Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 23:1-56

HAAPOTORAA O TE MAU TUMU PARAU

  • Iesu i mua ia Pilato e Heroda (1-25)

  • Patitihia Iesu e na taata ohipa ino i nia i te pou haamauiuiraa (26-43)

    • “Ei te paradaiso oe e o vau atoa” (43)

  • Poheraa o Iesu (44-49)

  • Hunaraahia Iesu (50-56)

23  Tia a‘era ratou pauroa e aratai atura ia Iesu ia Pilato ra.  Pari maira ratou ia ’na a na ô ai: “Ua ite matou i teie taata i te haavareraa i to matou nunaa, i te opaniraa ia aufau i te tute ia Kaisara* e i te parauraa e o ’na te Mesia, te arii.”  Ui maira Pilato ia ’na: “O oe te Arii o te ati Iuda?” Pahono atura oia: “Te reira iho â mai ta oe e parau ra.”  Na ô ihora Pilato i te mau tahu‘a tiaau e i te nahoa: “Aita e hara i itehia mai e au i teie taata.”  Onoono a‘era râ ratou i te parau: “Ua huehue te taata i ta ’na haapiiraa na Iudea taatoa, na Galilea atoa e tae roa mai i ǒ nei.”  I to Pilato faarooraa mai, ui ihora oia e taata Galilea anei o ’na.  I te papuraa ia ’na e no ǒ mai Iesu i te fenua faaterehia e Heroda, tono ihora oia ia ’na ia Heroda ra, tei Ierusalema hoi i taua mau mahana ra.  I to Heroda iteraa ia Iesu, oaoa roa ihora oia. Mea maoro hoi to ’na tiai-noa-raa i te ite ia Iesu, no te mea mea rahi te parau ta ’na i faaroo no ’na, e te mana‘o ra oia e ite i te tahi mau semeio ta ’na e rave.  Uiui ihora Heroda ia ’na, aita râ oia i pahono atu. 10  Hopea ore râ te mau tahu‘a tiaau e te mau papai parau i te tia mai e i te pari ia ’na ma te riri. 11  Vahavaha maira Heroda e ta ’na mau faehau atoa ia Iesu. Faaooo ihora oia ia ’na ma te faaahu ia ’na i te hoê ahu nehenehe, e faaho‘i atura ia ’na ia Pilato ra. 12  Hoa ’tura Heroda raua Pilato i taua mahana ra, e enemi hoi raua na mua ’‘e. 13  Titau ihora Pilato i te mau tahu‘a tiaau, te mau raatira e te nahoa ia amui mai 14  e na ô atura: “Ua aratai mai outou i teie taata tei parihia i te orure hau. Inaha, ua uiui au ia ’na i mua ia outou, aita râ i itehia e au te tahi tumu e pari ai outou i teie taata. 15  Aita atoa i itehia e Heroda, ua faaho‘i mai hoi oia ia ’na, e a hi‘o na, aita oia i rave i te tahi mea e tano ai ia pohe oia. 16  E hui* ïa vau ia ’na, a tuu atu ai ia ’na.” 17  *—— 18  Tuô a‘era râ te nahoa atoa: “Haapohe atu i tena taata, e tuu mai râ ia Baraba!” 19  (I hurihia na teie taata i roto i te tapearaa no te orure-hau-raa i roto i te oire e no te taparahi-pohe-raa i te hoê taata.) 20  Paraparau faahou atura Pilato ia ratou no to ’na hinaaro e tuu ia Iesu. 21  Tuô maira ratou: “I nia i te pou! I nia i te pou!”* 22  Parau faahou atura oia, te toru ïa o te taime: “No te aha hoi? Eaha te ohipa ino ta teie taata i rave? Aita vau i ite i te tahi mea e tano ai ia pohe oia. E hui* ïa vau ia ’na, a tuu atu ai ia ’na.” 23  Parau onoono maira ratou ma te reo puai ia haapohehia oia,* e rahi noa ’tura ta ratou tutuôraa. 24  Faaoti ihora Pilato e farii i ta ratou aniraa. 25  Tuu ihora oia i te taata tei tapeahia no te orure-hau-raa e no te taparahi-pohe-raa i te hoê taata, e tuu atura râ ia Iesu i to ratou rima ia haapohehia ia au i to ratou hinaaro. 26  A aratai ai ratou ia Iesu, haru a‘era ratou ia Simona no Kurene, na te mataeinaa maira, e tuu a‘era i nia i to ’na tapono i te pou haamauiuiraa* ta ’na e amo na muri mai ia Iesu. 27  E nahoa rahi atoa tei apee mai ia Iesu, e te tahi atoa mau vahine o te tupaipai noa ra i to ratou ouma ma te oto, a ta‘i noa ’i. 28  Fariu maira Iesu i te mau vahine ra e na ô maira: “Tamahine ma no Ierusalema, a faaea na i te ta‘i no ’u. A ta‘i râ no outou iho e no ta outou mau tamarii. 29  Inaha hoi, te piri mai ra te mau mahana e na ô ai te taata: ‘E oaoa te mau vahine eita ta ratou tamarii e noaa, te mau vahine aita i fanau, e te mau vahine aita ta ratou e aiû!’ 30  I reira ïa te taata e parau ai i te mau mou‘a: ‘A mairi mai i nia ia matou!’ e i te mau aivi: ‘A tapo‘i mai ia matou!’ 