Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 2:1-52

HAAPOTORAA O TE MAU TUMU PARAU

  • Fanauraa o Iesu (1-7)

  • Faraa ’tu te mau melahi i te mau tiai mamoe (8-20)

  • Peritomeraa e tamâraa (21-24)

  • E ite Simeona i te Mesia (25-35)

  • Faaite Ana i te parau no te tamarii (36-38)

  • Ho‘iraa i Nazareta (39, 40)

  • Iesu 12 matahiti i te hiero (41-52)

2  I taua mau mahana ra, ua faaue Kaisara* Auguso ia tapaohia te i‘oa o to te fenua atoa.  I ravehia na tera tapaoraa i‘oa matamua a tavana ’i Kurenio i Suria.  Haere a‘era te taata atoa i to ratou iho oire fanauraa ia tapaohia to ratou i‘oa.  Ei mero no te utuafare e te fetii o Davida, ua haere atoa ïa o Iosepha mai te oire mai o Nazareta i Galilea, i te oire o Davida i Iudea tei parauhia Betelehema.  Haere a‘era Iosepha raua Maria ta ’na vahine faaipoipo tei fatata i te fanau e tapao i to raua i‘oa.  A parahi noa ’i raua i reira, tae maira te taime e fanau ai Maria.  Fanau ihora oia i ta ’na tamaiti matahiapo, vehî a‘era ia ’na i te ahu e tuu atura i roto i te hoê vahi e paruhia ’i te animara, aita hoi e piha faahou no te mau ratere.  E tiai mamoe atoa tei taua fenua ra e parahi ra i rapae e e haapao ra i ta ratou mau nǎnǎ i te po taatoa.  Fa maira ta Iehova* melahi, anaana maira to Iehova* hanahana e ati a‘e ia ratou, e mǎta‘u roa ihora ratou. 10  Na ô maira râ te melahi: “Eiaha e mǎta‘u, inaha hoi ua haere mai au e faaite atu i te tahi parau apî oaoa e oaoa roa ’i te taata atoa. 11  I teie hoi mahana i te oire o Davida, ua fanauhia mai te hoê faaora, oia hoi te Mesia ra te Fatu. 12  Teie te tapao: E ite outou i te hoê aiû vehîhia i te ahu i roto i te hoê vahi e paruhia ’i te animara.” 13  Fa atoa maira e rave rahi melahi* e ratou atura taua melahi ra i te arueraa i te Atua a na ô ai: 14  “Ia faahanahanahia te Atua i te ra‘i teitei e ia tupu te hau i te fenua nei no te taata ta te Atua e farii.” 15  Faarue maira te mau melahi no te ho‘i atu i te ra‘i e na ô a‘era te mau tiai mamoe te tahi i te tahi: “Mai haere ana‘e i Betelehema e hi‘o i te ohipa i tupu, ta Iehova* hoi i faaite mai ia tatou.” 16  Haere oioi atura ratou e ite atura ia Maria raua o Iosepha, e to roto te aiû i te hoê vahi e paruhia ’i te animara. 17  I to ratou iteraa i te aiû, faaite atura ratou ia raua i tei parauhia mai no nia i teie tamaiti. 18  Maere ihora te taata atoa tei faaroo i ta te mau tiai mamoe i parau atu, 19  o Maria râ, ua tapea maite ïa i teie mau parau atoa ma te feruriruri i te auraa o te reira i roto i to ’na aau. 20  Ho‘i atura te mau tiai mamoe, a faahanahana ’i e a arue ai i te Atua no ta ratou i faaroo e i ite, mai tei parauhia ’tu ia ratou. 21  I te va‘u o te mahana o to ’na fanauraa, peritomehia ihora oia e mairihia ’tura i te i‘oa ra Iesu. O te i‘oa ïa ta te melahi i horoa ’tu hou Maria a hapû ai. 22  Oia atoa i te mahana tamâraa ia raua ia au i te ture a Mose, afai atoa a‘era raua i te aiû i Ierusalema e faaite ia Iehova,* 23  mai tei papaihia i roto i te ture a Iehova:* “Ia mo‘a te mau tamaroa matahiapo atoa no Iehova.”* 24  Pûpû atura raua i te hoê tusia ia au i tei parauhia i roto i te ture a Iehova:* “e piti uupa aore ra e piti fanau‘a uuairao.” 