Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 22:1-71

HAAPOTORAA O TE MAU TUMU PARAU

  • Opua te mau tahu‘a e taparahi pohe ia Iesu (1-6)

  • Faaineineraa no te Pasa hopea (7-13)

  • Haamauhia te Amuraa maa a te Fatu (14-20)

  • “Te tarava ra te taata o te tuu ia ’u i to ’u mau enemi i teie amuraa maa” (21-23)

  • Hoê aimârôraa rahi (24-27)

  • Te faufaa a Iesu no te hoê Faatereraa arii (28-30)

  • Tohuhia to Petero parauraa e aita oia i ite ia Iesu (31-34)

  • Titauhia te faaineineraa. Te ‘o‘e e piti (35-38)

  • To Iesu pureraa i te mou‘a Oliveta (39-46)

  • Tapeahia Iesu (47-53)

  • Parau Petero e aita oia i ite ia Iesu (54-62)

  • Faaooohia Iesu (63-65)

  • Haavahia i mua i te Sunederi (66-71)

22  E te piri mai ra te Oroa pane* hopue ore, tei parauhia Pasa.  Te imi ra te mau tahu‘a tiaau e te mau papai parau i te tahi ravea papu no te haapohe ia Iesu no to ratou mǎta‘u i te taata.  Tomo atura Satani i roto ia Iuda, tei piihia Isakariota, hoê o na 12,*  e haere atura Iuda e paraparau i te mau tahu‘a tiaau e te mau raatira tiai hiero e nafea ia tuu ia Iesu i to ratou rima.  Au roa a‘era ratou i te reira e faaoti atura e horoa i te moni ario na ’na.  Farii ihora oia e imi atura i te taime tano no te tuu ia Iesu i to ratou rima ma te ore e itehia e te taata.  Tae maira te mahana matamua o te Oroa pane hopue ore, e pûpûhia ’i te animara ei tusia i te Pasa.  Tono atura Iesu ia Petero e ia Ioane a na ô ai: “A haere e faaineine i te Pasa ia amu tatou i te reira.”  Parau maira raua: “Ihea oe e hinaaro ai ia faaineine mâua i te Pasa?” 10  Parau atura oia: “Ia tomo orua i roto i te oire, e farerei mai te hoê tane e amo ra i te hoê farii araea î i te pape ia orua. A pee ia ’na e tae roa ’tu i roto i te fare ta ’na e tomo atu. 11  E parau orua i te fatu fare: ‘Te na ô mai ra te Orometua: “Teihea te piha no te mau manihini e nehenehe ai au e amu i te Pasa e ta ’u mau pǐpǐ?”’ 12  E faaite mai tera taata i te hoê piha rahi nahonaho i nia. A faaineine i te Pasa i reira.” 13  Reva ’tura raua, tupu a‘era te mau mea atoa mai ta Iesu i parau, e faaineine a‘era raua i te Pasa. 14  Tae maira te hora tamaaraa, e tarava ihora oia i te amuraa maa e te mau aposetolo atoa. 15  Na ô atura oia ia ratou: “Ua hinaaro roa vau e amu i teie Pasa e outou hou vau e mauiui ai, 16  te parau atu nei hoi au: Eita vau e amu faahou i te Pasa e tae noa ’tu i te taime e tupu ai te reira i roto i te Faatereraa arii a te Atua.”* 17  Rave ihora oia i te hoê au‘a tei horoahia mai, haamauruuru a‘era i te Atua e parau atura: “A rave i teie au‘a e a horoa ’tu i te tahi e te tahi, 18  te parau atu nei hoi au: Mai teie atu nei, e ore roa vau e inu faahou i te uaina e tae noa ’tu i te taime e tae mai ai te Faatereraa arii a te Atua.” 19  Rave atoa ihora oia i te hoê pane,* haamauruuru a‘era i te Atua, ofati ihora i te reira e horoa ’tura ia ratou, a na ô ai: “O to ’u tino teie e horoahia no outou. A tamau i te rave i te reira ei mana‘oraa ia ’u.” 20  Na reira atoa ’tura Iesu no te au‘a i muri a‘e i to ratou tamaaraa, a na ô ai: “Teie au‘a, o te faufaa apî ïa e haamauhia maoti to ’u toto o te haamaniihia no outou.” 