na Aberahama, tamaiti na Tera, tamaiti na Nahora, 35  tamaiti na Seruga, tamaiti na Reu, tamaiti na Pelega, tamaiti na Ebera, tamaiti na Sela, 36  tamaiti na Kainana, tamaiti na Araphakesada, tamaiti na Sema, tamaiti na Noa, tamaiti na Lameha, 37  tamaiti na Metusela, tamaiti na Enoha, tamaiti na Iareda, tamaiti na Mahalaleela, tamaiti na Kainana, 38  tamaiti na Enosa, tamaiti na Seta, tamaiti na Adamu, tamaiti na te Atua.

Nota i raro i te api

Aore ra “emepera no Roma.”
Oia hoi Heroda Anitipa. A hi‘o i te titionare.
“Teterareha” na roto i te reo Heleni.
A hi‘o i te titionare.
Aore ra “te ravea faaoraraa.”
Aore ra “A rave.”
Aore ra “Eiaha e taviri ia vetahi ê.”
Aore ra “i tei aufauhia mai.”
Te raveraa teie e matara ’i te huero sitona i to ’na tumu i te taataahiraa avae aore ra i te hoê mauhaa e hutihia e te animara.