Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 20:1-47

HAAPOTORAA O TE MAU TUMU PARAU

  • Patoihia to Iesu mana (1-8)

  • Faahoho‘araa o te feia faaapu taparahi taata (9-19)

  • Te Atua e Kaisara (20-26)

  • Uiraa no nia i te tia-faahou-raa (27-40)

  • E tamaiti anei te Mesia na Davida? (41-44)

  • A ara i te mau papai parau (45-47)

20  I te hoê o taua mau mahana ra, a haapii ai Iesu i te taata i roto i te hiero e a faaite atu ai i te parau apî oaoa, tapiri maira te mau tahu‘a tiaau, te mau papai parau e te mau aratai ati Iuda,  e na ô maira ia ’na: “Faaite mai na, i teihea mana e rave ai oe i teie mau mea? Aore ra na vai i horoa ia oe i teie mana?”  Pahono atura Iesu: “E uiraa atoa ta ’u e na outou e pahono mai:  Te bapetizoraa a Ioane, no te ra‘i mai anei aore ra no ǒ mai i te taata ra?”  Feruri ihora ratou e na ô a‘era te tahi i te tahi: “Ia parau tatou: ‘No te ra‘i mai,’ e na ô mai ïa oia: ‘No te aha ïa outou i ore ai i tiaturi ia ’na?’  Ia parau râ tatou: ‘No ǒ mai i te taata ra,’ e pehi te taata ia tatou i te ofai, te tiaturi ra hoi ratou e e peropheta Ioane.”  Pahono a‘era ratou e aita ratou i ite nohea mai.  Na ô atura Iesu: “Eita atoa ïa vau e faaite atu i teihea mana e rave ai au i teie mau mea.”  Faaite atura Iesu i te taata i teie faahoho‘araa: “Ua tanu te hoê taata i te vine, horoa tarahu atura i ta ’na faaapu i te tahi feia faaapu, e reva ’tura i te ara no te hoê tau huru maoro. 10  I te tau ootiraa vine, tono ihora oia i te hoê tavini i te feia faaapu ia horoa mai ratou i ta ’na tuhaa vine. Rutu a‘era râ ratou i taua tavini ra e faaho‘i maira ia ’na ma te ore e horoa mai i te vine. 11  Tono faahou atura râ oia i te tahi atu tavini. Tairi atoa a‘era ratou i teie tavini, faahaama ihora ia ’na e faaho‘i maira ia ’na ma te ore e horoa mai i te vine. 12  Tono faahou atura râ oia i te toru o te tavini. Haapepe maitai atoa a‘era ratou i teie e tiahi atura ia ’na. 13  Na ô ihora te fatu faaapu vine: ‘Eaha ta ’u e rave? E tono vau i ta ’u tamaiti, tei herehia. E faatura paha ïa ratou ia ’na.’ 14  I to te feia faaapu iteraa mai i te tamaiti, feruri ihora ratou e na ô a‘era te tahi i te tahi: ‘Teie te taata o te fatu i teie faaapu, haapohe ana‘e ia ’na, a fatu atu ai tatou i teie faaapu.’ 15  Arato a‘era ratou ia ’na i rapae i te faaapu vine e haapohe ihora ia ’na. Eaha ïa ta te fatu faaapu vine e rave? 16  E haere mai oia e haapohe i teie feia faaapu, a horoa tarahu atu ai i te faaapu vine i te tahi atu feia faaapu.” A faaroo ai ratou i te reira, na ô atura ratou: “Eiaha ïa!” 17  Hi‘o tia ’tura râ Iesu ia ratou e na ô atura: “Eaha ïa te auraa o teie parau i papaihia: ‘Te ofai ta te feia patu fare i faarue, ua riro mai ïa ei ofai tihi’?* 18  Te taata atoa e topa i nia iho i taua ofai ra, e mou ïa. E te taata e topahia i taua ofai ra, e perehu roa ïa.” 19  I reira, imi a‘era te mau papai parau e te mau tahu‘a tiaau i te haru ia Iesu, ua taa hoi ia ratou e no ratou te faahoho‘araa ta ’na i parau. Mǎta‘u a‘era râ ratou i te taata. 20  A imi ai ratou i te ravea no te râmâ ia ’na, tono maira ratou i te tahi mau taata ta ratou i peta ia faahua taata parau-tia ia ratou, ia noaa hoi Iesu ia ratou na roto i ta ’na mau parau, a tuuhia ’tu ai oia i te feia mana e te tavana. 