Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 18:1-43

HAAPOTORAA O TE MAU TUMU PARAU

  • Faahoho‘araa o te vahine ivi (1-8)

  • Te Pharisea e te titau tute (9-14)

  • Iesu e te mau tamarii (15-17)

  • Uiraa a te hoê raatira ati Iuda tao‘a rahi (18-30)

  • To Iesu pohe i tohu-faahou-hia (31-34)

  • Ite faahou te hoê matapo (35-43)

18  Horoa ’tura Iesu i te mau pǐpǐ i te hoê faahoho‘araa no nia i te faufaaraa ia tamau i te pure e eiaha e fiu,  a na ô ai: “E haava tei te hoê oire. Aita oia e mǎta‘u ra i te Atua e aita e tâu‘a ra i te taata.  E vahine ivi atoa tei taua oire ra. E haere noa oia e parau i te haava: ‘A haava mai na ia ’u e te taata i horo ia ’u i te haavaraa ma te parau-tia.’  Aita râ te haava i farii oioi, i muri a‘e râ, feruri ihora oia: ‘Aita vau e mǎta‘u ra i te Atua e aita atoa e tâu‘a ra i te taata,  no te mea râ e haapeapea noa teie vahine ivi ia ’u, e haava vau ia ’na ma te parau-tia a ore atu ai oia e haere noa mai, a taahoa ’tu vau ia ’na no to ’na onoono.’”*  Na ô atura te Fatu: “A faaroo i ta te haava i parau, noa ’tu e e taata parau-tia ore oia!  E ore anei ïa te Atua e rave e ia haavahia ma te parau-tia te feia ta ’na i maiti, o te taparuparu ra ia ’na i te rui e te ao, a faaoromai noa ’i oia ia ratou?  Te parau atu nei au: E na reira iho â oia e ma te ru. Teie râ, ia tae mai te Tamaiti a te taata nei, e ite anei oia i teie huru faaroo* i te fenua nei?”  Faahiti atoa ’tura oia i teie faahoho‘araa i te feia e mana‘o ra e feia parau-tia ratou e mea faufaa ore vetahi ê: 10  “E piti taata tei haere i te hiero e pure, e Pharisea hoê, e titau tute te tahi. 11  Tia noa ihora te Pharisea e pure atura i roto i to ’na aau mai teie: ‘E te Atua e, te haamauruuru atu nei au ia oe i te mea e ere au mai te tahi atu mau taata, e eiâ hoi, e feia parau-tia ore, e faaturi. E ere atoa vau mai tera titau tute. 12  E haapae au i te maa e piti taime i te hebedoma. E horoa vau i te tuhaa ahuru o te mau mea atoa i noaa mai ia ’u.’ 13  Te titau tute râ, te tia noa ra ïa i te atea ê e aita i hinaaro noa ’‘e e hi‘o i nia i te ra‘i. Na ô ihora oia a tupaipai noa ’i i to ’na ouma: ‘E te Atua e, aroha mai oe ia ’u te hoê taata hara.’ 14  Te parau atu nei au: Ia ho‘i oia i te fare, o ’na te taata parau-tia a‘e i te aro o te Atua eiaha tera Pharisea. Te taata hoi o te faateitei ia ’na, e faahaehaahia ïa. Te taata râ o te faahaehaa ia ’na, e faateiteihia ïa.” 15  Aratai maira te taata i ta ratou mau tamarii rii ia Iesu ra ia tuu oia i to ’na na rima i nia ia ratou.* I to te mau pǐpǐ râ iteraa ’tu, tama‘i a‘era ratou i taua mau taata ra. 16  Pii atura râ Iesu i te mau tamarii rii ia haere mai, a na ô ai: “A vaiiho noa i te mau tamarii rii ia haere mai ia ’u nei, eiaha e tapea ’tu, no te feia hoi mai teie mau tamarii rii te Faatereraa arii a te Atua.* 17  Oia mau ta ’u e parau atu: Te taata e ore e farii i te Faatereraa arii a te Atua mai te hoê tamarii iti, e ore roa ’tu ïa e ô i roto.” 18  Ui maira te hoê raatira ati Iuda ia ’na: “Orometua maitai, eaha ta ’u e rave e noaa ’i ia ’u te ora mure ore?” 19  Na ô atura Iesu: “Eaha oe e parau mai ai Orometua maitai? Aita hoê a‘e e mea maitai, o te Atua ana‘e râ. 20  Ua ite oe i te mau faaueraa: ‘Eiaha e faaturi, eiaha e taparahi pohe i te taata, eiaha e eiâ, eiaha e pari haavare, a faatura i to metua tane e to metua vahine.’” 