Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 21:1-38

HAAPOTORAA O TE MAU TUMU PARAU

  • Na lepeta e piti a te vahine ivi veve (1-4)

  • TAPAO E TUPU A MURI A‘E (5-36)

    • Tama‘i, aueueraa fenua, ma‘i pee, o‘e (10, 11)

    • Haaatihia Ierusalema e te nuu (20)

    • Te tau faataahia o te mau nunaa ěê (24)

    • Haereraa mai o te Tamaiti a te taata (27)

    • Faahoho‘araa o te tumu suke (29-33)

    • A ara (34-36)

  • E tia Iesu i roto i te hiero e haapii (37, 38)

21  A hi‘o ai Iesu i te mau afata* moni, ite atura oia i te feia tao‘a rahi e tuu ra i ta ratou mau ô i roto.  Ite ihora oia i te hoê vahine ivi veve e tuu ra e piti lepeta,*  e na ô atura: “Oia mau ta ’u e parau atu: Mea rahi a‘e ta teie vahine ivi veve i tuu i ta tera mau taata atoa.  Ua horoa hoi ratou paatoa i ta ratou moni hau ei ô, o ’na râ, noa ’tu to ’na veve, ua tuu pauroa ïa i ta ’na moni e ora ’i oia.”  I muri a‘e, te paraparau ra vetahi o ta ’na mau pǐpǐ no nia i te hiero, ua faaunaunahia i te mau ofai taraihia e i te mau mea i pûpûhia i te Atua.  Na ô ihora Iesu: “Teie mau mea ta outou e hi‘o nei, e tae mai te mau mahana e ore ai e vaiihohia te hoê ofai i nia iho i te tahi, e huri-pauroa-hia i raro.”  Ui maira ratou ia ’na: “Orometua, afea hoi teie mau mea e tupu ai, e eaha te tapao e ite ai matou e e tupu te reira?”  Na ô atura oia: “A ara eiaha outou ia vare, mea rahi hoi o te haere mai ma to ’u i‘oa, a na ô ai: ‘O vau te Mesia,’ e: ‘Ua fatata mai te taime tano.’ Eiaha e pee ia ratou.  Ia faaroo atoa outou i te tama‘i e te arepurepu,* eiaha e mǎta‘u. Ia tupu iho â na mua teie mau mea, eita râ te hopea e tae oioi mai.” 10  Na ô atura Iesu ia ratou: “E aro te tahi nunaa i te tahi atu nunaa e te tahi faatereraa i te tahi atu faatereraa. 11  E tupu te aueueraa fenua rahi, e i tera e tera vahi te o‘e e te ma‘i pee. E ite-atoa-hia te mau mea riaria e te mau tapao rahi no te ra‘i mai. 12  Hou râ teie mau mea atoa e tupu ai, e haruhia outou, e hamani-ino-hia, a tuuhia ’tu ai i mua i te sunago e i roto i te tapearaa. E aratohia outou i mua i te mau arii e te mau tavana no to ’u nei i‘oa. 13  E riro ïa te reira ei ravea e tia ’i outou i mua ia ratou ei ite no ’u. 14  A faaoti ïa i roto i to outou aau eiaha e faaineine ê na i ta outou e parau, 15  na ’u hoi e horoa ’tu i te parau e te paari e ore ai e tia i to outou mau enemi ia patoi aore ra ia mârô mai. 16  Hau atu â, e tuu to outou mau metua, taeae, fetii e hoa ia outou i te haavaraa,* e haapohe ratou vetahi o outou, 17  e e hae te taata atoa ia outou no to ’u nei i‘oa. 18  E ore roa râ te hoê rouru o to outou upoo e marua. 19  I to outou faaoromai tamau e ora ’i outou.* 20  Teie râ, ia ite outou ia Ierusalema ia haaatihia e te nuu, ua fatata ïa oia i te mou. 21  Ia horo ïa te feia e parahi ra i Iudea i te mau mou‘a, ia faarue te feia i roto i te oire i taua oire ra, e eiaha to te mataeinaa e tomo mai, 22  no te mea e mau mahana teie e faautua ’i te Atua i te taata* ia tupu te mau mea atoa i papaihia. 23  Ua ati te mau vahine hapû e te mau vahine e aiû ta ratou i taua mau mahana ra! E tupu hoi te mauiui rahi i nia i te fenua e te riri rahi i nia i teie nunaa. 24  E pohe ratou i te ‘o‘e, e hopoi-tîtî-hia i te tahi atu mau nunaa atoa, a taataahihia ’tu ai Ierusalema e te mau nunaa ěê e ia hope noa ’tu te tau faataahia o te mau nunaa ěê. 25  E ite-atoa-hia te mau tapao i nia i te mahana, te ava‘e e te mau fetia. I te fenua nei, e ahoaho te mau nunaa a ore atu ai e ite e nafea râ no te haruru e te arepurepu o te miti. 26  E riaria roa te taata i te tiairaa i te mau mea e tupu i te fenua nei, e ueuehia hoi te mau mea puai o te ra‘i. 27  I reira ratou e ite ai i te Tamaiti a te taata nei ia haere mai i roto i te hoê ata ma te puai e te hanahana rahi. 28  Ia tupu râ teie mau mea, a tia mai e a faateitei i to outou upoo, no te mea ua fatata to outou faaoraraa.” 29  Faahiti atura Iesu i te hoê faahoho‘araa: “A hi‘o na i te tumu suke e te tahi atu mau tumu raau atoa. 30  Ia oteo mai te omou, ua ite ïa outou e ua fatata te tau tupuraa. 31  Oia atoa ia ite outou i teie mau mea ia tupu, ua fatata ïa te Faatereraa arii a te Atua.* 32  Oia mau ta ’u e parau atu: E ore roa teie nei u‘i e mou e tupu ai teie mau mea atoa. 33  E mou te ra‘i e te fenua, ta ’u râ mau parau, e ore roa ïa e mou. 34  A haapao maitai râ ia outou iho ia ore to outou aau ia teimaha i te rahi o te tamaa, i te inu hua, i te haapeapearaa o te oraraa, a roohia mai ai outou e taua mahana ra ma te mana‘o-ore-hia 35  mai te hoê marei. E tae mai hoi te reira i nia i te taatoaraa o te taata i te fenua nei. 36  A vai ara ïa e a tamau i te pure ia nehenehe outou e ora ’tu i teie mau mea atoa o te tupu iho â, a tia ’tu ai i mua i te Tamaiti a te taata nei.” 37  No reira, i te ao, e haapii Iesu i te taata i roto i te hiero, i te po râ, e haere oia e faaea i nia i te mou‘a parauhia mou‘a Oliveta. 38  E e haere mai te taata atoa ia ’na ra i te poipoi roa no te faaroo ia ’na i roto i te hiero.

Nota i raro i te api

Aore ra “farii.”
Oia hoi te moni no piri i te 10 minuti ohipa. A hi‘o i te titionare.
Aore ra “faahuehueraa,” “orureraa hau.”
Aore ra “i te rima o to outou mau enemi.”
Heleni pusuke. A hi‘o i te titionare.
Aore ra “e tahoo ai te Atua.”
Aore ra “Basileia o te Atua.”