Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 19:1-48

HAAPOTORAA O TE MAU TUMU PARAU

  • Farerei Iesu ia Zakaio (1-10)

  • Faahoho‘araa o te ahuru mina (11-27)

  • Farii-popou-hia Iesu (28-40)

  • Ta‘i Iesu ia Ierusalema (41-44)

  • Tamâ Iesu i te hiero (45-48)

19  Tomo atura Iesu i Ieriko e na roto atura i taua oire ra.  Tei reira te hoê taata o Zakaio te i‘oa, e raatira titau tute, e taata tao‘a rahi atoa.  Te hinaaro ra oia e ite atu ia Iesu, aita râ i tia ia ’na no te rahi o te taata, mea poto hoi oia.  Horo atura oia na mua e tauma a‘era i nia i te hoê tumu suke ia ite oia ia Iesu o te haere mai ra hoi na reira.  I to Iesu taeraa mai i taua vahi ra, hi‘o a‘era oia i nia e na ô atura: “Zakaio, haaviti, pou mai, e parahi hoi au i ǒ oe i teie mahana.”  Pou oioi maira Zakaio e farii atura ia Iesu i to ’na fare ma te oaoa.  I to te taata râ iteraa i te reira, ohumu a‘era ratou pauroa a na ô ai: “Ua tomo oia i roto i te fare o te hoê taata hara.”  Tia maira râ Zakaio e na ô ihora ia Iesu: “E te Fatu, te horoa nei au i te afaraa o ta ’u mau faufaa na te feia veve, e te taata ta ’u i taviri,* e tataimaha ïa ta ’u e faaho‘i na ’na.”  Na ô atura Iesu: “I teie mahana ua faaora te Atua i teie taata e to ’na utuafare, no te mea e tamaiti atoa oia na Aberahama. 10  Ua haere mai hoi te Tamaiti a te taata nei e imi e e faaora i tei mo‘e.” 11  A faaroo noa ’i te mau pǐpǐ i teie mau parau, faahiti atura Iesu i te tahi atu faahoho‘araa, no te mea te mana‘o ra ratou e ia tae ratou i Ierusalema e itehia mai ai te Faatereraa arii a te Atua* i reira iho. 12  Na ô atura ïa oia: “Ua reva ’tu te hoê taata no roto mai i te hui arii i te hoê fenua atea ia faatoroahia oia ei arii a ho‘i mai ai. 13  Na mua râ, titau ihora oia ahuru o ta ’na mau tavini, horoa ’tura ahuru mina* e na ô atura: ‘A faaohipa i te reira ia hoona mai e ia ho‘i noa mai au.’ 14  Mea hae râ na te mau taata o to ’na fenua ia ’na. Tono maira ratou i te tahi mau tia e parau ia ’na: ‘Eita matou e hinaaro ia oe ei arii no matou.’ 15  Ho‘i maira oia i muri a‘e i to ’na faatoroaraahia ei arii, e titau ihora i te mau tavini ta ’na i horoa ’tu i te moni* no te ite ehia ta ratou i apî mai. 16  Tia maira ïa te tavini matamua e na ô maira: ‘Fatu, hoê ahuru mina tei noaa mai i ta oe mina.’ 17  Na ô atura oia: ‘Maitai roa, e tavini maitai oe! No te mea ua haapao maitai oe i te mea haihai roa, e faatere ïa oe hoê ahuru oire.’ 18  Haere maira te piti o te tavini e na ô maira: ‘Fatu, e pae mina tei noaa mai i ta oe mina.’ 19  Na ô atura oia i teie tavini: ‘E faatere ïa oe e pae oire.’ 20  Haere maira râ te tahi atu tavini e na ô maira: ‘Fatu, tera mai ta oe mina ta ’u i huna i roto i te hoê ahu. 21  Ua mǎta‘u hoi au ia oe, e taata etaeta oe. E rave oe i te moni ta oe i ore i tuu i te fare moni, e ooti atoa oe i ta oe i ore i ueue.’ 22  Na ô atura oia: ‘I ta oe iho mau parau e faahapa ’i au ia oe, tavini ino. Ua ite ïa oe e e taata etaeta vau, o te rave i te moni ta ’u i ore i tuu i te fare moni, o te ooti atoa i ta ’u i ore i ueue. 23  No te aha ïa oe i ore ai i tuu i ta ’u moni* i te fare moni? Ia tae mai au, e rave ïa vau i ta ’u moni e te moni taime.’ 