21  Na ô maira oia: “Ua hope ia ’u i te haapao i teie mau mea atoa mai to ’u apîraa mai â.” 22  I to Iesu faarooraa i teie parau, na ô atura oia: “Hoê noa mea e toe ra ia oe: A hoo pauroa i ta oe mau tao‘a, a horoa ’tu ai i te moni na te feia veve, e tao‘a ïa ta oe i te ra‘i e a pee mai ia ’u.” 23  A faaroo ai oia i teie parau, oto roa ihora oia, mea rahi roa hoi ta ’na faufaa. 24  Hi‘o atura Iesu ia ’na e na ô atura: “Mea fifi mau â no te feia mea rahi ta ratou moni ia faaô i roto i te Faatereraa arii a te Atua! 25  Inaha, mea ohie a‘e no te hoê kamela ia ô i roto i te hoê apoo nira eiaha râ no te hoê taata tao‘a rahi ia ô i roto i te Faatereraa arii a te Atua.” 26  Na ô maira te mau pǐpǐ tei faaroo i te reira: “O vai ïa te nehenehe e ora ’tu?” 27  Pahono atura oia: “Te mau mea e ore e tia i te taata, e tia ïa i te Atua.” 28  Parau maira râ Petero: “Ua haapae hoi matou i tei vai ra ia matou e ua pee mai ia oe.” 29  Na ô atura oia ia ratou: Oia mau ta ’u e parau atu: Te taata tei haapae i te fare aore ra vahine faaipoipo, taeae, metua aore ra tamarii no te Faatereraa arii a te Atua, 30  e fana‘o iho â oia hau atu i teie nei â, e i roto i te faanahoraa o te ao nei no a muri a‘e,* te ora mure ore ïa.” 31  Aratai rii ê atura Iesu i na 12* e na ô atura: “Inaha, te pauma nei tatou i Ierusalema, e te mau mea atoa i papaihia e te mau peropheta no nia i te Tamaiti a te taata nei, e tupu ïa.* 32  E tuuhia oia i te rima o te feia o te mau nunaa ěê, e faaooohia, e tuhihia, e tutuhahia, 33  e ia oti oia i te huihia, e taparahi-pohe-hia oia. I te toru râ o te mahana, e tia faahou mai oia.” 34  Aita râ i taa ia ratou teie mau mea, ua hunahia hoi te auraa o teie parau ia ratou. 35  A piri atu ai Iesu ia Ieriko, te parahi noa ra te hoê matapo i te pae purumu, te taparu haere ra. 36  A faaroo ai oia i te nahoa e haere ra na reira, ui maira oia eaha tera. 37  Parau atura ratou: “O Iesu no Nazareta teie e haere nei!” 38  Tuô maira oia: “Iesu, Tamaiti a Davida, aroha* mai oe ia ’u!” 39  Te feia râ i mua, tama‘i a‘era ïa ia ’na ia mamû oia. Puai noa ’tura râ to ’na tuôraa: “Tamaiti a Davida, aroha* mai ia ’u!” 40  Tia noa ihora ïa Iesu e faaue atura ia arataihia mai te matapo. I to ’na piriraa mai, ui atura Iesu: 41  “Eaha ta oe e hinaaro ia rave au no oe?” Na ô maira oia: “E te Fatu, ia ite faahou vau.” 42  Na ô atura Iesu: “Ia ite faahou oe! No to oe faaroo i ora ’i oe.” 43  I reira noa, ite faahou ihora oia e pee maira ia Iesu, a faahanahana ’i i te Atua. Arue atoa a‘era te taata atoa, tei ite atu i te reira, i te Atua.

Nota i raro i te api

Aore ra “e ore e noaa faahou ia ’u ia faaoromai i to ’na mârô.”
“Te faaroo” na roto i te reo Heleni.
Aore ra “ia haamaitai oia ia ratou.”
Aore ra “Basileia o te Atua.”
Aore ra “i te tau no a muri a‘e.” A hi‘o i te titionare.
Oia hoi na 12 aposetolo.
Aore ra “e hope roa ïa i te tupu.”
Aore ra “aroha hamani maitai.”
Aore ra “aroha hamani maitai.”