21  Ui maira taua mau taata ra ia ’na: “Orometua, ua ite matou e e parau mau ta oe e faahiti e e haapii ia vetahi ê. E ore oe e maitiiti i te taata e te haapii nei oe ia vetahi ê i te e‘a o te Atua ma te parau mau: 22  Mea tano* anei ia au i te ture ia aufau matou i te tute* ia Kaisara* aore ra eita? 23  Taa ihora râ ia ’na to ratou huru haavarevare e na ô atura: 24  “Faaite mai na i te hoê denari.* No vai te hoho‘a e te i‘oa i nia iho?” Na ô maira ratou: “No Kaisara.” 25  Na ô atura oia: “A faaho‘i ïa i ta Kaisara ia Kaisara ra, ta te Atua râ i te Atua ïa.” 26  Aita ’tura i noaa ia ratou ia râmâ ia ’na i roto i ta ’na mau parau i mua i te taata, maere ihora râ i ta ’na pahonoraa e mamû noa ’tura. 27  Haere maira râ te tahi mau Sadukea, o te parau ra e aita e tia-faahou-raa, e ui maira ia Iesu: 28  “Orometua, ua papai mai Mose: ‘Ia pohe te hoê tane, a vaiiho mai ai i ta ’na vahine faaipoipo ma te tamarii ore, ia faaipoipo ïa to ’na taeae i taua vahine ra e tia ’i e ia fanau mai ta ’na ei tamarii na to ’na taeae i pohe.’ 29  I vai na e hitu taeae, faaipoipo ihora te matahiapo i te vahine e pohe atura ma te tamarii ore. 30  Faaipoipo ihora te piti i taua vahine ra e pohe atura. 31  Na reira atoa te toru. O na hitu atoa tei faaipoipo i taua vahine ra e pohe atura ma te tamarii ore. 32  Pohe atoa ’tura te vahine. 33  I te tia-faahou-raa, ei vahine oia na vai? I faaipoipo na hoi na hitu atoa ia ’na.” 34  Na ô atura Iesu: “E faaipoipo te taata o teie faanahoraa o te ao nei* e e horoahia ia faaipoipo. 35  Te feia râ mea tano iho â ia fana‘o i tera faanahoraa o te ao nei e i te tia-faahou-raa o tei pohe, eita ïa e faaipoipo e e horoahia ia faaipoipo. 36  E ore atoa ratou e pohe faahou, e au hoi ratou i te mau melahi. E riro atoa ratou ei tamarii na te Atua no te mea e faatiahia mai ratou. 37  E tia faahou mai te feia pohe, ta Mose ïa i faaite i to ’na faatiaraa no nia i te raau taratara e ura ra, a parau ai no Iehova* mai ‘te Atua o Aberahama e te Atua o Isaaka e te Atua o Iakoba.’ 38  E Atua oia no te feia ora, eiaha no te feia pohe, mea ora hoi ratou pauroa no ’na.”* 39  Na ô maira te tahi mau papai parau: “Orometua, ua tano ta oe parau.” 40  Taiâ ’tura ratou i te uiui faahou ia ’na. 41  Ui atura Iesu: “No te aha te taata e parau ai e e tamaiti te Mesia na Davida? 42  Na Davida iho e parau ra i roto i te buka Salamo: ‘Ua parau Iehova* i to ’u Fatu: “A parahi i to ’u rima atau nei 43  e ia faariro roa vau i to oe mau enemi ei taahiraa avae no oe.”’ 44  Te parau ra hoi Davida i te Mesia e Fatu, mea nafea ïa e tamaiti ai oia na ’na?” 45  A faaroo noa ’i te taata atoa, na ô atura oia i ta ’na mau pǐpǐ: 46  “A ara i te mau papai parau, mea au na ratou e hahaere ma te ahu roa, ia arohahia ratou ma te faatura na te mahora,* e parahi i mua roa* i roto i te mau sunago e i te mau vahi faataahia no te mau manihini tiaraa teitei i te mau tamaaraa. 47  E rave haapau atoa ratou i te faufaa a te mau vahine ivi e e faaroa i te pure ia hi‘ohia mai ratou. E faautuahia ratou ma te etaeta ’tu â.”

Nota i raro i te api

E tuuhia teie ofai i te poro fare i te vahi e tuati ai e piti patu.
Aore ra “tia.”
Oia hoi te hoê tute na nia i te taata tataitahi.
Aore ra “i te emepera no Roma.”
A hi‘o i te titionare.
Aore ra “teie tau.” A hi‘o i te titionare.
A hi‘o i te titionare.
Aore ra “i to ’na mana‘o.”
A hi‘o i te titionare.
I reira te taata e hoohoo ai e e ruru ai.
Aore ra “i nia i te mau parahiraa maitai roa ’‘e.”