Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 17:1-37

HAAPOTORAA O TE MAU TUMU PARAU

  • Hapa, faaore i te hara, e faaroo (1-6)

  • Tavini faufaa ore (7-10)

  • Faaorahia ahuru taata lepera (11-19)

  • Te taeraa mai te Faatereraa arii a te Atua (20-37)

    • Te Faatereraa arii “ia outou nei” (21)

    • ‘A haamana‘o i te vahine a Lota’ (32)

17  Na ô atura Iesu i ta ’na mau pǐpǐ: “Te vai ra iho â te tahi mau mea e hapa ’i te taata. Ua ati râ te taata no ’na e hapa ’i vetahi ê!  Mea maitai a‘e ia taamu i te hoê ofai oro i nia i to ’na a‘î, a huri atu ai ia ’na i raro i te moana, eiaha râ ia hapa hoê o teie feia e au i te tamarii rii no ’na.  A haapao maitai ia outou iho. Ia hara mai to oe taeae ia oe, a a‘o atu ia ’na e ia tatarahapa oia, a faaore ïa i ta ’na hapa.  Ia hitu noa ’tu taime i te mahana to ’na hararaa mai ia oe e ia hitu atoa taime to ’na haereraa mai ia oe ra, a na ô mai ai: ‘Te tatarahapa nei au,’ e faaore oe i ta ’na hapa e tia ’i.”  Na ô maira te mau aposetolo i te Fatu: “A faarahi mai i to matou faaroo.”  Na ô atura te Fatu: “Ahiri to outou faaroo mai te huero sinapi* te rahi, e parau ïa outou i teie tumu sukamino:* ‘A iriti tumu ia oe e a tanu ia oe i roto i te miti!’ E faaroo oia ia outou.  O vai o outou e tavini ta ’na e arote ra i te faaapu aore ra e tiai ra i te nǎnǎ, e na ô atu i ta ’na tavini ia ho‘i mai: ‘Haaviti, parahi mai e tamaa’?  E ore anei oia e na ô atu: ‘A tunu mai i te tahi maa na ’u, a taamu mai i to oe pareu tûtu maa e a afai mai i te maa e ia paia roa vau, e i muri iho oe e tamaa ’i’?  E mauruuru anei oia i te tavini no te mea ua rave oia i tei faauehia ’tu? Eita. 10  Oia atoa, ua oti ana‘e ia outou i te rave i tei faauehia ’tu, a na ô: ‘E tavini faufaa ore matou. Ua rave noa matou i tei faauehia mai.’” 11  A haere ai oia i Ierusalema, na roto atura oia ia Samaria e ia Galilea. 12  A tomo atu ai oia i roto i te hoê oire iti, farerei maira ahuru taata lepera ia ’na, a tia noa ’i râ i te atea ê. 13  Tuô maira ratou: “E Iesu e, Orometua, aroha* mai ia matou!” 14  I to Iesu iteraa ’tu ia ratou, na ô atura oia: “Haere a faaite ia outou i te mau tahu‘a.” A haere noa ’i ratou, ora ihora to ratou lepera. 15  Ite ihora hoê o ratou e ua ora to ’na ma‘i, ho‘i maira a faahanahana ’i i te Atua ma te reo puai. 16  Tipapa ihora oia i to Iesu avae e haamauruuru maira ia ’na. Hau atu â, e taata Samaria oia. 17  Na ô atura Iesu: “E ere anei hoê ahuru tei ora to ratou ma‘i? Teihea roa ïa na iva? 18  Aita ’tu anei taata i ho‘i mai no te faahanahana i te Atua, o teie ana‘e râ taata nunaa ê?” 19  Na ô atura oia: “A tia e a haere, no to oe faaroo i ora ’i oe.” 20  I te hoê mahana, ua ui mai te mau Pharisea ia ’na afea te Faatereraa arii a te Atua* e tae mai ai. Pahono atura oia: “Eita te Faatereraa arii a te Atua e tae mai a ite atu ai te taata, 21  e ore atoa e parauhia: ‘A hi‘o na, to ǒ nei!’ aore ra: ‘A hi‘o na, to ǒ atu!’ Inaha, tei rotopu te Faatereraa arii a te Atua ia outou nei.” 22  Na ô atura oia i ta ’na mau pǐpǐ: “E tae mai te mau mahana e hinaaro ai outou e ite i te tau e ho‘i mai ai te Tamaiti a te taata nei, eita râ outou e ite atu i te reira. 23  E na ô atoa mai te taata ia outou: ‘A hi‘o na, to ǒ atu!’ aore ra: ‘A hi‘o na, to ǒ nei!’ Eiaha e haere atu, eiaha atoa e pee ia ratou. 24  Mai te uira hoi e anapa mai te hoê pae ra‘i i te tahi atu pae ra‘i, mai tera atoa ïa i taua* mahana ra e faaitehia mai ai te Tamaiti a te taata nei. 25  Ia roohia râ oia na mua i te mauiui rahi e ia vahavahahia e teie nei u‘i e tia ’i. 26  E mai i te tau o Noa, oia atoa ïa i te tau o te Tamaiti a te taata nei: 27  Te tamaa ra te taata, te inu ra, te faaipoipo ra te tane, te horoahia ra te vahine ia faaipoipo e tae roa i te mahana i tomo ai Noa i roto i te araka, o te diluvi maira e mou a‘era ratou pauroa. 28  Mai i te tau atoa o Lota: Te tamaa ra te taata, te inu ra, te hoo mai ra, te hoo atu ra, te tanu ra, te patu ra. 29  I te mahana râ i faarue ai Lota ia Sodoma, mairi maira te auahi e te mau ofai ura mai te ra‘i mai e mou a‘era ratou pauroa. 30  Mai tera atoa ïa ia tae i te mahana e faaitehia mai ai te Tamaiti a te taata nei. 31  I taua mahana ra, te taata i nia iho i to ’na fare* e to roto ta ’na mau tao‘a i te fare, eiaha ïa e pou mai e tii i ta ’na mau tao‘a, e oia atoa te taata i roto i te faaapu, eiaha ïa e ho‘i i muri. 32  A haamana‘o i te vahine a Lota. 33  O tei tapea i to ’na ora,* e ere ïa oia i te reira. O tei ere râ i to ’na ora,* e noaa faahou mai ïa ia ’na te reira. 34  Te parau atu nei au: I taua po ra, e piti taata to nia i te hoê â ro‘i. E ravehia hoê, e vaiihohia râ te tahi. 35  E piti vahine te taviri ra i te ofai oro. E ravehia hoê, e vaiihohia râ te tahi.” 36  *—— 37  Na ô maira ïa ratou ia ’na: “Ihea ïa, e te Fatu?” Pahono atura oia: “I te vahi e tino pohe to reira e amui atoa mai ai te mau aeto.”

Nota i raro i te api

E huero haihai roa teie e raea e 4 metera i te teitei ia tupu mai, e amaa to ’na.
E tumu raau teie e raea e 6 metera i te teitei, mea rarahi te rauere e mea uteute pa‘o aore ra mea ereere te maa i nia iho.
Aore ra “aroha hamani maitai.”
Aore ra “Basileia o te Atua.”
“To ’na” na roto i te reo Heleni.
I tera tau, e tahua te niaraa o te rahiraa o te mau fare e mea rahi te ohipa e ravehia i reira.
Heleni pusuke. A hi‘o i te titionare.
Heleni pusuke. A hi‘o i te titionare.
Te vai ra teie irava i roto i te tahi mau huriraa Bibilia, aita râ i roto e rave rau papai Heleni tahito fariihia.