25  E inaha, te vai ra te hoê tane i Ierusalema o Simeona te i‘oa. E taata parau-tia oia e te mǎta‘u i te Atua e tiai ra i te taime e tamahanahana ’i te Atua ia Iseraela. Tei nia iho atoa ia ’na te varua mo‘a. 26  Ua faaite atoa te Atua ia ’na maoti te varua mo‘a e e ite oia i te Mesia a Iehova* hou a pohe ai. 27  Arataihia e te varua o te Atua, haere ihora Simeona i roto i te hiero, e i te mea e te afai mai ra na metua i te tamaiti ra o Iesu no te rave i tei titauhia e te ture no ’na, 28  rave ihora oia i taua tama ra, arue atura i te Atua e na ô atura: 29  “I teie nei, e to ’u Arii hau ê e Fatu, e nehenehe to tavini e pohe ma te hau ia au i ta oe parau, 30  no te mea ua ite to ’u mata i ta oe ravea faaoraraa 31  ta oe i horoa mai ia ite te taata atoa, 32  e maramarama oia e ite ai te mata o te feia o te mau nunaa ěê e e maramarama anaana atoa no to nunaa Iseraela.” 33  Maere noa ihora te metua tane e te metua vahine o te tamaiti i ta Simeona i parau no ’na. 34  Haamaitai atoa ihora Simeona ia raua e na ô atura ia Maria te metua vahine o te tamaiti: “Inaha, ua maitihia teie tamaiti ia hi‘a e ia faateiteihia e rave rahi i Iseraela e ia riro ei tapao o te faainohia, 35  a ite-maitai-hia ’tu ai te mana‘o o te aau e rave rahi. Oia mau, e mauiui roa oe mai te huru ra ua puta roa oe* i te ‘o‘e.” 36  Te vai ra te hoê peropheta vahine, o Ana tamahine a Phanuela no te opu o Asera. E ruhiruhia teie vahine e mai to ’na faaipoiporaa mai,* i ora na oia e ta ’na tane e hitu matahiti, 37  e i teie nei e vahine ivi oia e 84 matahiti. I haere noa na oia i te hiero e pûpû i te Atua i te hoê taviniraa mo‘a i te po e te ao, a haapae atoa ’i i te maa e a pure ai ma te aau atoa. 38  I taua taime ra, tapiri maira oia, haamauruuru ihora i te Atua e faaite atura i te parau no te tamaiti i te feia atoa e tiai ra ia tiamâ mai Ierusalema. 39  I te otiraa ia raua i te rave i te mau mea atoa ia au i te ture a Iehova,* ho‘i atura raua i Galilea i to raua iho oire o Nazareta. 40  Rahi noa maira te tamaiti e itoito maira, a î ai i te paari e a farii maitai noa ’i te Atua ia ’na. 41  Ua matau hoi to Iesu na metua i te haere i te mau matahiti atoa i Ierusalema i te oroa Pasa. 42  I te 12raa o to ’na matahiti, haere a‘era ratou i te oroa mai ta ratou i matau. 43  I te otiraa te oroa e a ho‘i ai ratou, faaea ihora te tamaiti ra o Iesu i Ierusalema e aita to ’na na metua i ite. 44  Mana‘o a‘era raua e tei rotopu Iesu i te feia ratere. Hoê mahana i muri iho, haamata ’tura raua i te imi ia ’na i rotopu i te fetii e te feia ta raua i matau. 45  Aita râ oia i itehia mai, ho‘i atura raua i Ierusalema e maimi a‘era ia ’na. 46  E toru mahana i muri iho to raua iteraa ia ’na i roto i te hiero e parahi ra i rotopu i te mau orometua a faaroo ai e a uiui ai ia ratou. 47  Maere noa ihora râ te feia atoa e faaroo ra ia ’na i to ’na maramarama e ta ’na mau pahonoraa. 48  I te iteraa ’tu to ’na na metua ia ’na, maere ihora raua e na ô atura to ’na metua vahine ia ’na: “Ta ’u tamaiti, eaha oe i na reira mai ai ia mâua? I ahoaho roa na mâua to metua tane i te imiraa ia oe.” 49  Na ô maira râ oia: “Eaha orua i imi ai ia ’u? Aita orua i ite e ei roto vau i te fare o to ’u Metua?” 50  Tera râ, aita i taa ia raua ta ’na e parau ra. 51  Ho‘i ihora oia na muri ia raua i Nazareta e auraro noa ’tura ia raua. Tapea maite atoa ’tura to ’na metua vahine i teie mau parau atoa i roto i to ’na aau. 52  A rahi mai ai Iesu, rahi atoa ’tura to ’na paari e to te Atua e te taata farii-maitai-raa ia ’na.

Nota i raro i te api

Aore ra “te emepera no Roma.”
A hi‘o i te titionare.
A hi‘o i te titionare.
“E rave rahi o te nuu o te ra‘i” na roto i te reo Heleni.
A hi‘o i te titionare.
A hi‘o i te titionare.
A hi‘o i te titionare.
A hi‘o i te titionare.
A hi‘o i te titionare.
A hi‘o i te titionare.
Heleni pusuke. A hi‘o i te titionare.
“Ei vahine aita i taoto a‘enei i te hoê tane” na roto i te reo Heleni.
A hi‘o i te titionare.