21  “Inaha râ, te tarava atoa ra te taata o te tuu ia ’u i to ’u mau enemi i teie amuraa maa. 22  Te reva nei iho â te Tamaiti a te taata nei mai tei faaotihia. Ua ati râ tera taata na ’na e tuu i te Tamaiti a te taata nei i to ’na mau enemi!” 23  Uiui a‘era te mau aposetolo te tahi i te tahi o vai hoi o ratou te na reira. 24  Tupu atoa ’tura râ te hoê aimârôraa rahi i rotopu ia ratou no te ite o vai te mea rahi a‘e. 25  Parau atura râ Iesu ia ratou: “Te faatere ra te mau arii o te mau nunaa i te taata e te haavî atoa ra te feia parauhia Hamani maitai ia ratou. 26  Outou râ, eiaha ïa e na reira. Ia riro râ te taata rahi a‘e mai te tamarii hopea, e te taata aratai mai te hoê tavini. 27  O vai hoi te taata rahi a‘e, te taata e tamaa ra* aore ra te taata e tavini ra? E ere anei o te taata e tamaa ra?* O vau nei râ, mai te taata ïa e tavini ra ia outou. 28  Outou râ, ua pee maite ïa ia ’u i roto i to ’u mau ati, 29  e e haamau vau i te hoê faufaa e o outou, mai to ’u Metua i haamau i te hoê faufaa e o vau no te hoê faatereraa arii, 30  ia nehenehe outou e tamaa e e inu i ta ’u amuraa maa i roto i ta ’u Faatereraa arii, e e parahi i nia i te mau terono no te haava i na opu 12 o Iseraela. 31  Simona, Simona, inaha, ua ani Satani ia ueue oia ia outou paatoa mai te sitona. 32  Ua pure râ vau no oe ia ore to oe faaroo ia paruparu, e ua tatarahapa ana‘e oe, a faaitoito i to oe mau taeae.” 33  Parau maira Petero ia Iesu: “E te Fatu, ua ineine au i te pee ia oe i roto i te tapearaa e te pohe atoa.” 34  Na ô atura râ oia: “Te parau atu nei au ia oe, Petero, hou te hoê moa e totereo ai i teie mahana, e parau oe e toru taime e aita oe i ite ia ’u.” 35  Na ô atoa ’tura oia ia ratou: “I to ’u tonoraa ia outou ma te ore e rave i te pute moni, te pute maa e te tiaa, aita outou i ere noa ’‘e i te tahi mea, e ere anei?” Parau maira ratou: “Aita!” 36  Parau atura oia: “I teie nei râ, te taata e pute moni ta ’na, ia rave ïa, e te hoê pute maa. E te taata aita ta ’na e ‘o‘e, ia hoo atu ïa i to ’na ahu tapo‘i e ia hoo mai i te hoê ‘o‘e. 37  Te parau atu nei hoi au e ia tupu tei papaihia no ’u e tia ’i, oia hoi ‘Ua amuihia oia i te feia rave hara.’ Te tupu nei hoi tei papaihia no ’u.” 38  Parau maira ratou: “E te Fatu, inaha, teie e piti ‘o‘e.” Parau atura oia: “Ua ravai noa te reira.” 39  Reva ’tura oia, haere atura i te mou‘a Oliveta mai ta ’na i matau, e pee atoa maira ta ’na mau pǐpǐ ia ’na. 40  I to ratou taeraa ’tu, parau atura oia: “A tamau i te pure ia ore outou ia hema.” 41  Faaatea rii atura oia,* tuturi ihora e pure ihora, 42  a na ô ai: “To ’u Metua, ia tia ia oe, a hopoi ê atu na i teie au‘a. Teie râ, ia tupu eiaha to ’u hinaaro, to oe râ.” 43  Fa maira te hoê melahi mai te ra‘i mai e faaitoito ihora ia ’na. 44  No to ’na râ ahoaho rahi, tamau noa ’tura oia i te pure ma te u‘ana ’tu â, e riro atura to ’na hou mai te toto e topata ra i raro i te repo. 45  I to ’na tiaraa mai i ta ’na pureraa e i to ’na haereraa i ta ’na mau pǐpǐ, ite ihora oia e te taoto ra ratou, ua rohirohi roa no te oto. 46  Parau atura oia: “No te aha outou e taoto ai? A tia e a tamau i te pure ia ore outou ia hema.” 47  Te paraparau noa ra Iesu, inaha, tae maira