Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 24:1-53

HAAPOTORAA O TE MAU TUMU PARAU

  • Faatia-faahou-hia Iesu (1-12)

  • I nia i te purumu e tae atu ai i Emausa (13-35)

  • Tia mai ra Iesu i mua i te mau pǐpǐ (36-49)

  • Ravehia Iesu i te ra‘i (50-53)

24  Teie râ, i te mahana matamua o te hebedoma, haere atura taua mau vahine ra i te poipoi roa i te menema* e ta ratou mau raau no‘ano‘a i faaineine.  Ite a‘era râ ratou e ua turai-ê-hia te ofai e opani ra i te menema,*  tomo atura ratou i roto e aita i ite atu i te tino o te Fatu ra o Iesu.  Huru ê a‘era ratou i te reira, e inaha, tia maira e piti tane ma te ahu anaana i pihai iho mai.  Mehameha a‘era te mau vahine, a pi‘o noa ’i te mata i raro. Parau maira na tane: “No te aha outou e imi ai i tei ora nei i rotopu i te taata pohe?  Aita oia i ǒ nei, ua faatiahia hoi oia. A haamana‘o i ta ’na i parau ia outou a vai ai oia i Galilea,  a na ô ai e ia tuuhia te Tamaiti a te taata nei i te rima o te feia rave hara e ia haapohehia i nia i te pou, e i te toru o te mahana, e tia faahou mai oia.”  Haamana‘o ihora ratou i ta ’na parau,  faarue a‘era ratou i te menema* e faatia ’tura i teie mau mea atoa i na 11* e i te toea o te mau pǐpǐ. 10  O Maria Magadala, o Ioana, o Maria te metua vahine o Iakobo, e te toea o te mau vahine tei apee mai ia ratou, tei faatia i te reira i te mau aposetolo. 11  Mana‘o ihora râ ratou e aita e auraa to teie mau parau e aita i tiaturi i taua mau vahine ra. 12  Tia a‘era râ Petero, horo atura i te menema* e fâao ihora, e ahu lino ana‘e ta ’na i ite atu. Ho‘i maira oia a uiui noa ’i ma te maere eaha tei tupu. 13  Inaha râ, i taua noa mahana ra, reva ’tura e piti pǐpǐ i te hoê oire iti o Emausa te i‘oa, hau atu i te 11 kilometera i te atea ia Ierusalema, 14  e paraparau noa ihora raua no teie mau mea atoa i tupu na. 15  A paraparau noa ’i raua, tapiri maira Iesu e haere atura ratou e toru, 16  aita râ raua i ite noa ’‘e e o Iesu tera. 17  Parau maira oia ia raua: “Eaha tera mau parau ta orua i mârô a‘enei?” Tia noa ihora raua ma te mata oto. 18  Pahono atura hoê o raua, o Keleopa te i‘oa: “O oe noa anei te taata ê* i Ierusalema tei ore i ite i te mau mea i tupu i teie mau mahana nei?” 19  Ui maira oia: “Teihea mau mea?” Parau atura raua: “Te mau mea no nia ia Iesu no Nazareta, te hoê peropheta o tei faahiti i te mau parau mana e tei rave i te mau ohipa mana i te aro o te Atua e o te taata atoa. 20  Ua tuu atu te mau tahu‘a tiaau e te mau raatira ia ’na ia faautuahia i te pohe, e ua patiti ia ’na i nia i te pou. 21  I mana‘o na râ matou e na teie taata e faaora ia Iseraela. Oia mau, e hau atu â, teie te toru o te mahana i tupu ai teie mau mea. 22  Ua maere atoa matou i ta te tahi mau vahine no rotopu ia matou i faatia mai, ua haere hoi ratou i te poipoi roa i te menema* 23  e aita i ite atu i to Iesu tino, e ua haere mai ratou e faaite e ua ite atoa ratou e piti melahi i te faraa mai e tei parau e te ora nei Iesu. 24  Haere atura vetahi o matou i te menema,* e ite a‘era i te reira mai ta te mau vahine i faatia, aita râ i ite atu ia Iesu.” 25  Parau maira oia: “Aita â i taa ’tura ia orua e aita â i tiaturi atura i te mau mea atoa ta te mau peropheta i parau! 