31  I te mea e e tupu te reira e mea ota te raau, mai te aha ïa te huru ia mǎrô te raau?” 32  Aratai-atoa-hia maira e piti taata ohipa ino, ia haapohehia e o Iesu. 33  Tae atura ratou i te vahi parauhia Apu upoo, patiti atura ia Iesu i nia i te pou e na taata ohipa ino atoa i pihai iho ia ’na, hoê i to ’na pae atau e hoê i to ’na pae aui. 34  Parau atura râ Iesu: “To ’u Metua, a faaore i ta ratou hara, aita hoi ratou i ite i ta ratou e rave nei.” Pere* atoa ’tura ratou no te opere i to ’na ahu. 35  Te tia noa ra te taata a hi‘o noa ’i. Hi‘o faaooo maira râ te mau raatira, a na ô ai: “Ua faaora o ’na ia vetahi ê. Ia faaora ïa oia ia ’na iho, o ’na hoi te Mesia a te Atua, tei maitihia.” 36  Faaooo atoa maira te mau faehau ia ’na, ma te tapiri mai a horoa mai ai i te uaina toavaava, 37  a na ô ai: “O oe te Arii o te ati Iuda, a faaora ïa ia oe iho.” 38  Ua papai-atoa-hia i nia noa mai i to ’na upoo: “Teie te Arii o te ati Iuda.” 39  Hoê râ o na taata ohipa ino tei patitihia, faaino maira ïa ia Iesu, a na ô ai: “O oe te Mesia, e ere anei? A faaora ïa ia oe iho e ia mâua atoa!” 40  Tama‘i maira te tahi atu ia ’na e na ô maira: “Aita oe e mǎta‘u ra i te Atua, ua roohia oe i te hoê â utua? 41  Mea tano roa teie utua no tâua no ta tâua i rave. Teie râ taata, aita ïa i rave i te ohipa ino.” 42  E na ô maira oia: “Iesu, haamana‘o mai oe ia ’u ia tae oe i roto i ta oe Faatereraa arii.” 43  Na ô atura Iesu ia ’na: “Oia mau ta ’u e parau atu ia oe i teie mahana: Ei te paradaiso oe e o vau atoa.” 44  Piri a‘era i te ono o te hora,* ati ihora te fenua taatoa i te poiri e tae atu i te iva o te hora,* 45  no te mea aita faahou te maramarama o te mahana. Mahae ihora te paruru o te nao* na ropu. 46  Tuô ihora Iesu e na ô atura: “To ’u Metua, te tuu atu nei au i to ’u ora* i roto i to rima.” I muri a‘e i to ’na parauraa i te reira, pohe atura oia.* 47  Ite a‘era te raatira faehau i te reira e faahanahana ’tura i te Atua, a na ô ai: “E taata parau-tia mau â teie.” 48  E a ite ai te nahoa atoa tei haere mai e mataitai, i te ohipa e tupu ra, ho‘i atura ratou i ǒ ratou ma te tupaipai i to ratou ouma. 49  E te tia noa ra te feia atoa tei matau ia ’na i te atea ê. To reira atoa te mau vahine tei pee mai ia ’na na Galilea mai e ua ite ratou i te reira. 50  E inaha, te vai ra te hoê mero no te Sunederi o Iosepha te i‘oa. E taata maitai oia e te parau-tia. 51  (Aita roa ’tu teie taata i turu i ta ratou opuaraa e ta ratou ohipa.) No Arimataio oia, oire no to Iudea, e te tiai ra oia i te Faatereraa arii a te Atua.* 52  Haere ihora teie taata i mua ia Pilato e ani maira i te tino o Iesu. 53  Haapou maira oia i te tino, vehî atura i te ahu lino maitai, e tuu ihora i roto i te hoê menema* tei paohia i roto i te mato, aita â e tino i tuuhia ’tura i roto. 54  O te mahana Faaineineraa ïa e te piri mai ra te Sabati.* 55  Te mau vahine râ tei na muri mai ia Iesu na Galilea mai, apee maira ïa ia Iosepha, hi‘o atura i te menema,* ite a‘era i te vahi i tuuhia ’i to Iesu tino, 56  e ho‘i atura e faaineine i te mau raau no‘ano‘a e te mono‘i no‘ano‘a. Aita râ ratou i rave i te ohipa i te Sabati ia au i te ture a Mose.

Nota i raro i te api

Aore ra “i te emepera no Roma.”
“Faautua” na roto i te reo Heleni.
Te vai ra teie irava i roto i te tahi mau huriraa Bibilia, aita râ i roto e rave rau papai Heleni tahito fariihia.
Aore ra “Haapohe ia ’na i nia i te pou! Haapohe ia ’na i nia i te pou!”
“Faautua” na roto i te reo Heleni.
Aore ra “ia haapohehia oia i nia i te pou.”
A hi‘o i te titionare.
A hi‘o i te titionare.
I te area hora 12 i te avatea.
I te area hora 3 i te taperaa mahana.
A hi‘o i te titionare.
Aore ra “puai ora.” Heleni peneuma. A hi‘o i te titionare.
Aore ra “huti atura oia i to ’na hutiraa aho hopea.”
Aore ra “Basileia o te Atua.”
Aore ra “menema haamana‘oraa.”
A hi‘o i te titionare.
Aore ra “menema haamana‘oraa.”