24  Na ô atura oia i te feia e tia noa ra na pihai iho mai: ‘A rave i ta ’na mina e a horoa ’tu na te tavini ahuru mina ta ’na.’ 25  Na ô maira râ ratou: ‘Fatu, hoê ahuru mina ta ’na!’ 26  Pahono atura oia: ‘Te parau atu nei au: Te taata e faufaa ta ’na, e horoahia ’tu â ïa ta ’na. Te taata râ aita ta ’na e faufaa, e iriti-ê-atoa-hia ïa ta ’na. 27  A tii atoa i to ’u mau enemi aita i hinaaro ia ’u ei arii no ratou e a taparahi pohe ia ratou i mua ia ’u.’” 28  I muri a‘e i to ’na faahitiraa i teie mau mea, reva ’tura oia a pauma ’i i Ierusalema. 29  A piri atu ai oia ia Betephage e ia Betania i nia i te mou‘a parauhia Oliveta, tono atura oia e piti o ta ’na mau pǐpǐ, 30  a na ô ai: “A haere i tera oire iti i mua ia orua, e ia tomo atu orua, e ite orua i te hoê fanau‘a asini tei taamuhia e aita â i parahihia ’tura e te taata. A tatara e a putô mai. 31  Ia ui mai râ te tahi taata: ‘Eaha orua e tatara ’i i tena asini?’ a na ô atu: ‘Te hinaaro mai ra te Fatu.’” 32  Reva ’tura na pǐpǐ e ite a‘era i te fanau‘a asini mai ta Iesu i parau. 33  Tera râ, a tatara ’i raua i te asini, na ô maira te mau fatu: “Eaha orua e tatara ’i i tena asini?” 34  Na ô atura raua: “Te hinaaro mai ra te Fatu.” 35  Putô maira raua i te fanau‘a asini ia Iesu ra, tuu a‘era te mau pǐpǐ i to ratou ahu tapo‘i i nia iho, e haaparahi ihora ia Iesu i nia iho. 36  A faahoro noa ’i Iesu i te asini, vauvau a‘era te taata i to ratou ahu tapo‘i i nia i te purumu. 37  I to ’na iho â piriraa ’tu i te purumu titapou mai te mou‘a Oliveta mai, oaoa ihora te pǐpǐ e rave rahi e arue a‘era i te Atua ma te reo puai no te mau ohipa mana atoa ta ratou i ite, 38  a na ô ai: “Ia haamaitaihia tei haere mai ei Arii ma te i‘oa o Iehova!* Ia hau i nia i te ra‘i e ia hanahana te Atua i te ra‘i teitei!” 39  Na ô maira râ te tahi mau Pharisea i rotopu i te nahoa ia Iesu: “Orometua, tama‘i na i ta oe mau pǐpǐ.” 40  Pahono atura oia: “Te parau atu nei au: Ia mamû noa ratou, na te ofai ïa e tuô mai.” 41  A piri atu ai oia ia Ierusalema, ite atura oia i te oire e ta‘i ihora, 42  a na ô ai: “Ahiri iho â ïa oe i ite i teie mahana e nafea e noaa ’i te hau. I teie nei râ, ua hunahia te reira i to mata. 43  E tae mai hoi te mau mahana e aua ’i to oe mau enemi ia oe i te pou oeoe, a haaati atu ai ia oe. 44  E haamou u‘ana ’tu ai ratou ia oe e to mau tamarii. E ore te hoê ofai i roto i teie oire e vaiihohia i nia iho i te tahi, no te mea ua haere mai te Atua e haava ia oe, aita râ oe i ite.” 45  Tomo ihora Iesu i roto i te hiero e tiahi atura i te feia hoohoo, 46  a na ô atu ai: “Ua papaihia: ‘E riro to ’u fare ei fare no te pure,’ ua faariro râ outou i te reira ei ana no te eiâ.” 47  Tamau noa ’tura oia i te haapii i te taata pauroa te mahana i roto i te hiero. Area te mau tahu‘a tiaau, te mau papai parau e te mau raatira ati Iuda, te imi ra ïa i te haapohe ia ’na, 48  aita râ i itea mai ia ratou te ravea, tei pihai iho noa hoi te taata ia Iesu a faaroo maite noa ’i ia ’na.

Nota i raro i te api

Aore ra “i taviri ma te pariraa haavare.”
Aore ra “Basileia o te Atua.”
E 340 tarama te teiaha o te hoê mina Heleni, 100 ïa derama. A hi‘o i te titionare.
“Ario” na roto i te reo Heleni.
“Ario” na roto i te reo Heleni.
A hi‘o i te titionare.