26  Eiaha anei te Mesia ia faaruru i teie mau mea e ia faahanahanahia?” 27  E faataa maira oia ia raua i ta Mose e tae roa ’tu i ta te mau Peropheta atoa i parau no nia ia ’na i roto i te taatoaraa o te mau Papai. 28  Fatata ’tura ratou i te oire iti i reira raua e haere atu ai. O Iesu râ, tamau noa ’tura ïa i to ’na tere mai te huru ra e te haere ra oia i mua ’tu â. 29  Ani ru atura râ raua ia ’na ia faaea mai, a na ô ai: “A faaea mai, no te mea te topa ra te mahana e ua fatata te po.” Tomo ihora oia i roto i to raua fare. 30  A tamaa ’i ratou,* rave ihora Iesu i te faraoa,* haamaitai a‘era i te Atua, ofati ihora i te faraoa e horoa ’tura ia raua ra. 31  Taa a‘era ia raua e o Iesu oia. Mo‘e ihora râ Iesu. 32  Parau a‘era te tahi i te tahi: “Aita anei to tâua aau i putapû roa a paraparau mai ai oia ia tâua i nia i te purumu, a tatara* maitai mai ai i te mau Papai?” 33  Tia a‘era raua i taua taime ra, ho‘i atura i Ierusalema, e itehia maira ia raua na 11 e te tahi atu mau pǐpǐ tei putuputu mai 34  e tei parau: “Ua faatiahia mai iho â te Fatu e ua fa ’tu oia ia Simona!” 35  Faatia maira raua i tei tupu i nia i te purumu, e i to raua iteraa ia ’na i te ofatiraa i te faraoa i taa ’i ia raua e o Iesu oia. 36  A paraparau noa ’i ratou, fa maira Iesu i rotopu ia ratou e na ô maira: “Ei ia outou na te hau.” 37  Mana‘o ihora ratou e e varua ta ratou e ite ra, mehameha e riaria a‘era ratou. 38  Parau maira oia: “No te aha outou e horuhoru ai, e no te aha to outou aau e feaa ’i? 39  A hi‘o mai i to ’u na rima e na avae, o vau iho â. A fafa mai e a hi‘o, aita hoi to te hoê varua e i‘o e e ivi mai to ’u.” 40  E mai ta ’na i parau, faaite maira oia i to ’na na rima e na avae. 41  No to ratou oaoa e te maere, aita â ratou i tiaturi. Parau maira oia: “E maa ta outou i ǒ nei?” 42  Horoa ’tura ratou i te tahi i‘a tunu paa, 43  rave maira oia e amu atura i mua i to ratou mata. 44  Parau maira oia: “A vai ai au ia outou ra, i parau atu na vau e ia tupu te mau mea atoa i papaihia no ’u i roto i te ture a Mose, te mau peropheta e te mau Salamo.” 45  Tauturu ihora oia ia ratou ia taa maitai i te auraa o te mau Papai, 46  e na ô maira: “Teie tei papaihia: E mauiui te Mesia e e tia mai oia mai te pohe mai i te toru o te mahana, 47  e ma to ’na i‘oa, e porohia te tatarahapa ia faaorehia te hara i te mau nunaa atoa, na Ierusalema ’tu ia haamata. 48  Na outou ïa e faaite haere i te reira. 49  E inaha, e faatae atu vau i nia ia outou i ta to ’u Metua i fafau. Outou râ, a faaea noa ïa i te oire nei e ia noaa mai ia outou te puai no nia mai.” 50  Aratai atura Iesu ia ratou i Betania, hopoi a‘era i to ’na na rima i nia e haamaitai maira ia ratou. 51  A haamaitai ai oia ia ratou, vaiiho maira Iesu ia ratou e ravehia ’tura oia i te ra‘i. 52  Tahopu maira ratou ia ’na e ho‘i atura i Ierusalema ma te oaoa rahi. 53  E tia noa ’tura ratou i te hiero, a arue ai i te Atua.

Nota i raro i te api

Aore ra “menema haamana‘oraa.”
Aore ra “menema haamana‘oraa.”
Aore ra “menema haamana‘oraa.”
Oia hoi na 11 aposetolo.
Aore ra “menema haamana‘oraa.”
Nehenehe atoa e hurihia “te ratere.”
Aore ra “menema haamana‘oraa.”
Aore ra “menema haamana‘oraa.”
Aore ra “A tarava noa ’i ratou i te amuraa maa.”
Aore ra “pane.”
Aore ra “faataa.”