te hoê nahoa arataihia e Iuda, hoê o na 12. Tapiri maira oia ia Iesu no te apa ia ’na. 48  Parau atura râ Iesu: “Iuda, te tuu ra oe i te Tamaiti a te taata nei i to ’na mau enemi ma te apa?” 49  I te iteraa ta ’na mau pǐpǐ i te ohipa e tupu ra, na ô maira ratou: “E te Fatu, e tairi anei matou ia ratou i te ‘o‘e?” 50  Tairi ihora hoê o ratou i te tavini a te tahu‘a rahi e mutu ê atura to ’na tari‘a atau. 51  Parau atura râ Iesu: “Atira.” Tapea ihora oia i te tari‘a o te tavini e ora ihora oia. 52  Parau atura Iesu i te mau tahu‘a tiaau, te mau raatira tiai hiero e te mau aratai ati Iuda o tei haere mai i reira no ’na: “Ua haere mai outou e haru ia ’u ma te ‘o‘e e te raau mai te mea ra e e eiâ vau? 53  A tia noa ’i au e o outou i te hiero i te mau mahana atoa, aita outou i haru ia ’u. Teie nei râ hora, no outou ïa e no te mana o te poiri.” 54  Tapea a‘era ratou ia ’na, arato atura ia ’na e tae roa ’tu i roto i te fare o te tahu‘a rahi. O Petero râ, pee maira ïa na te atea ê. 55  Tahu a‘era ratou i te auahi i ropu i te aua e parahi ihora. Parahi atoa maira Petero. 56  Ite maira râ te hoê tavini vahine ia ’na e parahi ra i te vahi maramarama, hi‘o maitai maira ia ’na e na ô ihora: “Na muri atoa na teie taata ia ’na.” 57  Parau atura râ Petero: “Aita vau i ite ia ’na.” 58  I muri iti a‘e, ite maira te tahi atu taata ia ’na e na ô maira: “E pǐpǐ atoa oe na ’na.” Parau atura râ Petero: “Eita.” 59  Piri i te hoê hora i muri iho, parau haapapu maira te tahi atu taata: “Na muri atoa na iho â teie taata ia ’na, e taata Galilea hoi oia!” 60  Na ô atura râ Petero: “Aita vau i ite i ta oe e parau ra.” A paraparau noa ’i oia, totereo ihora te hoê moa. 61  Fariu maira te Fatu, hi‘o maira ia Petero e haamana‘o ihora Petero i ta te Fatu i parau ia ’na: “Hou te hoê moa e totereo ai i teie mahana, e parau oe e toru taime e aita oe i ite ia ’u.” 62  Haere atura oia i rapaeau e ta‘i ihora no te peapea rahi. 63  Haamata ’tura te mau taata e tiai ra ia Iesu i te faaooo ia ’na e i te tupai ia ’na. 64  E i muri a‘e i te tapo‘iraa i to ’na mata, parau noa maira ratou: “E peropheta oe, faaite mai ïa na vai i tupai ia oe.” 65  E parau maira ratou e rave rahi atu â parau faaino ia ’na. 66  E ao a‘era, putuputu maira te mau aratai ati Iuda, te mau tahu‘a tiaau e te mau papai parau, afai atura ia ’na i roto i ta ratou Sunederi, e na ô atura: 67  “O te Mesia oe, faaite mai ïa.” Parau maira râ oia: “Noa ’tu e e faaite atu vau ia outou, eita iho â outou e tiaturi. 68  Ia ui atoa ’tu vau ia outou, eita outou e pahono mai. 69  Tera râ, mai teie atu nei, e parahi te Tamaiti a te taata nei i te rima atau o te Atua manahope.” 70  Na ô a‘era ratou pauroa: “O oe ïa te Tamaiti a te Atua?” Pahono maira oia: “Te reira iho â mai ta outou e parau ra.” 71  Na ô atura ratou: “No te aha ïa e imi ai i te tahi atu haapapuraa? Ua faaroo hoi tatou iho i te reira no roto mai i to ’na vaha.”

Nota i raro i te api

Aore ra “faraoa.”
Oia hoi na 12 aposetolo.
Aore ra “Basileia o te Atua.”
Aore ra “faraoa hopue ore.”
Aore ra “e tarava ra i te amuraa maa.”
Aore ra “e tarava ra i te amuraa maa.”
Aore ra “Faaatea ’tura oia i te vahi e topa ’i te ofai i taorahia.”